Bipangujo bya Batangi

Satana paāsapwidile Eva amba kakafupo shi adye ku mutyi wa kuyukanya biyampe ne bibi, le wāletele mulangwe uyukene bininge dyalelo wa kubulwa kufwa kwa muya?

Bimweka’mba ke amopo. Dyabola kālombwelepo Eva amba shi adye kipa kyobajidikile kudi Leza, ukamweka’tu bu mufwe ino kipindi kyandi kimo kyampikwa kumweka (kitela bamo dyalelo bu muya keufu) kikendelela na būmi kuntu kampanda. Pa kwisamba nandi kupityila kudi nyoka, Satana wālangile amba shi Eva adye ku kipa kya mutyi, ‘kakafupo’ nansha dimo. Wādi ukimba kunena’mba Eva ukendelela na būmi, būmi bulumbuluke pano pa ntanda, būmi bwampikwa kuludikwa na Leza.​—Ngo. 2:17; 3:3-5.

Shi lufundijo lwa bubela lwa kubulwa kufwa kwa muya lufundijibwa dyalelo kelwāshilwilepo mu Edena, penepo lwāikele’ko kitatyi’ka? Ketuyukilepo. Byotuyukile i bino amba, butōtyi bonso bwa bubela bwāpwile pa Dilobe dya mu mafuku a Noa. I kutupu mulangwe mufwe wa bipwilo wāpandile ku Dilobe, mwanda kwāpandile’nka batōtyi ba bine​—ba Noa ne kyandi kisaka.

Nanshi bufundiji bwa kubulwa kufwa kwa muya wa muntu bufundijibwa dyalelo, bwāshilwile pa kupwa kwa Dilobe. Leza paāvutakenye ndimi pa Babele, bantu bākusankana “koku ne koku pano pa ntanda ponso,” kebābudilwepo kwenda na mulangwe wa amba bantu badi na muya keufu. (Ngo. 11:8, 9) Nansha shi buno bufundiji bwa bubela bwāshilwile kitatyi’ka, tubwanya kukulupila’mba Satana Dyabola “shandya bubela” ye wēbuletele kadi wāsangele pa kumona buno bufundiji busambakana ntanda yonso.​—Yoa. 8:44.