Mukanda wa Kumpala wa Kulondolola

11 Pakapita matuku, bena Isalele bonso bakadisangisha kudi Davidi ku Hebelone,+ kuambabu ne: “Mona! Tuetu tudi mufuba webe ne musunyi webe.*+ 2 Bidimu bishale biabia pavua Shaula mukalenge, wewe ke uvua ulombola Isalele mu mvita yende.*+ Pashishe Yehowa Nzambi webe wakakuambila ne: ‘Neulame tshisamba tshianyi tshia Isalele, ne neulue mulombodi wa tshisamba tshianyi tshia Isalele.’”+ 3 Nunku bakulu ba mu Isalele bonso bakalua kudi mukalenge ku Hebelone, ne Davidi wakadia nabu tshipungidi ku Hebelone kumpala kua Yehowa. Pashishe bakela Davidi manyi bua ikale mukalenge wa Isalele+ bilondeshile dîyi divua Yehowa muambe ku butuangaji bua Samuele.+

4 Pakapita matuku, Davidi ne Isalele mujima bakasa luendu batangile ku Yelushalema, mmumue ne: ku Yebuse,+ buloba buvua bena Yebuse+ basombele. 5 Bantu ba mu Yebuse bakaseka Davidi bamba ne: “Kuakubuela munemu nansha dituku dimue to!”+ Kadi Davidi wakakuata muaba mukolesha wa kusokomena wa Siona,+ udibu babikila mpindieu ne: Tshimenga tshia Davidi.+ 6 Ke Davidi kuamba ne: “Muntu washipa bena Yebuse wa kumpala nealue mfumu* ne mukokeshi.” Nunku Yoaba+ muana wa Seluya wakabanda wa kumpala, yeye kulua mfumu. 7 Pashishe Davidi wakasombela muaba mukolesha wa kusokomena au. Ke bualu kayi bavua bawubikila ne: Tshimenga tshia Davidi. 8 Wakatuadija kuibaka tshimenga kumpenga kuonso, kumbukila ku Kakunakuna* too ne miaba mikuabu ivua mitshinyunguluke, ne Yoaba wakalongolola miaba mikuabu ya tshimenga ivua mishale. 9 Nunku Davidi wakatungunuka amu ne kupeta bukole bua bungi,+ ne Yehowa wa biluilu uvua nende.

10 Mpindieu aba mbamfumu ba bilobo bia mvita bia Davidi, bavua bamukuatshishe bikole mu bukalenge buende pamue ne Isalele mujima, bua kumuvuija mukalenge bilondeshile dîyi dia Yehowa divua ditangila Isalele.+ 11 Aa mmêna a bilobo bia mvita bia Davidi: Yashobeama+ muana wa balume wa muena Hakemoni, uvua ku mutu kua bilobo bia mvita bisatu.+ Musangu mukuabu uvua mushipe bantu 300 ne difuma diende.+ 12 Bakamulondela kudi Eleazâ+ muana wa Dodo muena Ahoa.+ Uvua munkatshi mua bilobo bia mvita bisatu. 13 Uvua ne Davidi ku Pasa-damima,+ muaba uvua bena Peleshete badisangishe bua mvita. Mpindieu kuvua tshitupa tshia buloba tshivua tshiuwule tente ne orje, ne bantu bavua banyeme bua bena Peleshete. 14 Kadi yeye wakimana munkatshi mua budimi abu, kubuluilaye mvita ne kutungunukaye ne kushipa bena Peleshete, kuenzabi bua Yehowa afile ditshimuna dinene.*+

15 Bantu basatu ba ku bamfumu 30 bakapueka ku dibue kuvua Davidi mu nyongolo wa Adulama+ pavua eku tshiluilu tshia bena Peleshete tshiase tshitudilu mu Tshibandabanda* tshia bena Lefa.+ 16 Dîba adi Davidi uvua muaba wa kusokomena, ne tshisumbu tshia basalayi ba bena Peleshete tshivua mu Beteleheme. 17 Pashishe Davidi wakaleja dijinga divuaye nadi wamba ne: “Bu meme nansha mua kupetaku mâyi a kunua a mu tshina tshia kulamina mâyi tshidi pabuipi ne tshiibi tshia Beteleheme!”+ 18 Ke bantu basatu abu kubuelabu mu tshitudilu tshia bena Peleshete ku makanda, kusunabu mâyi mu tshina tshia kulamina mâyi tshivua pabuipi ne tshiibi tshia Beteleheme ne kuatuadilabu Davidi; kadi Davidi wakabenga bua kuanua, kuapongoluelaye Yehowa panshi. 19 Yeye kuamba ne: “Ku mêsu kua Nzambi wanyi kabiena mua kuenzeka bua meme kuenza bualu ebu to! Ndi mua kunua mashi a bantu aba bavua bateke mioyo* yabu mu njiwu anyi?+ Bualu bavua bateke mioyo* yabu mu njiwu bua kulua nawu.” Nunku wakabenga bua kuanua. Aa ke malu avua bilobo biende bia mvita bisatu bienze.

20 Abishai+ muanabu ne Yoaba+ wakalua mfumu wa bena mvita bakuabu basatu; wakashipa bantu 300 ne difuma diende, ne uvua ne lumu anu bu bantu basatu abu.+ 21 Mu basatu bakuabu abu, yeye ke uvuabu batamba kunemeka kupita babidi bakuabu abu, ne uvua mfumuabu; kadi kavua mufike mu mulongo wa basatu ba kumpala abu to.

22 Benaya+ muana wa Yehoyada uvua muntu wa dikima* uvua muenze malu manene a bungi mu Kabesêle.+ Uvua mushipe bana babidi ba Aliele wa mu Moaba, ne dituku kampanda divua neje iloka uvua mupueke mu tshina tshia kulamina mâyi, kushipaye ntambue.+ 23 Uvua mushipe kabidi muena Ejipitu kampanda uvua munene mule wa mfiondo, muikale ne bule bua nkubita itanu.*+ Nansha muvua muena Ejipitu au ne difuma mu tshianza tshiende dienze bu mutshi wa ku tshiamu tshia muluki wa bilamba,+ yeye wakaya kuluangana nende ne mutshi, kudiapulaye difuma mu tshianza tshia muena Ejipitu ne kumushipaye ne difuma diende yeye adi.+ 24 Aa ke malu avua Benaya muana wa Yehoyada muenze, ne uvua ne lumu bu lua bilobo bia mvita bisatu bia Davidi. 25 Nansha muvuabu bamunemeka bikole kupita too ne bena mvita 30, kavua mufike mu mulongo wa bena mvita basatu abu to.+ Kadi Davidi wakamuteka ku mutu kua bantu bavua bamulama.

26 Bilobo bia mvita bia biluilu bia basalayi bivua: Asahele+ muanabu ne Yoaba, Elehanana muana wa Dodo wa ku Beteleheme,+ 27 Shamota muena Halola, Helese muena Pelona, 28 Ila+ muana wa Ikeshe muena Tekoa, Abiezê+ muena Anatota, 29 Sibekai+ muena Husha, Ilai muena Ahoa, 30 Mahalai+ muena Netofa, Helede+ muana wa Bânaha muena Netofa, 31 Itayi muana wa Libai wa ku Gibea wa mu bena Benyamina,+ Benaya muena Pilatona, 32 Hulai wa ku tusulu tua tshilonda nkoka* tua Gâsha,+ Abiele muena Alabâ, 33 Azamaweta muena Bahulima, Eliahaba muena Shâlabima, 34 bana ba Hashema muena Gizona, Yonatana muana wa Shage muena Halala, 35 Ahiyama muana wa Sakâ muena Halala, Elifala muana wa Ula, 36 Hefê muena Mekelata, Ahiya muena Pelona, 37 Heselo muena Kâmele, Nâlai muana wa Ezebai, 38 Yoele muanabu ne Natana, Mibehale muana wa Hageli, 39 Seleke muena Amona, Nahalai muena Bêlota, muambudi wa bia mvita wa Yoaba muana wa Seluya; 40 Ila muena Yitela, Galeba muena Yitela, 41 Uliya+ muena Hiti, Zabada muana wa Ahalai, 42 Adina muana wa Shiza muena Lubena, umue wa ku bamfumu ba bena Lubena, ne bantu 30 bavua nende; 43 Hanana muana wa Mâka, Yoshafata muena Mitena, 44 Uzia muena Ashetelata, Shama ne Yiele bana ba balume ba Hotama muena Aloê; 45 Yediele muana wa Shimeli, ne Yoha muanabu wa balume muena Tisi; 46 Eliele muena Mahawa, Yelibai ne Yoshawia bana ba balume ba Elenâma, ne Yitema muena Moaba; 47 Eliele, Obeda, ne Yâsiele muena Mesobaya.