Mukanda wa Kumpala wa Kulondolola

12 Aba mbantu bavua balue kudi Davidi ku Sikelaga+ pavuaye kayi mua kuya kuvuaye musue kuya mudilekelele bua Shaula+ muana wa Kishi, ne bavua munkatshi mua bilobo bia mvita bivua bimuambuluishe mu mvita.+ 2 Bavua ne buta bua mikete ne bavua mua kukupa mabue+ anyi kukupa mikete ne buta ne tshianza tshia bulume anyi ne tshianza tshia bakaji.+ Bavua ba mu bana babu ne Shaula, ba mu Benyamina.+ 3 Mfumu uvua Ahiezê, pamue ne Yoasha, bonso babidi bana ba Shemâ muena Gibea;+ Yiziele ne Pelete bana ba Azamaweta,+ Belaka, Yehu muena Anatota, 4 Yishemaya muena Gibeona,+ tshilobo tshia mvita tshia mu bena mvita 30 + ne uvua ku mutu kua bena mvita 30; kabidi ne Yelemiya, Yahaziele, Yohanana, Yozabada muena Gedela, 5 Eluzai, Yelimota, Bealeya, Shemaliya, Shefataya muena Halifa, 6 Elekana, Yishaya, Azalele, Yoezê, ne Yashobeama, bena Kola;+ 7 ne Yoela ne Zebadaya bana ba Yelohama wa mu Gedô.

8 Bena Gada bakuabu bakaya luseke lua Davidi mu tshipela muaba wa kusokomena;+ bavua bilobo bia mvita, basalayi balongesha mvita, bimane badilongolole ne ngabu minene ne mafuma, bavua ku mêsu bu kua ntambue ne bavua ne lubilu bu lua tubuluku pa mikuna. 9 Ezê uvua mfumu, muibidi Obadaya, muisatu Eliaba, 10 muinayi Mishemana, muitanu Yelemiya, 11 muisambombo Atai, wa muanda mutekete Eliele, 12 wa muanda mukulu Yohanana, wa tshitema Elezabada, 13 wa dikumi Yelemiya, wa 11 Makebanai. 14 Bantu aba bavua ba mu bena Gada,+ bamfumu ba tshiluilu. Mutambe bukese uvua mumue ne bantu lukama, ne mutambe bunene uvua mumue ne bantu tshinunu.+ 15 Aba mbantu bavua basabuke Yadene mu ngondo wa kumpala pavuaye muwule musambuke mikalu yende, ne bakipata bantu bonso bavua basombele mu tshibatabata, ku est ne ku ouest.

16 Bantu bakuabu ba mu Benyamina ne mu Yuda bakalua pabu kudi Davidi muaba wende wa kusokomena.+ 17 Pashishe Davidi wakapatuka, kuimanaye kumpala kuabu, kubambilaye ne: “Binuikala balue kundi mu ditalala bua kungambuluisha, muoyo wanyi newikale mu buobumue nenu. Kadi binuikala balue bua kumfila kudi baluishi banyi padi bianza bianyi kabiyi bienze bualu bubi, Nzambi wa bankambua betu amone bualu ebu ne abukose.”+ 18 Pashishe nyuma wakatulukila* Amasai,+ mfumu wa bena mvita 30, kuambaye ne:

“Tudi bantu bebe, wewe Davidi, ne tudi nebe, wewe muana wa Yishai.+

Nunku Davidi wakabakidila ne kubatekaye munkatshi mua bamfumu ba bisumbu bia basalayi.

19 Bantu bakuabu ba mu Manashe bakumbuka pabu kuyabu kudi Davidi pavuaye mulue ne bena Peleshete bua kuluangana ne Shaula; kadi kavua muambuluishe bena Peleshete to, bualu panyima pa bakalenge ba bena Peleshete+ bamane kuyukila, bakamupingaja bamba ne: “Yeye neatushiye bua kuya kudi mukalenge wende Shaula, nunku netujimije mioyo yetu.”+ 20 Pavuaye muye ku Sikelaga,+ bantu ba mu Manashe aba bakanyema kuyabu kudiye: Adenaha, Yozabada, Yediele, Mikaele, Yozabada, Elihu, ne Ziletai, bamfumu ba bantu tshinunu tshinunu ba mu Manashe.+ 21 Bakambuluisha Davidi bua kuluisha tshisumbu tshia benzavi, bualu buonso buabu bavua bantu ba bukole, ba dikima,+ ne bakalua bamfumu mu tshiluilu tshia basalayi. 22 Bantu bavua anu balua kudi Davidi+ ku dituku ku dituku bua kumuambuluisha too ne pavua tshitudilu tshilue tshinene anu bu tshitudilu tshia Nzambi.+

23 Ebu mbungi bua bamfumu ba bantu bavua ne bia mvita bua kuluangana bavua balue kudi Davidi ku Hebelone+ bua kumupesha bukalenge bua Shaula bilondeshile dîyi divua Yehowa mutume.+ 24 Bantu ba mu Yuda bavua bambula ngabu minene ne mafuma bavua 6 800, bikale ne bia mvita bua kuluangana. 25 Mu bena Simeona, bantu ba bukole, ba dikima ba mu tshiluilu bavua 7 100.

26 Mu bena Lewi, bantu 4 600. 27 Yehoyada+ uvua mulombodi wa bana ba Alona,+ ne uvua ne bantu 3 700, 28 kusangisha ne Sadoka,+ nsongalume wa bukole ne wa dikima, pamue ne bamfumu 22 ba mu nzubu wa batatuende.

29 Mu bena Benyamina, bana babu ne Shaula,+ kuvua bantu 3 000, ne ba bungi ba munkatshi muabu bavua balama bintu bia mushinga bia nzubu wa Shaula kumpala. 30 Mu bena Efelayima, kuvua bantu 20 800 ba bukole ne ba dikima bavua bende lumu mu nzubu ya batatuabu.

31 Mu tshitupa tshia tshisa tshia Manashe, kuvua bantu binunu 18 bavuabu batele mêna abu bua kulua kuteka Davidi mukalenge. 32 Mu tshisa tshia Yisakâ, kuvua bantu 200 ba mu bamfumu babu bavua bajingulula bikondo ne bamanye tshivua Isalele ne bua kuenza, ne bana babu bonso bavua ku bukokeshi buabu. 33 Mu Zebulona, kuvua bantu binunu 50 bavua mua kubuela mu tshiluilu, badilongolole bua mvita bikale ne bia mvita bionso bua kuluangana, bonso badisangishe kudi Davidi ne lulamatu luonso.* 34 Mu Nafatale, kuvua bamfumu tshinunu, ne bavua ne bantu binunu 37 bikale ne ngabu minene ne mafuma. 35 Mu bena Dana, bantu bavua badilongolole bua mvita bavua 28 600. 36 Mu Ashê, bantu bavua mua kubuela mu tshiluilu bua kuela mualu wa mvita bavua binunu 40.

37 Dia muamua dia Yadene,+ mu bena Lubena, ne bena Gada ne tshitupa tshia tshisa tshia Manashe, kuvua basalayi binunu 120 bikale ne bia mvita bia mishindu yonso. 38 Bonso aba bavua bena mvita, bavua badisangisha pamue muaba wa mvita; bavua balue ku Hebelone ne muoyo mujima bua kuteka Davidi mukalenge ku mutu kua Isalele mujima, ne kabidi bena Isalele bakuabu bonso bavua mu buobumue mu dijinga dia* kuteka Davidi mukalenge.+ 39 Bakashala kuntu aku ne Davidi matuku asatu, badia, banua, bualu bana babu bavua babalongoluele bintu. 40 Kabidi ne bantu bavua pabuipi nabu, too ne bavua ku Yisakâ, Zebulona, ne Nafatale, bavua balua ne biakudia pa mpunda, pa tumelu, pa mpunda ya mushindu mukuabu ne pa ngombe, mmumue ne: biakudia bienza ne bukula, mabulu a mfigi miumisha ne a tumuma tua mvinyo tumisha, mvinyo, mafuta, ne ngombe ne mikoko bia bungi menemene, bualu kuvua disanka mu Isalele.