MUKANDA MUIBIDI WA SAMUELE

1 Panyima pa lufu lua Shaula, pavua Davidi mupingane ufuma ku ditshimuna* bena Amaleka, Davidi wakashala mu Sikelaga+ matuku abidi. 2 Dituku disatu, muntu mukuabu wakalua umbukila mu tshitudilu tshia Shaula mudipande bilamba, muikale ne buloba mu mutu. Pakasemenaye kudi Davidi, wakadiela panshi, kutuaye mpala panshi.

3 Davidi wakamuebeja ne: “Udi ufumina penyi?” Yeye kuandamuna ne: “Ndi munyeme mu tshitudilu tshia Isalele.” 4 Davidi wakamuebeja ne: “Malu mmapite mushindu kayi? Ngambila koku.” Yeye kuamba ne: “Bantu mbanyeme ku mvita ne ba bungi mbakuluke bafue. Nansha Shaula ne muanende Yonatana mbafue pabu.”+ 5 Ke Davidi kuebeja nsongalume uvua mulue ne lumu au ne: “Mmunyi muudi mumanye ne: Shaula ne muanende Yonatana mbafue?” 6 Nsongalume wakandamuna ne: “Mvua mpitshila pa mukuna wa Gileboa+ ku mpukapuka, meme kumona Shaula mudishindamene pa difuma diende, matempu ne bendeshi ba tubalu bikale pabuipi nende.+ 7 Pavuaye mukudimuke mummone, wakambikila, meme kuamba ne: ‘Mmeme eu!’ 8 Yeye kunkonka ne: ‘Wewe udi nganyi?’ Meme kuandamuna ne: ‘Ndi muena Amaleka.’+ 9 Ke yeye kuamba ne: ‘Luaku koku unshipe, bualu ndi nkengakana bikole, kadi ntshidi ne muoyo.’* 10 Nunku meme kuya kudiye, kumushipa,+ bualu mvua mumanye ne: kavua mua kushala ne muoyo yeye mumane kukuluka mutapike mushindu au to. Ke meme kuangata tshifulu tshia bukalenge* tshivua ku mutu kuende ne tshikanu tshivua ku diboko diende; ndi mulue nabi muaba eu kudi mukalenge wanyi.”

11 Pakumvua Davidi nanku wakadikuata mu bilamba, yeye kubipanda, ne bantu bonso bavuaye nabu bakenza bia muomumue. 12 Bakadila bela mbila, bobu kujila biakudia+ too ne ku dilolo bua Shaula, bua muanende Yonatana, bua bantu ba Yehowa, ne bua nzubu wa Isalele,+ bualu bavua bakuluke ku muele wa mvita.

13 Davidi wakebeja nsongalume uvua mumutuadile lumu au ne: “Udi wa penyi?” Yeye kuamba ne: “Ndi muana wa muntu udi musombe buenyi, muena Amaleka.” 14 Ke Davidi kumuebeja ne: “Bua tshinyi kuvua mutshine bua kujula tshianza tshiebe bua kushipa muela manyi wa Yehowa?”+ 15 Nunku Davidi wakabikila umue wa ku bantu bavuaye nabu, kuamba ne: “Semena umushipe.” Nunku wakamukuma, yeye kufua.+ 16 Davidi wakamuambila ne: “Mashi ebe adi pa mutu pebe nkayebe, bualu mukana muebe nkayebe muvua mukufunde pauvua muambe ne: ‘Meme ke uvua mushipe muela manyi wa Yehowa.’”+

17 Pashishe Davidi wakelela Shaula ne muanende Yonatana kasala ka muadi,*+ 18 kuambaye bua balongeshe bantu ba mu Yuda kasala ka muadi ka “Buta” kadi kafunda mu mukanda wa Yashâ aka:+

19 “Wewe Isalele, bantu ba butumbi mbalale bashipa pa miaba yebe mitumbuke.+

Mona mudi bantu ba bukole bakuluke!

25 Mona mudi bantu ba bukole bakuluke mu mvita!

Yonatana mmulale mushipa pa miaba yebe mitumbuke!+

Dinanga diuvua munnange nadi divua dimpe ditambe kupita dinanga dia bakaji.+

2 Pakapita matuku, Davidi wakebeja Yehowa+ wamba ne: “Ndi mua kubanda mu tshimue tshia ku bimenga bia Yuda anyi?” Yehowa wakamuambila ne: “Banda.” Ke Davidi kuebeja ne: “Nya kuepi?” Yeye kuandamuna ne: “Ku Hebelone.”+ 2 Nunku Davidi wakabanda kuntu aku ne bakaji bende babidi, Ahinoama+ wa mu Yizelele ne Abigayila+ mukaji mukamba uvua Nabala wa mu Kâmele mushiye. 3 Davidi wakaya kabidi ne bantu bavuaye nabu,+ muntu yonso ne ba mu nzubu muende, ne bakasombela mu bimenga bivua binyunguluke Hebelone. 4 Pashishe bantu ba mu Yuda bakalua kuntu aku, kuelabu Davidi manyi bu mukalenge wa nzubu wa Yuda.+

Bakambila Davidi ne: “Bantu ba mu Yabesha-gilada ke bavua bajiike Shaula.” 5 Nunku Davidi wakatuma bantu ne mukenji kudi bantu ba mu Yabesha-gilada, kubambilaye ne: “Yehowa anubeneshe bualu nuvua baleje mukalenge wenu Shaula dinanga dia lulamatu panuvua bamujiike.+ 6 Yehowa anuleje dinanga dia lulamatu ne lulamatu. Meme panyi nennuenzele malu ne bulenga bualu nudi benze bualu ebu.+ 7 Mpindieu koleshayi bianza bienu ne nuikale bantu ba dikima, bualu mukalenge wenu Shaula mmufue, ne ba mu nzubu wa Yuda mbangele manyi bua ngikale mukalenge wabu.”

8 Kadi Abinê+ muana wa Nê, mfumu wa tshiluilu tshia Shaula uvua muangate Ishi-boshete+ muana wa Shaula musabuke muye nende ku Mahanayima+ 9 ne mumuteke mukalenge wa Gilada,+ wa bena Ashehû, wa Yizelele,+ wa Efelayima,+ wa Benyamina, ne wa Isalele mujima. 10 Ishi-boshete, muana wa Shaula, uvua ne bidimu 40 pavuaye mulue mukalenge wa Isalele, ne wakakokesha bidimu bibidi. Kadi nzubu wa Yuda yeye uvua ku luseke lua Davidi.+ 11 Tshikondo tshivua* Davidi mukalenge mu Hebelone ku mutu kua nzubu wa Yuda tshivua tshia bidimu muanda mutekete ne ngondo isambombo.+

12 Pakapita matuku, Abinê muana wa Nê ne bena mudimu ba Ishi-boshete, muana wa Shaula, bakumbuka ku Mahanayima+ kuyabu ku Gibeona.+ 13 Yoaba+ muana wa Seluya+ ne bena mudimu ba Davidi bakumbuka pabu ne bakapetangana nabu ku dijiba dia mâyi dia mu Gibeona; tshisumbu tshimue tshivua tshisombe dia munemu dia dijiba, ne tshisumbu tshikuabu dia muamua dia dijiba. 14 Ndekelu wa bionso Abinê wakambila Yoaba ne: “Lekela bansongalume bajuke ne baluangane* kumpala kuetu.” Ke Yoaba kuamba ne: “Bajuke.” 15 Nunku bakajuka, kusabukabu bilondeshile bungi bukosa: bantu 12 bua Benyamina ne Ishi-boshete muana wa Shaula, ne bantu 12 mu bena mudimu ba Davidi. 16 Bakakuatangana umue ne mukuabu ku mutu ne yonso wa kudibu wakabueja muele wende wa mvita mu lubese lua muluishi wende, ne bonso bakakuluka pamue. Nunku bakabikila muaba wa mu Gibeona au ne: Helekata-hasulima.

17 Mvita yakalonda pashishe ivua mikole menemene dituku adi, ne ndekelu wa bionso bena mudimu ba Davidi bakatshimuna Abinê ne bantu ba mu Isalele. 18 Mpindieu bana ba balume basatu ba Seluya:+ Yoaba,+ Abishai,+ ne Asahele+ bavua muaba au; Asahele uvua ne lubilu ku makasa bu lua kabuluku mu mpata. 19 Asahele wakalondakaja Abinê, ne kavua uya ni nku dia balume anyi ku dia bakaji pavuaye ulondakaja Abinê to. 20 Pavua Abinê mukudimuke mutangile panyima, wakebeja ne: “Asahele, nguewe anyi?” Yeye kuandamuna ne: “Eyowa, mmeme.” 21 Ke Abinê kumuambila ne: “Ndaku ku dia balume anyi ku dia bakaji diebe ne kuata nsongalume umue ne wangate tshionso tshiwamukopola bua tshilue tshiebe.” Kadi Asahele kavua musue kulekela dimulondakaja to. 22 Nunku Abinê wakambila kabidi Asahele ne: “Lekela kundondakaja. Udi musue nkushipe bua tshinyi? Meme muenze nunku, mmunyi mundi mua kutangila muanenu Yoaba mu mpala?” 23 Kadi yeye wakabenga bua kuimana, nunku Abinê wakamukuma tshitaku tshia difuma mu difu,+ difuma kumupatukila pa nyima; wakakuluka, kufuaye musangu umue. Muntu yonso uvua ufika muaba uvua Asahele mukulukile ne mufuile au uvua wanji kuimana.

24 Pashishe Yoaba ne Abishai bakatungunuka ne kulondakaja Abinê. Pakavua dîba dibuela, bakafika pa mukuna mukese wa Ama udi mutangilangane ne Giya mu njila uvua muye mutangile ku tshipela tshia Gibeona. 25 Bena Benyamina bakadisangisha pamue ne Abinê kuntu aku, ne bakenza tshisumbu tshimue, kuimanabu pa mukuna mukese kampanda. 26 Pashishe Abinê wakela Yoaba dîyi wamba ne: “Muele wa mvita neutungunuke ne kushipa kakuyi ndekelu anyi? Kuena mumanye ne: ndekelu wa bualu ebu neikale anu mubi menemene anyi? Nunku nkushale mutantshi bule kayi bua wewe kuambila bantu bua balekele kulondakaja bana babu?” 27 Ke Yoaba kuamba ne: “Bushuwa anu bu mudi Nzambi ne muoyo, bu wewe kuyi muakule, apu anu mu dinda ke pavua bantu mua kulekela dilondakaja bana babu.” 28 Ke Yoaba kuela mpungi, ne bantu bende kulekela dilondakaja Isalele, mvita kujikayi.

29 Pashishe Abinê ne bantu bende bakenda butuku bujima abu, kupitshilabu mu Alabâ,+ kusabukabu Yadene, kupitshilabu mu tshibandabanda tshijima* ne ndekelu wa bionso kufikabu ku Mahanayima.+ 30 Pavua Yoaba mupingane ufuma ku dilondakaja Abinê, wakasangisha bantu bonso pamue. Mu bena mudimu ba Davidi muvua mupangike bantu 19, kusangisha ne Asahele. 31 Kadi bena mudimu ba Davidi bavua batshimune bena Benyamina ne bantu ba Abinê; bantu babu 360 bavua bafue. 32 Bakangata Asahele,+ kumujiikabu mu lukita lua tatuende ludi ku Beteleheme.+ Pashishe Yoaba ne bantu bende bakenda butuku bujima, kufikabu ku Hebelone+ patshiatshia.

3 Mvita ivua pankatshi pa nzubu wa Shaula ne nzubu wa Davidi yakatungunuka; Davidi uvua wenda upeta bukole bua bungi,+ kadi nzubu wa Shaula uvua yeye wenda anu uteketa.+

2 Tshikondo tshionso atshi, bakalelela Davidi bana ba balume mu Hebelone.+ Muanende muanabute uvua Amenona,+ uvuabu bamulelele kudi Ahinoama+ wa mu Yizelele. 3 Muanende muibidi uvua Kileaba, uvuabu bamulelele kudi Abigayila,+ mukaji mukamba uvua Nabala wa mu Kâmele mushiye; ne muanende muisatu uvua Abashaloma+ muana wa Mâka, muana wa bakaji wa Talemai+ mukalenge wa Geshû. 4 Muanende muinayi uvua Adoniya+ muana wa Hagita, ne muitanu uvua Shefataya muana wa Abitala. 5 Muanende muisambombo uvua Yiteleama, uvuabu balelele Davidi kudi mukajende Egala. Bakalelela Davidi bana aba mu Hebelone.

6 Pavua mvita ivua pankatshi pa nzubu wa Shaula ne nzubu wa Davidi itungunuka, Abinê+ uvua anu ushindamija muaba uvuaye nawu mu nzubu wa Shaula. 7 Mpindieu Shaula uvua ne mukaji uvuaye mubanjije dîna diende Lisepa,+ muana wa Aya. Pashishe Ishi-boshete+ wakalua kuebeja Abinê ne: “Bua tshinyi uvua mulale ne mukaji uvua tatu mubanjije?”+ 8 Abinê wakafiika munda bikole bua mêyi a Ishi-boshete aa, yeye kuamba ne: “Ndi mutu wa mbua wa mu Yuda anyi? Too ne lelu eu, ndi muleje nzubu wa tatuebe Shaula, bana babu ne balunda bende dinanga dia lulamatu, ne tshiena munufile mu tshianza tshia Davidi to; kadi lelu ukadi undumbuluisha bua tshilema tshidi tshitangila mukaji. 9 Nzambi enzele Abinê nunku ne apitshishe apu meme tshiyi muenzele Davidi anu muvua Yehowa muditshipe kudiye:+ 10 bua kumbusha bukalenge mu nzubu wa Shaula ne kujadika nkuasa wa bukalenge wa Davidi ku mutu kua Isalele ne kua Yuda, kumbukila ku Dana too ne ku Bê-sheba.”+ 11 Kavua mukumbane bua kuandamuna kabidi Abinê to, bualu uvua umutshina.+

12 Diakamue Abinê wakatuma bantu ne mukenji kudi Davidi, wamba ne: “Buloba mbua nganyi?” Yeye kuamba kabidi ne: “Diaku nanyi tshipungidi, ne meme nengenze tshionso tshindi mua kuenza* bua Isalele ikale ku luseke luebe.”+ 13 Yeye kuandamuna ne: “Mbimpe! Nendie nebe tshipungidi. Kadi bualu bumue bundi nkulomba mbua ne: kutetshi bua kumona mpala wanyi wewe kuyi muanji kulua ne Mikala+ muana wa Shaula paudi ulua bua kummona.” 14 Pashishe Davidi wakatuma bantu ne mukenji kudi Ishi-boshete+ muana wa Shaula, wamba ne: “Mpesha mukajanyi Mikala umvua mubangile ku misoso lukama ya bena Peleshete.”+ 15 Nunku Ishi-boshete wakatuma bantu bua bamuangate kudi bayende Palatiele+ muana wa Layishe. 16 Kadi bayende wakaya nende, wenda udila pavuaye wenda umulonda too ne ku Bahulima.+ Pashishe Abinê wakamuambila ne: “Ndaku, pingana!” Yeye kupingana.

17 Pine apu, Abinê uvua mutumine bakulu ba mu Isalele mukenji wamba ne: “Kukadi matuku nuvua bajinge bua Davidi ikale mukalenge wenu. 18 Mpindieu enzayi tshinudi ne bua kuenza, bualu Yehowa uvua muambile Davidi ne: ‘Ku diambuluisha dia tshianza tshia muena mudimu wanyi Davidi+ meme nempandishe tshisamba tshianyi tshia Isalele mu tshianza tshia bena Peleshete ne mu tshianza tshia bena lukuna babu bonso.’” 19 Pashishe Abinê wakakula ne bena Benyamina.+ Abinê wakaya kabidi kuakula ne Davidi pa nkayabu ku Hebelone bua kumuambila bualu buvua Isalele ne nzubu mujima wa Benyamina bitabe bua kuenza.

20 Pavua Abinê mufike kudi Davidi ku Hebelone ne bantu 20, Davidi wakalambishila Abinê ne bantu bavuaye nabu biakudia bia bungi. 21 Pashishe Abinê wakambila Davidi ne: “Lekela nye bua nsangishile mfumu mukalenge wanyi bena Isalele bonso bua badie nebe tshipungidi, ne wewe neulue mukalenge ku mutu kua bionso biudi ujinga.”* Ke Davidi kulekelaye Abinê bua aye, yeye kuya mu ditalala.

22 Anu dîba adi, Yoaba ne bena mudimu ba Davidi bakalua bafuma ku dipawula bintu, bikale ne bintu bia bungi menemene bivuabu bapawule. Abinê katshivua kabidi ne Davidi mu Hebelone to, bualu ukavua mumupingaje mu ditalala. 23 Pakafika Yoaba+ ne tshiluilu tshijima tshivuaye natshi, bakambila Yoaba ne: “Abinê+ muana wa Nê+ uvua mulue kudi mukalenge, ne mukalenge mmumupingaje muye mu ditalala.” 24 Nunku Yoaba wakabuela kudi mukalenge, kumuambilaye ne: “Tshiudi muenze ntshinyi? Mona, Abinê uvua mulue kuudi. Bua tshinyi udi mumupingaje muye kakuyi bualu? 25 Wewe udi mumanye Abinê muana wa Nê bimpe! Uvua mulue muaba eu bua kukudingakaja, bua kumanya kuonso kuudi uya ne kumanya bualu buonso buudi wenza.”

26 Nunku Yoaba wakumbuka kudi Davidi, kutumaye bantu ne mukenji bua kulonda Abinê; bakamupeta ku tshina tshia mâyi tshia Silaha, kupinganabu nende; kadi Davidi kavua mumanye bualu nansha bumue mu tshilumbu atshi to. 27 Pavua Abinê mupingane ku Hebelone,+ Yoaba wakaya nende ku luseke mu tshiibi tshia tshimenga bua kuakula nende pa nkayabu. Kadi wakamubueja muele wa mvita mu difu kuntu aku, yeye kufua;+ wakenza nunku bualu uvua mushipe* muanabu Asahele.+ 28 Pavua Davidi mumvue bualu abu pashishe, wakamba ne: “Bua kashidi ne kashidi meme ne bukalenge buanyi katuakuikala ne bualu kumpala kua Yehowa bua dibanza dia mashi+ a Abinê muana wa Nê. 29 Dipingane pa mutu pa Yoaba+ ne pa nzubu mujima wa tatuende. Nzubu wa Yoaba kapangidi muntu mulume udi ne disama dia tufina tupueka,+ udi ne nsudi,+ anyi udi wenza mudimu ne lusambu lua kuluka nalu manda,* anyi udi ufua ku muele wa mvita, anyi udi upangila biakudia!”+ 30 Nunku Yoaba ne muanabu Abishai+ bakashipa Abinê+ bualu uvua mushipe muanabu Asahele mu mvita+ ku Gibeona.

31 Pashishe Davidi wakambila Yoaba ne bantu bonso bavuaye nabu ne: “Dipandayi bilamba, nuvuale bilamba bikayabale, nudile Abinê.” Mukalenge Davidi yeye muine uvua wenda ulonda tshintu tshivuabu bambuile tshitalu. 32 Bakajiika Abinê mu Hebelone; mukalenge wakadila ne dîyi dikole ku lukita lua Abinê, ne bantu bonso bakadila pabu. 33 Mukalenge wakelela Abinê kasala, kuambaye ne:

“Abinê uvua ne bua kufua lufu lua muntu uvua kayi ne lungenyi anyi?

Udi mukuluke anu bu muntu udi ukuluka kumpala kua bashipianganyi.”*+

Pakumvua bantu bonso nanku, bakamudila kabidi.

35 Pashishe bantu bonso bakalua bua kupesha Davidi biakudia bia kumusamba nabi* patshivua panshi patoke, kadi Davidi wakaditshipa ne: “Nzambi angenzele nunku ne apitshishe apu meme mulabule biakudia anyi tshintu kayi tshionso kumpala kua dîba kubuela!”+ 36 Bantu bonso bavua bamone tshivua tshienzeke, biobi kubasankisha. Anu bu malu onso avua mukalenge wenza, bualu ebu buakasankisha bantu bonso. 37 Nunku bantu bonso ne Isalele mujima bakamanya dituku adi ne: ki mmukalenge uvua mushipeshe Abinê muana wa Nê to.+ 38 Pashishe mukalenge wakambila bena mudimu bende ne: “Kanuena bamanye ne: mukokeshi ne muntu munene mmukuluke lelu mu Isalele anyi?+ 39 Lelu tshiena ne bukole bua bungi nansha mundi mukalenge,+ ne buanyi meme, bantu aba, bana ba Seluya,+ badi ne tshikisu tshia bungi.+ Yehowa afute muenji wa bubi bilondeshile bubi buende nkayende.”+

4 Pavua Ishi-boshete+ muana wa Shaula mumvue ne: Abinê uvua mufue mu Hebelone,+ wakapanga dikima* ne bena Isalele bonso bakapampakana. 2 Kuvua bantu balume babidi bavua batangila bisumbu bia bapawudi bia muana wa Shaula: dîna dia umue divua Bânaha ne dia mukuabu Lekaba. Bavua bana ba Limona muena Bêlota wa mu tshisa tshia Benyamina. (Bualu bavua babala Bêlota+ pende mu Benyamina. 3 Bena Bêlota bavua banyemene ku Gitayima,+ ne mbasombe buenyi kuntu aku too ne lelu.)

4 Yonatana+ muana wa Shaula uvua ne muana wa balume uvua utebuka.*+ Uvua ne bidimu bitanu pavua lumu lua lufu lua Shaula ne Yonatana lulue lumbukila ku Yizelele,+ ne ndeji wende wakamuambula ne kunyemaye, kadi pavuaye unyema ne buôwa, muana wakakuluka, kushalaye utebuka. Dîna dia muana au divua Mefibosheta.+

5 Bana ba balume ba Limona muena Bêlota, Lekaba ne Bânaha, bakaya ku nzubu kua Ishi-boshete pavuaku luya lukole, pavua Ishi-boshete wikisha munda munya. 6 Bakabuela mu nzubu anu bu bantu bakeba kuangata ntete ya blé, ne bakamukuma mu difu; pashishe Lekaba ne muanabu Bânaha+ bakanyema. 7 Pavuabu babuele mu nzubu, uvua mulale pa bulalu mu nzubu wende wa bulalu, bobu kumukuma kumushipa, pashishe bobu kumukosa mutu. Ke bobu kuangata mutu wende, kuendabu butuku bujima mu njila wa ku Alabâ. 8 Bakatuadila Davidi mutu wa Ishi-boshete+ ku Hebelone, bobu kuambila mukalenge ne: “Mutu wa Ishi-boshete muana wa Shaula muena lukuna webe+ uvua ukeba muoyo* webe+ nguowu eu. Yehowa mmusombuele mfumu mukalenge wanyi kudi Shaula ne ndelanganyi yende lelu.”

9 Kadi Davidi wakandamuna Lekaba ne muanabu Bânaha, bana ba balume ba Limona muena Bêlota ne: “Bushuwa anu bu mudi Yehowa ne muoyo, yeye uvua munsungile* ku makenga onso,+ 10 pavua muntu mukuabu mulue kungambila ne: ‘Shaula mmufue,’+ wela meji ne: uvua muntuadile lumu luimpe, mvua mumukuate, meme kumushipa+ ku Sikelaga. Ke difutu dia mutuadi wa mukenji divuaye mupete kundi! 11 Nebikale mushindu kayi padi bantu babi bashipe muntu muakane mu nzubu muende pa bulalu! Tshiena mua kulomba mashi ende ku bianza bienu+ ne kunujimija pa buloba anyi?” 12 Nunku Davidi wakatumina bansongalume bende dîyi bua kubashipa.+ Bakabakosa bianza ne makasa ne kubakudikabu+ pabuipi ne dijiba dia mâyi mu Hebelone. Kadi bakangata mutu wa Ishi-boshete, kuwujiikabu muaba wa kujiikilangana wa Abinê mu Hebelone.

5 Pakapita matuku, bisa bionso bia Isalele biakalua kudi Davidi ku Hebelone,+ kuambabi ne: “Mona! Tuetu tudi mufuba webe ne musunyi webe.*+ 2 Bidimu bishale biabia pavua Shaula mukalenge wetu, wewe ke uvua ulombola Isalele mu mvita yende.*+ Pashishe Yehowa uvua mukuambile ne: ‘Neulame tshisamba tshianyi tshia Isalele ne neulue mulombodi wa Isalele.’”+ 3 Nunku bakulu ba mu Isalele bonso bakalua kudi mukalenge ku Hebelone, ne mukalenge Davidi wakadia nabu tshipungidi+ ku Hebelone kumpala kua Yehowa. Pashishe bakela Davidi manyi bua ikale mukalenge wa Isalele.+

4 Davidi uvua ne bidimu 30 pavuaye mulue mukalenge, ne wakakokesha bidimu 40.+ 5 Wakakokesha Yuda mu Hebelone bidimu muanda mutekete ne ngondo isambombo, ne wakakokesha Isalele mujima ne Yuda mu Yelushalema+ bidimu 33. 6 Mukalenge ne bantu bende bakasa luendu batangile ku Yelushalema bua kuluisha bena Yebuse+ bavua basombele mu buloba abu. Bakaseka Davidi bamba ne: “Kuakubuela munemu to! Bampofu ne balema ke bakuipata.” Bavua bela meji ne: ‘Davidi kakubuela munemu to.’+ 7 Kadi Davidi wakakuata muaba mukolesha wa kusokomena wa Siona, udibu babikila mpindieu ne: Tshimenga tshia Davidi.+ 8 Nunku Davidi wakamba dituku adi ne: “Bantu badi bela bena Yebuse mvita badi ne bua kuyila mu njila wa mâyi muenzela muinshi mua buloba bua kushipa ‘balema ne bampofu’ badi Davidi* mukine!” Ke bualu kayi badi bamba ne: “Bampofu ne balema kabakubuela mu nzubu to.” 9 Pashishe Davidi wakasombela muaba mukolesha wa kusokomena eu, ne bavua bawubikila* ne: Tshimenga tshia Davidi; Davidi wakatuadija kuibaka kumpenga kuonso, kumbukila ku Kakunakuna*+ wenda ubuela munda.+ 10 Nunku Davidi wakatungunuka amu ne kupeta bukole bua bungi,+ ne Yehowa Nzambi wa biluilu uvua nende.+

11 Hilama+ mukalenge wa Tulo wakatuma bantu ne mukenji kudi Davidi, wakatuma kabidi mitshi ya sedre,+ bena mabaya ne bantu bavua bibaka ne mabue bua kuibakabu bimanu, ne bakatuadija kuibakila Davidi nzubu.*+ 12 Davidi wakamanya ne: Yehowa uvua mumujadike bikole bu mukalenge wa Isalele+ ne uvua mubandishe bukalenge buende+ bua bualu bua tshisamba Tshiende tshia Isalele.+

13 Davidi wakasela bakaji bakuabu mu Yelushalema ne wakabanjija bakuabu+ yeye mumane kufuma ku Hebelone, ne bakalelela Davidi bana bakuabu ba balume ne ba bakaji.+ 14 Aa mmêna a bana bavuabu bamulelele mu Yelushalema: Shamua, Shobaba, Natana,+ Solomo,+ 15 Yibeha, Elishua, Nefege, Yafia, 16 Elishama, Eliada, ne Elifelete.

17 Pavua bena Peleshete bumvue ne: bavua bele Davidi manyi bua kulua mukalenge wa Isalele,+ bena Peleshete bonso bakabanda bua kukeba Davidi.+ Pakumvua Davidi bualu abu, wakapueka muaba wa kusokomena.+ 18 Pashishe bena Peleshete bakalua, kumuangalakabu mu Tshibandabanda* tshia bena Lefa.+ 19 Davidi wakebeja Yehowa+ wamba ne: “Mbande bua kuluangana ne bena Peleshete anyi? Neubafile mu tshianza tshianyi anyi?” Ke Yehowa kuambila Davidi ne: “Banda, bualu bushuwa nemfile bena Peleshete mu tshianza tshiebe.”+ 20 Nunku Davidi wakaya ku Bâla-pelasima, ne Davidi wakabashipa kuntu aku. Ke yeye kuamba ne: “Yehowa mmupande njila mu bena lukuna banyi+ kumpala kuanyi anu bu njila mupanda kudi mâyi.” Ke bualu kayi wakinyika muaba au ne: Bâla-pelasima.*+ 21 Bena Peleshete bakalekela mpingu yabu kuntu aku, Davidi ne bantu bende bakayangata kuyabu nayi.

22 Pashishe bena Peleshete bakabanda kabidi ne kumuangalakabu mu Tshibandabanda* tshia bena Lefa.+ 23 Davidi wakebeja Yehowa, kadi Yeye kuamba ne: “Kubandi buludiludi to. Kadi nyunguluka uyile panyima pabu ne ubapatukile kumpala kua mitshi ya baka. 24 Paumvua mikuma ya bantu benda kuulu kua mitshi ya baka, dîba adi wenze malu ne dikima, bualu Yehowa neikale mupatuke kumpala kuebe bua kushipa tshiluilu tshia bena Peleshete.” 25 Nunku Davidi wakenza anu muvua Yehowa mumutumine dîyi bua kuenza, ne wakashipa bena Peleshete+ kumbukila ku Geba+ kuya too ne ku Gezê.+

6 Davidi wakasangisha kabidi bisumbu bionso bia basalayi bia mu Isalele bivua bimanye mvita bikole, bantu balume binunu 30. 2 Pashishe Davidi ne bantu bonso bavuaye nabu bakamata mu njila batangile ku Bâle-yuda bua kubanda ne Mushete wa Nzambi mulelela.+ Kumpala kua Mushete au ke kuvua bantu babila dîna dia Yehowa wa biluilu+ udi usomba mu nkuasa wa bukalenge pa mutu* pa bakeluba.+ 3 Kadi bakateka Mushete wa Nzambi mulelela mu ditempu dipiadipia+ bua kumbuka nawu ku nzubu kua Abinadaba,+ ne nzubu wende uvua pa mukuna mukese; Uza ne Ahio, bana ba balume ba Abinadaba, bavua benda balombola ditempu dipiadipia adi.

4 Nunku bakumbuka ne Mushete wa Nzambi mulelela ku nzubu kua Abinadaba pa mukuna mukese, ne Ahio uvua wenda wenda kumpala kua mushete. 5 Davidi ne nzubu mujima wa Isalele bavua benda basanka kumpala kua Yehowa ne biombelu bia mutshi wa jenevriye bia mishindu yonso, ne nzenze, ne biombelu bikuabu bia nshinga,+ ne ngoma,+ ne makasa, ne bintu bia kukumakaja.+ 6 Kadi pakafikabu muaba wa tshishipuidi wa Nakona, Uza wakolola tshianza, kukuataye Mushete wa Nzambi mulelela,+ bualu ngombe ivua yamba kuwukulula. 7 Ke tshiji tshia Yehowa kutemenatshi Uza, ne Nzambi mulelela wakamukumina+ muaba au bua tshienzedi tshiende tshia dipanga kanemu,+ ne wakafuila muaba au ku luseke lua Mushete wa Nzambi mulelela. 8 Kadi Davidi wakafiika munda* bualu tshiji tshia Yehowa tshivua tshitemene Uza; ne badi babikila muaba au ne: Pelese-Uza* too ne lelu. 9 Nunku Davidi wakabanga kutshina Yehowa+ dituku adi, kuambaye ne: “Mushete wa Yehowa udi mua kufika kundi mushindu kayi?”+ 10 Davidi kavua musue kuya ne Mushete wa Yehowa muaba uvuaye mu Tshimenga tshia Davidi to.+ Kadi Davidi wakawambuisha bua baye nawu ku nzubu kua Obeda-edome+ muena Gata.

11 Mushete wa Yehowa wakashala ku nzubu kua Obeda-edome muena Gata ngondo isatu, ne Yehowa uvua ubenesha Obeda-edome ne ba mu nzubu muende bonso.+ 12 Bakalua kuambila mukalenge Davidi ne: “Yehowa mmubeneshe nzubu wa Obeda-edome ne bintu biende bionso bua bualu bua Mushete wa Nzambi mulelela.” Nunku Davidi wakaya bua kuangata Mushete wa Nzambi mulelela ku nzubu kua Obeda-edome bua kubanda nawu mu Tshimenga tshia Davidi benda basanka.+ 13 Pavua bantu bavua bambule+ Mushete wa Yehowa bende bidia bisambombo, wakalambula ngombe mulume ne nyama wa mafuta.

14 Davidi uvua wenda uja maja unyunguluka kumpala kua Yehowa ne bukole buende buonso; pine apu Davidi uvua muvuale* efoda wa line.+ 15 Davidi ne nzubu mujima wa Isalele bavua benda babanda ne Mushete+ wa Yehowa ne mbila ya disanka+ ne muadi wa lusengu.+ 16 Kadi pakafika Mushete wa Yehowa mu Tshimenga tshia Davidi, Mikala+ muana wa Shaula wakatangila panshi ku dididishi, kumonaye mukalenge Davidi wenda utumpika, uja maja unyunguluka kumpala kua Yehowa; yeye kubanga kumupetula mu muoyo wende.+ 17 Nunku bakabueja Mushete wa Yehowa, kuwutekabu muaba wawu mu ntenta uvua Davidi muwashile.+ Pashishe Davidi wakalambula milambu ya kuosha+ ne milambu ya diumvuangana+ kumpala kua Yehowa.+ 18 Pavua Davidi mujikije kulambula milambu ya kuosha ne milambu ya diumvuangana, wakabenesha bantu mu dîna dia Yehowa wa biluilu. 19 Pashishe wakabanyina bantu bonso, musumba mujima wa Isalele, mulume yonso ne mukaji yonso, diampa dienze bu tshikata, dibulu dienza ne ngaji ya dibue dia kankinda miumisha, dibulu dia tumuma tua mvinyo tumisha; pashishe bantu bonso bakumbuka, muntu yonso kuyaye ku nzubu kuende.

20 Pavua Davidi mupingane bua kubenesha ba mu nzubu muende yeye, Mikala+ muana wa Shaula wakapatuka bua kusambakena nende. Wakamba ne: “Mona mudi Mukalenge wa Isalele muditumbishe lelu padiye mudiumbushe bilamba ku mêsu kua bapika bakaji ba bena mudimu bende, anu mutu muntu udi kayi ne lungenyi udiumbusha bilamba patoke!”+ 21 Ke Davidi kuambila Mikala ne: “Meme mvua nsanka kumpala kua Yehowa uvua munsungule pa muaba wa tatuebe ne ba mu nzubu muende bonso, ne uvua munteke mulombodi wa tshisamba tshia Yehowa tshia Isalele.+ Bua bualu ebu, nensanke kumpala kua Yehowa, 22 ne nendipuekeshe kabidi bikole kupita mundi muenze mpindieu ne nempueke too ne ku mêsu kuanyi meme muine. Kadi bua bapika bakaji baudi muambe abu, bobu nebantumbishe.” 23 Nunku Mikala+ muana wa Shaula kakalela bana too ne dituku diakafuaye.

7 Pakavua mukalenge musombele mu nzubu* wende+ ne Yehowa mumupeshe dikisha kudi bena lukuna bende bonso bavua bamunyunguluke, 2 mukalenge wakambila muprofete Natana+ ne: “Tangila, meme ndi musombele mu nzubu wa mitshi ya sedre+ padi Mushete wa Nzambi mulelela wowu musombe mu bilamba bia ntenta.”+ 3 Natana wakandamuna mukalenge ne: “Ndaku, wenze tshionso tshidi mu muoyo webe, bualu Yehowa udi nebe.”+

4 Anu butuku abu, dîyi dia Yehowa diakalua kudi Natana, diamba ne: 5 “Ndaku, wambile muena mudimu wanyi Davidi ne: ‘Yehowa udi wamba ne: “Wewe neungibakile nzubu wa meme kusombela anyi?+ 6 Bualu tshiena musombele mu nzubu katshia ku dituku dimvua mupatule tshisamba tshianyi tshia Isalele mu Ejipitu too ne lelu,+ kadi mvua ngenda ntambakana* mu ntenta ne mu ntenta wa tshitendelelu.+ 7 Tshikondo tshionso tshimvua muende ne bena Isalele* bonso, mvuaku muambile umue wa ku balombodi ba bisa bia Isalele bamvua muteke bua kulama tshisamba tshianyi tshia Isalele dîyi, ngamba ne: ‘Bua tshinyi kuena mungibakile nzubu wa mitshi ya sedre’ anyi?”’ 8 Mpindieu ambila muena mudimu wanyi Davidi ne: ‘Yehowa wa biluilu udi wamba ne: “Mvua mukuangatshile mu mpata ya kudishila nyama, muaba uuvua usaka mikoko,+ bua wewe kulua mulombodi wa tshisamba tshianyi tshia Isalele.+ 9 Nengikale nebe kuonso kuudi uya,+ ne nenjimije* bena lukuna bebe bonso kumpala kuebe;+ nengenze bua dîna diebe dilue dinene+ anu bu dîna dia bantu banene ba pa buloba. 10 Nensunguile tshisamba tshianyi tshia Isalele muaba, nembatekamu, nebasombelamu ne kabakubatatshisha kabidi to; bantu babi kabakubakengesha kabidi bu muvuabu benze kale,+ 11 katshia dituku dimvua muteke balumbuluishi+ ku mutu kua tshisamba tshianyi tshia Isalele. Nenkupeshe dikisha kudi bena lukuna bebe bonso.+

“‘“Yehowa mmukuambile kabidi ne: Yehowa neakuenzele nzubu.*+ 12 Padi matuku ebe atua ku ndekelu+ ne wewe mulale bua kuikisha ne bankambua bebe, dîba adi nenjule muanebe* wa balume walua panyima pebe, lulelu luebe,* ne nenjadike bukalenge buende bikole.+ 13 Yeye ke wibaka nzubu bua dîna dianyi,+ ne nenjadike nkuasa wa bukalenge buende bikole bua kashidi.+ 14 Nendue tatuende ne yeye nealue muananyi.+ Padiye wenza bibi, nemmupeshe dinyoka ne lukodi lua bantu ne mututu wa bana ba bantu.*+ 15 Dinanga dianyi dia lulamatu kadiakumbushibua kudiye mushindu umvua mudiumbushe kudi Shaula+ umvua mumbushe kumpala kuebe. 16 Nzubu webe ne bukalenge buebe nebishindame kumpala kuebe bua kashidi; nkuasa webe wa bukalenge neajadikibue bikole bua kashidi.”’”+

17 Natana wakambila Davidi mêyi onso aa ne wakamulondela tshikena kumona tshionso etshi.+

18 Pakumvua mukalenge Davidi nanku wakalua, kusombaye kumpala kua Yehowa, kuambaye ne: “Wewe Mukalenge Mutambe Bunene Yehowa, meme ndi nganyi? Nzubu wanyi udi ne mushinga kayi bua muudi muye nanyi kule nunku?+ 19 Mukalenge Mutambe Bunene Yehowa, anu bu ne: ki mbikumbane, udi wakula kabidi bua nzubu wa muena mudimu webe too ne mu matuku atshilualua kule menemene; ne bualu ebu budi dilongesha* bua bukua bantu buonso, Mukalenge Mutambe Bunene Yehowa. 20 Muena mudimu webe Davidi neakuambile kabidi tshinyi, Mukalenge Mutambe Bunene Yehowa, paudi wewe mummanye bimpe nunku?+ 21 Bua bualu bua dîyi diebe ne mu diumvuangana ne muoyo webe* udi muenze malu manene onso aa ne udi muamanyishe muena mudimu webe.+ 22 Ke bualu kayi wewe Mukalenge Mutambe Bunene Yehowa udi munene bushuwa.+ Kakuena mukuabu bu wewe,+ ne kakuena Nzambi pa kumbusha wewe;+ malu onso atudi bumvue ne matshi etu adi ajadika bualu ebu. 23 Ntshisamba kayi tshikuabu pa buloba tshidi bu tshisamba tshiebe tshia Isalele?+ Nzambi uvua muye ne mubapikule bu bantu bende,+ yeye kudipetela lumu lua bungi+ pa kubenzela malu manene adi akemesha.+ Wewe uvua muipate bisamba ne nzambi yabi bua bualu bua tshisamba tshiebe tshiuvua mudipikuile mu Ejipitu. 24 Uvua mujadike tshisamba tshiebe tshia Isalele bu tshisamba tshiebe wewe bua kashidi;+ ne wewe Yehowa, udi mulue Nzambi wabu.+

25 “Mpindieu Yehowa Nzambi wanyi, kumbajaku dilaya diudi muenze bua muena mudimu webe ne nzubu wende bua kashidi, ne enzaku anu bu muudi mulaye.+ 26 Dîna diebe ditumbishibue bua kashidi,+ bua bantu bambe ne: ‘Yehowa wa biluilu udi Nzambi wa Isalele,’ ne nzubu wa muena mudimu webe Davidi ajadikibue bikole kumpala kuebe.+ 27 Bualu wewe Yehowa wa biluilu, Nzambi wa Isalele, udi mubuluile muena mudimu webe bualu paudi muambe ne: ‘Nenkuenzele nzubu.’*+ Ke bualu kayi muena mudimu webe udi ne dikima dia* kuenza disambila edi kuudi. 28 Mpindieu wewe Mukalenge Mutambe Bunene Yehowa, udi Nzambi mulelela, mêyi ebe adi bulelela,+ ne udi mulaye muena mudimu webe malu mimpe aa. 29 Nunku bikusankishaku bua kubenesha nzubu wa muena mudimu webe, ne atungunuke kumpala kuebe bua kashidi;+ bualu wewe Mukalenge Mutambe Bunene Yehowa udi mulaye, ne nzubu wa muena mudimu webe abeneshibue ne dibenesha diebe bua kashidi.”+

8 Pakapita matuku, Davidi wakatshimuna bena Peleshete,+ wakabakokesha,+ ne Davidi wakanyenga Metega-hama mu bianza bia bena Peleshete.

2 Wakatshimuna bena Moaba,+ kubaladikaye panshi ne kubapimaye ne muonji. Wakapima bantu ba kushipa bule bua mionji ibidi, ne bantu ba kushiya ne muoyo bule bua muonji umue mujima.+ Bena Moaba bakalua bena mudimu ba Davidi, ne bavua balua ne milambu.+

3 Davidi wakatshimuna Hadadezê muana wa Lehoba mukalenge wa Soba+ pavuaye uya bua kujadika tshiakabidi bukokeshi buende ku Musulu wa Pelata.+ 4 Davidi wakakuata bendeshi bende ba tubalu 1 700 ne basalayi bavua benda ku makasa binunu 20. Pashishe Davidi wakakosa mijilu ya ku bikono bia tubalu tuvua tukoka matempu, kadi wakashiya tubalu lukama.+

5 Pavua bena Sulia ba ku Damaseke+ balue bua kuambuluisha Hadadezê mukalenge wa Soba, Davidi wakashipa bena Sulia binunu 22.+ 6 Pashishe Davidi wakateka bisumbu bia basalayi mu Sulia wa Damaseke, ne bena Sulia bakalua bena mudimu ba Davidi, ne bavua balua ne milambu. Yehowa uvua wenza bua Davidi atshimune* miaba yonso ivuaye uya.+ 7 Davidi wakangata kabidi ngabu ya or ya bijengu ya bena mudimu ba Hadadezê, kuyaye nayi ku Yelushalema.+ 8 Mukalenge Davidi wakangata biamu bia mitaku bia bungi mu Beta ne mu Belotai, bimenga bia Hadadezê.

9 Mpindieu Toi mukalenge wa Hamate+ wakumvua ne: Davidi uvua mutshimune tshiluilu tshijima tshia Hadadezê.+ 10 Nunku Toi wakatuma muanende Yolama kudi mukalenge Davidi bua amuebeje muvuaye ne amuele kalumbandi bua muvuaye muluangane ne Hadadezê ne mumutshimune (bualu Hadadezê uvua muluishe Toi misangu ya bungi), ne uvua mumutuadile bintu bia arjan, bia or ne bia tshiamu tshia mitaku. 11 Mukalenge Davidi wakajidila Yehowa bintu ebi pamue ne arjan ne or ivuaye mujidile ya mu bisamba bionso bivuaye mushiye ku bukokeshi buende:+ 12 ya mu Sulia ne Moaba,+ ya kudi bena Amona, bena Peleshete,+ bena Amaleka,+ ne ya mu bintu bivuabu banyenge Hadadezê+ muana wa Lehoba mukalenge wa Soba. 13 Davidi wakapeta kabidi lumu lua bungi pavuaye mupingane ufuma ku dishipa bena Edome binunu 18 mu Tshibandabanda tshia Mukele.+ 14 Wakateka kabidi bisumbu bia basalayi mu Edome. Wakateka bisumbu bia basalayi mu Edome mujima, ne bena Edome bonso bakalua bena mudimu ba Davidi.+ Yehowa uvua wenza bua Davidi atshimune* miaba yonso ivuaye uya.+

15 Davidi wakatungunuka ne kukokesha Isalele,+ ne Davidi uvua ulumbuluisha tshisamba tshiende tshijima+ ne buakane ne bululame.+ 16 Yoaba+ muana wa Seluya uvua ku mutu kua tshiluilu, ne Yehoshafata+ muana wa Ahiluda uvua mufundi wa malu a bukalenge. 17 Sadoka+ muana wa Ahituba ne Ahimeleke muana wa Ebeyatâ bavua bakuidi, ne Selaya uvua mufundi. 18 Benaya+ muana wa Yehoyada uvua ku mutu kua bena Kelete ne bena Pelete.+ Bana ba balume ba Davidi bakalua bamfumu.*

9 Pashishe Davidi wakebeja ne: “Kutshidi muntu wa mu nzubu wa Shaula udi mushale undi mua kuleja dinanga dia lulamatu bua bualu bua Yonatana anyi?”+ 2 Mpindieu kuvua muena mudimu mukuabu wa mu nzubu wa Shaula dîna diende Siba.+ Nunku bakamubikila, kuyaye kudi Davidi, ne mukalenge wakamuebeja ne: “Wewe ke Siba anyi?” Kuandamunaye ne: “Ndi muena mudimu webe.” 3 Mukalenge wakebeja kabidi ne: “Kudiku muntu wa mu nzubu wa Shaula udi mushale undi mua kuleja dinanga dia lulamatu dia Nzambi anyi?” Siba wakandamuna mukalenge ne: “Kutshidi muana umue wa Yonatana; udi ne bulema ku makasa onso abidi.”+ 4 Mukalenge wakamukonka ne: “Udi penyi?” Siba wakandamuna mukalenge ne: “Udi mu nzubu wa Makî+ muana wa Amiele ku Lo-debâ.”

5 Diakamue mukalenge Davidi wakamubikidisha, kumumbushaye mu nzubu wa Makî muana wa Amiele ku Lo-debâ. 6 Pavua Mefibosheta muana wa Yonatana muana wa Shaula mufike kudi Davidi, wakadiela panshi diakamue, kutuaye mpala panshi. Pashishe Davidi wakamba ne: “Mefibosheta!” Yeye kuandamuna ne: “Muena mudimu webe nyeye eu.” 7 Davidi wakamuambila ne: “Kutshinyi to, bualu meme nenkuleje bushuwa dinanga dia lulamatu+ bua bualu bua tatuebe Yonatana, ne nenkupingajile maloba onso a kakuebe Shaula, ne wewe newikale anu udia* ku mêsa anyi.”+

8 Ke kutuaye mpala panshi, kuambaye ne: “Muena mudimu webe nnganyi, bua muudi mutume ntema yebe* kudi mbua mufue+ bu meme?” 9 Nunku mukalenge wakabikidisha Siba, muambuluishi wa Shaula, kumuambilaye ne: “Ndi mpesha muikulu wa mfumuebe bintu bionso bivua bia Shaula ne bia nzubu wende mujima.+ 10 Neumudimine buloba, wewe ne bana bebe ne bena mudimu bebe, ne neupole bia mu buloba abu bua kupesha bantu bonso ba muikulu wa mfumuebe biakudia. Kadi Mefibosheta, muikulu wa mfumuebe, neikale yeye udia anu ku mêsa anyi.”+

Mpindieu Siba uvua ne bana ba balume 15 ne bena mudimu 20.+ 11 Ke Siba kuambila mukalenge ne: “Muena mudimu webe neenze bionso bidi mfumu mukalenge wanyi mutumine muena mudimu wende dîyi bua kuenza.” Nunku Mefibosheta uvua udia ku mêsa a Davidi* anu bu umue wa ku bana ba mukalenge. 12 Kadi Mefibosheta uvua kabidi ne muana wa balume utshivua mupuekele dîna diende Mika;+ ne bantu bonso bavua mu nzubu wa Siba bakalua bena mudimu ba Mefibosheta. 13 Nunku Mefibosheta wakasombela mu Yelushalema, bualu uvua udia anu ku mêsa a mukalenge;+ ne uvua ne bulema ku makasa onso abidi.+

10 Pashishe mukalenge wa bena Amona+ wakafua, ne muanende Hanuna wakalua mukalenge pa muaba wende.+ 2 Ke Davidi kuamba ne: “Nendeje Hanuna muana wa Nahasha dinanga dia lulamatu anu bu muvua tatuende mundeje dinanga dia lulamatu.” Nunku Davidi wakatuma bena mudimu bende bua kumusamba bua muvuaye mujimije tatuende. Kadi pavua bena mudimu ba Davidi bafike mu buloba bua bena Amona, 3 bakokeshi ba bena Amona bakambila Hanuna mukalenge wabu ne: “Udi wela meji ne: Davidi udi unemeka tatuebe padiye mukutumine bantu bua kukusamba anyi? Davidi ki mmutume bena mudimu bende kuudi bua kutangila tshimenga, kutshitentekela ne kutshikulula anyi?” 4 Nunku Hanuna wakangata bena mudimu ba Davidi, kubakungulaye tshitupa tshia miedi,+ kubapandaye bilamba mu bitupa bibidi lua pa mataku ne kubapingajaye. 5 Pavuabu bambile Davidi bualu ebu, wakatuma bantu diakamue bua kusambakena ne bena mudimu bende abu, bualu bavua bafuishibue bundu bikole; mukalenge wakabambila ne: “Shalayi mu Yeliko+ too ne padi miedi yenu isasa, pashishe nupingane.”

6 Pakapita matuku bena Amona bakamona ne: bavua balue tshintu tshidi tshinunka bibi kudi Davidi, nunku bena Amona bakatuma bantu bua kufuta bena Sulia ba ku Bete-lehoba+ ne bena Sulia ba ku Soba+ bua baluangane ku luseke luabu, basalayi bavua benda ku makasa binunu 20; ne mukalenge wa Mâka+ muikale ne bantu tshinunu; ne bantu binunu 12 ba ku Ishitobo.*+ 7 Pakumvua Davidi bualu abu, wakatuma Yoaba ne tshiluilu tshijima, kusangisha ne bena mvita bende ba bukole bua bungi.+ 8 Bena Amona bakapatuka, bobu kuela mualu wa mvita ku tshibuelelu tshia tshiibi tshia tshimenga pavua eku bena Sulia ba ku Soba ne ba ku Lehoba pamue ne Ishitobo* ne Mâka bikale mu mpata pa nkayabu.

9 Pavua Yoaba mumone ne: basalayi bavua benda bamuluila kumpala ne panyima, wakasungula bamue ba ku basalayi bavua bamanye mvita bikole mu Isalele, yeye kubelesha mualu wa mvita bua baluangane ne bena Sulia.+ 10 Bantu bavua bashale, wakabateka ku bulombodi bua* muanabu Abishai+ bua abeleshe mualu wa mvita bua baluangane ne bena Amona.+ 11 Ke yeye kuamba ne: “Bena Sulia bobu bampite bukole, dîba adi udi ne bua kulua bua kunsungila; kadi bena Amona bobu bakupite bukole, nendue kukusungila. 12 Tudi ne bua kuikala ne bukole ne dikima+ bua tshisamba tshietu ne bua bimenga bia Nzambi wetu; ne Yehowa neenze tshidi tshimpe ku mêsu kuende.”+

13 Pashishe Yoaba ne bantu bende bakaya bua kuluangana ne bena Sulia, bobu kunyema kumpala kuende.+ 14 Pavua bena Amona bamone ne: bena Sulia bavua banyeme, bakanyema Abishai, kubuelabu mu tshimenga. Panyima pa bualu ebu Yoaba wakumbuka kudi bena Amona, yeye kulua ku Yelushalema.

15 Pavua bena Sulia bamone ne: Isalele uvua mubatshimune, bakadisangisha kabidi.+ 16 Nunku Hadadezê+ wakabikidisha bena Sulia ba mu tshitupa tshia buloba tshia Musulu,*+ ne pashishe bakalua ku Helama, Shobaka mfumu wa tshiluilu tshia Hadadezê muikale ubalombola.

17 Pakambilabu Davidi bualu ebu, wakasangisha diakamue Isalele mujima, kusabukaye Yadene, kufikaye ku Helama. Nunku bena Sulia bakela mualu wa mvita bua kuluangana ne Davidi, bobu kuluangana nende.+ 18 Kadi bena Sulia bakanyema Isalele; Davidi wakashipa bena Sulia 700 bavua bendesha matempu ne bakuabu binunu 40 bavua bendesha tubalu, ne wakashipa Shobaka mfumu wa tshiluilu tshiabu, yeye kufuila muaba au.+ 19 Pavua bakalenge bonso, bena mudimu ba Hadadezê, bamone ne: Isalele uvua mubatshimune, diakamue bakalengejangana ne Isalele, bobu kutuadija kubakokela;+ bena Sulia bakavua batshina bua kuambuluisha kabidi bena Amona.

11 Ku ntuadijilu kua tshidimu,* dîba ditu bakalenge baya ku mvita, Davidi wakatuma Yoaba ne bena mudimu bende ne tshiluilu tshijima tshia Isalele bua kubutula bena Amona, ne bakatshintshimika Laba,+ pavua Davidi yeye mushale mu Yelushalema.+

2 Dilolo kampanda* Davidi wakajuka pa bulalu buende ne uvua wendakana kuulu kua nzubu* wa mukalenge. Pavuaye kuulu aku wakamona mukaji kampanda wowa mâyi, ne mukaji au uvua muimpe be! 3 Davidi wakatuma muntu bua kuebeja bua mukaji au, ne muntu au kulua kumuambila ne: “M’Beta-sheba+ muana wa Eliyama+ ne mmukaji wa Uliya+ muena Hiti.”+ 4 Ke Davidi kutuma bantu bua balue nende.+ Nunku wakalua kudiye, ne yeye wakalala nende.+ (Bualu ebu buakenzeka pavua Beta-sheba udilengeja ku bukoya buende.*)+ Pashishe Beta-sheba wakapingana kuende.

5 Mukaji au wakapeta difu, kutuminaye Davidi mukenji ne: “Ndi ne difu.” 6 Ke Davidi kutumina Yoaba mukenji ne: “Ntumina Uliya muena Hiti.” Nunku Yoaba wakatuma Uliya kudi Davidi. 7 Pavua Uliya mufike kudi Davidi, Davidi wakamukonka bua kumanya muvua Yoaba, muvua bisumbu bia basalayi ne muvua mvita yenzeka. 8 Pashishe Davidi wakambila Uliya ne: “Pueka ku nzubu kuebe, wikishe.”* Pavua Uliya mumbuke mu nzubu mua mukalenge, bakamulonda ne dipa dia kumutua nadi mushinga dia kudi mukalenge.* 9 Kadi Uliya wakalala ku tshibuelelu tshia nzubu wa mukalenge pamue ne bena mudimu ba mfumuende bakuabu, ne kakapueka kuende to. 10 Nunku bakambila Davidi ne: “Uliya kavua mupueke kuende to.” Ke Davidi kuebeja Uliya ne: “Wewe kuena ufuma ku luendu anyi? Bua tshinyi kuvua mupueke kuebe?” 11 Uliya wakandamuna Davidi ne: “Mushete+ ne Isalele ne Yuda mbisombe mu bisaasa, ne mfumuanyi Yoaba ne bena mudimu ba mfumuanyi mbatudile mu mpata. Nunku meme ndi ne bua kuya kuanyi bua kudia ne kunua ne kulala ne mukajanyi anyi?+ Bulelela, bu muudi wewe ne muoyo ne upuyakana,* tshiakuenza bualu ebu to!”

12 Pashishe Davidi wakambila Uliya ne: “Shala kabidi muaba eu lelu, ne malaba nenkulekele uye.” Nunku Uliya wakashala mu Yelushalema dituku adi ne dituku diakalonda. 13 Pashishe Davidi wakamubikidisha bua alue kudia nende ne kunua nende, yeye kuenza bua akuatshike. Kadi dilolo, wakapatuka bua kulala pa bulalu buende ne bena mudimu ba mfumuende, ne kakapueka kuende to. 14 Mu dinda Davidi wakafundila Yoaba mukanda, kuwutumaye ku tshianza tshia Uliya. 15 Uvua mufunde mu mukanda ne: “Teka Uliya ku milongo ya kumpala muaba udi mvita mikole menemene. Pashishe numulekele nupingane panyima pende bua bamukume afue.”+

16 Yoaba uvua mutangile tshimenga bimpe menemene, kutekaye Uliya muaba uvuaye mumanye ne: uvua bilobo bia mvita. 17 Pavua bantu ba mu tshimenga bapatuke ne baluangane ne Yoaba, bakashipa bamue bena mudimu ba Davidi, ne Uliya muena Hiti uvua munkatshi mua bantu bavua bafue.+ 18 Mpindieu Yoaba wakatumina Davidi ngumu yonso ya ku mvita. 19 Wakambila muntu uvua uya ne mukenji ne: “Paudi ujikija kuambila mukalenge ngumu yonso ya ku mvita, 20 mukalenge udi mua kufiika munda ne kukuambila ne: ‘Bua tshinyi nuvua ne bua kusemena pabuipi ne tshimenga nanku bua kuluangana? Kanuvua bamanye ne: bavua mua kunuashila mikete kuulu kua tshimanu anyi? 21 Nnganyi uvua mushipe Abimeleke+ muana wa Yelubesheta?+ Ki mmuntu mukaji kampanda uvua mumuashile dibue dia mpelu kuulu kua tshimanu, kumushipadi ku Tebese anyi? Bua tshinyi nuvua ne bua kusemena pabuipi ne tshimanu nanku?’ Dîba adi wambe ne: ‘Muena mudimu webe Uliya muena Hiti mmufue pende.’”

22 Nunku muntu au wakaya kudi Davidi, kumuambilaye malu onso avua Yoaba mumutume bua kuamba. 23 Pashishe muntu au wakambila Davidi ne: “Bantu babu bavua batupite bukole, ne bavua bapatuke bua kutuela mvita mu mpata; kadi tuvua babapingaje too ne ku tshibuelelu tshia tshiibi tshia tshimenga. 24 Bedi ba mikete bavua benda bashila bena mudimu bebe mikete kuulu kua tshimanu, ne bamue ba ku bena mudimu ba mukalenge mbafue; muena mudimu webe Uliya muena Hiti mmufue pende.”+ 25 Ke Davidi kuambila muntu au ne: “Ambila Yoaba ne: ‘Bualu ebu kabukupampakaji to, bualu muele wa mvita udi udia muntu yonso tshianana tshianana. Luishayi tshimenga atshi bikole, nutshikuate.’+ Pashishe umukankamije.”

26 Pavua mukaji wa Uliya mumvue ne: bayende Uliya uvua mufue, wakatuadija kudila bayende. 27 Diakamue pakajika tshikondo tshia madilu, Davidi wakamubikidisha ne wakamubueja kuende, kuluaye mukajende+ ne kumulelelaye muana wa balume. Kadi bualu buvua Davidi muenze buvua bunyingalaje* Yehowa bikole.+

12 Nunku Yehowa wakatuma Natana+ kudi Davidi. Wakaya kudiye,+ kumuambilaye ne: “Kuvua bantu babidi mu tshimenga tshikuabu, umue uvua mubanji, mukuabu mupele. 2 Muntu mubanji uvua ne mikoko ne ngombe bia bungi menemene;+ 3 kadi muntu mupele kavua ne kantu, uvua anu ne kana ka mukoko kakaji ka kakese kavuaye musumbe.+ Uvua ukalama, koku kukola pamue nende ne bana bende ba balume. Kavua kadia biakudia bikese bivuaye nabi, kanua bintu bia mu dikopo diende, ne kalala mu maboko ende. Kakalua kudiye anu bu muanende wa bakaji. 4 Dituku dikuabu muenyi wakakuata muntu mubanji, kadi kavua muangate mukoko wende anyi ngombe wende nansha umue bua kulambila muenyi uvua mulue kudiye to. Pamutu pa nanku, wakangata kana ka mukoko ka muntu mupele, yeye kukalambila muntu uvua mulue kudiye au.”+

5 Ke Davidi kumvuila muntu au tshiji tshikole, kuambilaye Natana ne: “Bushuwa, anu bu mudi Yehowa ne muoyo,+ muntu udi muenze bualu bua nunku mmukumbanyine lufu! 6 Pashishe udi ne bua kufuta kana ka mukoko aku misangu inayi,+ bualu mmuenze bualu ebu kayi luse.”

7 Ke Natana kuambila Davidi ne: “Muntu au nguewe! Yehowa Nzambi wa Isalele udi wamba ne: ‘Meme nkayanyi mvua mukuele manyi bua wikale mukalenge mu Isalele,+ ne mvua mukusungile mu tshianza tshia Shaula.+ 8 Mvua musue kukupesha nzubu wa mfumuebe+ ne kuteka bakaji ba mfumuebe+ mu maboko ebe, ne mvua mukupeshe nzubu wa Isalele ne wa Yuda.+ Bienze anu bu ne: abi kabivua bikumbane, mvua musue kukuenzela malu a bungi kupita apu.+ 9 Bua tshinyi uvua mupetule dîyi dia Yehowa pa kuenza bualu bubi ku mêsu kuende? Uvua mushipe Uliya muena Hiti ne muele wa mvita!+ Pashishe wewe kuangata mukajende bua alue mukajebe+ wewe mumane kumushipa ku muele wa mvita wa bena Amona.+ 10 Mpindieu muele wa mvita kawakumbuka mu nzubu muebe kashidi,+ bualu udi mumpetule pa kuangata mukaji wa Uliya muena Hiti bu mukajebe.’ 11 Yehowa udi wamba ne: ‘Mona, ndi nkutumina dikenga diafumina mu nzubu muebe wewe;+ ne nengangate bakaji bebe, nembapeshe muntu mukuabu* ku mêsu kuebe,+ ne yeye nealale ne bakaji bebe munda munya.*+ 12 Nansha muuvua wewe muenze bualu ebu mu musokoko,+ meme nengenze nunku kumpala kua Isalele mujima munda munya.’”*

13 Ke Davidi kuambila Natana ne: “Ndi muenzele Yehowa mpekatu.”+ Natana kuandamuna Davidi ne: “Yehowa pende udi ukufuila luse bua mpekatu webe.*+ Kuakufua to.+ 14 Tshidibi, bu muudi muenzele Yehowa malu ne dipanga kanemu dikole mu bualu ebu, muana udibu bafuma ku dikulelela neafue bulelela.”

15 Pashishe Natana wakapingana kuende.

Nunku Yehowa wakakuma muana uvua mukaji wa Uliya mulelele Davidi, yeye kubanga kusama. 16 Davidi wakasengelela Nzambi mulelela bua bualu bua muana au. Davidi wakajila biakudia ne muoyo umue, ne uvua ubuela mu nzubu, ulala panshi butuku bujima.+ 17 Nunku bakulu ba mu nzubu muende bavua bimana ku luseke luende, bateta bua kumujula panshi, kadi uvua ubenga, ne kavua udia nabu to. 18 Dituku dia muanda mutekete muana wakafua, kadi bena mudimu ba Davidi bavua batshina bua kumuambila ne: muana uvua mufue. Bakamba ne: “Patshivua muana ne muoyo tuvua tuyukila nende, kavua ututeleja to. Mpindieu mmunyi mutudi mua kumuambila ne: muana mmufue? Udi mua kuenza bualu bubi menemene.”

19 Pavua Davidi mumone ne: bena mudimu bende bavua banungana munkatshi muabu, wakajingulula ne: muana uvua mufue. Davidi wakebeja bena mudimu bende ne: “Muana mmufue anyi?” Bobu kuandamuna ne: “Mmufue.” 20 Nunku Davidi wakajuka panshi. Wakuowa mâyi, kudilabaye mafuta,+ kushintululaye bilamba, kuyaye ku nzubu+ wa Yehowa, ne kutuaye mpala panshi. Pashishe wakabuela mu nzubu* muende, kulombaye bua bamutuadile biakudia, yeye kudia. 21 Bena mudimu bende bakamuebeja ne: “Bua tshinyi udi muenze malu mushindu eu? Patshivua muana ne muoyo, uvua mujile biakudia, udila anu kudila; kadi diakamue padi muana mufue, udi mujuke panshi ne mudie biakudia.” 22 Wakandamuna ne: “Patshivua muana ne muoyo, mvua mujile biakudia,+ ndila anu kudila, bualu mvua ndiambila ne: ‘Nnganyi udi mumanye bikala Yehowa mua kungumvuila ne kulekela muana ne muoyo?’+ 23 Mpindieu udiye mufue, bua tshinyi ndi ne bua kujila biakudia? Ndi mua kumualuja anyi?+ Meme nenye kudiye,+ kadi yeye kakupingana kundi to.”+

24 Pashishe Davidi wakasamba mukajende Beta-sheba.+ Wakabuela kudiye, kulalaye nende. Pakapita matuku, wakamulelela muana wa balume, kumuinyikabu ne: Solomo.*+ Yehowa uvua mumunange,+ 25 yeye kutuma muprofete Natana ne dîyi+ bua bamuinyike ne: Yedidiya,* bua bualu bua Yehowa.

26 Yoaba wakatungunuka ne kuluisha Laba+ wa bena Amona,+ yeye kukuata tshimenga tshia bakalenge.*+ 27 Nunku Yoaba wakatuma bantu ne mukenji kudi Davidi, kuambaye ne: “Ndi muluishe Laba,+ ne ndi mukuate tshimenga tshia mâyi.* 28 Mpindieu sangisha bisumbu bia basalayi bidi bishale, wase tshitudilu bua kuluisha tshimenga, utshikuate. Tshianana, meme ke muntu wakuata tshimenga, ne nebambe ne: meme ke udi mutshikuate.”*

29 Nunku Davidi wakasangisha bisumbu bionso bia basalayi, kuyaye ku Laba, kuluishaye tshimenga atshi, yeye kutshikuata. 30 Pashishe wakangata tshifulu tshia bukalenge tshivua ku mutu kua Malakama. Bujitu buatshi buvua bua ntalanta* mujima wa or, pamue ne mabue a mushinga mukole, ne bakatshiasa Davidi ku mutu. Wakangata kabidi bintu bia bungi bivuabu banyenge+ mu tshimenga.+ 31 Wakapatula bantu bavuamu, yeye kubateka ku mudimu wa dipanda mabue ne nsele,* wa dienza mudimu ne biamu bitue ne tusuyi tua biamu, ne ku dienza madioto. Ke tshivuaye wenzela bimenga bionso bia bena Amona. Ndekelu wa bionso, Davidi ne bisumbu bionso bia basalayi bakapingana ku Yelushalema.

13 Mpindieu Abashaloma muana wa Davidi uvua ne muanabu wa bakaji mukuabu muimpe be! Dîna diende divua Tamâ,+ ne Amenona+ muana wa Davidi wakamunanga. 2 Bualu abu buvua butonde Amenona bikole, yeye kufika too ne ku disama bua bualu bua muanabu Tamâ, bualu utshivua kamama, ne bivua bimueneka ne: kakuvua mushindu wa Amenona kumuenzela bualu nansha bumue to. 3 Kadi Amenona uvua ne mulunda wende mukuabu dîna diende Yonadaba*+ muana wa Shimea+ muanabu ne Davidi; Yonadaba uvua muntu wa lungenyi lua bungi be! 4 Nunku wakamuebeja ne: “Bua tshinyi, wewe muana wa mukalenge, udi anu mubungame dinda dionso? Kuena ungambila anyi?” Amenona wakamuandamuna ne: “Ndi munange Tamâ, muanabu+ ne muanetu Abashaloma.” 5 Yonadaba wakamuambila ne: “Lala pa bulalu, wenze bu udi usama. Padi tatuebe ulua bua kukumona, umuambile ne: ‘Anyishaku bua muanetu Tamâ alue kumpesha biakudia. Yeye mulambe biakudia bitubu bapesha bantu badi basama* mu mêsu muanyi, nembidie ku tshianza tshiende.’”

6 Nunku Amenona wakalala, yeye kuenza bu udi usama, ne mukalenge wakalua bua kumumona. Pashishe Amenona wakambila mukalenge ne: “Anyishaku bua muanetu Tamâ alue kungenzela mikata ibidi mienze bu muoyo mu mêsu muanyi, bua ndiile biakudia ku tshianza tshiende.” 7 Ke Davidi kutuminaye Tamâ mukenji ku nzubu wamba ne: “Ndaku koku ku nzubu kua muanenu Amenona, umulambile biakudia.”* 8 Nunku Tamâ wakaya ku nzubu kua muanabu Amenona, kuvuaye mulale. Wakangata bukula bumana kusopa, kububetakajaye mu mêsu muende, kuenzaye mikata. 9 Pashishe wakangata mpanu, yeye kumupesha biakudia. Kadi Amenona wakabenga bua kudia, yeye kuamba ne: “Patulayi bantu bonso muaba eu!” Nunku bantu bonso bakamushiya.

10 Mpindieu Amenona wakambila Tamâ ne: “Luaku ne biakudia* mu nzubu wa bulalu, bua mbidiile ku tshianza tshiebe.” Nunku Tamâ wakangata mikata mienze bu muoyo ivuaye muenze, kuyaye nayi kudi muanabu Amenona mu nzubu wa bulalu. 11 Pakayaye nayi kudiye bua yeye kudia, wakamukuata, kuambaye ne: “Luaku ulale nanyi muanetu wa bakaji.” 12 Kadi yeye wakamuambila ne: “Tòo, muanetu wa balume! Kumfuishi bundu to, bualu, bualu bua mushindu eu kabutu buenzeka mu Isalele to.+ Kuenji bualu bubi bua bundu ebu to.+ 13 Nengenze tshinyi bua bantu bapue bundu buanyi muoyo? Wewe pebe nebakumone bu muntu mubi menemene mu Isalele. Mpindieu akula koku ne mukalenge, bualu yeye kakubenga bua kumfila kuudi to.” 14 Kadi wakabenga bua kumuteleja, yeye kumupita bukole, kumufuishaye bundu pa kulala nende ku bukole. 15 Pashishe Amenona wakabanga kumukina ne lukinu lukole menemene, kuenzekabi ne: lukinu luvuaye mumukine nalu luakalua lukole kupita dinanga divuaye mumunange nadi. Amenona wakamuambila ne: “Juka, katuka apa!” 16 Ke yeye kumuambila ne: “Tòo, muanetu wa balume, bualu kungipata mpindieu nkubi kupite bualu buudi mungenzele!” Kadi wakabenga bua kumuteleja.

17 Ke yeye kubikila nsongalume uvua umuambuluisha, kuambaye ne: “Umbushaku muntu eu kumpala kuanyi, ne ukange tshiibi paudi umupatula.” 18 (Mpindieu yeye uvua muvuale nkanzu wa pa buende,* bualu abi ke bilamba bivua bana ba bakaji ba mukalenge batshivua tumama bavuala.) Nunku muntu uvua umuambuluisha wakapatula Tamâ pambelu, yeye kukanga tshiibi pavuaye mumupatule. 19 Pashishe Tamâ wakadiela butu mu mutu,+ kudipandaye nkanzu muimpe menemene uvuaye muvuale; wakaditeka bianza mu mutu, kuyaye wenda udila ne dîyi dikole.

20 Ke muanabu Abashaloma+ kumuebeja ne: “Unuvua nende mmuanenu Amenona anyi? Mpindieu shala mupuwe muanetu wa bakaji. Yeye mmuanenu wa balume.+ Kulami bualu ebu ku muoyo webe to.” Nunku Tamâ wakasomba ku nzubu kua muanabu Abashaloma kayi umonangana ne bantu to. 21 Pavua mukalenge Davidi mumvue malu onso aa, wakumvua tshiji tshikole.+ Kadi kavua musue kubungamija muanende Amenona to, bualu uvua mumunange bu muvuaye muanende muanabute. 22 Abashaloma pende kakambila Amenona bualu nansha bumue, buimpe anyi bubi to; bualu Abashaloma uvua mukine+ Amenona bu muvuaye mufuishe muanabu Tamâ bundu+.

23 Panyima pa bidimu bibidi bijima, bakoshi ba miosa ya mikoko ba Abashaloma bavua ku Bâla-hasô, pabuipi ne Efelayima,+ ne Abashaloma wakabikidisha bana ba mukalenge bonso.+ 24 Nunku Abashaloma wakaya kudi mukalenge, kuambaye ne: “Muena mudimu webe udi ukosesha miosa ya mikoko yende. Tuye koku ne mukalenge ne bena mudimu bende.” 25 Kadi mukalenge wakambila Abashaloma ne: “Tòo, muananyi. Tuetu baye nebe bonso, netuikale bujitu kuudi.” Nansha muvuaye anu umuela mutoyi, wakabenga bua kuya, kadi wakamubenesha. 26 Ke Abashaloma kuamba ne: “Wewe mubenge wewe, anyisha tuye ne muanetu Amenona.”+ Mukalenge wakamuandamuna ne: “Aye nebe bua tshinyi?” 27 Kadi Abashaloma wakamuela mutoyi, nunku yeye kumupesha Amenona ne bana ba mukalenge bonso bua kuyabu nende.

28 Pashishe Abashaloma wakatumina bantu bavua bamuambuluisha dîyi ne: “Tentekelayi Amenona, ne padi muoyo wende umvua bimpe bua mvinyo, nennuambile ne: ‘Shipayi Amenona!’ Dîba adi nudi ne bua kumushipa. Kanutshinyi to. Ki mmeme udi munutumine dîyi anyi? Ikalayi ne bukole ne dikima.” 29 Nunku bantu bavua bambuluisha Abashaloma bakenzela Amenona anu muvua Abashaloma mubatumine dîyi bua kuenza; ke bana ba mukalenge bonso kujuka, muntu yonso kubandaye pa mpunda wende, kunyemaye. 30 Patshivuabu mu njila, lumu luakafika kudi Davidi ne: “Abashaloma mmushipe bana ba mukalenge bonso, muana nansha umue ki mmupande to.” 31 Ke mukalenge kujuka, kudipandaye bilamba, kulalaye panshi, ne bena mudimu bende bonso bavua bimane pabuipi nende ne bilamba biabu bipanda.

32 Kadi Yonadaba+ muana wa Shimea+ muanabu ne Davidi wakamba ne: “Mukalenge wanyi kedi meji ne: mbashipe bansongalume bonso ba mukalenge to, bualu anu Amenona ke udi mufue.+ Mmufue ku dîyi dia Abashaloma ukavua mupangadije bualu ebu+ katshia ku dituku divua Amenona mufuishe muanabu+ Tamâ bundu.+ 33 Mpindieu mfumu mukalenge wanyi kateleji* lumu lua ne: ‘Bana ba mukalenge bonso mbafue’ to; anu Amenona ke udi mufue.”

34 Pine apu, Abashaloma wakanyema.+ Pashishe nsentedi wakajula mêsu ende, kumonaye ne: kuvua bantu ba bungi bavua benda balua bafumina mu njila uvua panyima pende ku luseke lua mukuna. 35 Ke Yonadaba+ kuambila mukalenge ne: “Tangila! Bana ba mukalenge mbalukile. Bidi anu muvua muena mudimu webe mukuambile amu.” 36 Pakajikijaye kuakula, bana ba mukalenge bakabuela benda badila ne dîyi dikole; mukalenge ne bena mudimu bende bonso bakadila pabu ne kanyinganyinga kakole. 37 Kadi Abashaloma wakanyema, kuyaye kudi Talemai+ muana wa Amihuda mukalenge wa Geshû. Davidi wakadila muanende matuku a bungi. 38 Abashaloma mumane kunyema muye ku Geshû,+ wakashala kuntu aku bidimu bisatu.

39 Ndekelu wa bionso, mukalenge Davidi wakapeta dijinga dikole dia kuya kudi Abashaloma, bualu ukavua mukole ku muoyo bua* lufu lua Amenona.

14 Mpindieu Yoaba muana wa Seluya+ wakumvua ne: muoyo wa mukalenge uvua ujinga Abashaloma bikole.+ 2 Nunku Yoaba wakatuma muntu ku Tekoa+ bua kubikidisha mukaji kampanda uvua ne lungenyi lua bungi, kumuambilaye ne: “Enzaku malu bu muntu udi mu madilu, vuala bilamba bia madilu ne kudilabi mafuta to.+ Enza malu bu mukaji udi mu madilu a muntu udi mufue kukadi matuku a bungi. 3 Pashishe uye kudi mukalenge ne umuambile nunku.” Ke Yoaba kuteka mêyi mukana mua mukaji au.*

4 Mukaji muena Tekoa wakaya kudi mukalenge, kudielaye panshi, kutuaye mpala panshi, kuambaye ne: “Mukalenge wanyi, ngambuluishaku!” 5 Mukalenge wakamuebeja ne: “Udi ne bualu kayi?” Ke yeye kuamba ne: “Aka! Ndi mukaji mukamba; bayanyi ukadi mufue. 6 Meme muena mudimu webe mvua ne bana babidi ba balume, ne bana babidi abu bakaluangana mu budimi. Kakuvua muntu wa kubasunga to, ne umue wakatuta mukuabu, kumushipaye. 7 Mpindieu dîku dijima ndinjukile meme muena mudimu webe kuulu, ne badi bamba ne: ‘Tupesha muana uvua mushipe muanabu bua tumushipe bua muoyo* wa muanabu uvuaye mushipe,+ nansha biobi bilomba kujimija mupianyi!’ Mbasue kujima dikala dia kapia dia ndekelu dimvua mushale nadi* ne kushiya bayanyi kayi ne dîna anyi muntu udi ne muoyo* pa buloba.”

8 Ke mukalenge kuambila mukaji au ne: “Ndaku kuebe, ne meme nentume dîyi bua bualu buebe.” 9 Ke mukaji muena Tekoa kuambila mukalenge ne: “Mfumu mukalenge wanyi, dipila dikale pambidi panyi ne pa mutu pa nzubu wa tatuanyi, padi eku mukalenge ne nkuasa wende wa bukalenge bikale kabiyi ne bualu.” 10 Nunku mukalenge wakamuambila ne: “Muntu yeye mukuambile bualu bukuabu, ulue nende kundi, ne kakukutatshisha kabidi to.” 11 Kadi wakamba ne: “Mukalenge avulukaku Yehowa Nzambi webe, bua musombuedi wa mashi+ kanyangakaji malu ne kabutudi muananyi to.” Ke mukalenge kuamba ne: “Bushuwa anu bu mudi Yehowa ne muoyo,+ lusuki lua muanebe nansha lumue kaluakumata panshi to.” 12 Nunku mukaji au wakamba ne: “Muena mudimu webe ambilaku mfumu mukalenge wanyi dîyi.” Ke yeye kuamba ne: “Akula!”

13 Mukaji au wakamba ne: “Kadi bua tshinyi udi muele meji bua kuenzela tshisamba tshia Nzambi bualu bua mushindu eu?+ Padi mukalenge wakula mushindu eu, udi udipisha nkayende, bualu mukalenge kena upingaja muanende yeye uvuaye muipate.+ 14 Bushuwa, netufue ne netuikale bu mâyi adibu bitshikije panshi, adibu kabayi mua kupetulula kabidi. Kadi Nzambi kakujimija muoyo wa muntu,* ne udi ukonkonona malu adi mua kuenza bua ne: muntu uvua muipatshibue kikadi anu muipatshibue kudiye. 15 Ndi mulue kuambila mfumu mukalenge wanyi bualu ebu, bualu bantu bavua bankuatshishe buôwa. Ke bualu kayi muena mudimu webe uvua muambe ne: ‘Ngakulaku ne mukalenge. Pamuapa mukalenge neenze tshidi mupika wende mulombe. 16 Mukalenge udi mua kunteleja ne kusungila mupika wende mu tshianza tshia muntu udi ukeba kunjimija meme ne muananyi umuepele mu bumpianyi buvua Nzambi mutupeshe.’+ 17 Ke muena mudimu webe kuamba ne: ‘Dîyi dia mfumu mukalenge wanyi dimpeshaku disulakana,’ bualu mfumu mukalenge wanyi udi anu bu muanjelu wa Nzambi mulelela mu disunguluja tshidi tshimpe ne tshidi tshibi. Yehowa Nzambi webe ikale nebe.”

18 Ke mukalenge kuambila mukaji au ne: “Kunsokoki koku bualu nansha bumue bundi nkuebeja to.” Mukaji au wakandamuna ne: “Mfumu mukalenge wanyi akule koku.” 19 Ke mukalenge kuebeja ne: “Yoaba ke udi mukusake bua kuenza bionso ebi anyi?”+ Mukaji au wakandamuna ne: “Bushuwa anu bu muudi wewe* mfumu mukalenge wanyi ne muoyo, bidi anu bu mudi* mfumu mukalenge wanyi muambe, bualu muena mudimu webe Yoaba ke uvua mungambile tshia kuenza ne muteke mêyi onso aa mukana mua muena mudimu webe. 20 Muena mudimu webe Yoaba mmuenze nunku bua kushintulula mushindu udi malu amueneka, kadi mukalenge wanyi udi ne meji bu a muanjelu wa Nzambi mulelela ne mmumanye malu onso adi enzeka mu buloba.”

21 Pashishe mukalenge wakambila Yoaba ne: “Mbimpe, nengenze bualu ebu.+ Ndaku ulue ne nsongalume Abashaloma au.”+ 22 Ke Yoaba kudiela panshi, kutuaye mpala panshi, kutumbishaye mukalenge. Yoaba wakamba ne: “Lelu muena mudimu webe mmumanye ne: ndi mukulengelele, mfumu mukalenge wanyi, bualu mukalenge mmuenze malu bilondeshile dilomba dia muena mudimu wende.” 23 Pashishe Yoaba wakajuka, kuyaye ku Geshû,+ kualukilaye ne Abashaloma ku Yelushalema. 24 Kadi mukalenge wakamba ne: “Apingane ku nzubu kuende, kadi kena mua kumona mpala wanyi to.” Nunku Abashaloma wakapingana ku nzubu kuende, ne kakamona mpala wa mukalenge to.

25 Mpindieu mu Isalele mujima kakuvua muntu uvuabu batumbisha bua tshimuenekelu tshiende tshimpe bu Abashaloma to. Kumbukila muinshi mua dikasa too ne ku lubombo lua mutu, kavua ne kalema nansha kamue to. 26 Pavuaye ukungula mutu wende (uvua ne bua kuwukungula ku ndekelu kua tshidimu tshionso bualu nsuki ivua imunemena bujitu), nsuki ya ku mutu kuende ivua ne bujitu bua nshekele 200* bilondeshile dibue dia kupima nadi dia bukalenge.* 27 Bakalelela Abashaloma bana basatu ba balume,+ ne umue wa bakaji dîna diende Tamâ. Uvua mukaji muimpe be!

28 Abashaloma wakashala mu Yelushalema bidimu bibidi bijima, kadi kakamona mpala wa mukalenge to.+ 29 Nunku Abashaloma wakabikidisha Yoaba bua kumutuma kudi mukalenge, kadi Yoaba wakabenga bua kulua kudiye. Pashishe wakamutumina kabidi bantu musangu muibidi, yeye kubenga kabidi bua kulua. 30 Ndekelu wa bionso wakambila bena mudimu bende ne: “Budimi bua Yoaba budi ku luseke lua buanyi, ne udi ne orje mu budimi amu. Ndayi nubutue kapia.” Nunku bena mudimu ba Abashaloma bakatua budimi abu kapia. 31 Ke Yoaba kujuka, kuyaye ku nzubu kua Abashaloma, kumuebejaye ne: “Bua tshinyi bena mudimu bebe mbatue budimi buanyi kapia?” 32 Abashaloma wakandamuna Yoaba ne: “Tangila! Mvua mukutumine mukenji eu ne: ‘Luaku nkutume kudi mukalenge bua kumuebeja ne: “Bua tshinyi ndi mumbuke ku Geshû?+ Buanyi meme bivua mua kuikala bimpe bu meme mushale kuntu aku. Mpindieu anyisha mmone mpala wa mukalenge, ne bingikala mupile, dîba adi neanshipe.”’”

33 Nunku Yoaba wakaya kudi mukalenge, yeye kumuambila bualu abu. Pashishe wakabikila Abashaloma, kuluaye kudi mukalenge, kudielaye panshi kumpala kua mukalenge, kutuaye mpala panshi kumpala kuende. Pashishe mukalenge wakatua Abashaloma mishiku.+

15 Panyima pa malu onso aa, Abashaloma wakapeta ditempu ne tubalu ne bantu 50 bua bikale banyema kumpala kuende.+ 2 Abashaloma uvua ujuka mu dinda menemene ne wimana kumpenga kua njila uvua muye mutangile ku tshiibi tshia tshimenga.+ Dîba dionso divua muntu ne tshilumbu tshivua ne bua kuya kudi mukalenge bua atshikose,+ Abashaloma uvua umubikila, wamba ne: “Wewe udi wa mu tshimenga kayi?” ne muntu uvua wamba ne: “Muena mudimu webe ngua mu tshisa kampanda tshia mu Isalele.” 3 Abashaloma uvua umuambila ne: “Mona, malu audi ulomba mmajalame ne mmakumbane, kadi kakuena muntu wa kua mukalenge udi mua kuteleja tshilumbu tshiebe to.” 4 Abashaloma uvua wamba ne: “Bu bobu nansha mua kunteka meme mulumbuluishi mu buloba ebu! Dîba adi muntu yonso udi ne tshilumbu anyi udi ujinga bua bakose tshilumbu kampanda uvua mua kulua kundi, ne meme mvua mua kulondesha bua batshilumbuluishe bimpe.”

5 Pavua muntu usemena bua kuinamina Abashaloma, Abashaloma uvua olola tshianza tshiende, umukuata ne umutua mishiku.+ 6 Abashaloma uvua wenzela bena Isalele bonso bavua balua kudi mukalenge bua akose bilumbu biabu nanku; nunku Abashaloma uvua anu wiba mioyo ya bantu ba mu Isalele.+

7 Ku ndekelu kua bidimu binayi,* Abashaloma wakambila mukalenge ne: “Nganyishila koku nye ku Hebelone+ bua kukumbaja mutshipu umvua muenze kudi Yehowa. 8 Bualu muena mudimu webe uvua muenze mutshipu eu ne muoyo mujima+ pamvua musombele mu Geshû+ mu Sulia ne: ‘Yehowa yeye mumpingaje ku Yelushalema, nemfile mulambu kudi* Yehowa.’” 9 Nunku mukalenge wakamuambila ne: “Ndaku mu ditalala.” Ke yeye kujuka, kuyaye ku Hebelone.

10 Mpindieu Abashaloma wakatuma batentekedi mu bisa bionso bia Isalele, wamba ne: “Diakamue panudi numvua muadi wa mpungi, nuambe ne: ‘Abashaloma mmulue mukalenge mu Hebelone!’”+ 11 Mpindieu bantu 200 ba mu Yelushalema bavua baye kuntu aku ne Abashaloma; bavua bababikile ne bakaya kabayi bamanye bualu, kabayi bamanye tshivua tshienzeka. 12 Kabidi pavua Abashaloma mufile milambu, wakabikidisha Ahitofele+ muena Gilo, mufidi wa mibelu* wa Davidi,+ mu tshimenga tshiabu tshia Gilo+ bua alue kudiye. Tshifufu tshivua anu tshienda tshidiunda ne bantu bavua ku luseke lua Abashaloma bavua benda bavula.+

13 Pakapita matuku muntu wakalua kumanyisha Davidi wamba ne: “Muoyo wa bantu ba mu Isalele mmuye kudi Abashaloma.” 14 Diakamue Davidi wakambila bena mudimu bende bonso bavuaye nabu mu Yelushalema ne: “Jukayi tunyeme,+ bualu muntu nansha umue wa kutudi kakupanduka kudi Abashaloma to! Enzayi lukasa bua kalu kutukuata lukasa, kutukebela dikenga ne kubutula tshimenga ne muele wa mvita!”+ 15 Bena mudimu ba mukalenge bakandamuna mukalenge ne: “Bualu buonso budi mfumu mukalenge wanyi upangadija, bena mudimu bebe badi pabuipi bua kubuenza.”+ 16 Nunku mukalenge wakapatuka ne ba mu nzubu muende bonso benda bamulonda, kadi mukalenge wakashiya bakaji dikumi bavuaye mubanjije+ bua kulama nzubu.* 17 Mukalenge wakatungunuka ne kuya pamue ne bantu bavua bamulonda, ne bakimana ku Bete-mêhaka.

18 Bena mudimu bende bonso bavua baye nende* ne bena Kelete bonso, bena Pelete bonso,+ ne bena Gata bonso,+ bantu balume 600 bavua bamulonde kumbukila ku Gata,+ bavua benda bapita pavua eku mukalenge wenda ubakonkonona.* 19 Pashishe mukalenge wakambila Itai+ muena Gata ne: “Bua tshinyi wewe pebe udi uya netu? Pingana ushale ne mukalenge mupiamupia bualu wewe udi muntu wa ku babende ne udi kabidi munyeme kuenu. 20 Udi mulue anu malaba eu, nunku lelu ndi ne bua kuenza bua utambakane netu, bua kuya dîba dindi ne bua kuya ne kuya muaba undi ne bua kuya anyi? Angata bana benu upingane nabu, ne Yehowa akuleje dinanga dia lulamatu ne lulamatu!”+ 21 Kadi Itai wakandamuna mukalenge ne: “Bushuwa anu bu mudi Yehowa ne muoyo ne bushuwa anu bu mudi mfumu mukalenge wanyi ne muoyo, muaba wonso wikala mfumu mukalenge wanyi, nansha bua lufu nansha bua muoyo, muaba au ke wikala muena mudimu webe!”+ 22 Ke Davidi kuambila Itai ne:+ “Ndaku usambuluke.” Nunku Itai muena Gata wakasambuluka pamue ne bantu bende bonso ne bana.

23 Bantu bonso ba mu buloba bavua badila ne dîyi dikole pavua bantu bonso abu basambuluka, ne mukalenge uvua muimane kumpala kua Tshibandabanda tshia Kidilona;+ bantu bonso bavua basambuluka baya mu njila uvua muye mutangile mu tshipela. 24 Sadoka+ uvua pende muaba au ne uvua ne bena Lewi bonso+ bavua bambule mushete+ wa tshipungidi tshia Nzambi mulelela; ne bakateka Mushete wa Nzambi mulelela panshi;+ Ebeyatâ+ wakabanda, pavua eku bantu bonso bajikija kusambuluka bumbukila mu tshimenga. 25 Kadi mukalenge wakambila Sadoka ne: “Pingana ne Mushete wa Nzambi mulelela mu tshimenga.+ Meme muanyishibue ku mêsu kua Yehowa, neampingaje panyi ne neenze bua ngumone wowu ne muaba udiwu usombela.+ 26 Kadi yeye muambe ne: ‘Kuena munsankishe,’ dîba adi angenzele tshionso tshidi tshimueneka tshimpe ku mêsu kuende.” 27 Mukalenge wakambila muakuidi Sadoka ne: “Wewe kuena mumonyi wa malu anyi?+ Pingana mu tshimenga mu ditalala ne wangate bana benu babidi, Ahimasa muanebe wewe ne Yonatana+ muana wa Ebeyatâ. 28 Mona, meme nenjingakane ku bisabu bia ku tshipela too ne pawantumina dîyi bua kummanyisha.”+ 29 Nunku Sadoka ne Ebeyatâ bakapingana ne Mushete wa Nzambi mulelela ku Yelushalema, bobu kushala kuntu aku.

30 Pavua Davidi wenda ubanda Mukuna wa* Olive,+ uvua wenda udila pavuaye ubanda; uvua mudibuikile ku mutu, ne uvua wenda ku makasa kutupu. Bantu bonso bavuaye nabu bavua pabu badibuikile ku mutu ne bavua badila pavuabu benda babanda. 31 Pashishe bakambila Davidi ne: “Ahitofele udi munkatshi mua bantu badi bela tshifufu+ ne Abashaloma.”+ Ke Davidi kuamba ne: “Kudimuna koku mubelu wa* Ahitofele ulue bupote,+ Yehowa wanyi.”+

32 Pavua Davidi mufike ku lusongo lua mukuna muaba uvua bantu ne tshibidilu tshia kuinamina Nzambi, Hushai+ muena Aka+ uvua muaba au bua kupetangana nende, mudipande muzabi ne muikale ne buloba mu mutu. 33 Kadi Davidi wakamuambila ne: “Wewe musambuluke nanyi, newikale bujitu kundi. 34 Kadi wewe mupingane mu tshimenga ne muambile Abashaloma ne: ‘Mukalenge wanyi, ndi muena mudimu webe. Mvua muena mudimu wa tatuebe ku kale, kadi mpindieu ndi muena mudimu webe,’+ dîba adi udi mua kunnyangakajila mubelu wa Ahitofele.+ 35 Kuena ne muakuidi Sadoka ne muakuidi Ebeyatâ kuntu aku anyi? Udi ne bua kuambila muakuidi Sadoka ne muakuidi Ebeyatâ malu onso audi umvua mu nzubu wa mukalenge.+ 36 Mona! Bobu badi ne bana babu babidi kuntu aku, Ahimasa+ muana wa Sadoka ne Yonatana+ muana wa Ebeyatâ, ne nubambile bualu buonso bunudi numvua bua balue kungambila.” 37 Nunku Hushai, mulunda wa Davidi,*+ wakabuela mu tshimenga pavua Abashaloma wenda ubuela mu Yelushalema.

16 Pavua Davidi mupite lusongo lua mukuna kakese,+ Siba,+ muambuluishi wa Mefibosheta,+ uvua muaba au bua kusambakena nende muikale ne mpunda ibidi misuikila biseba pa nyima, ne pa mpunda apu pavua mampa 200, mabulu lukama a tumuma tua mvinyo tumisha, mabulu lukama a bimuma bia mu muvu wa luya lukole* biumisha,* ne mulondo munene wa mvinyo.+ 2 Nunku mukalenge wakebeja Siba ne: “Udi mulue ne bintu ebi bua tshinyi?” Siba wakandamuna ne: “Mpunda nya ba mu nzubu wa mukalenge kuendela, mampa ne bimuma bia mu muvu wa luya lukole mbia bansongalume kudiabu, ne mvinyo mbua bantu badi bapungila mu tshipela kunuabu.”+ 3 Pashishe mukalenge wakebeja ne: “Kadi muana* wa mfumuebe udi kuepi?”+ Ke Siba kuambila mukalenge ne: “Mmushale mu Yelushalema, bualu uvua muambe ne: ‘Lelu nzubu wa Isalele neampingajile bukalenge bua tatu.’”+ 4 Nunku mukalenge wakambila Siba ne: “Tangila! Bintu bionso bia Mefibosheta mbiebe.”+ Siba wakandamuna ne: “Ndi nginama kumpala kuebe. Nganyishibuaku ku mêsu kuebe, mfumu mukalenge wanyi.”+

5 Pavua mukalenge Davidi mufike ku Bahulima, muntu mukuabu wa mu dîku dia nzubu wa Shaula dîna diende Shimei,+ muana wa Gela, wakapatuka wenda wela milawu ne dîyi dikole pavuaye wenda usemena.+ 6 Uvua wasa Davidi mabue ne bena mudimu bonso ba mukalenge Davidi, pamue ne bantu bonso ne bilobo bivua ku dia balume diende ne ku dia bakaji diende. 7 Shimei wakamba pavuaye wela milawu ne: “Katuka, katuka, wewe muntu udi ne dibanza dia mashi! Wewe muntu tshianana! 8 Yehowa mmukufute bua dibanza dia mashi dionso dia nzubu wa Shaula, muena muaba uudi mukokeshe bu mukalenge, kadi Yehowa udi upesha Abashaloma muanebe bukalenge. Mpindieu dikenga ndikukuate bualu udi ne dibanza dia mashi!”+

9 Pashishe Abishai muana wa Seluya+ wakambila mukalenge ne: “Bua tshinyi mbua mufue eu+ udi ne bua kuela mfumu mukalenge wanyi milawu?+ Lekela koku nye, mmukose mutu.”+ 10 Kadi mukalenge wakamba ne: “Ndi nenu tshilumbu kayi nuenu bana ba Seluya?+ Mulekelayi angele milawu,+ bualu Yehowa mmumuambile ne:+ ‘Ela Davidi milawu!’ Nunku nnganyi udi mua kuamba ne: ‘Udi wenza nunku bua tshinyi?’” 11 Pashishe Davidi wakambila Abishai ne bena mudimu bende bonso ne: “Tangilayi, muananyi meme muine, udi mupatukile munda muanyi meme, udi ukeba muoyo* wanyi,+ mpindieu netuambe tshinyi bua muena Benyamina!+ Mulekelayi angele milawu, bualu Yehowa ke udi mumuambile bua kuenza nunku! 12 Pamuapa Yehowa neamone dikenga dianyi,+ ne Yehowa neampingajile malu mimpe pamutu pa milawu idibu bangela lelu eu.”+ 13 Nunku Davidi ne bantu bende bakatungunuka ne kupueka ne njila pavua eku Shimei wenda wendela kumpenga kua mukuna buludiludi nende, wenda wela milawu ne dîyi dikole,+ wasa mabue ne ukupa buloba bua bungi.

14 Ndekelu wa bionso, mukalenge ne bantu bonso bavuaye nabu bakafika bapungile muaba uvuabu baya, ne bakikisha.

15 Pine apu Abashaloma ne bantu bonso ba mu Isalele bavua bamulonda bakafika mu Yelushalema, ne Ahitofele+ uvua nende. 16 Pavua Hushai+ muena Aka,+ mulunda wa Davidi,* muye kudi Abashaloma, Hushai wakambila Abashaloma ne: “Mukalenge ikale ne muoyo matuku a bungi!+ Mukalenge ikale ne muoyo matuku a bungi!” 17 Ke Abashaloma kuambila Hushai ne: “Edi ke dinanga dia lulamatu diudi uleja mulunda webe anyi? Bua tshinyi kuvua muye ne mulunda webe?” 18 Nunku Hushai wakambila Abashaloma ne: “Tòo, meme ndi ku luseke lua muntu udibu basungule kudi Yehowa, kudi tshisamba etshi, ne kudi bantu bonso ba mu Isalele. Nenshale nende. 19 Meme kuamba kabidi ne: Nnganyi ungenzela mudimu? Tshiena mua kuwenzela muanende anyi? Anu mumvua muenzele tatuebe mudimu, ke mungakuenzela wewe mudimu.”+

20 Pashishe Abashaloma wakambila Ahitofele ne: “Mpesha mubelu.*+ Tuenze tshinyi?” 21 Ke Ahitofele kuambila Abashaloma ne: “Lala ne bakaji badi tatuebe mubanjije,+ badiye mushiye bua kulama nzubu.*+ Nunku Isalele mujima neumvue ne: udi mudivuije tshintu tshidi tshinunka bibi kudi tatuebe, ne bantu badi bakutua mu nyima nebapete bukole.” 22 Nunku bakashila Abashaloma ntenta pa mutu pa nzubu,+ ne Abashaloma wakalala ne bakaji bavua tatuende mubanjije+ ku mêsu kua Isalele mujima.+

23 Mu matuku au mibelu ivua Ahitofele+ ufila ivua yangatshibua bu* dîyi dia Nzambi mulelela. Ke muvua Davidi ne Abashaloma bangata bonso babidi mibelu yonso ya Ahitofele.

17 Pashishe Ahitofele wakambila Abashaloma ne: “Anyishaku nsungule bantu binunu 12, njuke, ndondakaje Davidi butuku ebu. 2 Nemmujikile padiye mupungile, kayi bukole,*+ ne nemmupampakaje; nunku bantu bonso badiye nabu nebanyeme, ne meme nenshipe anu mukalenge nkayende.+ 3 Dîba adi nempingaje bantu bonso kuudi. Dipingana dia bantu bonso didi dilondeshila tshidi tshifikila muntu uudi ukeba. Nunku bantu bonso nebikale mu ditalala.” 4 Lungenyi alu luvua lukumbane ku mêsu kua Abashaloma ne kua bakulu bonso ba mu Isalele.

5 Kadi Abashaloma wakamba ne: “Bikila koku Hushai+ muena Aka, tumvue tshidiye wamba pende.” 6 Nunku Hushai wakalua kudi Abashaloma. Ke Abashaloma kumuambila ne: “Ke mubelu udi Ahitofele mufile eu. Tuenze mudiye muambe amu anyi? Wewe mubenge, tuambilaku wewe tshia kuenza.” 7 Ke Hushai kuambila Abashaloma ne: “Bua musangu eu mubelu udi Ahitofele mufile ki mmuimpe to!”+

8 Hushai wakamba kabidi ne: “Wewe udi mumanye bimpe mudi tatuebe ne bantu bende bikale bantu ba bukole,+ ne badi benda bakengakana* bu nyama wa urse udi mujimije bana bende muitu.+ Tatuebe udi kabidi muena mvita,+ kakulala kaba kamue ne bantu butuku ebu to. 9 Patudi tuakula apa, mmusokome mu nyongolo* kampanda anyi muaba kampanda mukuabu;+ yeye mubange yeye kutuluisha kumpala, bantu badi bumvua bualu ebu nebambe ne: ‘Mbatshimune bantu badi balonda Abashaloma!’ 10 Nansha muntu wa dikima udi ne muoyo bu wa ntambue+ neenguluke ne buôwa, bualu Isalele mujima mmumanye ne: tatuebe ntshilobo+ ne bantu badiye nabu mbantu ba dikima. 11 Meme ndi mfila mubelu eu: Isalele mujima adisangishe kuudi, kumbukila ku Dana too ne ku Bê-sheba,+ bantu bungi bu nsenga ya ku mbuu,+ ne wewe udi ne bua kubalombola mu mvita. 12 Netumupatukile muaba wonso utuamusangana, ne netumujikile anu bu lumuma ludi lumata panshi; ne muntu nansha umue wa kudibu kakupanda, nansha yeye, nansha bantu badiye nabu. 13 Yeye munyemene mu tshimenga kampanda, Isalele mujima neaye ne mionji ku tshimenga atshi, ne netutshikokele mu tshibandabanda too ne pikalaku kakuyi kushale nansha lusoka lumue.”

14 Nunku Abashaloma ne bantu bonso ba mu Isalele bavuaye nabu bakamba ne: “Mubelu wa Hushai muena Aka mmuimpe+ mupite mubelu wa Ahitofele!” Bualu Yehowa ukavua mupangadije* bua kunyangakaja mubelu muimpe wa Ahitofele,+ bua Yehowa atumine Abashaloma dikenga.+

15 Pashishe Hushai wakaya kuambila muakuidi Sadoka ne muakuidi Ebeyatâ,+ ne: “Eu ke mubelu udi Ahitofele mupeshe Abashaloma ne bakulu ba mu Isalele, ne eu ke wanyi mubelu undi mufile. 16 Mpindieu tuminayi Davidi mukenji lukasa lukasa bua kumudimuija ne: ‘Kushadi ku bisabu* bia ku tshipela butuku ebu to, kadi mu mishindu yonso sabuka, tshianana badi mua kubutula* mukalenge ne bantu bonso badiye nabu.”+

17 Yonatana+ ne Ahimasa+ bavua ku Ene-logela;+ nunku nsongakaji kampanda muena mudimu wakaya kubambila, bobu kuya bua kuambila mukalenge Davidi, bualu kabavua basue bua babamone babuela mu tshimenga to. 18 Kadi nsongalume kampanda wakabamona, yeye kuambila Abashaloma. Nunku bubidi buabu bakumbuka lukasa lukasa, kufikabu ku nzubu kua muntu mukuabu mu Bahulima+ uvua ne tshina tshia mâyi mu lupangu luende. Bakabuelamu, 19 ne mukaji wa muntu au wakadija tshintu pa mutu pa tshina tshia mâyi atshi, yeye kuelapu ntete mizaza; kakuvua muntu nansha umue uvua mumanye bualu abu to. 20 Bena mudimu ba Abashaloma bakafika kudi mukaji au, ku nzubu kuende, kuebejabu ne: “Ahimasa ne Yonatana badi kuepi?” Mukaji au wakandamuna ne: “Mbapitshile muaba eu batangile ku mâyi.”+ Ke bantu abu kubakebabu, kadi kabakabapeta to, nunku bakapingana ku Yelushalema.

21 Bantu abu bamane kuya, bakapatuka mu tshina tshia mâyi, kuyabu kuambila mukalenge Davidi. Bakamuambila ne: “Jukayi, nusabuke mâyi lukasa lukasa, bualu eu ke mubelu udi Ahitofele mufile bua kunuluisha.”+ 22 Davidi ne bantu bonso bavuaye nabu bakajuka diakamue, kusabukabu Yadene. Patshiatshia kakuvua muntu nansha umue uvua mushale kayi musabuke Yadene to.

23 Pavua Ahitofele mumone ne: kabavua balonde mubelu wende, wakasuika tshiseba pa mpunda wende, kuyaye ku nzubu kuende, mu tshimenga tshiabu.+ Yeye mumane kuambila ba mu nzubu muende tshia kuenza,+ wakadiowa.*+ Nunku wakafua, bobu kumujiika muaba wa kujiikilangana wa bankambua bende.

24 Pine apu, Davidi wakaya ku Mahanayima,+ ne Abashaloma wakasabuka Yadene ne bantu bonso ba mu Isalele bavuaye nabu. 25 Abashaloma wakateka Amasa+ ku mutu kua tshiluilu pa muaba wa Yoaba;+ Amasa uvua muana wa muntu mukuabu dîna diende Yitela muena Isalele, uvua mulale ne Abigayila+ muana wa Nahasha, muanabu ne Seluya wa bakaji, mamuende wa Yoaba. 26 Isalele ne Abashaloma bakasa tshitudilu mu buloba bua Gilada.+

27 Diakamue pakafika Davidi ku Mahanayima, Shobi muana wa Nahasha wa ku Laba+ wa bena Amona, Makî+ muana wa Amiele wa ku Lo-debâ, ne Bâzilai+ muena Gilada wa ku Logelima 28 bakalua ne bia kuladila, malongo manene, mabungu, ntete ya blé, ntete ya orje, bukula, ntete mikanga, nkunde minene, nkunde mikese, ntete miumisha, 29 buitshi, manteka, mikoko, ne fromaje.* Bakalua ne bintu bionso ebi bua Davidi ne bantu bavuaye nabu kudiabu,+ bualu bakamba ne: “Bantu badi ne nzala, mbatshioke ne badi ne nyota mu tshipela.”+

18 Pashishe Davidi wakabala bantu bavuaye nabu, yeye kubatekela bamfumu ba bantu tshinunu tshinunu ne bamfumu ba bantu lukama lukama.+ 2 Davidi wakatuma tshia bisatu ku bulombodi bua* Yoaba,+ tshia bisatu ku bulombodi bua muanabu ne Yoaba diende Abishai+ muana wa Seluya,+ ne tshia bisatu tshikuabu ku bulombodi bua Itai+ muena Gata. Pashishe mukalenge wakambila bantu abu ne: “Meme panyi nenye nenu.” 3 Kadi bakamba ne: “Wewe kuena ne bua kuya netu to,+ bualu tuetu banyeme, bobu kabakutangila bualu buetu* to; ne tshia bibidi tshia kutudi tshiotshi tshifue, kabakutangila bualu buetu to, bualu wewe udi mumue ne bantu binunu 10 ba kutudi.+ Nunku nebikale bimpe bu wewe mua kututumina diambuluisha diumbukila mu tshimenga.” 4 Mukalenge wakabambila ne: “Nengenze tshionso tshidi tshimueneka tshitambe buimpe kunudi.” Nunku mukalenge wakimana pabuipi ne tshiibi tshia tshimenga, ne bantu bonso bakapatuka ku lukama ku lukama ne ku tshinunu ku tshinunu. 5 Pashishe mukalenge wakatumina Yoaba ne Abishai ne Itai dîyi ne: “Nuenzele nsongalume Abashaloma au malu bimpe bua bualu buanyi meme.”+ Bantu bonso bavua bumvue dîyi adi pavua mukalenge mutumine bamfumu bonso dîyi bua bualu bua Abashaloma.

6 Bantu bakapatuka kuyabu mu mpata bua kutuilangana ne Isalele, ne mvita yakenzekela mu ditu dia Efelayima.+ 7 Muomu amu, bena mudimu ba Davidi+ bakatshimuna bantu ba mu Isalele,+ ne bakashipa bantu ba bungi dituku adi, mmumue ne: bantu balume binunu 20. 8 Mvita yakamuangalaka mu tshitupa atshi tshijima. Kabidi, ditu diakadia bantu bapite bavua muele mushipe dituku adi.

9 Ndekelu wa bionso Abashaloma wakadimona kumpala kua bena mudimu ba Davidi. Abashaloma uvua mubande pa mpunda, ne mpunda wakabuela muinshi mua matamba mapindakane a mutshi munene menemene, mutu wende kukalamawu mu mutshi munene, ke yeye kushala mulembelele muulu muulu* pavua eku mpunda uvuaye mubande mutungunuke ne kuya. 10 Nunku muntu kampanda wakamona tshivua tshienzeke atshi, kuambilaye Yoaba ne:+ “Tangila! Ndi mumone Abashaloma mulembelele mu mutshi munene.” 11 Yoaba wakandamuna muntu uvua mumuambile au ne: “Bu muuvua mumone bualu abu, bua tshinyi kuvua mumushipe mumukulule musangu umue? Dîba adi mvua mua kuikala mukupeshe bitupa dikumi bia arjan ne mukaba ne disanka dionso.” 12 Kadi muntu au wakambila Yoaba ne: “Nansha bu wewe mumpeshe* bitupa tshinunu bia arjan, tshivua mua kujudila muana wa mukalenge tshianza tshianyi to, bualu tuvua bumvue mukalenge ukutumina wewe, Abishai ne Itai dîyi ne: ‘Nansha nuenu bikale banganyi, nulame nsongalume Abashaloma.’+ 13 Bu meme mubenge kutumikila ne muangate muoyo wende,* mukalenge kavua mua kupanga kumanya bualu ebu nansha kakese, ne wewe kuvua mua kunkuba to.” 14 Ke Yoaba kumuambila ne: “Tshiakujimija kabidi nebe dîba to!” Nunku wakangata misongolo* isatu mu tshianza tshiende, kuyibuejaye mu muoyo wa Abashaloma patshivuaye ne muoyo munkatshi mua matamba a mutshi munene. 15 Pashishe bambuluishi dikumi bavua bambule bia mvita bia Yoaba bakalua, kukumabu Abashaloma too ne muakafuaye.+ 16 Ke Yoaba kuela mpungi, bantu kupinganabu bafuma ku dilondakaja Isalele; Yoaba wakabalomba bua balekele. 17 Bakangata Abashaloma, kumuimanshabu mu tshina tshinene tshia mu ditu amu, bobu kunguija mushiki munene menemene wa mabue pa mutu pende.+ Nunku bena Isalele bonso bakanyema batangile ku mabu.

18 Mpindieu, patshivua Abashaloma ne muoyo uvua muangate dikunji mudimanyikiladi mu Tshibandabanda* tshia Mukalenge,+ bualu uvua muambe ne: “Tshiena ne muana wa balume bua kulama tshivulukilu tshia dîna dianyi.”+ Nunku wakinyika dikunji adi dîna diende, ne badi babikila dikunji adi ne: Tshibumba tshia Abashaloma too ne lelu.

19 Ahimasa+ muana wa Sadoka wakamba ne: “Ndekela koku nye lubilu, nye kuambila mukalenge lumu elu, bualu Yehowa mmumulumbuluile padiye mumusungile kudi bena lukuna bende.”+ 20 Kadi Yoaba wakamuambila ne: “Wewe kuakuya kufila mukenji lelu to. Udi mua kuya kuamba mukenji au dituku dikuabu; kadi lelu wewe kuakuya kufila mukenji au to, bualu muana wa mukalenge mmufue.”+ 21 Pashishe Yoaba wakambila muena Kushi ne:+ “Ndaku wambile mukalenge bualu buudi mumone.” Ke muena Kushi kuinaminaye Yoaba ne kuyaye lubilu. 22 Ahimasa muana wa Sadoka wakambila kabidi Yoaba ne: “Nansha bualu kayi buenzeke, ndekela koku ndonde panyi muena Kushi lubilu.” Kadi Yoaba wakamba ne: “Muananyi, bua tshinyi udi ne bua kuya lubilu, padiku kakuyi mukenji wa wewe kuya kuamba?” 23 Kuambaye kabidi ne: “Nansha bualu kayi buenzeke, ndekela meme nye lubilu.” Nunku Yoaba wakamuambila ne: “Ndaku lubilu!” Ahimasa wakaya lubilu ulonda njila wa ku tshitupa tshia buloba tshia Yadene,* ne ndekelu wa bionso wakapita muena Kushi.

24 Mpindieu Davidi uvua musombe pankatshi pa biibi bibidi bia tshimenga,+ ne nsentedi+ wakabanda kuulu kua tshiibi lua pabuipi ne tshimanu. Wakabanduluka, kumonaye muntu wenda unyema nkayende. 25 Nunku nsentedi wakela mukalenge dîyi, yeye kumuambila. Mukalenge kuamba ne: “Yeye muikale nkayende, udi ne mukenji wa kuamba.” Pavuaye wenda anu usemena pabuipi menemene, 26 nsentedi wakamona muntu mukuabu mu lubilu. Ke nsentedi kuambila muntu uvua ulama ku tshiibi ne: “Tangila! Muntu mukuabu udi ulua lubilu nkayende!” Mukalenge kuamba ne: “Eu udi ulua pende ne mukenji.” 27 Nsentedi wakamba ne: “Ndi mumone ne: muntu wa kumpala udi unyema anu bu Ahimasa+ muana wa Sadoka,” mukalenge wakamba ne: “Yeye mmuntu muimpe ne udi ulua ne mukenji muimpe.” 28 Pashishe Ahimasa wakela mukalenge dîyi ne: “Malu onso adi enda bimpe!” Ke kuinaminaye mukalenge mpala mutue panshi. Pashishe wakamba ne: “Yehowa Nzambi webe atumbishibue, yeye udi mufile bantu bavua batombokele* mfumu mukalenge wanyi mu tshianza tshiebe!”+

29 Kadi mukalenge wakebeja ne: “Malu onso adi enda bimpe bua nsongalume Abashaloma au anyi? Ke Ahimasa kuamba ne: mvua mumone kayumbayumba kakole pavua Yoaba mutume muena mudimu wa mukalenge ne muena mudimu webe, kadi tshivua mumanye ne: kavua ka tshinyi to.”+ 30 Nunku mukalenge wakamuambila ne: “Semena ku luseke, imana muaba eu.” Ke yeye kusemena ku luseke, kuimanaye muaba au.

31 Pashishe muena Kushi wakafika,+ ne muena Kushi au kuambaye ne: “Mfumu mukalenge wanyi itabe mukenji eu: Lelu Yehowa mmukose tshilumbu pa kukusungila mu tshianza tshia bantu bonso badi bakutombokele.”+ 32 Kadi mukalenge wakebeja muena Kushi ne: “Malu onso adi enda bimpe bua nsongalume Abashaloma au anyi?” Ke muena Kushi kuamba ne: “Bena lukuna bonso ba mfumu mukalenge wanyi ne bantu bonso badi bakutombokele bua kukuenzela bibi balue bu nsongalume au!”+

33 Bualu ebu buakapampakaja mukalenge bikole, yeye kubanda mu nzubu wa kuulu pa mutu pa tshiibi ne kudilaye, wamba pavuaye wenda uya ne: “Muananyi Abashaloma, muananyi, muananyi Abashaloma! Mvua mua kuikala nansha mufue pa muaba webe, muananyi Abashaloma, muananyi!”+

19 Bakalua kuambila Yoaba ne: “Mukalenge udi udila, ujinga Abashaloma.”+ 2 Nunku ditshimuna dia* dituku adi diakandamuka madilu bua bantu bonso, bualu bavua bumvue ne: mukalenge uvua unyingalala bua muanende. 3 Bantu bakapingana mu tshimenga+ dituku adi mu tshimuma anu bu bantu badi bumvue bundu bualu mbanyeme ku mvita. 4 Mukalenge uvua mudibuikile ku mêsu ne uvua udila ne dîyi dikole wamba ne: “Muananyi Abashaloma! Abashaloma muananyi, muananyi!”+

5 Pashishe Yoaba wakabuela mu nzubu kudi mukalenge, kuambaye ne: “Lelu udi mufuishe bena mudimu bebe bonso bundu, bobu bavua bapandishe muoyo* webe lelu, mioyo* ya bana bebe ba balume,+ ya bana bebe ba bakaji,+ ya bakaji bebe, ne ya bakaji baudi mubanjije.+ 6 Udi munange badi bakukine ne udi mukine badi bakunange, bualu udi muleje patoke lelu ne: bamfumu bebe ne bena mudimu bebe kabena ne mushinga kuudi to, bualu ndi mutuishibue ne: bu Abashaloma muikale ne muoyo lelu kadi tuetu bonso aba bafue, bivua mua kuikala bimpe buebe wewe. 7 Mpindieu juka, upatuke ne ukankamije* bena mudimu bebe, bualu ndi nditshipa mu dîna dia Yehowa ne: wewe kuyi mupatuke, muntu nansha umue kakushala nebe butuku ebu to. Bualu ebu nebuikale bubi butambe kuudi wewe kupita malu mabi onso akadi makufikile katshia ku buana buebe too ne mpindieu.” 8 Nunku mukalenge wakajuka, kusombaye mu tshiibi tshia tshimenga, ne bakambila bantu bonso ne: “Mukalenge mmusombe mu tshiibi mpindieu.” Nunku bantu bonso bakalua kumpala kua mukalenge.

Kadi Isalele uvua munyeme, muntu yonso muye kuende.+ 9 Bantu bonso ba mu bisa bionso bia Isalele bavua bakokangana, bamba ne: “Mukalenge uvua mutupandishe kudi bena lukuna betu,+ ne mutusungile kudi bena Peleshete; kadi mpindieu mmunyeme buloba bua bualu bua Abashaloma.+ 10 Abashaloma muine utuvua bele manyi bua ikale ku mutu kuetu+ mmufue mu mvita.+ Nunku mpindieu, bua tshinyi kanuena nuenza tshintu nansha tshimue bua kupingaja mukalenge?”

11 Mukalenge Davidi wakatumina muakuidi Sadoka+ ne muakuidi Ebeyatâ+ mukenji eu ne: “Akulayi ne bakulu ba mu Yuda,+ nuambe ne: ‘Bua tshinyi nuenu nudi ne bua kuikala ba ndekelu bua kupingaja mukalenge ku nzubu kuende, pakadi dîyi dia Isalele mujima difike kudi mukalenge ku nzubu kuende? 12 Nudi bana betu; nudi mufuba wanyi ne musunyi wanyi menemene.* Bua tshinyi nuenu nudi ne bua kuikala ba ndekelu bua kupingaja mukalenge?’ 13 Nuambile kabidi Amasa ne:+ ‘Wewe kuena mufuba wanyi ne musunyi wanyi menemene anyi? Nunku Nzambi angenzele nunku ne apitshishe apu wewe kuyi mulue mfumu wa tshiluilu tshianyi kubangila ku mpindieu pa muaba wa Yoaba.’”+

14 Nunku wakalenga* mioyo ya bantu bonso ba mu Yuda anu bu muntu umue; bobu kutumina mukalenge mukenji ne: “Pingana, wewe ne bena mudimu bebe bonso.”

15 Mukalenge wakatuadija kupingana, yeye kufika ku Yadene, ne bantu ba mu Yuda bakalua ku Gilegala+ bua kusambakena ne mukalenge ne kumusabuisha Yadene. 16 Nunku Shimei+ muana wa Gela, muena Benyamina wa ku Bahulima, wakapueka lukasa ne bantu ba mu Yuda bua kusambakena ne mukalenge Davidi, 17 ne uvua ne bantu tshinunu ba mu Benyamina. Siba+ muambuluishi wa nzubu wa Shaula wakapueka pende lukasa ku Yadene kumpala kua mukalenge, muikale ne bana bende ba balume 15 ne bena mudimu bende 20. 18 Wakasabukila* ku tshisabu bua kusabuisha ba mu nzubu wa mukalenge ne kuenza tshionso tshivua mukalenge ujinga. Kadi Shimei muana wa Gela wakadiela kumpala kua mukalenge pakavua mukalenge ukeba kusabuka Yadene. 19 Wakambila mukalenge ne: “Mukalenge kambadidi bubi, ne kavuluki bubi buvua muena mudimu webe muenze+ dituku divua mfumu mukalenge wanyi mupatuke Yelushalema to. Mukalenge kabulami ku muoyo to, 20 bualu muena mudimu webe mmumanye bimpe ne: ndi muenze mpekatu; nunku lelu ndi wa kumpala ku dipueka bua nzubu mujima wa Jozefe bua kulua kusambakena ne mfumu mukalenge wanyi.”

21 Diakamue Abishai+ muana wa Seluya+ wakamba ne: “Shimei kena ne bua kushipibua bua bualu ebu, bu muvuaye muele muela manyi wa Yehowa mulawu anyi?”+ 22 Kadi Davidi wakamba ne: “Nudi ne tshilumbu kayi mu bualu ebu, nuenu bana ba Seluya,+ bua nuenu kunduisha lelu? Badi ne bua kushipa muntu mu Isalele lelu anyi? Meme tshiena mumanye ne: ndi mukalenge ku mutu kua Isalele lelu anyi?” 23 Ke mukalenge kuambila Shimei ne: “Kuakufua to.” Pashishe mukalenge wakaditshipa kudiye.+

24 Mefibosheta,+ muikulu wa Shaula, wakapueka pende bua kusambakena ne mukalenge. Kavua mutabalele makasa ende anyi mukose muedi wende wa pa mushiku anyi musukule bilamba biende kumbukila ku dituku divua mukalenge mumbuke too ne ku dituku divuaye mupingane mu ditalala. 25 Pakaluaye* ku Yelushalema bua kusambakena ne mukalenge, mukalenge wakamuebeja ne: “Mefibosheta, kuvua muye nanyi bua tshinyi?” 26 Yeye kuamba ne: “Mfumu mukalenge wanyi, muena mudimu wanyi+ uvua mundingakaje. Bualu muena mudimu webe uvua muambe ne: ‘Nsuikishe tshiseba pa mpunda wanyi bua mbandapu, nye ne mukalenge,’ bualu muena mudimu webe mmulema.+ 27 Kadi yeye uvua mushiminyine muena mudimu webe malu kudi mfumu mukalenge wanyi.+ Kadi mfumu mukalenge wanyi udi anu bu muanjelu wa Nzambi mulelela, nunku enza tshionso tshidi tshimueneka tshimpe ku mêsu kuebe. 28 Mfumu mukalenge wanyi uvua mua kuikala mushipeshe ba mu nzubu wa tatu wanyi bonso, kadi wewe uvua muteke muena mudimu webe munkatshi mua bantu badi badia ku mêsa ebe.+ Nunku mbukenji kayi bundi nabu bua kudidila kabidi mukalenge?”

29 Kadi mukalenge wakamuambila ne: “Bua tshinyi udi utungunuka ne kuakula nunku? Ndi muangate dipangadika dia ne: wewe ne Siba nenuabanyangane budimi.”+ 30 Ke Mefibosheta kuambila mukalenge ne: “Abuangate buonso mpindieu udi mfumu mukalenge wanyi mupingane ku nzubu kuende mu ditalala.”

31 Pashishe Bâzilai+ muena Gilada wakapueka ku Yadene ufuma ku Logelima bua kushindikija mukalenge ku Yadene. 32 Bâzilai ukavua mukulakaje bikole, uvua ne bidimu 80, ne uvua upesha mukalenge biakudia pavua mukalenge musombele mu Mahanayima,+ bualu yeye uvua ne bubanji bua bungi menemene. 33 Nunku mukalenge wakambila Bâzilai ne: “Sabuka nanyi, ne nengikale nkupesha biakudia mu Yelushalema.”+ 34 Kadi Bâzilai wakambila mukalenge ne: “Ndi mushale ne matuku* a muoyo bungi kayi bua mbande ne mukalenge ku Yelushalema? 35 Ndi ne bidimu 80 lelu.+ Ndi mua kujingulula pankatshi pa tshidi tshimpe ne tshidi tshibi anyi? Meme muena mudimu webe ndi mua kumvua muenya wa bindi ndia ne bindi nnua anyi? Ntshidi mua kuteleja mêyi a bimbi ba misambu ba balume ne ba bakaji anyi?+ Nunku bua tshinyi muena mudimu webe udi ne bua kuikala bujitu bukuabu kudi mfumu mukalenge wanyi? 36 Mbikumbane bua mudi muena mudimu webe mulue ne mukalenge ku Yadene. Bua tshinyi mukalenge udi ne bua kumfuta difutu edi? 37 Anyishaku muena mudimu webe apingane, ne mfuile mu tshimenga tshietu pabuipi ne muaba uvuabu bajiikile tatu ne mamu.+ Kadi muena mudimu webe Kimehama nyeye eu.+ Asabuke ne mfumu mukalenge wanyi ne wewe udi mua kumuenzela tshionso tshidi tshimueneka tshimpe ku mêsu kuebe.”

38 Ke mukalenge kuamba ne: “Kimehama neasabuke nanyi, ne nemmuenzele tshionso tshidi tshimueneka tshimpe ku mêsu kuebe; nenkuenzele tshionso tshiudi undomba.” 39 Mpindieu bantu bonso bakatuadija kusabuka Yadene, ne pavua mukalenge musabuke, wakatua Bâzilai mishiku,+ kumubeneshaye; pashishe Bâzilai wakapingana kuende. 40 Pavua mukalenge musabuke bua kuya ku Gilegala,+ Kimehama wakasabuka nende. Bantu bonso ba mu Yuda ne tshitupa tshia bantu ba mu Isalele bakasabuisha mukalenge.+

41 Pashishe bantu balume bonso ba mu Isalele bakalua kudi mukalenge, kumuambilabu ne: “Bua tshinyi bana betu, bantu ba mu Yuda, bavua bakuibe ne basabuishe mukalenge ne ba mu nzubu muende Yadene, pamue ne bantu bonso ba Davidi?”+ 42 Bantu balume bonso ba mu Yuda bakandamuna bantu ba mu Isalele ne: “Bualu mukalenge mmulela wetu.+ Bua tshinyi nudi numvua tshiji bua bualu ebu? Tudi badie tshintu tshia kudi mukalenge anyi? Peshi mbatupeshe dipa kampanda anyi?”

43 Kadi bantu balume ba mu Isalele bakandamuna bantu ba mu Yuda ne: “Tudi ne bitupa dikumi mu mukalenge, nunku tudi ne bukenji bunene mu Davidi kunupita nuenu. Nunku bua tshinyi nudi batupepeje? Tuetu katuvua ne bua kuikala ba kumpala bua kupingaja mukalenge wetu anyi?” Kadi dîyi dia bantu ba mu Yuda diakapita* dia bantu ba mu Isalele.

20 Mpindieu kuvua mukebeshi wa bimvundu mukuabu dîna diende Sheba+ muana wa Bikili, muena Benyamina. Wakela mpungi,+ kuambaye ne: “Katuena ne tshitupa mu Davidi, ne katuena ne bumpianyi mu muana wa Yishai to.+ Wewe Isalele, muntu yonso aye kudi nzambi* yende!”+ 2 Ke bantu bonso ba mu Isalele kulekelabu kulonda Davidi bua kulondabu Sheba muana wa Bikili;+ kadi bantu ba mu Yuda bakashala balamate mukalenge wabu, kumbukila ku Yadene too ne ku Yelushalema.+

3 Pavua Davidi mufike ku nzubu* kuende mu Yelushalema,+ mukalenge wakangata bakaji babanjija dikumi bavuaye mushiye bua kulama nzubu,+ ne wakabateka mu nzubu mulama. Uvua ubapesha biakudia, kadi kavua usangila nabu to.+ Bakashala mu nzubu muvuabu babalamine amu too ne dituku diabu dia lufu, basombe bu bakaji bakamba, nansha muvua bayabu ne muoyo.

4 Pashishe mukalenge wakambila Amasa ne:+ “Bikila bantu ba mu Yuda bua badisangishe kundi mu matuku asatu, ne wewe pebe wikalaku.” 5 Nunku Amasa wakaya kubikila bena Yuda bua kudisangishabu, kadi yeye wakalua panyima pa dîba divuabu bamukosele bua kulua. 6 Pashishe Davidi wakambila Abishai ne:+ “Sheba+ muana wa Bikili udi mua kutuenzela bibi kupita muvua Abashaloma muenze.+ Angata bena mudimu ba mukalenge webe umulondakaje, bua yeye kapetshi bimenga bikolesha ne katunyemi.” 7 Nunku bantu ba Yoaba,+ bena Kelete, bena Pelete,+ ne bilobo bionso bakapatuka bua kumulonda; bakumbuka mu Yelushalema bua kulondakaja Sheba muana wa Bikili. 8 Pavuabu pabuipi ne dibue dinene mu Gibeona,+ Amasa+ wakalua bua kusambakena nabu. Mpindieu Yoaba uvua muvuale bilamba biende bia mvita, ne uvua ne muele wa mvita muela mu tshizubu tshiawu muasa mu tshimono tshiende. Pakasemenaye kumpala, muele wa mvita wakamata.

9 Yoaba wakambila Amasa ne: “Muanetu, udi bimpe anyi?” Pashishe Yoaba wakakuata Amasa ku muedi ne tshianza tshiende tshia balume, muenze bu uvua usua kumutua mishiku. 10 Amasa kavua mudimukile muele wa mvita uvua mu tshianza tshia Yoaba to, ke Yoaba kumubuejawu mu difu,+ mala ende kuyawu panshi. Kavua ne bua kumubuejawu musangu muibidi to; musangu umue uvua mukumbane bua kumushipa. Pashishe Yoaba ne muanabu Abishai bakalondakaja Sheba muana wa Bikili.

11 Umue wa ku bansongalume ba Yoaba wakimana ku luseke luende, ne uvua wamba ne: “Muntu yonso udi ku luseke lua Yoaba ne muntu wa Davidi yonso alonde Yoaba!” 12 Dîba dionso adi Amasa uvua udivuandakaja mu mashi ende munkatshi mua njila. Pavua nsongalume au mumone ne: bantu bonso bavua bimana, wakumbusha Amasa mu njila, kuyaye nende mu mpata. Pashishe wakakupa tshilamba kumubuikilatshi, bualu uvua mumone ne: muntu yonso uvua wimana pavuaye ufika muaba uvuaye. 13 Panyima pa yeye mumane kumumbusha mu njila, bantu bonso bakalonda Yoaba bua kulondakaja Sheba+ muana wa Bikili.

14 Sheba wakapitshila munkatshi mua bisa bionso bia Isalele too ne ku Abele wa Bete-mâka.+ Bena Bikili bakadisangisha pamue, kuyabu pabu bua kumulonda.

15 Yoaba ne bantu bende* bakaya, kumutshintshimikabu mu Abele wa Bete-mâka ne kubandishabu mushiki wa buloba ku tshimenga atshi bua kutshitshintshimika, bualu tshivua munda mua mushiki wa buloba. Bantu bonso bavua Yoaba nabu bavua benda bumbula kuinshi kua tshimanu bua kutshiupula. 16 Mukaji kampanda wa meji wakela dîyi muikale pa tshimanu tshia tshimenga ne: “Telejayi, nuenu balumiana, telejayi! Ambilayiku Yoaba ne: ‘Luaku muaba eu, nkuambile bualu.’” 17 Nunku wakaya pabuipi nende, ne mukaji au kuebejaye ne: “Wewe ke Yoaba anyi?” Yeye kuandamuna ne: “Mmeme.” Ke mukaji au kumuambila ne: “Teleja mêyi a muena mudimu webe.” Yeye kuamba ne: “Ndi muteleje.” 18 Mukaji au wakamba kabidi ne: “Bavua bamba ku kale ne: ‘Bebeje bualu mu Abele,’ nanku bualu abu buvua bujika. 19 Meme ndi ndeja mpala wa bantu ba ditalala ne ba lulamatu ba mu Isalele. Wewe udi ukeba bua kubutula tshimenga tshidi bu mamu mu Isalele. Bua tshinyi udi ne bua kujimija* bumpianyi bua Yehowa?”+ 20 Yoaba wakandamuna ne: “Kabiena mua kuenzeka bua meme kubujimija ne kutshibutula to. 21 Kabiena nanku nansha kakese to. Kadi muntu kampanda dîna diende Sheba+ muana wa Bikili wa mu buloba bua mikuna bua Efelayima+ mmutombokele* mukalenge Davidi. Nuenu bafile anu muntu au, nengumbuke ku tshimenga.” Ke mukaji au kuambila Yoaba ne: “Tangila! Nebakukupile mutu wende pa tshimanu!”

22 Diakamue mukaji wa meji au wakaya kudi bantu bonso, bobu kukosa mutu wa Sheba muana wa Bikili ne kuwukupilabu Yoaba. Ke yeye kuela mpungi, ne bobu kumbuka ku tshimenga, muntu yonso kuyaye kuende;+ ne Yoaba wakapingana kudi mukalenge ku Yelushalema.

23 Mpindieu Yoaba uvua utangila tshiluilu tshia Isalele;+ Benaya+ muana wa Yehoyada+ uvua ku mutu kua bena Kelete ne bena Pelete.+ 24 Adolama+ uvua ku mutu kua bonso bavuabu babikile bua kubenzeja midimu mikole ku bukole; Yehoshafata+ muana wa Ahiluda uvua mufundi wa malu a bukalenge. 25 Shewa uvua mufundi; Sadoka+ ne Ebeyatâ+ bavua bakuidi. 26 Ila muena Yaî wakalua pende mfumu* bua Davidi.

21 Mpindieu kuvua tshiyole tshia nzala+ mu matuku a Davidi munkatshi mua bidimu bisatu bilondangane; nunku Davidi wakakonka Yehowa, Yehowa kuamba ne: “Shaula ne ba mu nzubu wende badi ne dibanza dia mashi, bualu yeye uvua mushipe bena Gibeona.”+ 2 Nunku mukalenge wakabikila bena Gibeona,+ kuakulaye nabu. (Mpindieu bena Gibeona kabavua bena Isalele to, kadi bavua bena Amole+ bavua bashale, ne bena Isalele bavua baditshipe bua kubashiya ne muoyo,+ kadi Shaula uvua mukebe bua kubashipa mu tshisumi tshiende bua bantu ba mu Isalele ne ba mu Yuda.) 3 Davidi wakebeja bena Gibeona ne: “Nnuenzele tshinyi? Mmushindu kayi undi mua kubuikila mpekatu bua nuenu nubeneshe bumpianyi bua Yehowa?” 4 Bena Gibeona bakamuambila ne: “Tuetu katuena bualu ne arjan anyi or+ mu tshilumbu tshidi tshitangila Shaula ne ba mu nzubu wende to; ne tuetu katuena mua kushipa muntu nansha umue mu Isalele to.” Ke yeye kuamba ne: “Nennuenzele tshionso tshinuamba.” 5 Bakambila mukalenge ne: “Muntu au uvua mutushipe, ne muele meji a kutubutula bua katuikadi muaba nansha umue mu buloba bua Isalele,+ 6 nunku batupeshe bana bende ba balume muanda mutekete. Netukudike bitalu biabu*+ kumpala kua Yehowa mu Gibea+ wa Shaula, muntu uvua Yehowa musungule.”+ Nunku mukalenge wakamba ne: “Nembafile.”

7 Kadi mukalenge wakumvuila Mefibosheta+ muana wa Yonatana muana wa Shaula luse, bualu bua mutshipu uvua muenzeke kumpala kua Yehowa pankatshi pa Davidi ne Yonatana,+ muana wa Shaula. 8 Nunku mukalenge wakangata Âmoni ne Mefibosheta, bana babidi ba Lisepa+ muana wa bakaji wa Aya bavuaye mulelele Shaula, ne bana batanu ba Mikala*+ muana wa bakaji wa Shaula bavuaye mulelele Adaliele+ muana wa Bâzilai muena Mehola. 9 Pashishe wakabafila kudi bena Gibeona, bobu kukudika bitalu biabu pa mukuna kumpala kua Yehowa.+ Bakafua pamue bobu bonso muanda mutekete; bavua babashipe mu matuku a ntuadijilu a dipuola dia bintu, ku ntuadijilu kua dipuola dia ntete ya orje. 10 Pashishe Lisepa+ muana wa bakaji wa Aya wakangata tshilamba tshikayabale, kutshiadijaye pa dibue kutuadijila ku ntuadijilu kua dipuola dia bintu too ne dîba divua mvula mulokele bitalu abi ufumina mu diulu; kavua mulekele nyunyi ya muulu ikilapu mu munya anyi nyama ya luonji ya mu mpata isemena pabuipi butuku to.

11 Bakambila Davidi tshivua Lisepa, muana wa bakaji wa Aya, mukaji uvua Shaula mubanjije muenze. 12 Nunku Davidi wakaya kuangata mifuba ya Shaula ne mifuba ya muanende Yonatana kudi balombodi* ba mu Yabesha-gilada,+ bavua bayibe muaba wa tshinsangansanga wa mu Bete-shana, muaba uvua bena Peleshete babakudike dituku divua bena Peleshete bashipe Shaula pa mukuna wa Gileboa.+ 13 Wakafumaku ne mifuba ya Shaula ne mifuba ya muanende Yonatana, ne bakasangisha kabidi mifuba ya bantu bavuabu bashipe* abu.+ 14 Pashishe bakajiika mifuba ya Shaula ne ya muanende Yonatana mu buloba bua Benyamina mu Sele+ mu lukita lua tatuende Kishi.+ Panyima pa bobu bamane kuenza malu onso avua mukalenge mubatumine dîyi bua kuenza, Nzambi wakateleja misengelelu yabu bua buloba.+

15 Kuakajuka kabidi mvita pankatshi pa bena Peleshete ne Isalele.+ Nunku Davidi ne bena mudimu bende bakapueka, kuluanganabu ne bena Peleshete, kadi Davidi wakapungila. 16 Muntu mukuabu wa mu ndelanganyi ya bena Lefa+ diende Yishebi-benoba uvua ne difuma dia tshiamu tshia mitaku dia bujitu bua nshekele 300*+ ne uvua ne muele wa mvita mupiamupia, wakajinga bua kushipa Davidi. 17 Diakamue Abishai+ muana wa Seluya wakalua kumuambuluisha,+ yeye kukuma muena Peleshete au, kumushipaye. Dîba adi bantu ba Davidi bakaditshipa kudiye ne: “Wewe kuena ne bua kupatuka kabidi netu bua kuya ku mvita to!+ Kuena ne bua kujima muendu wa Isalele to!”+

18 Panyima pa bualu ebu, mvita yakakutuka kabidi ne bena Peleshete+ ku Gobo. Dîba adi Sibekai+ muena Husha wakashipa Safa, uvua wa mu ndelanganyi ya bena Lefa.+

19 Kuakajuka kabidi mvita ne bena Peleshete+ ku Gobo, ne Elehanana muana wa Yâleolezima muena Beteleheme wakashipa Goleyata muena Gata, uvua ne difuma divua ne tshikuatshidi tshienze bu mutshi wa ku tshiamu tshia muluki wa bilamba.+

20 Mvita yakakutuka kabidi ku Gata kuvua muntu mukuabu uvua munene mule wa mfiondo, muikale ne minu isambombo ku tshianza tshionso ne bana ba nkasa basambombo ku dikasa dionso, minu yonso mikale 24; yeye pende uvua wa mu ndelanganyi ya bena Lefa.+ 21 Uvua anu ubunda Isalele.+ Nunku Yonatana muana wa Shimei+ muanabu ne Davidi wakamushipa.

22 Bantu banayi aba bavua ba mu ndelanganyi ya bena Lefa mu Gata, ne bakakuluka ku tshianza tshia Davidi ne ku tshianza tshia bena mudimu bende.+

22 Davidi wakambila Yehowa mêyi a musambu eu+ dituku divua Yehowa mumusungile ku tshianza tshia bena lukuna bende bonso+ ne ku tshianza tshia Shaula.+ 2 Wakamba ne:

“Yehowa mmukuna wanyi wa dibue ne muaba wanyi mukolesha wa kusokomena+ ne Musungidi wanyi.+

11 Uvua mubande pa mukeluba,+ kuluaye wenda ubuuka.

Uvua umueneka pa mapuapua a tshifukibua tshia mu nyuma.*+

13 Makala a kapia akakenka afumina mu bukenke bua kumpala kuende.

Yeye udi ngabu kudi bonso badi banyemena kudiye.+

32 Bualu nnganyi udi Nzambi pa kumbusha Yehowa?+

Ne nnganyi udi dibue pa kumbusha Nzambi wetu?+

44 Neunsungile ku ditulangana bilema dia bena mu tshisamba tshietu.+

47 Yehowa udi ne muoyo! Dibue dianyi ditumbishibue!+

Nzambi wa dibue dia lupandu luanyi atumbishibue.+

23 Aa mmêyi a Davidi a ndekelu:+

 5 Nzubu wanyi kena nanku kumpala kua Nzambi anyi?

8 Aa mmêna a bilobo bia mvita bia Davidi:+ Yoshebashebeta muena Takemona, uvua ku mutu kua bena mvita ba bukole basatu.+ Musangu mukuabu uvua mushipe bantu 800 ne difuma diende. 9 Bakamulondela kudi Eleazâ+ muana wa Dodo+ muana wa Ahohi uvua munkatshi mua bilobo bia mvita bisatu bivua ne Davidi pavuabu babunde bena Peleshete. Bavua badisangishe kuntu aku bua mvita, ne pavua bantu ba mu Isalele banyeme, 10 yeye wakashala muimane, kutungunukaye ne kushipa bena Peleshete too ne pavua diboko diende dishikile ne tshianza tshiende tshikuate tukulakaji bua muvuaye anu mukuate muele wa mvita.+ Nunku Yehowa wakafila ditshimuna dinene* dituku adi;+ ne bantu bakapingana panyima pende bua kuangata bintu bia bantu bashipa.

11 Bakamulondela kudi Shama muana wa Age muena Halala. Bena Peleshete bakadisangisha ku Lehi muaba uvua tshitupa tshia buloba tshiuwule tente ne nkunde ya mikese; ne bantu bakanyema bua bena Peleshete. 12 Kadi yeye wakimana munkatshi mua budimi abu, kubuluilaye mvita ne kutungunukaye ne kushipa bena Peleshete, kuenzabi bua Yehowa afile ditshimuna dinene.*+

13 Bantu basatu ba ku bamfumu 30 bakapueka kudi Davidi ku nyongolo wa Adulama+ mu tshikondo tshia dipuola dia bintu, pine apu tshisumbu tshia* bena Peleshete tshivua tshiase tshitudilu mu Tshibandabanda* tshia bena Lefa.+ 14 Dîba adi Davidi uvua muaba wa kusokomena,+ ne basalayi ba bena Peleshete bavua mu Beteleheme. 15 Pashishe Davidi wakaleja dijinga divuaye nadi wamba ne: “Bu meme nansha mua kupetaku mâyi a kunua a mu tshina tshia kulamina mâyi tshidi pabuipi ne tshiibi tshia Beteleheme!” 16 Ke bilobo bia mvita bisatu abi kubuelabi mu tshitudilu tshia bena Peleshete ku makanda, kusunabi mâyi mu tshina tshia kulamina mâyi tshivua pabuipi ne tshiibi tshia Beteleheme ne kuatuadilabi Davidi; kadi yeye wakabenga bua kuanua, kuapongoluelaye Yehowa panshi.+ 17 Yeye kuamba ne: “Yehowa, kabiena mua kuenzeka bua meme kuenza bualu ebu to! Ndi mua kunua mashi+ a bantu bavua baye kusuna mâyi, bateke mioyo* yabu mu njiwu anyi?” Nunku wakabenga bua kuanua. Aa ke malu avua bilobo biende bia mvita bisatu bienze.

18 Abishai+ muanabu ne Yoaba muana wa Seluya+ uvua ku mutu kua bantu bakuabu basatu; wakashipa bantu 300 ne difuma diende, ne uvua ne lumu anu bu bantu basatu abu.+ 19 Nansha muvuabu batamba kumunemeka kupita bakuabu basatu abu ne muvuaye mfumuabu, kavua mufike mu mulongo wa basatu ba kumpala abu to.

20 Benaya+ muana wa Yehoyada uvua muntu wa dikima* uvua muenze malu manene a bungi mu Kabesêle.+ Uvua mushipe bana babidi ba Aliele wa mu Moaba, ne dituku kampanda divua neje iloka uvua mupueke mu tshina tshia kulamina mâyi, kushipaye ntambue.+ 21 Uvua mushipe kabidi muena Ejipitu kampanda uvua munene mule wa mfiondo. Nansha muvua muena Ejipitu au ne difuma mu tshianza tshiende, yeye wakaya kuluangana nende ne mutshi, kudiapulaye difuma mu tshianza tshia muena Ejipitu ne kumushipaye ne difuma diende yeye adi. 22 Aa ke malu avua Benaya muana wa Yehoyada muenze, ne uvua ne lumu bu lua bilobo bia mvita bisatu bia Davidi. 23 Nansha muvuabu bamunemeka bikole kupita too ne bena mvita 30, kavua mufike mu mulongo wa bena mvita basatu abu to. Kadi Davidi wakamuteka ku mutu kua bantu bavua bamulama.

24 Asahele+ muanabu ne Yoaba uvua munkatshi mua bantu 30; Elehanana muana wa Dodo wa ku Beteleheme,+ 25 Shama muena Haloda, Elika muena Haloda, 26 Helese+ muena Palati, Ila+ muana wa Ikeshe muena Tekoa, 27 Abiezê+ muena Anatota,+ Mebunai muena Husha, 28 Salemona muena Ahoa, Mahalai+ muena Netofa, 29 Helebe muana wa Bânaha muena Netofa, Itai muana wa Libai muena Gibea wa mu bena Benyamina, 30 Benaya+ muena Pilatona, Hidai wa ku tusulu tua tshilonda nkoka* tua Gâsha,+ 31 Abi-alabona muena Alabâ, Azamaweta muena Bâ-hulima, 32 Eliahaba muena Shâlabima, bana ba Yashena, Yonatana, 33 Shama muena Halala, Ahiyama muana wa Shala muena Halala, 34 Elifelete muana wa Ahasabai muana wa Mâkata, Eliyama muana wa Ahitofele+ muena Gilo, 35 Heselo muena Kâmele, Pâlai muena Alaba, 36 Igala muana wa Natana wa ku Soba, Bani muena Gada, 37 Seleke muena Amona, Nahalai muena Bêlota muambudi wa bia mvita wa Yoaba muana wa Seluya, 38 Ila muena Yitela, Galeba muena Yitela,+ 39 ne Uliya+ muena Hiti, bantu bonso 37.

24 Tshiji tshia Yehowa tshiakatemena kabidi bena Isalele+ pavua muntu kampanda musake Davidi* bua kubenzela bibi wamba ne: “Ndaku ubale bungi+ bua bena Isalele ne bua bena Yuda.”+ 2 Nunku mukalenge wakambila Yoaba+ mfumu wa tshiluilu uvuabu nende ne: “Pitshila koku mu bisa bionso bia Isalele, kumbukila ku Dana too ne ku Bê-sheba,+ ne ufunde mêna a bantu bua mmanye bungi bua bantu.” 3 Kadi Yoaba wakambila mukalenge ne: “Yehowa Nzambi webe avudije bantu misangu lukama, ne mêsu a mfumu mukalenge wanyi amone bualu ebu, kadi bua tshinyi mfumu mukalenge wanyi mmusue kuenza bualu bua mushindu eu?”

4 Kadi dîyi dia mukalenge diakapita Yoaba ne bamfumu ba tshiluilu bukole. Nunku Yoaba ne bamfumu ba tshiluilu bakumbuka kumpala kua mukalenge bua kufunda mêna a bantu ba mu Isalele.+ 5 Bakasabuka Yadene, kutudilabu mu Aloê,+ ku dia balume dia* tshimenga munkatshinkatshi mua tshibandabanda,* kuyabu batangile ku bena Gada, kutungunukabu too ne ku Yazê.+ 6 Pashishe bakaya ku Gilada+ ne ku buloba bua Tatima-hodeshi ne kutungunukabu too ne ku Dana-yana, bobu kunyunguluka kuyabu ku Sidona.+ 7 Pashishe bakaya ku muaba mukolesha bikole wa ku Tulo+ ne mu bimenga bionso bia bena Hiwi+ ne bia bena Kanâna, ne ndekelu wa bionso bakashikidila mu Negebe+ wa Yuda ku Bê-sheba.+ 8 Nunku bakapitshila mu buloba buonso ne kufikabu ku Yelushalema ku ndekelu kua ngondo tshitema ne matuku 20. 9 Nunku Yoaba wakapesha mukalenge bungi bua bantu bavuabu bafunde mêna. Isalele uvua ne bena mvita batue ku binunu 800 bikale ne miele ya mvita, ne bantu ba mu Yuda bavua binunu 500.+

10 Kadi muoyo wa* Davidi wakanyingalala+ panyima pa yeye mumane kubala bungi bua bantu. Pashishe Davidi wakambila Yehowa ne: “Ndi muenze mpekatu munene+ pandi muenze bualu ebu. Mpindieu Yehowa, buikidila koku muena mudimu webe tshilema tshiende,+ bualu ndi muenze malu ne bupote bua bungi menemene.”+ 11 Pakajuka Davidi mu dinda, dîyi dia Yehowa diakalua kudi muprofete Gada,+ mumonyi wa bikena kumona wa Davidi, diamba ne: 12 “Ndaku wambile Davidi ne: ‘Yehowa udi wamba ne: “Ndi nkutekela malu asatu. Sungula bundi ne bua kukuenzela.”’”+ 13 Nunku Gada wakaya kudi Davidi, kumuambilaye ne: “Bidimu muanda mutekete bia tshiyole tshia nzala bilue mu buloba buebe anyi?+ Peshi udi ne bua kunyema baluishi bebe mu ngondo isatu padibu benda bakulonda?+ Anyi kuikale matuku asatu a tshipupu mu buloba buebe?+ Mpindieu ela meji bimpe bua tshindi ne bua kuandamuna Eu uvua muntume.” 14 Ke Davidi kuambila Gada ne: “Mbintonde bikole menemene. Tukuluke koku mu tshianza tshia Yehowa,+ bualu luse luende ndunene;+ kadi tshikuluki mu tshianza tshia muntu to.”+

15 Nunku Yehowa wakatuma tshipupu+ mu Isalele kutuadijila mu dinda too ne dîba dikosa, kuenzabi bua ne: bantu binunu 70 kumbukila ku Dana too ne ku Bê-sheba+ bafue.+ 16 Pavua muanjelu muolole tshianza tshiende tshitangija ku Yelushalema bua kumubutula, Yehowa wakanyingalala* bua dikenga adi,+ ke yeye kuambila muanjelu uvua mulue ne kabutu munkatshi mua bantu ne: “Biakumbanyi! Mpindieu puekesha tshianza tshiebe.” Muanjelu wa Yehowa uvua pabuipi ne muaba wa tshishipuidi wa Alauna+ muena Yebuse.+

17 Pavua Davidi mumone muanjelu uvua ushipa bantu, wakambila Yehowa ne: “Meme ke uvua muenze mpekatu, ne meme ke uvua muenze bibi; kadi mikoko eyi,+ tshidiye mienze ntshinyi? Tshianza tshiebe tshinduishe meme ne nzubu wa tatuanyi.”+

18 Nunku Gada wakaya kudi Davidi dituku adi kumuambilaye ne: “Banda, washile Yehowa tshioshelu muaba wa tshishipuidi wa Alauna muena Yebuse.”+ 19 Ke Davidi kubanda bilondeshile dîyi dia Gada, anu muvua Yehowa mutume dîyi bua kuenza. 20 Pavua Alauna mutangile muinshi ne mumone mukalenge ne bena mudimu bende balua kudiye, diakamue Alauna wakapatuka, yeye kuinamina mukalenge mpala mutue panshi. 21 Alauna wakebeja ne: “Mfumu mukalenge wanyi mmulue kudi muena mudimu wende bua tshinyi?” Davidi wakandamuna ne: “Mbua kukusumba muaba wa tshishipuidi bua kuashila Yehowa tshioshelu, bua tshipupu tshidi tshikuate tshisamba tshimane.”+ 22 Kadi Alauna wakambila Davidi ne: “Mfumu mukalenge wanyi awangate ne alambule tshidi tshimpe kudiye.* Ngombe bua mulambu wa kuosha ne tshintu tshia kushipula natshi ne bikokedi bia ngombe bua nkunyi mbiobi ebi. 23 Mukalenge wanyi, Alauna udi upesha mukalenge bintu bionso ebi.” Pashishe Alauna wakambila mukalenge ne: Yehowa Nzambi webe akuanyishe.”

24 Kadi mukalenge wakambila Alauna ne: “Tòo, ndi ne bua kuwusumba kuudi ku mushinga kampanda. Tshiakulambula Yehowa Nzambi wanyi milambu ya kuosha indi tshiyi mutudile tshintu to.” Nunku Davidi wakasumba muaba wa tshishipuidi ne ngombe ku nshekele* 50 ya arjan.+ 25 Nunku Davidi wakashila Yehowa tshioshelu+ muaba au, yeye kulambula milambu ya kuosha ne milambu ya diumvuangana. Ke Yehowa kuteleja disengelela bua bualu bua buloba,+ ne tshipupu tshivua tshikuate Isalele tshiakimana.