ESETÊ

1 Mpindieu mu matuku a Ahashawelosha,* mmumue ne: Ahashawelosha uvua mukokeshe maprovense* 127+ kumbukila ku Inde too ne ku Etshiopi,* 2 mu matuku au pavua mukalenge Ahashawelosha musombe mu nkuasa wende wa bukalenge mu Shushana*+ nzubu mukolesha,* 3 mu tshidimu tshisatu tshia bukokeshi buende, wakenzejila bakokeshi ba mu bukalenge buende ne bena mudimu bende bonso didia dinene. Tshiluilu tshia bena Pelasa+ ne bena Madayi,+ bantu banene, ne bakokeshi ba mu maprovense* bavua kumpala kuende, 4 ne wakabaleja bubanji bua bukalenge buende bua butumbi ne bunene ne butumbi bua bukole buende matuku a bungi, matuku 180. 5 Pakajika matuku au, mukalenge wakenzeja didia dinene matuku muanda mutekete bua bantu bonso bavua mu Shushana* nzubu mukolesha,* mu lubanza lua lupangu lua mitshi ne bilongo lua dibalasa dia mukalenge, kumbukila ku muntu mutambe bunene too ne ku mutambe bukese. 6 Kuvua bilamba bia line, bia ndanda muimpe, ne bia dikala dia ble bisuikila ku mionji ya tshilamba tshimpe, bilamba bia miose mikunzubile ya mikoko ku bikanu bia tshiamu tshia arjan, makunji a mabue a marbre, ne tulalu tua or ne tua arjan tuteka panshi palamika mabue a marbre makunze, mabue a marbre matoke, masanga, ne mabue a marbre mafiike.

7 Bavua belela mvinyo mu makopo a or;* dikopo dionso divua dishilangane ne dikuabu, ne mvinyo wa mukalenge uvua wa bungi menemene bilondeshile bubanji bua mukalenge. 8 Dinua divua bilondeshile mukenji wa ne: kabavua ne bua kuenzeja* muntu nansha umue to, bualu mukalenge uvua mumvuangane ne bena mudimu ba mu dibalasa diende ne: muntu yonso uvua ne bua kuenza muvuaye musue.

9 Mukalenge mukaji Washeti+ wakenzejila pende bantu bakaji didia dinene ku nzubu wa bukalenge* wa mukalenge Ahashawelosha.

10 Mu dituku dia muanda mutekete, pavua muoyo wa mukalenge muikale ne disanka bua mvinyo, wakambila Mehumana, Bezeta, Hâbona,+ Bigata, Abagata, Zetâ, ne Kâkasa, bena mudimu muanda mutekete ba mu lubanza lua mukalenge bavua bambuluishi ba mukalenge Ahashawelosha nkayende, 11 bua kulua ne mukalenge mukaji Washeti kumpala kua mukalenge, muvuale tshia ku mutu* tshia bukalenge, bua kuleja bantu ne bakokeshi muvuaye muimpe, bualu uvua muimpe be! 12 Kadi mukalenge mukaji Washeti uvua anu ubenga bua kulua bilondeshile dîyi divua mukalenge mutume ku butuangaji bua bena mudimu ba mu lubanza lua mukalenge. Nunku mukalenge wakafiika munda bikole, ne tshiji tshikole tshiakatema munda muende.

13 Pashishe mukalenge wakakula ne bantu ba meji bavua ne lungenyi lutue mu malu akavua menzeke* (bualu mu mushindu eu ke muvua bualu bua mukalenge bufika kudi bonso bavua bamanye mikenji ne dikosa bilumbu, 14 ne bavua pabuipi nende menemene bavua Kâshena, Shetâ, Ademata, Tâshishi, Melese, Mâsena, ne Memukana, bakokeshi muanda mutekete+ ba mu Pelasa ne mu Madayi bavua bafika kudi mukalenge ne bavua ne miaba mibandile menemene mu bukalenge). 15 Mukalenge wakebeja ne: “Bilondeshile mikenji, ntshinyi tshidibu ne bua kuenzela mukalenge mukaji Washeti bua mudiye kayi mutumikile dîyi divua mukalenge Ahashawelosha mutume ku butuangaji bua bena mudimu ba mu lubanza lua mukalenge?”

16 Ke Memukana kuamba mu mêsu mua mukalenge ne bakokeshi ne: “Mukalenge mukaji Washeti ki mmuenzele anu mukalenge nkayende bibi to,+ kadi mmuenzele bakokeshi bonso ne bantu bonso ba mu maprovense* onso a mukalenge Ahashawelosha bibi. 17 Bualu bakaji bonso nebamanye tshidi mukalenge mukaji muenze ne nebapetule babayabu bamba ne: ‘Mukalenge Ahashawelosha uvua muambe bua balue ne mukalenge mukaji Washeti kumpala kuende, kadi yeye wakabenga bua kulua.’ 18 Lelu eu bakaji ba bakokeshi ba mu Pelasa ne mu Madayi badi bamanye tshivua mukalenge mukaji muenze nebakule ne bakokeshi bonso ba mukalenge, bienza bua ne: kuikale dipetu dia bungi ne tshiji tshikole. 19 Biobi bikale bimpe ku mêsu kua mukalenge, mukalenge ele mukenji wa bukalenge, ne bawufunde mu mikenji ya mu Pelasa ne mu Madayi idibu kabayi mua kushipa,+ wa ne: Washeti kena mua kulua kabidi kumpala kua mukalenge Ahashawelosha musangu nansha umue to; ne mukalenge afile muanzu wende wa mukalenge kudi mukaji mukuabu udi mumupite yeye. 20 Pumvuabu mukenji wa mukalenge mu bukalenge buende buonso bunene, bakaji bonso nebanemeke babayabu, kumbukila ku mutambe bunene too ne ku mutambe bukese.”

21 Lungenyi elu luakasankisha mukalenge ne bakokeshi, ne mukalenge wakenza tshivua Memukana muambe. 22 Nunku wakatuma mikanda mu maprovense onso a bukalenge,*+ provense yonso* mu mfundilu wende* ne bantu bonso mu muakulu wabu, bua mulume yonso ikale mfumu* mu nzubu muende ne bua akule mu muakulu wa tshisamba tshiabu.

2 Panyima pa malu aa, pavua tshiji tshikole tshia mukalenge Ahashawelosha+ tshipueke, wakavuluka bualu buvua Washeti muenze+ ne dipangadika divuabu bamuangatshile.+ 2 Nunku bambuluishi ba mukalenge nkayende bakamba ne: “Bakebele mukalenge bansongakaji bimpe kumona batshidi tumama. 3 Mukalenge atume bantu mu maprovense* onso a mu bukalenge buende+ bua basangishe bansongakaji bonso bimpe kumona batshidi tumama ku Shushana* nzubu mukolesha,* ku nzubu wa bantu bakaji.* Hegai+ muntu mutungu wa mukalenge ne mulami wa bantu bakaji ikale ubatangila, ne bikale babapesha bintu bia kudilengeja nabi.* 4 Nunku nsongakaji udi usankisha mukalenge kupita bakuabu neikale mukalenge mukaji pa muaba wa Washeti.”+ Lungenyi elu luakasankisha mukalenge, ne ke tshiakenzaye.

5 Kuvua muena Yuda mukuabu mu Shushana*+ nzubu mukolesha,* dîna diende Môdekai+ muana wa Yaî muana wa Shimei muana wa Kishi, muena Benyamina,+ 6 uvuabu bakuate mu Yelushalema baye nende pamue ne bantu bavuabu baye nabu pamue ne Yekoniya*+ mukalenge wa Yuda uvua Nebukadenesâ mukalenge wa Babilona mukuate muye nende. 7 Uvua mukoleshe* Hadasa,* mmumue ne: Esetê, muana wa tatuende mukuabu,+ bualu kavua ne tatu anyi mamu. Nsongakaji eu uvua ne mubidi muimpe ne tshimuenekelu tshimpe, ne pakafua tatuende ne mamuende, Môdekai uvua mumuangate bu muanende wa bakaji. 8 Pavuabu bamanyishe dîyi dia mukalenge ne mukenji wende, ne pavuabu basangishe bansongakaji ba bungi ku Shushana* nzubu mukolesha* babateke mu bianza bia Hegai,+ bakalua kabidi ne Esetê ku nzubu* wa mukalenge kumutekabu mu bianza bia Hegai mulami wa bantu bakaji.

9 Nunku nsongakaji eu wakamusankisha, yeye kumuanyisha,* ke yeye kumulongoluela diakamue bintu bia kudilengeja nabi*+ ne biakudia biende, ne yeye kumupesha bansongakaji muanda mutekete basungula ba ku nzubu wa mukalenge. Wakamumbusha kabidi muaba uvuaye, kumutekaye yeye ne bansongakaji bavua bamuambuluisha muaba mutambe buimpe mu nzubu wa bantu bakaji.* 10 Esetê kavua muambe bualu nansha bumue bua tshisamba tshiabu+ anyi bua balela bende to, bualu Môdekai+ uvua mumuambile bua kambidi muntu nansha umue to.+ 11 Ku dituku ku dituku Môdekai uvua upitshila kumpala kua lubanza lua nzubu wa bantu bakaji* bua kumanya muvua Esetê ne bua kumanya tshivua tshimufikila.

12 Nsongakaji yonso uvua ne diende dîba dia kubuela kudi mukalenge Ahashawelosha pavuaye ujikija ngondo 12 ya didilengeja ivuabu bakosele bantu bakaji, bualu mushindu eu ke uvuabu bakumbaja didilengeja diabu: ngondo isambombo ne mafuta a mire+ ne ngondo isambombo ne mafuta a bome+ ne mafuta mashilashilangane a didilengeja nawu. 13 Dîba adi nsongakaji uvua ukumbana bua kubuela kudi mukalenge, ne tshionso tshivuaye ulomba bavua bamupeshatshi pavuaye umbuka mu nzubu wa bantu bakaji* bua kuya ku nzubu kua mukalenge. 14 Ku dilolo uvua ubuela, ne mu dinda uvua upingana ku nzubu muibidi wa bantu bakaji,* mu bianza bia Shâshagaza muntu mutungu wa mukalenge,+ mulami wa bakaji babanjija. Kavua upingana kabidi kudi mukalenge to, anu yeye musankishe mukalenge mu mushindu wa pa buawu ne bamubikile mu dîna diende.+

15 Pavua dîba dia Esetê muana wa Abihayila tatuende mukuabu wa Môdekai uvua mumuangate bu muanende wa bakaji+ dikumbane dia kubuela kudi mukalenge, kakalomba tshintu nansha tshimue pa kumbusha bintu bivua Hegai muntu mutungu wa mukalenge, mulami wa bantu bakaji, muambe. (Dîba dionso adi Esetê uvua wenda wanyishibua kudi muntu yonso uvua umumona.) 16 Bakaya ne Esetê kudi mukalenge Ahashawelosha ku nzubu wende wa bukalenge mu ngondo wa dikumi, mmumue ne: ngondo wa Tebeta,* mu tshidimu tshia muanda mutekete+ tshia bukokeshi buende. 17 Mukalenge wakalua kunanga Esetê bikole kupita bakaji bakuabu bonso, ne wakamusankisha, yeye kumuanyisha* bikole kupita bansongakaji bonso batshivua tumama. Nunku wakateka tshia ku mutu* tshia bukalenge pa mutu pende, yeye kumuteka mukalenge mukaji+ pa muaba wa Washeti.+ 18 Nunku mukalenge wakenzejila bakokeshi bonso ba mu bukalenge buende ne bena mudimu bende didia dinene, didia dia Esetê. Pashishe wakamanyisha dilekela bua maprovense,* ne uvua anu upesha bantu mapa bilondeshile bubanji bua mukalenge.

19 Mpindieu pakasangishabu bansongakaji batshivua tumama*+ musangu muibidi, Môdekai uvua musombe mu tshiibi tshia mukalenge. 20 Esetê kavua muambe bualu nansha bumue bua balela bende ne tshisamba tshiabu,+ anu muvua Môdekai mumuambile; Esetê wakatungunuka ne kuenza malu avua Môdekai wamba, anu bu pavuaye ku bukokeshi buende.+

21 Mu matuku au pavua Môdekai musombe mu tshiibi tshia mukalenge, Bigatana ne Teleshe, bena mudimu babidi ba mu lubanza lua mukalenge, balami ba ku biibi, bakakuata tshiji, bobu kuela tshifufu bua kushipa* mukalenge Ahashawelosha. 22 Kadi Môdekai wakumvua bualu abu, diakamue yeye kubuambila Esetê mukalenge mukaji. Esetê pende wakakula ne mukalenge mu dîna dia Môdekai.* 23 Nunku bakalondolola bualu abu, ndekelu wa bionso bobu kusangana ne: buvua bulelela, ne bakuowa bantu babidi abu ku mutshi; bakafunda bualu buonso ebu mu mukanda wa malu a bikondo abi mu mêsu mua mukalenge.+

3 Panyima pa malu aa mukalenge Ahashawelosha wakabandisha Hamana+ muana wa Hamedata muena Agaga+ muanzu ne wakamubandisha pa kuteka nkuasa wende wa bukalenge ku mutu kua bakokeshi bakuabu bonso bavuaye nabu.+ 2 Bena mudimu bonso ba mukalenge bavua mu tshiibi tshia mukalenge bavua binamina Hamana, bamutuila mpala panshi, bualu ke tshivua mukalenge mutume dîyi bua bamuenzele. Kadi Môdekai yeye uvua ubenga bua kuinama anyi kutua mpala panshi. 3 Nunku bena mudimu ba mukalenge bavua mu tshiibi tshia mukalenge bakakonka Môdekai ne: “Bua tshinyi udi ubenga kutumikila dîyi didi mukalenge mutume?” 4 Bavua bamukonka bualu ebu ku dituku ku dituku, kadi kavua ubateleja to. Nunku bakambila Hamana bua kumona ni uvua mua kulekela bua Môdekai atungunuke ne kuenza tshivuaye wenza atshi;+ bualu uvua mubambile ne: uvua muena Yuda.+

5 Mpindieu pavua Hamana mumone ne: Môdekai uvua ubenga bua kumuinamina ne kumutuila mpala panshi, Hamana wakuwula ne tshiji tshikole.+ 6 Kadi wakabenga lungenyi lua kushipa* Môdekai nkayende, bualu bavua bamuambile bua tshisamba tshia ba Môdekai. Nunku Hamana wakatuadija kukeba bua kubutula bena Yuda bonso bavua muaba wonso uvua Ahashawelosha ukokesha, tshisamba tshionso tshia ba Môdekai.

7 Mu ngondo wa kumpala, mmumue ne: mu ngondo wa Nisana,* mu tshidimu tshia 12+ tshia mukalenge Ahashawelosha, bakela Pû+ (mmumue ne: nshobo) kumpala kua Hamana bua kumanya dituku ne ngondo, ne Pû wakakuata ngondo wa 12, mmumue ne: ngondo wa Adâ.*+ 8 Pashishe Hamana wakambila mukalenge Ahashawelosha ne: “Kudi tshisamba kampanda tshidi tshitangalake ne tshimuangalake munkatshi mua bisamba+ mu maprovense* onso a mu bukalenge buebe;+ mikenji yatshi mmishilangane ne ya bisamba bikuabu bionso; bena mu tshisamba atshi kabena batumikila mikenji ya mukalenge to, ne bobu babalekele kabiakuikala bimpe bua mukalenge to. 9 Biobi bisankisha mukalenge, bele mukenji ne bawufunde bua bababutule. Nemfute bena mudimu ntalanta* binunu 10 ya arjan ya kuela mu tshibutshilu tshia bukalenge.”*

10 Ke mukalenge kumbushaye mpeta wa kutua nende tshitampi+ uvua ku munu kuende, kumupeshaye Hamana+ muana wa Hamedata muena Agaga+ uvua muena lukuna wa bena Yuda. 11 Mukalenge wakambila Hamana ne: “Arjan ne tshisamba atshi bidi mu bianza biebe, bua wewe kuenza nabi muudi umona bikumbana.” 12 Pashishe bakabikila bafundi ba mukalenge+ dituku dia 13 dia ngondo wa kumpala. Bakafunda+ mêyi onso avua Hamana mutumine baleji mpala ba mukalenge, banguvena bavua ku mutu kua maprovense,* ne bakokeshi ba bisamba bishilashilangane, provense* yonso mu mfundilu wende* ne tshisamba tshionso mu muakulu watshi. Bavua bafunde mu dîna dia mukalenge Ahashawelosha ne batue tshitampi ne mpeta wa mukalenge wa kutua nende tshitampi.+

13 Bavua batume mikanda mu maprovense* onso a mukalenge ku diambuluisha dia bafidi ba mikanda, mikale ne dîyi dituma dia kujikija bena Yuda bonso, kubashipa ne kubabutula, nsonga ne muntu mukole muomumue, bana ne bakaji, mu dituku dimue, dituku dia 13 dia ngondo wa 12, mmumue ne: ngondo wa Adâ,+ ne bua kunyenga bintu biabu.+ 14 Bavua ne bua kuangata malu a mu mukanda au kuavuija mukenji mu provense* yonso ne kuamanyisha bisamba bionso, bua bidilongolole bua dituku adi. 15 Bafidi ba mikanda bakaya lukasa lukasa+ ku dîyi dia mukalenge; bavua bamanyishe mukenji au mu Shushana*+ nzubu mukolesha.* Pashishe mukalenge ne Hamana bakasomba bua kunua, kadi tshimenga tshia Shushana* tshivua mu kayumbayumba.

4 Pavua Môdekai+ mumvue bionso bivua bienzeke,+ wakadipanda bilamba, kuelaye bilamba bikayabale ne kudielaye butu. Pashishe wakapatuka, kuyaye munkatshi mua tshimenga wenda udila bikole ne kanyinganyinga. 2 Wakaya, kuimanyinaye anu ku tshiibi tshia mukalenge, bualu muntu nansha umue kavua ne bua kubuela mu tshiibi tshia mukalenge muvuale bilamba bikayabale to. 3 Mu provense*+ yonso muvua dîyi dia mukalenge ne mukenji uvuaye muele bifike, kuvua madilu manene mu bena Yuda, pamue ne dijila dia biakudia+ ne miadi ne mbila. Bantu ba bungi bavua balala panshi mu butu bavuale bilamba bikayabale.+ 4 Pavua bambuluishi ba Esetê ba bakaji ne bantu batungu bende babuele ne bamuambile bualu ebu, biakatonda mukalenge mukaji bikole. Nunku wakatumina Môdekai bilamba bia kuvuala pa muaba wa bilamba biende bikayabale, kadi yeye wakabibenga. 5 Ke Esetê kubikidisha Hataka, umue wa ku bantu batungu ba mukalenge uvua mukalenge muteke bua kuenzela Esetê mudimu, ne wakamutumina dîyi bua kuya kudi Môdekai bua kumanya tshivua bualu ebu bumvuija ne tshivua tshipitakana.

6 Nunku Hataka wakapatuka, kuyaye kudi Môdekai muaba wa tshinsangansanga wa mu tshimenga kumpala kua tshiibi tshia mukalenge. 7 Môdekai wakamuambila malu onso avua mamuenzekele ne bungi bujalame bua makuta+ avua Hamana mulaye bua kufila mu tshibutshilu tshia mukalenge bua babutule bena Yuda.+ 8 Wakamupesha kabidi mukanda uvuabu bafunde mukenji uvuabu bamanyishe mu Shushana*+ bua kubabutula. Uvua ne bua kuwuleja Esetê, kumumvuijawu, ne kumuambila+ bua aye kudi mukalenge bua kulomba luse lua mukalenge ne kumusengelela yeye nkayende bua bena mu tshisamba tshiabu.

9 Hataka wakapingana, kuambilaye Esetê tshivua Môdekai muambe. 10 Esetê wakandamuna Hataka umuambila malu a kuambila Môdekai+ ne: 11 “Bena mudimu bonso ba mukalenge ne bantu ba mu maprovense* a mukalenge mbamanye ne: mulume anyi mukaji kayi yonso udi ubuela mu lubanza lua munda lua mukalenge+ bobu kabayi bamubikidishe, kudi anu mukenji umue udi umukumbanyina: badi ne bua kumushipa; yeye udi mua kushala ne muoyo anu mukalenge yeye mumuoluele dikombo dia or.+ Kadi mukalenge ki mmumbikidishe kukadi mpindieu matuku 30.”

12 Pavuabu bambile Môdekai tshivua Esetê muambe, 13 wakandamuna Esetê ne: “Kuedi meji ne: bu muudi mu nzubu mua mukalenge wewe udi mua kupanduka kupita bena Yuda bakuabu bonso to. 14 Bualu wewe mushale mupuwe tshikondo etshi, disulakana ne lupandu nebilue kudi bena Yuda bifumina muaba mukuabu,+ kadi wewe ne nzubu wa tatuebe nenujimine. Kabidi nnganyi udi mumanye biwikala mufike ku muanzu wa bukalenge bua kuambuluisha tshikondo tshia buena etshi?”+

15 Nunku Esetê wakandamuna Môdekai ne: 16 “Ndaku, usangishe bena Yuda bonso badi mu Shushana* ne nujile biakudia+ bua bualu buanyi. Kanudi tshintu anyi kanunu tshintu munkatshi mua matuku asatu,+ butuku ne munya. Meme pamue ne bambuluishi banyi ba bakaji netujile petu biakudia. Nembuele kudi mukalenge, nansha mudi bualu ebu bushipa mukenji, ne bikalabi bua meme kufua, nemfue.” 17 Nunku Môdekai wakaya ne wakenza bionso bivua Esetê mumuambile bua kuenza.

5 Mu dituku disatu+ Esetê wakavuala mizabi yende ya bukalenge, kuimanaye mu lubanza lua munda lua nzubu* wa mukalenge, mutangile ku nzubu wa mukalenge, pavua eku mukalenge musombe mu nkuasa wende wa bukalenge mu nzubu wende wa bukalenge mutangile ku tshibuelelu. 2 Diakamue pavua mukalenge mumone mukalenge mukaji Esetê muimane mu lubanza, Esetê wakamulengelela, ne mukalenge wakamuoluela dikombo dia or + divuaye nadi mu tshianza. Nunku Esetê wakaya, kulengaye lusongo lua dikombo adi.

3 Mukalenge wakamuebeja ne: “Ntshilumbu kayi, mukalenge mukaji Esetê? Udi ukeba tshinyi? Nansha too ne ku* tshia bibidi tshia bukalenge buanyi, nebakupeshatshi!” 4 Esetê wakandamuna ne: “Biobi bisankisha mukalenge, mukalenge alue ne Hamana+ lelu mu didia dinene dindi mumulongoluele.” 5 Ke mukalenge kuambila bantu bende ne: “Ambilayi Hamana alue lukasa anu bu mudi Esetê mulombe.” Nunku mukalenge ne Hamana bakaya mu didia dinene divua Esetê mulongolole.

6 Pavuabu benda banua mvinyo, mukalenge wakebeja Esetê ne: “Dilomba diebe didi tshinyi? Nebakukumbajiladi! Udi ukeba tshinyi? Nansha too ne ku* tshia bibidi tshia bukalenge buanyi, nebakuenzelatshi!”+ 7 Esetê wakandamuna ne: “Dilomba dianyi ne bualu bundi nkeba budi nunku: 8 Meme mulengelele mukalenge ne biobi bisankisha mukalenge bua kukumbaja dilomba dianyi ne kuenza tshindi nkeba, mukalenge ne Hamana balue mu didia dinene dingabenzela malaba; ne malaba nengenze mudi mukalenge wamba.”

9 Dituku adi Hamana wakapatuka ne disanka ne muoyo wende uvua muwule ne disanka. Kadi pavua Hamana mumone Môdekai mu tshiibi tshia mukalenge ne mumone ne: kavua mujuke ne muzakale kumpala kuende, Hamana wakuwula ne tshiji tshikole bua bualu bua Môdekai.+ 10 Kadi Hamana wakadikanda, kuyaye kuende. Pashishe wakabikidisha balunda bende ne mukajende Zeleshe.+ 11 Hamana wakaditumbisha bua bubanji buende bunene, bua bana ba bungi bavuaye nabu,+ ne bua muvua mukalenge mumubandishe muanzu ne mumubandishe ku mutu kua bakokeshi ne bena mudimu ba mukalenge.+

12 Hamana wakamba kabidi ne: “Bualu bukuabu, mukalenge mukaji Esetê kavua mubikile muntu mukuabu anu meme bua kuya ne mukalenge mu didia dinene divuaye mulongolole.+ Mmumbikile kabidi malaba bua tuikale nende ne mukalenge.+ 13 Kadi malu onso aa kaena ansankisha pantshidi mmona Môdekai muena Yuda musombe mu tshiibi tshia mukalenge.” 14 Nunku mukajende Zeleshe ne balunda bende bakamuambila ne: “Imanyikijija mutshi wa bule bua nkubita 50.* Nunku wambile mukalenge mu dinda ne: badi ne bua kuowelaku Môdekai.+ Pashishe uye ne mukalenge bua kusanka mu didia dinene adi.” Lungenyi alu luakamueneka luimpe kudi Hamana, ke yeye kuimanyikijija mutshi.

6 Butuku abu mukalenge wakapangila tulu.* Ke yeye kuamba bua balue ne mukanda uvuabu bafunda malu a bikondo abi,+ ne bakawubadila mukalenge. 2 Bakasangana bafundamu ne: Môdekai uvua muambe malu a Bigetana ne Teleshe, bena mudimu babidi ba mu lubanza lua mukalenge, balami ba ku biibi, bavua bele tshifufu bua kushipa* mukalenge Ahashawelosha.+ 3 Mukalenge wakebeja ne: “Mbutumbi kayi ne ndifutu kayi bidibu bapeshe Môdekai bua bualu ebu?” Ke bambuluishi ba mukalenge nkayende kuambabu ne: “Ki mbamuenzele tshintu nansha tshimue to.”

4 Panyima pa mutantshi, mukalenge wakebeja ne: “Nnganyi udi mu lubanza?” Dîba adi Hamana uvua mulue mu lubanza lua pambelu+ lua nzubu* wa mukalenge bua kuambila mukalenge bua kuowa Môdekai ku mutshi uvuaye mumulongoluele.+ 5 Bambuluishi ba mukalenge bakamuambila ne: “Hamana+ ke udi muimane mu lubanza.” Ke mukalenge kuamba ne: “Mubuejayi.”

6 Pavua Hamana mubuele, mukalenge wakamuebeja ne: “Ntshinyi tshidibu ne bua kuenzela muntu udi mukalenge ujinga kutumbisha?” Hamana wakadiambila mu muoyo wende ne: “Nnganyi udi mukalenge mua kujinga kutumbisha pa kungumbusha meme?”+ 7 Nunku Hamana wakambila mukalenge ne: “Bua muntu udi mukalenge ujinga kutumbisha, 8 balue ne bilamba bia bukalenge+ bitu mukalenge uvuala ne kabalu katu mukalenge wendesha kikale ne tshia ku mutu tshia bukalenge ku mutu kuaku. 9 Pashishe bangate bilamba abi ne kabalu, babipeshe umue wa ku bakokeshi banene ba mukalenge, ne badi ne bua kubivuadika muntu udi mukalenge ujinga kutumbisha ne bamuendeshe pa kabalu muaba wa tshinsangansanga wa mu tshimenga. Badi ne bua kuikala bela mbila kumpala kuende bamba ne: ‘Etshi ke tshidibu benzela muntu udi mukalenge ujinga kutumbisha!’”+ 10 Diakamue mukalenge wakambila Hamana ne: “Enza lukasa! Angata bilamba ne kabalu, ne wenzele Môdekai muena Yuda udi musombe mu tshiibi tshia mukalenge tshiudi ufuma ku diamba etshi. Kushiyi bualu nansha bumue buudi muambe to.”

11 Nunku Hamana wakangata bilamba ne kabalu, kubivuadika Môdekai,+ kumuendeshaye pa kabalu muaba wa tshinsangansanga wa mu tshimenga ne uvua wenda wela mbila kumpala kuende wamba ne: “Etshi ke tshidibu benzela muntu udi mukalenge ujinga kutumbisha!” 12 Panyima pa bualu ebu Môdekai wakapingana ku tshiibi tshia mukalenge, kadi Hamana wakaya kuende lubilu ne kanyinganyinga kakole, mudibuikile tshilamba ku mutu. 13 Pavua Hamana mulondele mukajende Zeleshe+ ne balunda bende bonso malu onso avua mamufikile, bena meji bende ne mukajende Zeleshe bakamuambila ne: “Bikala Môdekai uudi mutuadije kukuluka kumpala kuende muikale wa mu ndelanganyi ya bena Yuda,* kuakumutshimuna to; kakuyi mpata neukuluke kumpala kuende.”

14 Patshivuabu benda bayukila nende, bena mudimu ba mu lubanza lua mukalenge bakafika ne bakaya ne Hamana lubilu lubilu mu didia dinene divua Esetê muenzeje.+

7 Nunku mukalenge ne Hamana+ bakalua mu didia dinene dia mukalenge mukaji Esetê. 2 Mukalenge wakebeja kabidi Esetê dituku dibidi pavuabu banua mvinyo ne: “Mukalenge mukaji Esetê, dilomba diebe didi tshinyi? Nebakukumbajiladi. Udi ukeba tshinyi? Nansha too ne ku* tshia bibidi tshia bukalenge buanyi, nebakuenzelatshi!”+ 3 Mukalenge mukaji Esetê wakandamuna ne: “Meme mukulengelele, mukalenge wanyi, ne biobi bisankisha mukalenge, ndi ndomba bua usungile muoyo* wanyi, ne ndi nkeba bua ulame bena mu tshisamba tshietu+ ne muoyo. 4 Bualu mbatupane,+ meme ne bena mu tshisamba tshietu, bua kutujimija, kutushipa, ne kutubutula.+ Bu bobu batupane tshianana bu bapika balume ne bapika bakaji, mvua mua kushala mupuwe. Kadi dikenga kadiena dikumbana to, bualu nedienzele mukalenge bibi.”

5 Ke mukalenge Ahashawelosha kuebeja mukalenge mukaji Esetê ne: “Nnganyi au? Muntu udi mupete dikamakama dia kuenza bualu bua nunku udi kuepi?” 6 Esetê wakamba ne: “Muluishi ne muena lukuna ng’Hamana muntu mubi eu.”

Hamana wakumvua buôwa bua bungi bua bualu bua mukalenge ne mukalenge mukaji. 7 Mukalenge wakajuka ku dinua dia mvinyo ne tshiji tshikole, kuyaye mu lupangu lua dibalasa, kadi Hamana wakimana bua kusengelela mukalenge mukaji Esetê bua muoyo* wende, bualu uvua mumone ne: mukalenge uvua mudisuike bua kumupesha dinyoka. 8 Mukalenge wakumbuka mu lupangu lua dibalasa, kupinganaye mu nzubu muvuabu banuina mvinyo, kumonaye Hamana mudiele pa kalalu kavua Esetê. Mukalenge wakakema webeja ne: “Yeye udi kabidi ukeba kuangata mukalenge mukaji ku bukole mu nzubu muanyi anyi?” Diakamue pavua mêyi aa mapatuke mukana mua mukalenge, bakajika Hamana ku mêsu. 9 Mpindieu Hâbona,+ umue wa ku bena mudimu ba mu lubanza lua mukalenge, wakamba ne: “Hamana uvua kabidi mulongolole mutshi bua Môdekai+ uvua muambe malu avua mapandishe mukalenge.+ Mutshi au mmuimanyika ku nzubu kua Hamana, ne udi bule bua nkubita 50.”* Ke mukalenge kuamba ne: “Muowelayi ku mutshi au.” 10 Nunku bakuowela Hamana ku mutshi uvuaye mulongoluele Môdekai, ne tshiji tshikole tshia mukalenge tshiakapueka.

8 Dituku adi mukalenge Ahashawelosha wakapesha mukalenge mukaji Esetê nzubu wa Hamana,+ muena lukuna wa bena Yuda;+ ne Môdekai wakalua kumpala kua mukalenge, bualu Esetê uvua mumuambile muvua Môdekai mulela wende.+ 2 Pashishe mukalenge wakumbusha mpeta wende wa kutua nende tshitampi+ uvuaye munyenge Hamana, kumupeshaye Môdekai. Nunku Esetê wakateka Môdekai bua ikale utangila nzubu wa Hamana.+

3 Bualu bukuabu, Esetê wakakula kabidi ne mukalenge. Wakadiela ku makasa ende udila ne umusengelela bua akudimune bualu bubi buvua Hamana muena Agaga muenze ne tshifufu tshiende tshivuaye muelele bena Yuda.+ 4 Mukalenge wakoluela Esetê+ dikombo dia or, ke Esetê kujuka ne kuimanaye kumpala kua mukalenge. 5 Wakamba ne: “Biobi bisankisha mukalenge ne meme mumulengelele, ne mukalenge yeye mumone ne: mbimpe ne meme mumusankishe, batume dîyi difunda bua kushipa malu adi mu mikanda ya Hamana+ muana wa Hamedata muena Agaga,+ mueledianganyi wa tshifufu au, ivuaye mufunde bua kubutula bena Yuda mu maprovense* onso a mukalenge. 6 Bualu mmunyi mundi mua kukokesha bua kumona dikenga diakuata bena mu tshisamba tshietu, ne mmunyi mundi mua kukokesha bua kumona kabutu ka balela banyi?”

7 Nunku mukalenge Ahashawelosha wakambila mukalenge mukaji Esetê ne Môdekai muena Yuda ne: “Tangilayi! Ndi mufile nzubu wa Hamana kudi Esetê+ ne ndi muoweshishe Hamana ku mutshi+ bua tshifufu tshivuaye muele bua kuluisha* bena Yuda. 8 Mpindieu nudi mua kufunda mu dîna dia mukalenge bualu buonso bunudi numona bukumbana bua bena Yuda ne kubutua tshitampi ne mpeta wa mukalenge wa kutua nende tshitampi, bualu kabena mua kushintulula mukenji udi mufunda mu dîna dia mukalenge ne udi mutua tshitampi ne mpeta wa mukalenge wa kutua nende tshitampi.”+

9 Nunku bakabikila bafundi ba mukalenge dîba adi mu ngondo muisatu, mmumue ne: ngondo wa Siwana,* dituku dia 23, ne bakafunda mêyi onso avua Môdekai mutumine bena Yuda, pamue ne baleji mpala ba mukalenge,+ banguvena, ne bakokeshi ba maprovense*+ kumbukila ku Inde too ne ku Etshiopi, maprovense* 127, provense* yonso mu mfundilu wende* ne tshisamba tshionso mu muakulu watshi ne bena Yuda mu mfundilu wabu* ne mu muakulu wabu.

10 Wakaafunda mu dîna dia mukalenge Ahashawelosha, kuatuaye tshitampi ne mpeta wa mukalenge wa kutua nende tshitampi,+ ne kutumaye mikanda ayi ku tshianza tshia bafidi ba mikanda bavua bendela pa tubalu; bakendela pa tubalu tua kufila natu mikanda tua lubilu lukole, tukolesha bua mudimu wa mukalenge. 11 Mu mikanda eyi, mukalenge uvua mupeshe bena Yuda bavua mu bimenga bishilashilangane bionso dianyisha bua kudisangisha ne kuluila mioyo* yabu ne bua kujimija, kushipa, ne kubutula tshiluilu kayi tshionso tshia tshisamba kayi tshionso anyi provense* kayi yonso bivua mua kubaluisha, too ne bantu bakaji ne bana, ne bua kubanyenga bintu biabu.+ 12 Bualu ebu buvua ne bua kuenzeka mu dituku dimue mu maprovense* onso a mukalenge Ahashawelosha, mu dituku dia 13 dia ngondo wa 12, mmumue ne: ngondo wa Adâ.*+ 13 Malu avua mu mukanda au avua ne bua kulua bu mukenji mu maprovense* onso. Bavua ne bua kuwumanyisha bisamba bionso, bua bena Yuda bikale badilongolole dituku adi bua kudisombuela kudi bena lukuna babu.+ 14 Bafidi ba mikanda bavua bendela pa tubalu tua kufila natu mikanda tuvuabu bendesha bua mudimu wa mukalenge bakapatuka lukasa lukasa mu lubilu lukole ku dîyi dia mukalenge. Bavua bamanyishe kabidi mukenji au mu Shushana*+ nzubu mukolesha.*

15 Nunku Môdekai wakumbuka kumpala kua mukalenge muvuale bilamba bia bukalenge bia dikala dia ble ne ditoke, muase tshifulu tshia bukalenge tshinene tshia or ne mudiele tshilamba tshimpe menemene tshia miosa mikunzubile ya mikoko.+ Tshimenga tshia Shushana* tshiakela mbila ya disanka. 16 Kuvua disulakana,* disanka, ditua ntunku ne lumu bua bena Yuda. 17 Mu maprovense* onso ne mu bimenga bionso, muaba wonso uvua dîyi dia mukalenge ne mukenji wende bifike, bena Yuda bavua basanka, batua ntunku, balambisha biakudia bia bungi, ne benza bibilu bia disanka. Bantu ba mu bisamba bia bungi bia mu buloba bavua badiamba muvuabu bena Yuda,+ bualu buôwa bukole bua bena Yuda buvua bubakuate.

9 Mu dituku dia 13 dia ngondo wa 12, mmumue ne: ngondo wa Adâ,*+ dîba divuabu ne bua kukumbaja dîyi dia mukalenge ne mukenji wende,+ dituku divua bena lukuna ba bena Yuda batekemene bua kubapita bukole, malu akenzeka mushindu mukuabu, ne bena Yuda bakatshimuna bantu bavua babakine.+ 2 Bena Yuda bakadisangisha mu bimenga biabu mu maprovense* onso a mukalenge Ahashawelosha+ bua kuela bantu bavua bakeba kubenzela bibi tshianza, ne muntu nansha umue kavua mua kuimana kumpala kuabu to, bualu buôwa bukole buvua bukuate bisamba bionso bua bualu buabu.+ 3 Bakokeshi bonso ba maprovense,* baleji mpala ba mukalenge,+ banguvena, ne bantu bonso bavua batangila bintu bia mukalenge bavua ku luseke lua bena Yuda, bualu bavua batshina Môdekai. 4 Môdekai ukavua mulue ne bukole+ mu nzubu* wa mukalenge, ne lumu luende luvua luenda lutangalaka mu maprovense* onso, bualu Môdekai uvua wenda anu upeta bukole bua bungi.

5 Bena Yuda bakatapa bena lukuna babu bonso ne muele wa mvita, babashipa ne bababutula; bakenzela bantu bavua babakine tshionso tshivuabu basue.+ 6 Bena Yuda bakashipa ne bakabutula bantu 500 mu Shushana*+ nzubu mukolesha.* 7 Bakashipa kabidi Pâshanedata, Dalafona, Asepata, 8 Polata, Adalia, Alidata, 9 Pâmashata, Alisai, Alidai, ne Wayezata, 10 bana ba balume dikumi ba Hamana muana wa Hamedata, muena lukuna wa bena Yuda.+ Kadi panyima pa bamane kubashipa, kabakangata tshintu nansha tshimue to.+

11 Dituku adi bakambila mukalenge bungi bua bantu bavuabu bashipe mu Shushana* nzubu mukolesha.*

12 Mukalenge wakambila mukalenge mukaji Esetê ne: “Bena Yuda mbashipe ne mbabutule bantu 500 ne bana ba balume dikumi ba Hamana mu Shushana* nzubu mukolesha.* Mpindieu, mbenze tshinyi mu maprovense*+ makuabu onso a mukalenge? Dilomba diebe didi tshinyi mpindieu? Nebakukumbajiladi. Udi ukeba tshinyi tshikuabu? Nebakuenzelatshi.” 13 Esetê wakandamuna ne: “Biobi bisankisha mukalenge,+ banyishile bena Yuda badi mu Shushana* bua kuenza kabidi malaba bilondeshile mukenji wa lelu;+ ne bakudike bana ba balume dikumi ba Hamana ku mutshi.”+ 14 Nunku mukalenge wakatuma dîyi bua benze bualu abu. Bakela mukenji mu Shushana,* ne bakakudika bana ba balume dikumi ba Hamana ku mutshi.

15 Bena Yuda ba mu Shushana* bakadisangisha kabidi mu dituku dia 14 dia ngondo wa Adâ+ ne bakashipa bantu 300 mu Shushana,* kadi kabakangata tshintu nansha tshimue to.

16 Bena Yuda bakuabu bonso ba mu maprovense* a mukalenge bakadisangisha pabu ne bakaluila mioyo yabu.*+ Bakumbusha bena lukuna babu,+ kushipabu bantu binunu 75 ba ku bantu bavua babakine; kadi kabakangata tshintu nansha tshimue to. 17 Bualu ebu buakenzeka mu dituku dia 13 dia ngondo wa Adâ, ne bakikisha mu dituku dia 14, bobu kudivuija dituku dia kuenza mafesto ne dia kusanka.

18 Bena Yuda ba mu Shushana* bobu bakadisangisha mu dituku dia 13+ ne dia 14,+ ne bakikisha mu dituku dia 15, bobu kudivuija dituku dia kuenza mafesto ne dia kusanka. 19 Ke bualu kayi bena Yuda ba pa mpenga bavua basombela mu bimenga bia madistrike avua kule bavua bavuije dituku dia 14 dia ngondo wa Adâ dituku dia kusanka ne kuenza mafesto, dituku dia kusekelela,+ ne tshikondo tshia kutuminangana biakudia.+

20 Môdekai+ wakafunda malu aa ne wakatuma mikanda kudi bena Yuda bonso mu maprovense* onso a mukalenge Ahashawelosha, ba pabuipi ne ba kule. 21 Wakabambila bua kusekelela dituku dia 14 dia ngondo wa Adâ, pamue ne dituku dia 15, tshidimu tshionso, 22 bualu matuku au bena Yuda bavua bikishe bua bena lukuna babu ne ngondo au madilu abu avua mashintuluke malue disanka ne miadi yabu+ milue dituku dia kuenza bibilu bia disanka. Bavua ne bua kuasekelela bu matuku a kuenza mafesto ne kusanka, ne bu tshikondo tshia kutuminangana biakudia ne kupesha bapele bintu.

23 Nunku bena Yuda bakitaba bua kutungunuka ne tshibilu tshia disanka tshivuabu batuadije ne bua kuenza tshivua Môdekai mubafundile. 24 Bualu Hamana+ muana wa Hamedata muena Agaga,+ muena lukuna wa bena Yuda bonso, uvua muelele bena Yuda tshifufu bua kubabutula,+ ne uvua muele Pû,+ mmumue ne: nshobo, bua kubakuatshisha buôwa ne kubabutula. 25 Kadi pavua Esetê mulue kumpala kua mukalenge, mukalenge wakatuma mêyi, kuafundabu+ ne: “Tshifufu tshiende tshibi tshidiye muelele bena Yuda+ tshipingane pa mutu pende”; ne bakamuowa yeye ne bana bende ba balume ku mutshi.+ 26 Ke bualu kayi bakabikila matuku aa ne: Pulima bilondeshile dîna dia Pû.*+ Nunku, bua malu onso avuabu bafunde mu mukanda eu ne avuabu bamone bua bualu ebu ne avua mabafikile, 27 bena Yuda bakadielela bobu nkayabu mukenji ne ndelanganyi yabu ne bantu bonso bavua badisanga kudibu+ bua kusekelela matuku abidi aa kakuyi mpata ne bua kuenza malu avuabu bafunde avua atangila matuku au mu tshikondo tshisunguluke tshidimu tshionso. 28 Bavua ne bua kuvuluka matuku aa ne kuasekelela mu bipungu bionso, kudi dîku dionso, provense* yonso, ne tshimenga tshionso; ne matuku a Pulima aa kaavua ne bua kuimana munkatshi mua bena Yuda, ne tshivulukilu tshiawu katshivua ne bua kuimana munkatshi mua ndelanganyi yabu to.

29 Pashishe mukalenge mukaji Esetê, muana wa Abihayila, ne Môdekai muena Yuda bakafunda ne bukokeshi buonso bua kujadika malu avua mu mukanda muibidi bua Pulima. 30 Wakatuma mikanda kudi bena Yuda bonso mu maprovense* 127,+ muaba uvua Ahashawelosha+ ukokesha, mu mêyi a ditalala ne bulelela 31 bua kujadika disekelela dia matuku a Pulima dîba diawu disunguluke, anu muvua Môdekai muena Yuda ne mukalenge mukaji Esetê babambile bua kuenza+ ne anu muvuabu badielele bobu nkayabu mukenji* ne ndelanganyi yabu bua kuenza,+ kusangisha ne dijila biakudia+ ne disengelela.+ 32 Dîyi dia Esetê diakajadika malu avua atangila Pulima+ aa, ne bakadifunda mu mukanda.

10 Mukalenge Ahashawelosha wakenzeja bantu ba mu buloba ne mu bidiila* bia mu mbuu midimu mikole ku bukole.

2 Malu ende onso avuaye muenze ne bukokeshi ne bukole buende, pamue ne malu onso avua aleja bunene bua Môdekai+ buvua mukalenge mumubandishe nabu,+ ki mmafunda mu mukanda wa malu a bikondo+ bia bakalenge ba Madayi ne Pelasa+ anyi? 3 Bualu Môdekai muena Yuda ke muntu muibidi uvua ulondela mukalenge Ahashawelosha. Uvua muntu munene* munkatshi mua bena Yuda ne bavua bamunemeka kudi musumba wa bana babu, wenza bua bena mu tshisamba tshiabu bikale bimpe ne wakuila diakalenga dia* ndelanganyi yabu yonso.