Keba balunda ba mishindu yonso

Muaba udi bualu

Tuetu tudilamununa kudi bantu batudi tumona bibi, netutungunuke anu ne kubasunguluja. Kabidi, tuetu tukeba balunda anu badi bu tuetu, tudi mua kutuadija kuela meji ne: anu wetu mmuenenu wa malu, muetu mutudi tudiumvua, anyi wetu ngenzelu wa malu ke bidi bimpe.

Tshidi Bible wamba

“Unzululayi mioyo yenu bikole.”—2 KOLINTO 6:13.

Mbuena kuamba tshinyi? “Muoyo” wetu udi umvuija mushindu utudi tudiumvua, ne malu atudi banange. Tuetu banange anu bantu badi bu tuetu, tudi tufimpakaja muoyo wetu, tuwukepesha. Bua kuepuka lutatu alu, mbimpe tuikale badiakaje bua kudia bulunda ne bantu ba mishindu yonso.

Mudi dikeba balunda ba mishindu yonso dituambuluisha

Patudi tumanya bantu bimpe menemene, netutuadije kumanya tshidi tshibasaka ku dienza malu mushindu udibu baenza au. Kabidi patudi tusomba nabu, tudi tutuadija kubamona bu bena mu kasumbu ketu. Tudi tutuadija kubangata ne mushinga wa bungi, ne netumone disanka ne dikenga diabu bu bietu tuetu.

Tuangate tshilejilu tshia Nazaré. Kumpala uvua umona bantu bavua bapamina mu ditunga diabu bibi. Udi wamba bua tshivua tshimuambuluishe ne: “Mvua nsombeshangana nabu, ne ngenza nabu mudimu pamue. Ngakajingulula ne: bavua bashilangane bikole ne bivua bantu bakuabu bamba bua bualu buabu. Wewe mudie bulunda ne bantu ba mishindu mishilashilangane, kuakuikala ubateka mu mulongo wa bantu kampanda to, kadi neubanange bikole ne neubangate ne mushinga.”

Tshiudi mua kuenza

Keba mpunga ya kuyikila ne bantu ba mu matunga ne bisa bikuabu, nansha badi kabayi bakula muakulu wenu. Udi mua:

Kubalomba bua bakulondelaku malu abu ndambu.
Kubabikila bua kudia nabu.
Kuteleja malu adibu balonda bua kumanya bitubu bangata ne mushinga.

Wewe mutate kumanya mudi malu a mu nsombelu wabu mabavuije tshidibu atshi, udi mua kutuadija kumona bantu ba mushindu au bimpe.

Tshilejilu tshia bualu budi buenzeke: Kandasamy ne Sookammah (Canada)

“Tudi bakolele mu Afrique du Sud tshikondo tshivuaku kansungansunga ka batoke ne bafike. Bantu ba makoba mashilashilangane bavua benzejibue bua kusomba mu tusumbu tutapuluke tua makoba abu au, kuenzabi bua kansungansunga ka makoba kavule bikole mu tusumbu atu. Katuvua batoke to, nanku tuvua babakine bikole nangananga bualu bavua batumona bashadile kudibu. Tshikondo atshi, katuvua tuela meji ne: tshituvua tuenza atshi tshivua kansungansunga to, kadi tuvua tuamba ne: bobu ke bavua ne kansungansunga.

“Bua tuetu kushintulula mmuenenu wa malu au, tuakangata dipangadika dia kukeba balunda ba miaba mishilashilangane. Patuakatuadija kusomba ne batoke, tuakajingulula ne: tuvua bashilangane nabu anu ku malu makese patupu. Tuetu bonso tuvua ne nsombelu ya muomumue, ne ntatu ya muomumue kabidi.

“Tuakapeta ne mpunga wa kuakidila mulume ne mukajende ba batoke kuetu kumbelu bua matuku a bungi. Tuetu kufika ku dibamanya bimpe. Tuetu kubanga kumonangana bu balunda, ne bantu ba mushindu umue. Ke tuetu kutuadija kumona batoke bonso mu mushindu muimpe.”