Leja bantu ne: udi mubanange

Muaba udi bualu

Lungenyi lua disunguluja bantu kalutu lujika lukasa to. Anu mutubi bilomba dîba ne didienzeja bua kumbusha kishi ka disama kampanda dikole, ke mudibi bilomba kabidi dîba ne didienzeja bua kumbusha kansungansunga. Ntshinyi tshiudi mua kuenza bua kumbusha kansungansunga munda muebe?

Tshidi Bible wamba

Foto: 1. Muena mu Azi kampanda ukanguila muntu mufike udi muambule tumakopo tua kafé tshiibi. 2. Muntu mufike au upesha bantu badiye wenza nabu mudimu kafé, too ne mamu wa mu Inde utukadi bakuile au.

“Nuvuale dinanga, bualu didi tshisuikidi tshipuangane tshia buobumue.”—KOLOSAYI 3:14.

Mbuena kuamba tshinyi? Dienzelangana malu mimpe ditu disanga bantu. Wewe wenzela bantu malu mimpe bikole, kansungansunga nekakepele bikole munda muebe. Wewe uleja bantu ne: udi mubanange, kuakushila muoyo mubi ne lukuna muaba mu muoyo webe nansha.

Tshiudi mua kuenza

Foto: 1. Mamu wa mu Inde wambuluisha mamu kampanda mutoke ukadi mukulakaje bua kubanda mu bibandilu ne biakudia biende. 2. Mamu mutoke ukadi mukulakaje upesha muntu mulume wa mu Azi au biskwi.

Keba mishindu misunguluke iudi mua kuleja bantu bauvua umona bibi kumpala ne: udi mubanange. Kujingi anu bua kuenza malu a manene to. Tetabi kuenza malu adi alonda aa:

Wewe muenze tumalu tukese etu, neumbushe kansungansunga mu muoyo webe

Baleja bukalanga pa kubakanguila tshiibi anyi kubashila kaba ka kusomba panudi nabu mu bise.
Teta kutuadija nabu kamuyiki, nansha wewe kuyi mumanye muakulu wabu bimpe.
Baleja lutulu nansha bobu benze bualu budi bukutonde.
Diteka pa muaba wabu padibu bakuambila idi mibatonde.