Buanga bua bushuwa

Bantu miliyo ne miliyo bakadi batumikile mêyi a mu Bible atudi kakuile mu biena-bualu bishale ebi, ne mbibambuluishe bua kujomona miji yonso ya kansungansunga ivua munda muabu. Kadi bua kuamba anu bualu pa bualu, tuetu nkayetu katuena tukumbana bua kumbusha kansungansunga konso bua kashidi to. Mmumue ne: kakuena tshia kuenza anyi?

Mbulamatadi wa bushuwa

Mbulamatadi ya bantu kayena ne tshia nsongo tshidiyi mienze bua kumbusha kansungansunga mu bantu nansha. Kadi mbuena kuamba ne: kakuena mbulamatadi udi mua kukumbusha anyi?

Bua mbulamatadi kumbusha kansungansunga bidi bikengela

1. 1. Ambuluishe bantu bua bashintulule mushindu udibu bamona bakuabu ne babenzela malu.

2. 2. Umbushile bantu malu adi abatapa ku muoyo ne abasaka ku dibenga kuenzelangana malu mimpe.

3. 3. Ikale ne balombodi badi bamanyike bua dienzela bena ditunga bonso malu a muomumue.

4. 4. Enze bua bantu ba bisamba bionso bikale mu buobumue.

Bible udi utujadikila ne: Nzambi ukadi muenze mbulamatadi wa nanku. Badi bamubikila ne: “Bukalenge bua Nzambi.”​—Luka 4:43.

Mona malu enza mbulamatadi au.

1. Dilongesha dipite makuabu onso

“Badi basombele mu buloba [nebalonge] buakane.”​—YESHAYA 26:9.

“Tshipeta tshia buakane bulelela netshikale ditalala, ne mamuma a buakane bulelela neikale bupole ne bukubi bia tshiendelele.”​—YESHAYA 32:17.

Mbuena kuamba tshinyi? Bukalenge bua Nzambi nebulongeshe bantu malu makane. Padi bantu bamanya mua kutapulula buakane ku bubi, nebashintulule mushindu wabu wa kumona bakuabu. Buonso buabu nebamone ne: tshidi tshimpe nkunanga bantu ba mishindu yonso.

2. Diondopibua

Nzambi “neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”​—BUAKABULUIBUA 21:4.

Mbuena kuamba tshinyi? Bukalenge bua Nzambi nebujikije tunyinganyinga tuonso tudi kansungansunga kakebeshe. Bantu bonso bavuabu benzele malu ne kansungansunga kabakuikala kabidi ne tshia kukinyina bavua babenzelawu nansha.

3. Bulombodi buimpe

“Kakulumbuluisha anu bua malu adi amueneka ku mêsu kuende, anyi kubela anu bilondeshile malu adi matshi ende umvua to. Nealumbuluishe bapuekele biakane, ne neafile mubelu bua bualu bua bena bupuekele ba pa buloba ne bululame.”​—YESHAYA 11:3, 4.

Mbuena kuamba tshinyi? Yezu Kristo, Mukalenge wa Bukalenge bua Nzambi bua mu diulu nealombole bantu bimpe pa buloba kayi ubasunguluja. Kakuenzela tshisamba malu kupita tshikuabu to, neenze bua bantu ba pa buloba bujima balonde mikenji ya buakane.

4. Buobumue

Bukalenge bua Nzambi budi bulongesha bantu bua “kuikala ne meji amue ne [bua kuikala] ne dinanga dia muomumue, kuikala mu buobumue mu bionso, kuikala ne meji amue.”​—FILIPOYI 2:2.

Mbuena kuamba tshinyi? Buobumue bua bantu balombolabu kudi Bukalenge bua Nzambi kabuakuikala bua tshidingishilu to. Nebikale “mu buobumue mu bionso” bualu nebikale banangangane ne dinanga dilelela.