TSHIA KUENZA PADI BINTU BIBANDA MUSHINGA

Itaba mudi malu aya amu

Pamuapa tudi mua kupanga kumona ne: bintu bidi bienda bibanda mushinga, nangananga bobu benda batubandishila petu difutu. Kadi bintu biobi bibande mushinga diakamue, difutu dietu kadiyi diodi dibande, tudi mua kubanga kusamisha mutu bikole nangananga bituikala ne dîku.

Katuena ne tshitudi mua kuenza bua bintu kabibandi mushinga to. Kadi tuetu bitabe bua kuya mudi malu aya amu, nebituambuluishe bikole.

BUA TSHINYI BIDI NE MUSHINGA

Bantu batu bitaba ne: kabena ne tshidibu mua kuenza bua bintu kabibandi mushinga, bitu bipepele bua bobu . . .

kubenga kupampakana. Tuetu katuyi ne dipampakana, netuele meji bimpe menemene ne netuangate mapangadika mimpe
kuepuka bikadilu bibi. Tshilejilu, kabiakuikala bimpe bua kubuela mabanza ne kubenga kuafuta anyi kutulakaja makuta to.
kubenga kukokangana ne bena mu mêku abu bua makuta.
kumanya tshidibu mua kuenza bua kusumba bidibu nabi dijinga. Bidi mua kubalomba bua kukepesha ditula dia makuta ne kusumba anu bintu bidi ne mushinga.

TSHIA KUENZA

Itaba bua kushintulula malu. Padi bintu bibanda mushinga musangu umue, kuoku mushindu mbimpe kukepesha ditula dia makuta. Bamue bantu batu batula makuta mapite bungi pabu kabayi nawu a nsongo, nsombelu ulua mpindieu kubakolela. Ndekelu wa bionso bantu ba mushindu eu batu balua kuimana mukole mule ne muipi. Biwikala tatu wa dîku, tudi bamanye ne: udi musue kulama ba mu dîku diebe ne kubakebela bidibu nabi dijinga. Kadi ikala mumanye ne: bena mu dîku diebe mbasue nangananga bua wikale usomba nabu, utambe kutabalela yonso wa kudibu, ne uleje muudi mubanange.

‘Nnganyi wa kunudi, nansha yeye mutate bishi, udi mua kusakidila nansha dituku dimue ku matuku ende a panu?’—Luka 12:25, Mukanda wa Mvidi Mukulu. (Mishonyi)

“Kanuditatshishi bua dituku didi dilonda nansha, bualu dituku didi dilonda nedikale ne yadi ntatu. Dituku ne dituku didi ne yadi ntatu idi midikumbanyine.”—Matayi 6:34.

Bamue bantu batu batula makuta mapite bungi pabu kabayi nawu a nsongo, nsombelu ulua mpindieu kubakolela. Ndekelu wa bionso bantu ba mushindu eu batu balua kuimana mukole mule ne muipi