TSHIA KUENZA PADI BINTU BIBANDA MUSHINGA

Ikala ne ditekemena

Bintu bidi bienda bibanda mushinga mu ditunga dienu kadi mudimu uudi wenza kawena ukupetesha makuta makumbane anyi? Udi usamisha mutu bua muudi mua kudiambuluisha wewe ne bena mu dîku diebe ne binudi nabi dijinga anyi? Biobi nanku, udi mua kubanga kusamisha mutu bua tshikala nsombelu wenu matuku atshilualua. Nansha nsombelu mikole eyi yoyi mitukuate, kuikala ne ditekemena nekutuambuluishe bikole.

BUA TSHINYI BIDI NE MUSHINGA

Bantu badi ne ditekemena batu basue ne: malu mimpe enzeke, ne ditekemena adi ditu dibasaka bua kuenza muabu muonso bua nsombelu wabu ikale anu muimpe. Tshilejilu, makebulula adi aleja ne: bantu badi ne ditekemena dia ne: malu nealongoloke batu . . .

bananukila mu ntatu
bibidilangana ne nsombelu
bangata mapangadika adi abambuluisha bua kuikala ne makanda a mubidi mimpe ne kuikala ne nsombelu muimpe

TSHIA KUENZA

Tshia kumpala, ela meji a mudi Bible mua kukuambuluisha lelu eu. Mu Bible mudi mibelu mimpe idi mua kukuambuluisha bua kumanya tshia kuenza padi bintu bibanda mushinga. Idi mua kukuambuluisha bua umone ne: kudi anu tshiudi mua kuenza mpindieu ne pabanda bintu mushinga.

“Meji neakukube, lungenyi nelukulame.”—Nsumuinu 2:11, Mukanda wa Mvidi Mukulu (Katolike).

Tshibidi, ela meji a tshidi Bible wamba bua matuku atshilualua. Wewe mumone mudi mibelu ya mu Bible mikale ya meji, nebikusake bua kulonga malu a bungi adiye wamba bua matuku atshilualua. Tshilejilu, neulonge ne: Nzambi mmusue bua upete “matuku atshilualua mimpe ne ditekemena.” Mmukupeshe kabidi tshishimikidi bua ditekemena adi. (Yelemiya 29:11) Tshishimikidi atshi ke Bukalenge bua Nzambi.

BUKALENGE BUA NZAMBI NTSHINYI? NEBUENZE TSHINYI?

Bukalenge bua Nzambi mmbulamatadi wa mu diulu wakokesha buloba bujima. (Danyele 2:44; Matayi 6:10) Nebujikije makenga ne bupele. Dîba adi bantu bonso nebasombe mu ditalala ne nebikale ne bionso bidi bikengela bua bikale ne disanka, anu mudi mvese idi ilonda eyi ileja.

“Newikale ne disanka ne malu ebe neatante.”—Misambu 128:2.

“[Bantu bikale ku bukokeshi bua Bukalenge abu] kabakukuata mudimu mukole bua tshianana” to.—Yeshaya 65:23.

“Nekuikale ntete ya bungi pa buloba.”—Misambu 72:16.

Bantu miliyo ya bungi mbeyemene milayi eyi, batuishibue ne: Nzambi ‘kena mua kushima’ to. (Tito 1:2) Nunku tudi tukulomba bua wikala ubala Bible. Ditekemena diakupeteshaye nedikupeshe bukole bua kutantamena ntatu ya malu makuta ne kuikala mutuishiubue ne: malu nealengele kumpala eku.