TSHIA KUENZA PADI BINTU BIBANDA MUSHINGA
Ikala ne muoyo wa kupa
Wewe kuyi ne mushindu wa kusumba bintu biudi nabi dijinga, udi mua kumona dîba adi ne: mbikole bua kupesha bakuabu tshintu. Pabi kupesha bakuabu bintu kudi mua kukuambuluisha bikole. Kudi anu mushindu wa kuikala muena muoyo wa kupa ne kulama makuta nansha makese.
BUA TSHINYI BIDI NE MUSHINGA
Tuetu tuabanyangana ne bakuabu nansha tshikese tshitudi natshi, netuikale ne disanka ne netudiumvue bimpe. Bamue badoktere badi bamba ne: kupeshangana bintu kudi kutuambuluisha bua kuikala ne makanda a mubidi mimpe. Tshilejilu, katuakuikala ne tunyinganyinga tua bungi, katuakupeta disama dia luendu lua mashi, ne katuakumvua bintu bitusama to. Netuikale kabidi tulala bimpe.
Tuetu tupesha bakuabu makuta anyi bintu, kabiakutukolela bua kuitaba diambuluisha dia bakuabu patudi mu lutatu to. Howard wa mu Angleterre udi wamba ne: “Meme ne mukajanyi tutu tukeba mishindu ya kuambuluisha bakuabu ne bintu bitudi nabi. Ke bualu kayi katutu tutamba kumvua bibi patu bakuabu batuambuluisha patudi mu lutatu to.” Bushuwa, bapeshanganyi ba bintu kabatu babifila ne meji a ne: nebalue kubapesha pabu to. Kadi tshiabu tshidibu mua kupeta mbalunda bimpe. Balunda babu aba bobu nkayabu badi mua kulua kubambuluisha pikalabu dijinga ne dikuatshisha.
TSHIA KUENZA
Pesha muntu tshiudi natshi. Nansha wewe ne bintu bikese, kuena anu mupange kantu ka kupesha bakuabu to. Udi nansha mua kubapesha katshiakudia. Duncan ne mukajende ba mu Ouganda mbapele, nansha nanku mbena muoyo wa kupa. Duncan udi wamba ne: “Mu Dia lumingu dionso, meme ne mukajanyi tutu tubikila muntu kumbelu bua kudia nende katshiakudia. Tutu basue kusomba ne bantu.”
Nansha wewe upesha bakuabu bintu, mbimpe wikale ne nkatshinkatshi bua kukebedi bena mu dîku diebe ntatu ya patupu to.—Yobo 17:5.
Teta kuenza nunku: Pesha muntu tshiakunua anyi tshiakudia nansha tshiotshi tshikese. Biwikala ne bintu biudi kuyi kabidi wenza nabi mudimu, kuenaku mua kubipesha balunda anyi bena mutumba badibi mua kuambuluisha ne kusankisha anyi?
Leja muoyo wa kupa mu mishindu mikuabu. Kudi bintu bitudi mua kupeshangana bidi kabiyi bitulomba makuta to. Tshilejilu, tudi mua kufila dîba dietu ne kuenza malu adi ambuluisha bakuabu bua kuleja mutudi tubatabalela. Tuetu bambile muntu mêyi mimpe bidi anu bu tudi bamupeshe tshintu! Nunku ikala wambila bakuabu muudi ubanyisha bikole ne muudi mubanange.
Teta kuenza nunku: Enzeja bakuabu midimu ya kumbelu, bambuluisha bua kulongolola bidi binyanguke mu nzubu, anyi bayila mu tshisalu. Fundila mulunda webe mesaje bua kumuleja dianyisha anyi bua kumuambila anu ne: udi mumuvuluke.
Wewe ukeba mishindu ya kupeshangana bintu, newikale ne disanka dia bungi.