TSHIA KUENZA PADI BINTU BIBANDA MUSHINGA

Sanka ne biudi nabi

Bantu batu basanka ne bidibu nabi batu anu ne disanka mu nsombelu wabu. Padi nsombelu wabu au ushintuluka, batu bashintulula malu adi akengela bua kabatudi makuta a bungi kupita atubu bapeta ku midimu yabu to.

BUA TSHINYI BIDI NE MUSHINGA

Mumanyi wa malu a bikadilu bia bantu mukuabu, diende Jessica Koehler, wakaleja ne: bantu batu basanka ne bidibu nabi batu ne mmuenenu muimpe wa malu ne kabatu batamba kualakana bakuabu to. Ke bualu kayi batu anu ne disanka dia bungi ne kabatu batamba kusamisha mutu to. Kudi bamue bantu batu ne disanka dia bungi pabu kabayi ne makuta a nsongo to. Bidi nanku nangananga bua bantu badi bamona ne: kudi bintu bidi ne mushinga wa bungi bitudi katuyi mua kusumba ne makuta to, bu mudi disanka ditutu tupeta patudi tusomba ne balela betu ne balunda betu.

“Bu mutudi ne biakudia ne bilamba, tusanke ne bintu ebi.”—1 Timote 6:8.

TSHIA KUENZA

Kudifuanyikiji ne bakuabu to. Wewe ufuanyikija bintu bia mushinga mukese biudi nabi ne bia mushinga mukole bidi nabi bakuabu, udi mua kubanga kubalakana, kutshiyi usanka kabidi ne biudi nabi to. Pamuapa malu kaena muudi wela meji amu to. Bamue bantu badi ne bintu bia bungi badi mua kuikala babuele mabanza mapite. Nicole wa mu Sénégal udi wamba ne: “Bua meme kuikala ne disanka kabiena bikengela anu ne: ngikale ne bintu bia bungi to. Meme nsanka ne bindi nabi, nansha bakuabu bobu ne bintu bipite bindi nabi, nengikale anu ne disanka.”

Teta kuenza nunku: Epuka ditangila madisuisha anyi bintu bidibu bela mu Enternete bidi bileja mudi bakuabu bikale ne bubanji peshi ne bintu bia mushinga mukole.

“Nansha padi muntu ne bintu bia bungi, muoyo wende kawena ufumina ku bintu bidiye nabi to.”—Luka 12:15.

Ikala ne dianyisha. Bantu batu ne dianyisha batu nangananga basanka ne bidibu nabi ne kabatu bela meji ne: bidi bikengela anu bapete bia bungi to. Roberton wa mu Haïti udi wamba ne: “Ntu ngangata dîba dia kuelangana meji a malu mimpe adi bakuabu bangenzele meme ne bena mu dîku dianyi, pashishe ntu mbela tuasakidila. Ntu ndongesha kabidi muananyi wa balume wa bidimu 8 bua ikale welangana tuasakidila bua tshintu tshionso tshidibu bamupesha.”

Teta kuenza nunku: Dituku dionso, ikala ufunda malu audi mua kulejila “dianyisha.” Tshilejilu, udi mua kuela Nzambi tuasakidila bua muudi ne makanda a mubidi mimpe, bua munudi basombe bimpe mu dîku, bua balunda bimpe baudi nabu, ne bua kamunya kimpe ka dilolo.

“Muntu udi ne muoyo musangale udi anu utshionkomoka.”—Nsumuinu 15:15.

Kudi misangu itubi bitukolela bua kusanka ne bitudi nabi. Kadi mbimpe tudienzeje. Tuetu tusanka ne bitudi nabi, netuikale kabidi ne disanka, ngikadilu udi makuta kaayi mua kusumba.