Mmitabuja kayi adi nawu Bantemu ba Yehowa?
‘Tudi basue kumvua bualu buudi wela meji; bualu bua tshisumbu etshi, tudi bamanye ne: badi batshibanda kuonso.’ (Bienzedi 28:22) Banene ba bena Yuda ba ku Lomo ba mu bidimu lukama bia kumpala aba, bakafila tshilejilu tshimpe tshitambe. Bavua bajinga kumanyina malu kudi benawu, pamutu pa kuitaba bijanu bia patupu bia kudi banga bantu.
Bia muomumue lelu’eu, batu bamba Bantemu ba Yehowa malu a bungi. Kadi ki mbimpe kukeba bua kumanyina Bantemu ba Yehowa kudi bantu badi kabayi babanange to. Ke bua tshinyi tudi basue tuetu bine kukuleja amue a ku malu manene atudi tulongesha.
Bible, Yezu Kristo ne Nzambi
Tudi tuitabuja se: ‘Dîyi dionso dia mu Mukanda wa Nzambi didi difume kudi Nzambi, ne didi ne mudimu muimpe.’ (2 Timote 3:16) Nansha mudi bamue bamba ne: katuena bena Kristo menemene to, tuetu tudi bamanye ne: tudi bena Kristo ba bushuwa. Tudi tuitaba ne mutshima mujima mêyi akamba mupostolo Petelo pa bidi bitangila Yezu Kristo. Wakamba ne: ‘Kakuena dinga dîna muinshi mua diulu, dipa bantu, didi dimanye mua kutusungila.’—Bienzedi 4:12.
Kadi, bu muvua Yezu muambe ne: udi “Muana wa Nzambi,” kuamba kabidi ne: ‘Tatu wakantuma,’ tudi tuamba ne: Nzambi mmutambe Yezu. (Yone 10:36; 6:57) Yezu yeye muine wakitaba ne: “Tatu udi muntambe meme.” (Yone 14:28; 8:28) Nenku, katuena tuitaba ne: Yezu udi mumue ne Tatuende, bu mudi dilongesha dia Busatu Bunsantu diamba nansha. Kadi, tshidiku tudi tuitaba ne: Nzambi wakafuka Yezu; nenku Yezu udi ukokela Nzambi.—Kolosai 1:15; 1 Kolinto 11:3.
Dîna dia Nzambi mu Tshiluba n’Yehowa. Bible udi wamba ne: ‘Wewe nkayebe, ngudi muinyika dîna dia YEHOWA, udi Mutambe Bunene wa pa mutu pa buloba bujima.’ (Musambu 83:18) Yezu uvua ulonda mêyi aa, ke bualu kayi wakatamba kuakula bua dîna dia Nzambi, e kulongesha bayidi bende bua kusambila ne: ‘Tatu wetu udi mu diulu, banemeke dîna diebe.’ Yeye muine wakasambila Nzambi ne: ‘Ba mu ba pa buloba bawakampa ngakubaleja dîna diebe.’—Matayo 6:9; Yone 17:6.
Tudi tuitaba se: tudi ne bua kumanyisha bantu dîna dia Nzambi ne malu adiye mulongolole bua kuenza, anu bu muakenza Yezu. Ke bua tshinganyi tudi bangate dîna dia: Bantemu ba Yehowa, bualu tudi tuidikija Yezu, “Ntemu wa lulamatu.” (Buakabuluibua 1:5, NW; 3:14) Bushuwa, mbikumbanangane menemene padi Yeshaya 43:10 wambila bantu badi baleja mpala wa Nzambi ne: ‘Yehowa udi wamba ne: Nuenu nudi bamanyi [ta bantemu] banyi, ne nudi muntu wanyi ungakasungula.’
Bukalenge bua Nzambi
Yezu wakalongesha balongi bende bua kusambila ne: ‘Bukalenge buebe bulue.’ Bukalenge ebu ke buvua tshiena-bualu tshinene mu dilongesha diende. (Matayo 6:10; Luka 4:43) Tudi tulongesha ne: Bukalenge ebu mmbulamatadi wetu wa bushuwa eu, kadi wa mu diulu. Nebukokeshe buloba, ne Yezu Kristo ke Mukalenge. Bible udi wamba ne: ‘Bukokeshi nebuikale pa diapa diende. Kuvudija kua bukokeshi buende ne kua ditalala kakuena kuikala ne nshikidilu.’—Yeshaya 9:6, 7.
Kadi Yezu Kristo kakukokesha nkayende mbulamatadi wa Nzambi to; bakuabu bantu nebikale nende mu diulu amu. Mupostolo Paulo wakafunda ne: ‘Bituikala tuditantamika, netukokeshe nende.’ (2 Timote 2:12) Bilondeshile bidi Bible wamba, bantu badi bajuka ku lufu bua kukokesha ne Kristo mu diulu badi anu “binunu lukama makumi anayi ne binayi, bavuabo bapikule pa buloba.”—Buakabuluibua 14:1, 3, Mukanda wa Mvidi Mukulu.
Mbulamatadi wetu yonso eu utu ne bantu batuye ukokesha; ke bua tshinyi tudi tuitaba ne: pa kumbusha balombodi ba mu diulu aba, bantu bakuabu miliyare mivule nebapete muoyo wa tshiendelele. Buloba bukudimuna mparadizu nebuule ne bantu aba badi bakanyine Bukalenge bua Nzambi, ne buonso buabu nebakokele Kristo ne binende aba. Nenku, tudi bashindike se: buloba kabuakubutudibua nansha. Mêyi a mu Bible aa neakumbane bushuwa: ‘Bantu bakane nebapiane buloba, nebashikamemu tshiendelele.’—Musambu 37:29; 104:5.
Kadi, Bukalenge bua Nzambi nebulue bishi? Mpikala bantu bonso mua kukokela Mbulamatadi wa Nzambi ku budisuile anyi? Kabiena nanku to, bualu Bible udi uleja mu bulelela buonso ne: bua Bukalenge kuluabu, bidi bikengela Nzambi nkayende adituile bianza mu mianda ya bantu. Udi wamba ne: ‘Nzambi wa mu diulu neajadike bukalenge bukuabu budi kabuyi bubutudibua tshiendelele. Nebutshibule makalenge aa onso bitupa bitupa, nebuabutule, ne buobu nebujalame tshiendelele.’—Tuetu mbadi baladike maleta; Daniel 2:44.
Bukalenge bua Nzambi nebulue tshikondo kayi? Patudi tumona mushindu udi milayi ya mu Bible yenda ikumbana lelu’eu, tudi tuitaba ne: Bukalenge ebu bukadi pa kufika. Tudi tukulomba bua ukonkonone imue ya ku milayi idi ileja amue malu adi atangila “matuku a ku nshikidilu” wa ndongoluelu mubi wa malu eu. Bala Matayo 24:3-14; Luka 21:7-13, 25-31; ne 2 Timote 3:1-5.
Bu mutudi ‘banange Yehowa, Nzambi wetu, ne mutshima wetu wonso, ne muoyo wetu wonso, ne lungenyi luetu luonso ne bukole buetu buonso ne bu mutudi banange muntu netu bu mutudi badinange tuetu bine,’ katuena batapuluke to, nansha mudi bisamba bietu, makoba etu peshi nsombelu yetu mikale mishilangane. (Mâko 12:30, 31) Tudi batambe kumanyika bua dinanga ditudi tulejangana. (Yone 13:35; 1 Yone 3:10-12) Ke bua tshinyi katutu tubuelakana mu mianda ya tshididi ya muaba utudi to. Tudi tudienzeja bua kuidikija bayidi ba Yezu ba kumpala. Yezu wakabamba ne: ‘Kabena ba pa buloba, bu mundi meme tshiyi wa pa buloba.’ (Yone 17:16) Kuikala batapuluke ne ba pa buloba kudi kumvuija kuepuka bikadilu bibi bidi nabi bantu ba bungi lelu’eu, bu mudi: dishima, buivi, tshiendenda, dishala pamue dia mulume ne mulume [anyi mukaji ne mukaji], dienza midimu mibi ne mashi, ditendelela dia mpingu, ne bikuabu bintu bidi Bible ukandika.—1 Kolinto 6:9-11; Efeso 5:3-5; Bienzedi 15:28, 29.
Ditekemena dia matuku atshilualua
Tudi tuitaba ne: malu onso kaena ajika anu ne muoyo utudi nawu lelu’eu to. Tudi tuitaba ne: Yehowa wakatuma Kristo pa buloba bua kupuekesha mashi ende bu tshia-bupikudi bua bantu kumuenekabu bakane kumpala kua Nzambi ne kupetabu muoyo wa kashidi mu bulongolodi bupiabupia bua malu. Anu bu muakamba mupostolo mukuabu wa Yezu ne: ‘[Tudi] bamane kupeta buakane ku mashi ende.’ (Lomo 5:9, MMM; Matayo 20:28) Tudi tuela Nzambi ne Muanende Yezu tuasakidila wa bungi bua ditupikula edi didi ditunzuluila njila wa muoyo bua matuku atshilualua.
Tudi bashale batekemene bikole malu enzeka matuku atshilualua, tudi batekemene se: nebabishe bafue pakokesha Bukalenge bua Nzambi. Bilondeshile tshidi Bible ulongesha, tudi tuamba ne: padi muntu ufua, kenaku kabidi nansha, ne anu ‘mu dituku dine adi malu avuaye upangadija adi ajimina.’ (Musambu 146:3, 4; Yehezekele 18:4; Muambi 9:5) Bushuwa, bafue nebikale ne muoyo mu matuku adi kumpala eku, bualu Nzambi neabavuluke ne neababishe ku lufu.—Yone 5:28, 29.
Nansha nanku, tudi bashindike ne: bantu ba bungi badi ne muoyo mpindieu nebapande palua Bukalenge bua Nzambi kubutula mbulamatadi yonso idiku mpindieu. Anu muvua Nowa ne bena dîku diende bapande ku mvula wa kabutu, bantu abu nebatungunuke ne kuikala ne muoyo wa kashidi pa buloba bulengeja tshileya. (Matayo 24:36-39; 2 Petelo 3:5-7, 13) Kadi tudi bamanye ne: bua kupeta lupandu, tudi ne bua kuenza malu adi Yehowa utulomba, anu mene bu mudi Mukanda wa Nzambi wamba, ne: ‘Buloba budi bujimina; kadi yeye udi wenza mudi disua dia Nzambi udi ushalaku tshiendelele.’—1 Yone 2:17; Musambu 37:11; Buakabuluibua 7:9, 13-15; 21:1-5.
Kabeji aka kakena katupesha mushindu wa kutela kujikija malu onso adi Bantemu ba Yehowa balongesha to, ke bua tshinyi tudi tukusengelela bua ukebe makuabu malu atudi tulongesha.
Padiku kakuyi kamanyinu, mvese yonso mmiangata mu Mukanda wa Nzambi. Padi NW ulonda mvese mutela, bidi bileja ne: mmukudimuna biangatshile mu New World Translation of the Holy Scriptures—With References, nkudimuinu wa mu Anglais.
[Blurb on page 4]
Tudi bangate dîna dia Bantemu ba Yehowa, bualu tudi tuidikija Yezu