Tshitupa 4
Nzambi Udi Utumanyisha Malongolola Ende
1, 2. Mmunyi mutudi bamanye se: Nzambi udi ufila mandamuna kudi aba badi balomba ne muoyo muimpe?
NZAMBI wa dinanga udi bushuwa usokoluela bantu ba muoyo muimpe badi bamukeba malongolola ende. Udi upetesha bantu badi badiela nkonko mandamuna ku nkonko bu mudi bua tshinyi mmulekele makenga.
2 Bible udi wamba ne: ‘Biwamukeba [Nzambi], neumupete.’ “Nzambi udiku mu diulu udi usokolola malu masokoka.” ‘Yehowa Nzambi kêna wenza bualu, bikalaye kayi muanji kubusokoluela bantu bende baprofete diambedi.’—1 Kulondolola 28:9; Danyele 2:28; Amosa 3:7.
Mandamuna adi penyi?
3. Nkuepi kutudi mua kupetela diandamuna ku lukonko lua se: bua tshinyi Nzambi mmulekele makenga?
3 Mandamuna ku nkonko bu mudi bua tshinyi Nzambi mmulekele makenga ne ntshinyi tshienzaye bua bualu ebu, adi asanganyibua mu muyuki wakafundishaye ku spiritu bua diakalenga dietu. Muyuki au n’Dîyi diende, Bible Munsantu. “Mufundu wonso mmufunda ku spiritu wa Nzambi ne udi ne mushinga bua kulongesha, bua kubela, bua kupingajilula malu mu bulongame, bua kubela ne kunyoka mu buakane, bua muntu wa Nzambi ikale mukumbane tshishiki, mulongolola biakane bua mudimu wonso muimpe.”—2 Timote 3:16, 17, NW.
4, 5. Ntshinyi tshidi tshivuija Bible mukanda wa pa buawu?
4 Bible udi bushuwa mukanda wa pa buawu. Udi ne miyuki mitambe kujalama ya malu a kale a bantu ne a kumpala kua difukibua dia bantu mene. Mmuakanyine tshikondo tshietu etshi, bualu milayi yawu idi itangila malu a mu matuku etu aa ne kabidi ne a mu matuku atshilualua akadi pabuipi.
5 Mukanda mukuabu nansha umue kawena ne bujalame mu malu a kale bu nunku to. Tshilejilu, kudi anu bungi bukese bua mikanda mifunda ku bianza ya bafundi benda lumu ba tshikondo tshia kale. Kadi kudi mikanda mivule ya Bible mifunda ku bianza, imue bitupa ne mikuabu mijima: mitue ku 6 000 ya Mifundu ya tshiena-Ebelu (mikanda 39 ya “Dipungila Dikulukulu”) ne mikuabu mitue ku 13 000 ya Mifundu ya tshiena-Greke ya Buena-nkristo (mikanda 27 ya “Dipungila Dipiadipia”).
6. Bua tshinyi tudi mua kuikala bajadike ne: Bible udiku lelu’eu udi mumue mu nshindamenu ne pakamufundisha Nzambi?
6 Nzambi Wa-Bukole-Buonso, wakafundisha Bible ku spiritu, wakatabalela bujalame bua mifundu bua kubengabu kunyanguka mu mikanda ayi mifunda ku bianza. Nunku Bible yetu lelu’eu idi mumue menemene ne mifundu ya ku ntuadijilu mifunda ku spiritu. Bualu bukuabu budi butuambuluisha bua kutuishibua mbua se: imue mikanda mifunda ku bianza ya Mifundu ya tshiena-Greke ya Buena-nkristo mmifunda bidimu lukama kunyima kua diyifunda dia kumpala. Mikese ya ku mikanda mifunda ku bianza ya bafundi ba kale ba malu a panu itshidiku too ne lelu itu mene ya mu siekele mivule kunyima kua bafundi ba kumpala.
Dipa dia Nzambi
7. Bible mmuabanyibue mu bualabale kayi?
7 Bible mmukanda udibu babanye bikole mu miyuki ya bantu. Mbapatule miliyare mitue ku isatu ya Bible. Kakuena mukanda nansha umue udi mua kusemena pabuipi ne bungi ebu to. Ne mbakudimune Bible peshi bitupa biende mu miakulu mitue ku 2 000. Nenku, badi batshinka ne: bantu 98 pa lukama ba pa dibulunge dietu edi badi mua kupeta Bible.
8-10. Mbua tumue tubingila kayi budi Bible muakanyine dimukonkonona dietu?
8 Bushuwa mukanda udi ujadika ne: mmufume kudi Nzambi ne udi ne bijadiki bionso munda ne pambelu bia bujalame mmuakanyine diukonkonona dietu.a Udi umvuija tshipatshila tshia muoyo, ufila diumvuija bua nsombelu udi mu bulongolodi ebu, ne tshikala matuku atshilualua mua kututuadila. Kakuena mukanda nansha umue udi mua kuenza nanku to.
9 Eyowa, Bible ndimanyisha dia Nzambi ditumina dîku dia bantu. Wakalombola difunda dia Bible ku bukole buenzeji buende, anyi spiritu wende, ne bantu batue ku 40 bakamufunda. Nunku Nzambi udi wakula netu ku butuangaji bua Dîyi diende, Bible Munsantu. Mupostolo Paulo wakafunda ne: “Panuakapeta dîyi dia Nzambi, dinuakumvuila kutudi, nuakaditaba, ki mbu dîyi dia bantu, kadi, anu bu mudidi bulelela, bu dîyi dia Nzambi.”—1 Tesalonike 2:13, NW.
10 Abraham Lincoln, mfumu wa 16 wa États-Unis, wakabikila Bible ne: “dipa ditambe buimpe didi Nzambi mupeshe muntu . . . Kadi bu kabuyi bua bualu buadi katuvua mua kusunguluja bimpe ne bibi to.” Nunku mpindieu, ntshinyi tshidi dipa edi ditambe bulenga dituambila pa bidi bitangila mushindu wakatuadija makenga, bua tshinyi Nzambi wakaalekela, ne ntshinyi tshienzaye bua bualu ebu?
[Mêyi adi kuinshi]
a Bua mamanyisha makuabu mavule pa bidi bitangila bujalame bua Bible, tangila mukanda wa La Bible : Parole de Dieu ou des hommes ?, mupatula mu 1989 kudi Société Watchtower.
[Tshimfuanyi mu dibeji 10]
Bible, mufunda ku spiritu wa Nzambi, ndimanyisha dia Nzambi ditumina dîku dia bantu