Nnganyi udi Bushuwa Mukokeshi wa Bulongolodi ebu?
Bantu bavule nebandamune ne muaku umuepele ku lukonko elu ne: nNzambi. Kadi, muaba nansha umue Bible kêna wamba bua se: Yezu Kristo peshi Tatuende ke bakokeshi balelela ba bulongolodi ebu. Apo, Yezu wakamba ne: “Mukokeshi wa bulongolodi ebu neipatshibue.” Pashishe, wakasakidila ne: “Mukokeshi wa bulongolodi ebu ukadi pa kufika. Kadi, kêna ne bukokeshi pambidi panyi.”—Yone 12:31; 14:30; 16:11.
Nunku, mukokeshi wa bulongolodi ebu mmuluishi wa Yezu. Muine eu udi mene mua kuikala nganyi?
Nsombelu ya mu bulongolodi ebu bua kusulula nshinga
Nansha muvua bantu ba muoyo muimpe benze madikolela bua kuakaja nsombelu, bukua-bantu badi anu bapetangana ne ntatu mipite bukole mu kupita kua bikondo. Ebi biakasaka bamue bantu ba meji ku didikonka ne kukema, bu mudi mufundi wa bikandakanda David Lawrence, wakamba ne: “‘Ditalala pa buloba’—muntu yonso pa kuamba mmunange ditalala. ‘Dijinga dia bantu didi dia kuenzelangana bimpe’—pa kuamba bantu buonso ba pa buloba mbasue kuenzelangana bimpe. Kadi, tshilema tshidi tshifuma kunyi? Nansha mudibi kabiyi dijinga diabu dia ku tshileledi, bua tshinyi bantu badi’anu baditua mu mvita dîba dionso?”
Nsombelu eu kêna umvuika to, ki mmuomu’anyi? Nansha mudi dijinga dia ku tshileledi dia bantu dikale dia kusomba mu ditalala, buonso buabo badi bakinangana ne bashipangana—basaka kudi muoyo mubi. Bantu badi bakengeshangana ne tshikisu kakuyi luse nansha lukese. Anjibi kuela meji ku chambre à gaz, maloko a camps de concentration, bingoma bia lance-flammes, ne bombe ya napalm, ne mishindu mikuabu ya tshikisu ya dikengeshagana ne dishipangana kabiyi luse nansha kakese.
Udi utshinka bua se: bantu badi basue kuikala ne nsombelu wa ditalala ne disanka, badiku ne bukole buobo bine bua kukengeshangana ne tshikisu tshikole tshia mushindu’eu anyi? Mmakole kayi adi asaka bantu ku bienzedi bia muendi ne ababueja mu nsombelu idibo badiumvua benzejibue bua kuenza malu a tshikisu tshia mushindu’eu? Kuenaku muanji kudikonka pebe bikalaku bukole kampanda bubi ne bukena-bumueneka budi busaka bantu ku bienzedi bibi anyi?
Ditandula dia bakokeshi ba bulongolodi ebu
Kakuena ngelakanyi nansha mikese mu muanda eu, bualu Bible udi uleja bimpe bitambe ne: kampanda wa lungenyi ne ukena-umueneka udi ulombola bantu ne matunga wonso popamue. Bible udi wamba ne: “Bulongolodi ebu bujima budi ku bukokeshi bua mubi.” Pashishe, udi umutandula patoke, wamba ne: “Eu udi ubikidibua ne: Diabolo ne Satana . . . udi udinga ba pa buloba buonso.”—1 Yone 5:19; Buakabuluibua 12:9.
Musangu kampanda pavua Yezu “utetshibua kudi Diabolo,” Yezu kakela mpata nansha mikese pa bidi bitangila mudimu wa Satana bu mukokeshi wa bulongolodi ebu. Bible udi umvuija tshiakenzeka ne: “Diabolo wakamuambula too ne pa lusongo lua mukuna mule wa dikema, ne kumuleja makalenge wonso a pa buloba ne butumbi buawo, pashishe e kumuamba ne: ‘nenkupeshe bintu ebi bionso biwadiela ku makasa anyi ne kukumbaja mudimu wa dintendelela.’ Ke Yezu kumuambila ne: ‘Umuka, Satana!’ ”—Matayi 4:1, 8-10.
Anjibi kuela meji. Satana wakateta Yezu pa kumulaya bua kumupesha “makalenge wonso a pa buloba.” Tuanji kuamba, dilaya dia Satana divua mua kuikala dilelela bu yeye kayi bushuwa mukokeshi wa makalenge aa anyi? Tòo, nansha kakese. Tabalela kabidi bua se: Yezu kakela mpata bua se: mbulamatadi yonso ya mu bulongolodi ebu mbintu bia Satana, tshivuaye mua kuikala muenze mene bu Satana kayi ne bukokeshi pa mbulamatadi eyi. Nunku, Satana Diabolo udi bushuwa mukokeshi ukêna-umueka wa bulongolodi ebu! Bible udi mene umubikila ne: “nzambi wa bulongolodi ebu bua malu.” (2 Kolinto 4:4) Kadi, mmushindu kayi wakapeta tshifukibua etshi tshibi muanzu wa mukokeshi?
Eu wakalua Satana uvua muanjelo mufuka kudi Nzambi, kadi wakatuadija kualakena muaba wa Nzambi. Wakela mpata bua buakane bua bukokeshi bua Nzambi. Bilondeshile dijinga diende edi, wakatumika ne nyoka bu mufikishi wa dîyi bua kudinga mukaji wa kumpala Eva. Pa kuenza nunku, uvua ne mushindu wa kumufikisha, yeye ne bayende Adama, ku dikumbaja dîyi diende pamutu pa kutumikila Nzambi. (Genese 3:1-6; 2 Kolinto 11:3) Wakadikokola kabidi muvuaye ne bukole bua kusaka ndelanganyi yonso ya Adama ne Eva ku ditombokela Nzambi. Nunku, Nzambi wakalekeela Satana tshikondo kampanda bua kujadikaye bulelela bua budiambi buende, kadi kêna mukumbaje bualu ebu to.—Yobo 1:6-12; 2:1-10.
Bushuwa, Satana kêna nkayende ku dikokesha bulongolodi ebu to. Wakafikisha bamue ba ku banjelo bakuabu ku dimulonda mu ditombokela diende dia Nzambi. Bine aba ke bakalua ba-demon, ba-spiritu bena-diende. Bible udi wakula bualu buabo padiye udimuija bena nkristo ne: “Nutantamene mateyi a Diabolo; bualu kuluangana kuetu, ki nkua kuluishangana ne mashi ne mubidi, kadi . . . nkua kuluishangana ne bamfumu ba bulongilodi bua mîdima eyi, ne makole a ba-spiritu babi badi mu miaba ya mu muulu.”—Efeso 6:11, 12.
Tantamenayi ba-spiritu babi
Bamfumu aba babi ne bakena-bamueneka ba bulongolodi ebu mbapangadije bua kudinga bukua-bantu buonso, kubapambuisha kule ne ntendelelu wa Nzambi. Umue wa ku mishindu idi ba-spiritu babi batumika nayi bua kufika ku tshipatshila etshi ndimuangalaja dia lungenyi lua ditungunuka ne kuikala ne muoyo kunyima kua lufu, nansha mudi Dîyi dia Nzambi dileja bimpe bitambe bua se: bafue kabena bamanya bualu nansha bumue. (Genese 2:17; 3:19; Yehezekele 18:4; Musambu wa 146:3, 4; Muambi 9:5, 10) Nunku, pa kuidikija dîyi dia muntu kampanda wakafua, spiritu mubi kansanga udi mua kuakula ne mulela peshi mulunda wende utshidi ne muoyo, ku butuangaji bua muena lubuku, udi mudie nabu malanda peshi ku diambuluisha dia “dîyi” didi difuma ku muaba ukena-umueka. “Dîyi” edi didi dimanyisha mudidi dia mufue kampanda, pina apo dikale bushuwa dia demon kansanga!
Nunku, biakufikilabi bua wewe kumvua “dîyi” kampanda, kuanyishi bua bakushime to. Ubenge kuteleja bionso bididi dikuambila, ne wambulule mêyi a Yezu a se: “Umuka, Satana!” (Matayi 4:10; Yakobo 4:7) Kulekedi dijinga dia kumanya malu a ba-spiritu dikufikisha ku dibuelakana ne ba-spiritu babi nansha. Dibuelakana dia mushindu’eu didi dibikidibua ne: spiritisme peshi ntendelelu wa ba-spiritu, ne Nzambi udi ukandika basadidi bende didifila mu mishindu kayi yonso ya ditendelela ba-spiritu. Bible udi upiisha “muntu yonso udi utempa mbuku . . . peshi yonso udi ubuelakana mu njila ya mutendeledi wa ba-spiritu peshi mumanyishi wa malu masokome atshivuavua peshi muena lubuku lua muzangu anyi muebeji wa malu ku bafue.”—Dutelonome 18:10-12; Galatia 5:19-21; Buakabuluibua 21:8.
Bu mudi ntendelelu wa ba-spiritu ubueja muntu mu bukokeshi bua ba-demon, wepuke bienzedi bionso bidi bisuikakane ne ntendelelu eu, nansha biobi bikale bisekesha, anyi bisankisha mushindu kayi. Bimue bia ku bienzedi ebi mbiebi: lutangilu lua dibulunge dia lumuenu, diangata dia tubaya tua Ouija, dimona malu masokome, dibala dia mishonyi ya mu tshianza, ditempesha lubuku, dienza majimbu, buloji, mupongo, manga mapaka, dimanya malu mu mitoto. Ba-demon batu kabidi bajula mitoyi ne malu makuabu a bishima mu nzubu idibo bandamune bisombedi biabo.
Kusakidila apu, ba-spiritu babi batu bashindamena pa majinga a mpekatu a bantu pa kuvudija dimuangalaka dia mikanda, dia film, ne dia programme ya televizion bidi bizangika tshiendenda ne mishindu ya disangila idi kayiyi ya ku tshifukilu. Ba-demon mbamanye bua se: bialama muntu ngenyi mibi ne kayi uyumusha mu tshieledi tshiende tshia lungenyi neyimusake ku dikuna mmuenenu mibi kashidi ne bidi bifikisha ku bienzenza—amu bu muakafikilabi ba-demon bobo bine.—Genese 6:1, 2; 1 Tesalonike 4:3-8; Yuda 6.
Bushuwa, bavule badi mua kuseka pa kumvua ne: bulongolodi ebu mbukokesha kudi ba-spiritu babi. Kadi, dibenga kuitaba diabo kadiena ditukemesha, bualu Bible udi wamba ne: “Satana muine utu udiandamuna bu muanjelo wa butoke.” (2 Kolinto 11:14) Mushindu udiye utamba kudingangana ng’wa kufofomisha mesu a bavule bua kabafiki ku ditabuja muanda eu mulelela wa se: yeye ne ba-demon bende batuku bushuwa. Kadi wewe, kuitabi bua kudingibua! Diabolo ne ba-demon bende batuku bushuwa, ne bidi bikengela bua wewe kutungunuka ne kubatantamena.—1 Petelo 5:8, 9.
Diakalenga, tshikondo tshikala Satana ne bena diende ne bua kumushibua tshikadi pabuipi! Bible udi ujadika ne: “Bulongolodi ebu [pamue ne bamfumu babu ba-demon] budi bupita . . . kadi eu udi wenza disua dia Nzambi neashale [ne muoyo] tshiendelele.” (1 Yone 2:17) Ndisulakana kayipu dituikala nadi pumushibua buenzeji ebu bubi kutudi! Nunku, tudiku petu mua kuikala munkatshi mua aba badi benza disua dia Nzambi ne kupeta muoyo wa kashidi mu bulongolodi bupiabupia bua Nzambi muikala buakane.—Musambu wa 37:9-11, 29; 2 Petelo 3:13; Buakabuluibua 21:3, 4.
[Picture caption on page 4]
Satana uvuaku mua kupesha Yezu mbulamatadi yonso ya pa buloba bu yoyo kayiyi yende anyi?