Bulelela budi butangila anyima budi ne mushinga
“Nenumanye bulelela, bulelela pabu nebunupikule.” —YOWANESE 8:32, MMM.
MITABUJA a muntu adi atangila lufu ne Muoyo wa kunyima kua panu adi nangananga tshipeta tshia malu a ntendelelu ne a nshidimukilu a muaba udiye mukolele. Anu bu mutuamonyi, adi abangila ku dituishibua dia se: anyima udi ukumbaja tshipatshila tshiende tshia ndekelu anu kunyima kua diledibua tshiakabidi njila ne njila too ne ku lungenyi lua ne: matuku a muoyo umuepele wa muntu ke adi ajadika tshiapetaye ku ndekelu. Pa nanku, muntu udi mua kuikala ne dieyemena dia kudisangisha ndekelu wa bionso ne bulelela bua ndekelu padiye ufua, mukuabu ne dia kufika ku Nirvana, ne mukuabu kabidi dia kupeta difutu dia mu diulu. Nenku, bulelela mbuepi? Bu mudi mitabuja etu mikale ne buenzeji pa mmuenenu, mapangadika ne bienzedi bietu, katuenaku ne bua kuditatshisha bua kupeta diandamuna ku lukonko alu anyi?
2 Mukanda wa kale ku yonso idiku pa buloba, Bible, udi ulonda muyuki wa malu a kale a muntu too ne ku difukibua dia anyima wa muntu wa kumpala. Malongesha a mu Bible kaena ne nkindi ne bilele bia kale bia bantu. Bible udi uleja patoke bulelela budi butangila anyima: Anyima webe ng’wewe, bafue kabenaku nansha, ne aba badi mu tshivulukidi tshia Nzambi nebabiishibue mu tshikondo tshiende tshijadika. Kumanya malu aa kudi mua kumvuija tshinyi buebe wewe?
3 Yezu Kristo wakambila balondi bende ne: “Nenumanye bulelela, bulelela pabu nebunupikule.” (Yowanese 8:32, MMM) Eyowa, bulelela budi bupikulangana. Kadi bulelela budi butangila anyima nebutupikule ku tshinyi?
Bupikudi ku ditshina ne dipanga ditekemena
4 “Bantu ba bungi badi batshina lufu ne badi bateta bua kuepuka dielelapu meji,” ke mudi tshibungu kampanda tshiamba. (The World Book Encyclopedia) Munga mufundi wa malu a kale udi wamba ne: “Muaku ‘lufu’ muine mmulue kuikala mene kauyi wa kutela munkatshi mua bena ku Ouest.” Ne mu imue nshidimukilu badi batamba kutumika ne ngakuilu mubotesha bu mudi ne: “watulu nkinda” anyi “wabengi panu” bua kuamba anu ne: muntu wafu. Ditshina lufu edi didi bushuwa ditshina tshikena tshimanya bualu, bua bantu bavule, lufu mbualu bukena kujingulula. Dimanya dia bulelela pa tshidi tshitufikila patudi tufua didi ditekesha ditshina edi.
5 Tshilejilu, tangila lungenyi luvua nalu Michaelyn, muana wa bidimu 15. Uvua ne disama dia mu mashi (leucémie) ne muindile lufu. Paula, mamuende wa muana eu, udi uvuluka ne: “Michaelyn uvua wamba ne: bualu bua lufu luende kabuvua bumutonda, bu muvuaye mumanye se: luvua anu bua mutantshi muîpi. Tuvua tuyukila nende pa malu a bungi adi atangila bulongolodi bupiabupia bua Nzambi ne aba bonso babiishibuamu. Michaelyn uvua ne ditabuja dikole kudi Yehowa Nzambi ne mu dibiishibua—kavua ne mpata nansha mikese.” Ditekemena dia dibiishibua diakapikula muana wa bakaji eu wa muoyo mukole ku ditshina lufu dinekesha.
6 Mmunyi muvua bulelela ne buenzeji kudi baledi ba Michaelyn? Jeff, tatuende, udi wamba ne: “Lufu lua muanetu mutekete wa bakaji luvua bualu bua dibungama ditambe bukole butu kabuyi buanji kutufikila. Kadi tudi tueyemena kakuyi mpata dilaya dia Yehowa dia dibiishibua, ne tudi bindile dimue dituku bua kuambula kabidi Michaelyn wetu musuibue mu maboko. Ndimonangana kayipu!”
7 Eyowa, bulelela budi butangila anyima budi bupikula muntu ku dipanga ditekemena didi lufu lua munangibue kampanda mua kutuala. Bushuwa, kakuena tshidi mua kujikija menemene dibungama ne kanyinganyinga bitudi tupeta padi munangibue wetu ufua. Kadi ditekemena dia dibiishibua didi dikepesha tshinyongopelu ne didi diambuluisha bua kuakama bimpe bisama.
8 Bulelela bua mu Mifundu pa ngikadilu wa bafue budi butupikula kabidi ku ditshina bafue. Katshia bamanya bulelela ebu, bavule bavua kale basuikibue kudi bilele bia bitabataba bia malu a bafue kabatshiena bapampakana bua diedibua milawu, bilengulengu, bijimba anyi manga, kabena nansha bafila milambu ya mushinga mukole bua kutokesha bankambua babu munda ne kubakanda bua kabalu kuenzela badi ne muoyo bibi. Bushuwa, bualu bafue “ki mbamanye kabidi bualu nansha bumue,” ngenzelu ya nunku nya patupu.—Ntoyi 9:5, MMM.
9 Bulelela budi butangila anyima, budi busanganyibua mu Bible, budi bushuwa bupikulangana ne mbua kueyemena. Kadi tangila kabidi ditekemena dia pa buadi didi Bible ukuleja.
[Nkonko ya dilonga]
1. Bua tshinyi mbia mushinga bua tukonkonone mitabuja etu pa bidi bitangila anyima ne lufu?
2, 3. (a) Bua tshinyi tudi mua kueyemena tshidi Bible wamba bua anyima? (b) Anu bu mudibi biamba mu Bible, ntshinyi tshidi bulelela pa bidi bitangila anyima?
4, 5. (a) Nditshina kayi didi bulelela budi butangila anyima bumbusha? (b) Mmunyi muvua ditekemena dia dibiishibua dipeshe muana wa bakaji wakafua bua disama kampanda dikima?
6, 7. Bulelela budi butangila anyima budi butupikula ku dipanga ditekemena kayi? Fila tshilejilu.
8, 9. Bulelela budi butangila ngikadilu wa bafue budi butupikula ku ditshina kayi?
[Lungenyi lunene lua mu dibeji 29]
Bulelela budi butangila anyima budi bukupikula ku ditshina lufu, ditshina bafue, dipanga ditekemena bua lufu lua munangibue