Mbanganyi?
BANTEMU BA YEHOWA badi bajinga bua ubamanye bimpe. Pamu’apa bamue ba kudibu mbena mutumba nebe, bena mudimu nebe peshi bumue udi mua kuikala ukadi mupetangane nabu miaba mikuabu. Udi mua kuikala ukadi mubamone mu njila bafila bibejibeji kudi bantu. Peshi udi mua kuikala ukadi muyikile nabu ku nzubu kuebe.
Bantemu ba Yehowa badi basanka bikole bua kuyikila nebe ne mbasue wikale bimpe. Mbasue kuikala balunda bebe ne kukumanyisha malu abu a bungi, malu adibu bitabuja, malu adi atangila bulongolodi buabu ne meji adibu nawu bua bantu ne buloba butudi basombele ebu. Ke bua tshinyi, mbapatule kakanda aka, ne mbakapatule anu buebe wewe.
Tshidibi, mu malu a bungi Bantemu ba Yehowa badi anu bu bantu bakuabu bonso. Batu pabu bapeta ntatu, bapangila mfranga, bakuatshika masama ne bapeta pabu tunyinganyinga. Misangu mikuabu batu benza pabu bilema, bualu ki mbantu bapuangane to; nyuma wa Nzambi kêna ubaludika mu kalu konso to; ne batu pabu batupakana. Kadi badi bateta kuenza malu bilondeshile akadibu bamone ne badi balonga Bible ne tshisumi bua kulengeja amue malu bu mudibi bikengela. Mbadilambule kudi Nzambi bua kuenza disua diende, ne badi benza muabu muonso bua kuenza malu adi aleja ne: bushuwa mbantu badi badilambule kudi Nzambi. Badi bakeba bua Dîyi dia Nzambi ne spiritu munsantu wende bikale bibaludika mu malu abu onso.
Buabu buobu, malongesha abu adi ne bua kufumina anu mu Bible, pa mutu pa kuangatshilabu mu mamanya adi bantu bafuanyikija anyi mu bilele bia bena nzambi mikuabu. Badi ne meji a buena avua nawu mupostolo Paulo pavuaye wakula ku buenzeji bua nyuma wa Nzambi, ne: “Nzambi ikale muena bulelela, kadi muntu yonso ikale muena mashimi.” (Lomo 3:4a) Bua bidi bitangila malongesha a bulelela bua mu Bible, Bantemu badi bangata bualu buakenza bena Beloya ne mushinga mukole. Pavua diyisha dia mupostolo Paulo dibabuele: Bena Beloya ‘Bakitabuja dîyi ne mitshima mimana kulongolola; bakadi badikebela mu Mukanda wa Nzambi ku dituku ku dituku ne: Malu aa adi malelela anyi?’ (Bienzedi 17:11) Bantemu ba Yehowa badi bela meji ne: malongesha onso a malu a Nzambi, nansha adibu buobu balongesha anyi adi bantu bakuabu balongesha, badi ne bua kuakonkonona mushindu’eu bua kumona bikalawu bushuwa umvuangana ne Mifundu mifundisha ku diambuluisha dia nyuma wa Nzambi. Badi bakulomba ne bakukankamija bua wewe kuikala ukonkonona malu adibu balongesha paudi uyikila nabu.
Bionso ebi bidi bileja ne: Bantemu ba Yehowa badi bitabuja ne: Bible n’Dîyi dia Nzambi. Buabu buobu, mikanda 66 idi mu Bible mmifunda yonso ku diambuluisha dia spiritu munsantu ne malu adimu akenzeka kale mmalu majalame ne mmalelela. Tshitupa tshitu bantu bakuabu babikila pa tshibidilu ne: Dipungila Dipiadipia batu buobu batshibikila ne: Mifundu ya tshiena-Greke ya Buena-Kristo, ne Dipungila Dikulukulu badi buobu badibikila ne: Mifundu ya tshiena-Ebelu. Badi bitabuja Mifundu yonso ya tshiena-Greke ne ya tshiena-Ebelu ne bayumvua anu mudibu bayifunde amu, pa kumbusha imue miaba idi biambilu peshi bualu kampanda budi bupitakane bileja patoke ne: ngakuilu au ng’wa mu tshimfuanyi. Mbamanye ne: milayi ya bungi ya mu Bible ikadi mikumbane, mikuabu idi yenda ikumbana, ne minga kabidi neyikumbane kumpala eku.
DÎNA DIABU
Bantemu ba Yehowa? Eyowa, ke mutubu badinyike. Ndîna didi dibasunguluja, didi dileja ne: badi bamanyisha malu a Yehowa, Bunzambi buende ne malu adiye mulongolole. Mbikidilu bu mudi: “Nzambi,” “Mukalenge” ne “Mufuki” (anu bu mutubi bua: “Muludiki anyi Mulombodi” ne “Jenerale”) mmianzu idibu nansha mua kupesha muntu kayi yonso. Kadi “Yehowa” ke dîna dia Nzambi wa-bukole-buonso ne Mufuki wa bintu bionso. Bilondeshile Mukanda wa Nzambi, dîna edi ndileja mu Musambu 83:18, mutudi mua kubala ne: ‘Mbua bamanye biabu ne: wewe nkayebe, ng’udi muinyika dîna dia Yehowa, udi Mutambe Bunene wa pa mutu pa buloba bujima.’
Dîna edi Yehowa (anyi Yahweh, bilondeshile nkudimuinu wa La Bible de Jérusalem wa bena Katolike ne mushindu udi bamue bamanyi ba malu a mu Bible basue) tudi tudisangana misangu mitue ku 7000 mu Mifundu ya tshiena-Ebelu ya ntuadijilu. Kadi mu Bible ya bungi kamuena dîna edi to. Mbapingaje pa muaba wadi “Maweja,” “Mfumu” anyi mene “Mukalenge.” Mu miakulu mikuabu kudi imue nkudimuinu idi ne dîna Yehowa anyi Yahweh. Ke bualu kayi mu Mukanda wa Nzambi mbafunde mu Yeshaya 42:8 ne: “Meme ndi Yehowa. Adi ndina dianyi.”
Bantemu ba Yehowa mbangatshile dîna diabu edi mu Yeshaya nshapita wa 43. Mu nshapita eu badi baleja bantu bonso bu badi ku kabadi kanene, kudi nzambi ya bukua-bisamba ne bua kulua ne bantemu bayi bua kujadikabu buakane buabu budibu badiamba nabu, ne badi ne bua kuteleja bantemu badi bajadika buakane bua Yehowa ne kumanya bulelela. Mu nshapita eu Yehowa udi wambila bantu bende ne: ‘Nuenu nudi bamanyi [anyi bantemu] banyi, ne nudi muntu wanyi ungakusungula, bua nummanye ne nuitabuje dîyi dianyi, ne nujingulule bu mundi yeye mene. Kakuakadi nzambi mukuabu mufukibue kumpala kuanyi, kakuena kuikala mukuabu kunyima kuanyi. Meme, meme mene, ndi Yehowa; kakuena musungidi mukuabu kabidi anu meme nkayanyi.’—Yeshaya 43:10, 11.
Yehowa Nzambi uvua ne bantemu pa buloba munkatshi mua bidimu binunu bivule kumpala kua diledibua dia Yezu. Kunyima kua buobu bamane kutela bamue ba ku bantu ba ditabuja abu mu Ebelu nshapita wa 11, Ebelu 12:1 udi wamba ne: ‘Nunku, tuetu kabidi, bualu bua tudi tunyungulukibua ne tshisumbu tshinene nunku tshia [bantemu], tumushayi bujitu buonso, ne malu mabi adi bualu bua butekete bua kutulenduisha, tuidikije ne kutantamana tshidikijilu tshietu tshia lubilu tshidi tshitekibua kumpala kuetu.’ Yezu wakamba kumpala kua Ponsio Pilato ne: “Meme, tshidibo bandelele, kabidi tshindi muvuile panu apa, mbua kujadikila bantu bulelela.” Badi bamubikila ne: “Mujadiki [anyi ntemu] wa lulamatu ne mulelela.” (Yone 18:37, Mukanda wa Mvidi Mukulu; Buakabuluibua 3:14, Muanda Mulenga Lelu) Yezu wakambila bayidi bende ne: ‘Nenuangate bukole, panupuekela nyuma muimpe pambidi penu; nenuikale [bantemu] banyi mu Yelushalema ne mu Yudaya yonso ne Samalea ne ku mfudilu kua buloba.’—Bienzedi 1:8.
Ke bua tshinyi bantu bu 6 000 000 badi bayisha lelu lumu luimpe lua Bukalenge bua Yehowa budi Kristo Yezu ulombola mu matunga mapite pa 230 badi bamona ne: mbakumbanyine bua kuangata dîna edi dia Bantemu ba Yehowa.
[Mêyi adi kuinshi]
a Padiku kakuyi kamanyinu, mvese idi mu kakanda aka mmiangatshila mu Mukanda wa Nzambi.
[Tshimfuanyi mu dibeji 3]
Mbasue bua kuyikila nebe
[Tshimfuanyi mu dibeji 4]
Mbadilambule kudi Nzambi bua kuenza disua diende
[Tshimfuanyi mu dibeji 4]
Badi bitabuja ne: Bible n’Dîyi dia Nzambi
[Tshimfuanyi mu dibeji 4]
Dîna dia Nzambi mu tshiena-Ebelu tshia kale
[Tshimfuanyi mu dibeji 5]
Dîna bilondeshile muakadiambabu ku kabadi kanene
[Tshimfuanyi mu dibeji 5]
Bantemu bu 6 000 000 mu matunga mapite pa 230