Mmalu kayi adibu balongesha?

BANTEMU BA YEHOWA badi bitabuja ne: kudi Nzambi Wa-Bukole-Buonso, Mufuki wa diulu ne buloba, Yehowa. Bua mushindu udi bintu bionso bidi bimueneka bikale bikemesha, bidi bileja menemene ne: Muntu wakabifuka bionso udi ne lungenyi ne bukole bua bungi bua dikema. Anu mutu ngikadilu ya bantu imuenekela mu midimu yabu, ke mudibi kabidi bua Yehowa Nzambi. Bible udi utuambila ne: ‘Bua [ngikadilu] yende idi kayiyi mua kumueneka katshia buloba buafukibua, bukole buende bua tshiendelele mene ne bunzambi buende, [bidi bimueneka] bimpe, bualu bua bidi bijinguluka ku bintu biakufukibua.’ Udi wamba kabidi ne: “Diulu didi diamba butumbi bua Nzambi,” kadiyi dijukula dîyi.—Lomo 1:20; Musambu 19:1-4.

Bantu kabatu benza mabungu a dima anyi benza televizion peshi tshiamu tshia ordinatere kabiyi bua tshipatshila kampanda to. Buloba ne bikunyibua ne nyama bidipu mbintu bidi bitamba kukemesha bikole. Mushindu udi mubidi wa muntu muenza ne miliyare binunu ne binunu ya tutupa tukese menemene (anyi selile) mmutupite lungenyi kakuyi mushindu wa kubiumvuija. Nansha mene buongo buetu budi butuambuluisha bua kuela meji ntshintu tshia dikema tshitudi katuyi mua kujingulula muatshi muditshi! Pikala bantu bikale ne tshipatshila kampanda padibu benza bintu bidi kabiyi nansha binene patudi tubifuanyikija ne bidi Nzambi mufuke, kadi tudi mua kuamba tshinyi bua bintu bionso ebi bidi bikale bikemesha bantu bidi Yehowa Nzambi yeye mufuke? Nsumuinu 16:4 udi wamba ne: “Yehowa wakafuka tshintu tshionso ne kafukila katshi.”

Yehowa mmumanye bua tshinyi wakafuka buloba, biumvuika ku mêyi akambilaye mulume wa kumpala ne mukajende ne: ‘Nulelangane, nukumbane ba bungi, nuuje buloba tente; nuikale ne bukokeshi ku mutu kua minyinyi ya mu mâyi, ne nyunyu ya muulu, ne tshintu tshionso tshidi ne muoyo tshidi tshiendakana pa buloba.’ (Genese 1:28) Bu muakabenga mulume eu ne mukajende bua kutumikila Nzambi, ki mbafike ku diuuja buloba ne bantu bakane bavua mua kulama buloba bimpe pamue ne bikunyibua ne nyama bidipu. Kadi dibenga kutumikila diabu edi kadiena dipumbishisha tshivua Yehowa mulongolole nansha. Kunyima kua bidimu binunu ne binunu bakalua kufunda ne: ‘Nzambi mene wakafuka buloba ne wakabuenza, kakabufuka bu tshintu tshia patupu, wakabufuka bua bantu bashikamepu.’ Ki mmulongolole bua kubutula buloba to, “kadi buloba budi bushala kashidi.” (Yeshaya 45:18; Muambi 1:4, MMM) Kafukila ka Yehowa ka buloba nekakumbane. Udi wamba ne: “Bualu bundi muelele meji nebuenzeke, tshionso tshindi musue nentshikumbaje.”—Yeshaya 46:10, MMM.

Ke bua tshinyi Bantemu ba Yehowa badi balongesha ne bitabuja ne: buloba nebushale kashidi, ne bantu bonso bikale bakanyine malu adi Yehowa mulongolole bua buloba bualengejaye (badi ne muoyo nansha bakadi bafue), nebikale mua kusombelapu tshiendelele. Bantu bonso mbena mpekatu, bakapiana dipanga bupuangane dia Adama ne Eva. (Lomo 5:12) Bible udi utuambila ne: “Difutu dia bubi ndufu.” “Badi ne muoyo badi bamanye ne, Netufue; kadi bafue kabena bamanye bualu [nansha] bumue.” “Muntu [ ta anyima] udi wenza bualu bubi, yeye muine neafue.” (Lomo 6:23; Muambi 9:5; Yehezekele 18:4, 20) Kadi mmunyi muikala bantu aba mua kupeta muoyo tshiakabidi ne kubuela mu masanka ikala pa buloba? Bidi mua kuenzeka nanku anu ku diambuluisha dia mulambu uvua Yezu Kristo mufile bua kupikula bantu. Wakamba mene se: ‘Ndi bianyi dibisha, ndi bianyi muoyo; udi ungitabuja, nansha biafuaye, neikale ne muoyo kabidi.’ ‘Bonso badi mu nkita [ya tshivulukilu] nebumvue dîyi diende, nebajuke.’—Yone 5:28, 29; 11:25; Matayo 20:28.

Mmunyi muenzeka malu aa? Mbaumvuije mu ‘lumu luimpe lua bukalenge,’ luakabanga Yezu kumanyisha patshivuaye pa buloba. (Matayo 4:17-23) Kadi Bantemu ba Yehowa badi bayisha lumu luimpe elu lelu mu mushindu wa pa buawu menemene.

[Tablo mu dibeji 13]

MALU ADI BANTEMU BA YEHOWA BALONGESHA

Malu adibu balongesha Mvese idi ijadika malu aa

Bantu badi bafua bua mpekatu wa Adama Lomo 5:12; 6:23

Malu adibu balongesha Mvese idi ijadika malu aa

[Tshimfuanyi mu dibeji 12]

BULOBA . . . mbufuka kudi Yehowa . . . bantu badi babulama . . . nebasombepu kashidi