Ditangilangana ne bateleji

MÊSU etu atu aleja ngikadilu kampanda ne mutudi tudiumvua munda. Adi mua kuleja ne: tudi tukema anyi tutshina, tudi ne dinanga, tudi ne dielakana anyi kanyinganyinga. Mukuabu tatu wakamba bua bena mu ditunga diabu bavua mu ntatu mikole ne: “Tutu tuakula ne mêsu.”

Bamue bantu badi mua kutuelela meji bilondeshile muaba udi mêsu etu atangila. Mu matunga a bungi, bantu batu bitaba malu a muntu udi ubatangila ne bulenga buonso. Mpindieu kabatu bitaba dimanya peshi malu a muntu udi wakula mêsu matangija ku makasa ende anyi ku bintu bikuabu pamutu pa kubatangila. Kadi kabitu bimpe mu makuabu matunga bua kutangila bantu bikole to (nangananga bikalayi mfumu anyi ne muanzu kampanda peshi muntu udi kayi mulume anyi mukaji bu wewe). Mu minga miaba, padi nsonga utangila muntu mukole mu mêsu, mmupange malu.

Nansha nanku, muaba udibi kabiyi bibi, kutangila muntu mu mêsu paudi wamba bualu bua mushinga kudi kubushindika. Kudi mua kuleja mudi malu audi wamba mikale akutuisha. Tangila muakenza Yezu dîba diakakema bayidi bende bikole, kumuebejabu ne: ‘Udi mua kupanda nnganyi?’ Bible udi ulonda ne: ‘Yezu kubatangila talalaa, kubambilaye ne: “Tshidi bantu kabayi mua kuenza, [Nzambi] udi utshienza tshionso.”’ (Mat. 19:25, 26, MMM) Bible udi wamba kabidi ne: mupostolo Paulo uvua utangila talalaa bantu bavua bamuteleja. Umue musangu muntu kampanda uvua mulela mulema uvua munkatshi mua bantu bavua bateleja Paulo. Bienzedi 14:9, 10 udi wamba ne: ‘Uvua muteleje Polu wakula. Polu kumujooja, kumona ne: uvua ne ditaba, utekemena kuenda. Kumuambilaye ne diyi dikole ne: Juka, imana mululame bimpe.’​—MMV.

Tshitudi mua kuenza mu buambi. Mbimpe kuikala ne bulenga ne mimuemue kuisu dîba ditudi tusemena kudi muntu mu mudimu wa budimi. Padibi biakanyine, tudi mua kutuadija ne tukonko tuimpe pa tshintu kampanda tshidi muntu mumanye. Paudi wela tukonko etu, utangile muntu ku mêsu ne kanemu ne mpala mulenga. Mimuemue itu ileja disanka, ne itu isankisha bantu. Malu aa adi aleja muntu au tshiudi ne adi mua kuenza ne: adiumvue bimpe, musulaku padiye wakula nebe.

Padibi biakanyine, utangile muntu mu mpala bua kumanya mushindu uudi mua kuya ne muyuki. Tshilejilu, udi mua kumanya bikala muntu muikale ne tshiji anyi kayi musue malu audi umuambila, bikalaye kayi umvua biudi umuambila, bikalaye ukeba bua wambe budi munda ne lukasa, bikalaye usanka bua biudi umuambila. Mêsu ende adi mua kukuambila bua kuakula lubilu anyi bitekete, kuenza bua yeye pende akule, bua kukosa muyuki, anyi bua kutungunuka nawu ne kumuleja mututu tulonga Bible ne bantu.

Nansha uyisha tshianana anyi ulonga Bible ne bantu, uditatshishe bua kutangila muntu ne kanemu konso. Kadi ki mbimpe kushala mulengemene muntu mutantshi mule to, bidi mua kumutonda. (2 Bak. 8:11) Ikala utangila muntu misangu ya bungi mu mpala, ne bulenga bu muutu wenza matuku onso. Kutangila bantu nunku mu matunga a bungi nkuleja muudi wamba malu ne muoyo umue. Tshidibi, paudi ubala Bible anyi mukanda mukuabu, mêsu adi ne bua kuikala matangile bidi mu mikanda eyi. Kadi bua kushindika bualu, udi mua kuanji kutangila muntu bua katupa kîpi. Wewe muikale umutangila kunyima kua katantshi bule kampanda, neumanye mudiye umvua bua biudi umuambila.

Nansha buôwa buobu bukupangisha bangabanga bua kutangila muntu, kuteketshi mu maboko to. Wewe udibidija, neubange kutangila bantu ne kuyikila nabu kakuyi bualu.

Paudi wenza muyuki. Bible udi wamba ne: kumpala kua Yezu kutuadija Muyuki wende wa pa Mukuna, ‘Wakajoja bayidi bende.’ (Luka 6:20) Ulonde pebe tshilejilu tshiende. Paudi wakula kumpala kua kasumbu ka bantu, anji batangile ne ikisha katupa kumpala kua kutuadija kuakula. Mu matunga a bungi bitu bikengela kutangila bamue bantu basunguluke badi muaba au. Dindila katupa edi didi mua kukuambuluisha bua kumbusha buôwa. Padi bateleji batangila mpala webe, badi mua kumanya ne kulonda bimpe tshiudi usua kubambila. Katantshi aka kadi mua kubambuluisha bua kupuwabu ne kushala bakuteleja ne lubatshi.

Ikala anu utangila bantu. Kubatangidi mu tshibungi tshiabu to. Ubatangile muntu ku muntu. Mu matunga mavule, bitu bikengela ngamba-malu ikale utangilaku bantu.

Kutangila bateleji nkushilangane ne kutangila misangu ya bungi eku ne kuaka. Bidi bikengela kutangila muntu kampanda munkatshi mua bateleji ne kanemu, ne bikalabi biakanyine, amba tshiambilu tshijima anu mumutangile. Mpindieu tangila mukuabu, muambile tshiambilu tshimue anyi bibidi. Kadi kutangidi muntu umue mutantshi mule bifuane kumutonda; kutangidi anu bantu bamue bamue to. Utungunuke ne kutangila bantu nanku; tshibi paudi utangila muntu, muambile bualu ne mona tshidiye wenza kumpala kua kutangila mukuabu.

Udi mua kuteka mabeji ebe pa tshiakuidi, kuakuata ku tshianza, peshi kuela mu Bible bua ne: wikale utapamu dîsu kakese tshianana. Biobi bilomba kuinyika mutu wonso bua kutangila malu audi mufunde, kuakutangila kabidi bantu bimpe to. Tshikuabu tshintu tshia kuvuluka mbungi bua misangu ne dîba diudi utapa dîsu mu note yebe. Wewe utangila note yebe dîba diudi wamba bualu bua mushinga mukole, kuakumona bilenga mudi bantu bumvua to; muyuki webe kawakutuila bantu bimpe menemene to. Bidi mushindu umue kabidi ne paudi utangila anu kutangila biudi mufunde.

Tuangate tshilejilu: paudi ukupila muntu ndundu, udi utangila too ne mudi muntu eu umuakidila. Bia muomumue, lungenyi luonso mu muyuki ludi bu “dikupila” bateleji ndundu kasangu kamue. “Diakidila” ndundu mmushindu udi bantu bandamuna, tshilejilu: kushikula mutu, kutua mimuemue, kukutangila ne lubatshi luonso. Wewe utangila bantu bimpe, neumanye bikala bantu bumvua anyi “bakidila” ngenyi yebe.

Kadi tshiwenza ntshinyi pakupeshabu mudimu wa dibala? Bikala bantu babala pabu mu yabu Bible, ba bungi kabakumanya ni udi ubatangila to. Kadi biwikala ubatangilaku, neulengeje dibala diebe bualu neumanye mudibu bumvua. Paudi utangila bateleji, newambuluishe badi kabayi babala peshi badi ne lungenyi kua tshianana bua kutelejabu pabu. Kadi udi ubatangila anu bua katupa kîpi bua kulu kutupakana mu dibala. Ke bua tshinyi bitu bimpe kukuata Bible mu tshianza ne mutu muambulula, tshibanga katshiyi pa tshiadi to.

Imue misangu, bakulu batu benza miyuki ya kubala mu mpungilu anu mudibu bayifunde. Bitu bilomba dibidila, didilongolola biakane, ne dibala misangu mivule. Tshidibi, kakutu mushindu wa kutangila bateleji bikole mu miyuki ya nunku to. Kadi muntu yeye mudilongolole biakane, neatangile bateleji kayi utupakana to. Kutangila bantu eku kudi kubambuluisha bua kulonda muyuki ne kukuata malu audi wamba.