Kuakula bu pa tshibidilu

BANTU nebitabe biudi wamba biwakula bu pa tshibidilu. Amba tung, udi mua kuitaba malu a muntu udi wakula nebe, kadi muvuale buadi peshi tshifuebe ku mêsu anyi? Tshifuebe tshiotshi tshienza bilenga tshipita mpala wa muntu udi wakula ku buimpe, newitabe malu au anyi? Tòo. Ke bualu kayi, pamutu pa kushintuluka, ikala musule anu bu muutu pa tshibidilu.

Kadi kuikala mututu pa tshibidilu nkushilangane ne kulengulula malu. Tshilejilu, kuakula ne bilema, kushindumuna miaku bibi, kuakuila mu diulu anyi kuenza mudimu ne miaku ya bilele, mbintu bia kuepuka. Ngakuilu wetu ne ngenzelu wetu wa malu bidi ne bua kuleja kanemu. Nunku bua kuakula bu pa tshibidilu, kuakudi upitshisha bienze bu malu a mudimu, ne kukebi bua bakuabu bakumone muudi mumanye malu bikole to.

Mu mudimu wa budimi. Utuku umvua bibi anyi luya lutu lukutuka mu bianza paukadi pa kubuela mu lupangu peshi pautu usua kuyisha muntu mu njila anyi? Bitu bitufikila tuetu bonso, kadi kudi bamue, luzakalu elu lutu lushala mutantshi mule. Luzakalu ludi mua kuenza ne: dîyi dishintuluke anyi dizakale dilue mizelezele, ne bianza ne mutu bibange kukanka mu mushindu mubi.

Kudi malu a bungi adi enza ne: tuikale tuzakala nunku. Tshilejilu, tudi mua kuikala tuela meji bua mudi bakuabu batumona, anyi tudiebeja bikala muntu mua kuitaba bitudi tusua kumuambila. Tuetu bonso tutu ne meji aa, kadi tshilumbu tshidi tshijuka patudi tutumaku lungenyi bikole. Kadi tshiudi mua kuenza ntshinyi paudi umvua luzakalu kumpala kua kuyikila ne muntu? Udilongolole bimpe ne usambile Yehowa bikole. (Bien. 4:29) Ela meji mudi Yehowa muikale ne luse lua bungi: mudiye ubikila bantu bua kuikala ne mubidi mupuangane ne muoyo wa tshiendelele mu Mparadizu. Ela meji bua bantu baudi ukeba kuambuluisha ne mudibu dijinga ne kumvua lumu luimpe.

Kupu muoyo kabidi ne: bantu badi ne budikadidi, badi mua kuitaba anyi kubenga mukenji wetu. Ke tshiakenzekela Yezu pende mu Isalele. Umanye ne: mudimu webe ng’wa kuyisha tshianana. (Mat. 24:14) Nansha bantu kabayi bakulekela wakula, dikala diebe muaba au nkuyisha kujima. Udi muenze bimpe bualu udi mulekele Yehowa ukuate nebe mudimu bua kukumbaja disua diende. Kadi biakuitabilabu bua kuakula, newenze munyi? Wewe muteke meji ku majinga a bakuabu, newakule bilenga anu bu pa tshibidilu.

Wewe uyisha bantu, wakula bu muutu wenza matuku onso, nebadiumvue bimpe. Badi mene mua kuitaba malu a mu Bible audi ubambila. Kuakudi anu nkayebe to, kadi nuyikile nabu. Akula ne bulenga buonso. Wikale nabu ku muoyo, wanyishe malu adibu bamba pabu. Kadi muaba udi muakulu anyi bibidilu bilomba kuanji kuenza amue malu kumpala kua kuyikila ne muntu utudi katuyi bamanye, mbimpe kubilonda. Tshibi, kupu muoyo bua kutua mimuemue bu pa tshibidilu to.

Ku tshiakuidi. Paudi wakula kumpala kua kasumbu ka bantu, akula bu pa tshibidilu, bu udi uyikila nabu. Kadi padibu bikale tshisumbu tshinene, mbimpe kubandisha dîyi. Wewe mukuate muyuki ku muoyo peshi mufunde bintu bipite bungi pa dibeji, meji ebe neatambe kutata bua mushindu uudi mua kuamba malu aa. Eyowa, kuamba malu biakane kudi ne mushinga, kadi muyuki udi umakana patudi tuteka meji a bungi ku miaku itudi ne bua kuamba. Katuakuakula bu pa tshibidilu kabidi to. Ukebe ngenyi kumpala kua dîba; uteke meji ku ngenyi pamutu pa kuateka ku mushindu udi miaku ne bua kulondangana.

Bidi mushindu umue ne padibu bakuela nkonko mu bisangilu. Udilongolole bimpe. Kubadi anyi kukuatshi mandamuna ku muoyo to. Wakule ne dîyi dia pa tshibidilu bua biumvuike bimpe, biumvuike bu bidi bidipatukila.

Tumanyayi se: tuetu tuakula bimpe kadi tunekesha, bantu nebamone ne: ki mmututu nansha. Tshilejilu, bitu bikengela kuakula bintu biumvuika bimpe ne kushindumuna miaku biakane, kadi ngakuilu webe neanyanguke biwanekesha. Kunyungisha mubidi bua kushindika anyi kumvuija bualu nkuimpe, kadi paudi wenza jeste eyi unekesha, bantu kabakuteleja muyuki bimpe to. Kuakula dîyi diumvuika nkuimpe, kadi diodi dipite mbibi. Kuakula ne musangelu wa bungi imue misangu nkuakane, kadi wamanya kupitshishi to. Ikala ushintulula dîyi, ne musangelu, ne bulenga buudi wakula nabu bua bantu kabalu kuteka ntema anu kuudi wewe peshi kumvuabu bibatonda.

Bamue bantu batu ne wabu mushindu utubu bakula nansha patubu bayikila dituku dionso edi. Bakuabu batu bakula mutu bantu ba bungi bakula. Kadi tshidi ne mushinga, nkuakula biakane dituku dionso ne kuikala ne ngikadilu wa kanemu wa bena Kristo. Nenku newakule ku tshiakuidi bimpe kuyi ne lutatu, anu bu pa tshibidilu.

Paudi ubala kumpala kua bantu. Bidi bikengela kudienzeja bua kubala muenza bu muutu wakula. Bua kubala mushindu eu, ukebe ngenyi minene idi mu biudi ubala ne umone mudiyi milondangane. Uyikuate bimpe mu lungenyi bua kulu kubala anu miaku patupu. Keba mutubu babala miaku yudi kuyi muibidilangane nayi. Bala ne dîyi dikole misangu ya bungi too ne paudi umanya muaba wa kubandisha ne kupuekesha dîyi, kubala miaku idi ne lungenyi lumue musangu umue bua kulupatula bimpe. Ubale kabidi nunku misangu ne misangu too ne pawabala kuyi ne lutatu. Udianjile kumanya malu biakane bua ubale ne musangelu muenze bu udi uyikila. Ke dienza malu bu pa tshibidilu edi!

Tutu tubala misangu mivule malu adi mu mikanda yetu idi ituambuluisha bua kumvua Bible. Pa kumusha dibala mu Kalasa ka Mudimu wa Nzambi, tutu tubala kabidi mu buambi ne patubu batupesha midimu anyi miyuki ya kuenza. Bana betu ba balume batu babala mu Dilonga dia Tshibumba tshia Nsentedi ne Dilonda dia Mukanda dia Tshisumbu. Batu bapesha bamue bana betu ba balume miyuki ya dibala patupu mu mpungilu. Nansha wewe ubala Bible anyi mukanda mukuabu, ubale mêyi adi mu tutedi anyi giyeme bimpe ne musangelu. Pikalamu mêyi a bantu ba bungi, ushintulule dîyi ndambu bua muntu ne muntu. Wamanya, kunekeshi to. Ubale ne muoyo mujima bu muutu pa tshibidilu.

Kubala bu pa tshibidilu nkubala bu udi wakula. Kakuena kumueneka bu udi wenza malu ku bukole to, kadi anu bu udi mutuishibue.