Nshapita wa dikumi ne muinayi
Mmunyi mudi Yehowa ulombola bulongolodi buende?
1. Bible udi utuambila tshinyi bua bulongolodi bua Yehowa, ne bualu ebu budi ne mushinga kutudi bua tshinyi?
NZAMBI udi ne bulongolodi anyi? Mukanda wa Nzambi mufundisha ku nyuma wende udi utuleja ne: udi nabu. Mu Dîyi diende emu, udi utuleja mu lupitapita tshitupa tshia mu diulu tshia bulongolodi ebu tshidi tshikemesha bikole bia dikema. (Yehezekele 1:1, 4-14; Danyele 7:9, 10, 13, 14) Nansha mutudi katuyi mua kumona tshitupa etshi tshidi katshiyi tshimueneka, kadi tshiditshi tshidi tshiambuluisha bikole batendeledi balelela lelu’eu. (2 Bakelenge 6:15-17) Bulongolodi bua Yehowa budi kabidi ne tshikuabu tshitupa tshidi tshimueneka pa buloba. Bible udi utuambuluisha bua kujingulula tshidi bulongolodi ebu ne mushindu udi Yehowa ubulombola.
Tshitupa tshidi tshimueneka
2. Ntshisumbu tshipiatshipia kayi tshivua Nzambi muenze?
2 Tshisamba tshia Isalele tshivua tshisumbu tshia Nzambi munkatshi mua bidimu 1545 bijima. (Bienzedi 7:38) Kadi bena Isalele bakabenga kutumikila mikenji ya Nzambi ne kubengabu Muanende. Bua bualu ebu, Yehowa wakabenga tshisumbu atshi e kutshilekelaye. Yezu wakambila bena Yuda ne: ‘Nzubu wenu udi mushale patupu.’ (Matayo 23:38) Nunku Nzambi wakenza tshisumbu tshipiatshipia, kudiaye natshi tshipungidi tshipiatshipia. Tshisumbu etshi tshivua ne bua kuikala ne bantu 144 000 basungula kudi Nzambi bua kudisangabu pamue ne Muanende mu diulu.—Buakabuluibua 14:1-4.
3. Ntshinyi tshiakenzeka mu Pentekoste wa 33 B.B. tshiakaleja patoke ne: Nzambi uvua mpindieu wenza mudimu ne tshisumbu tshipiatshipia?
3 Bakela bantu ba kumpala ba mu tshisumbu tshipiatshipia atshi manyi a nyuma muimpe wa Yehowa mu Pentekoste wa mu 33 B.B. Tudi tubala pa bidi bitangila bualu bua dikema ebu ne: ‘Pakalua dituku dia Pentekoste, buonso buabu bakadi popamue mu muaba umue. Tshiona tshiakafuma lubilu mulu bu tshipepele tshikole tshipita, tshiakuuja mu nzubu muonso muakadibu bashikame tente. Ndimi mipanduluke yakamueneka kudibu, yakadi bu kapia, kakashikama pa mutu pa muntu ne muntu. Buonso buabu bakadi buwule tente ne nyuma muimpe.’ (Bienzedi 2:1-4) Nanku nyuma wa Nzambi wakaleja bimpe ne: abu ke bavua mpindieu kasumbu ka bantu kavua Nzambi ne bua kuenza naku mudimu bua kukumbaja dijinga diende ku bulombodi bua Yezu Kristo mu diulu.
4. Badi benza lelu’eu bulongolodi bua Yehowa budi bumueneka mbanganyi?
4 Lelu’eu, bashadile ba ku bantu 144 000 batshidi pa buloba. Kadi bua dikumbana dia milayi ya mu Bible, bantu ba mu “musumba munene” wa “mikoko mikuabo,” badi bafike mene too ne ku miliyo mivule mbabasangishe pamue ne bashadile ba mu bela manyi. Mulami muimpe Yezu mmusangishe mikoko mikuabu eyi ne bashadile ba ku bela manyi pamue, bua kuenzabu tshisumbu tshimue tshikale ku bulombodi buende yeye Mulami wabu umuepele. (Buakabuluibua 7:9, MMM; Yone 10:11, 16) Bonso aba badi benza anu tshisumbu tshimue tshidi mu buobumue anyi bulongolodi bua Yehowa budi bumueneka.
Bulongolodi budi Nzambi ulombola
5. Udi ulombola bulongolodi bua Nzambi nnganyi, ne mmushindu kayi udiye ubulombola?
5 Mêyi a mu Bible aa: ‘[tshisumbu tshia] Nzambi udi ne muoyo,’ adi aleja patoke muntu udi ulombola bulongolodi ebu. Nzambi ke udi ulombola bulongolodi ebu. Yehowa udi ulombola bantu bende ku butuangaji bua Yezu (muntu udi kayi umueneka Udiye muteke Mfumu wa tshisumbu), ne kabidi ku diambuluisha dia Bible udiye mufundishe ku nyuma wende.—1 Timote 3:14, 15; Efeso 1:22, 23; 2 Timote 3:16, 17.
6. (a) Mmushindu kayi uvua buludiki bua mu diulu bua tshisumbu bumueneke mu bidimu lukama bia kumpala? (b) Tshidi tshileja ne: Yezu utshidi amu Mfumu wa tshisumbu ntshinganyi?
6 Bulombodi ebu buakadimuenekela patoke mu dia Pentekoste. (Bienzedi 2:14-18, 32, 33) Buakamueneka pavua muanjelo wa Yehowa mulombole mudimu wa diyisha dia lumu luimpe bua kubuelawu mu Afrike, pavua Yezu muleje tshia kuenza dîba divua Shaula wa ku Tâso mukudimune mutshima, ne pavua Petelo mutuadije mudimu wa kuyisha munkatshi mua bena mu bisamba bia bende. (Bienzedi 8:26, 27; 9:3-7; 10:9-16, 19-22) Kadi kunyima, bantu kabakalua kabidi kumvua dîyi difuma mu diulu to, kabakamona kabidi banjelo anyi kupeta kabidi dipa dia mu tshishima dia nyuma to. Yezu mene ukavua mulaye ne: ‘Monayi, ndi nenu matuku onso too ne ku nshikidilu kua tshikondo etshi.’ (Matayo 28:20; 1 Kolinto 13:8) Lelu’eu, Bantemu ba Yehowa mbamanye ne badi banyisha buludiki bua Yezu. Bu Yehowa kayi ubaludika, kabavua mua kuyisha mukenji wa Bukalenge eku babaluisha bikole nunku to.
7. (a) Badi benza kasumbu ka “mupika wa lulamatu ne wa budimu” mbanganyi, ne mbua tshinyi? (b) Mmudimu kayi uvuabu bapeshe “mupika” au?
7 Matuku makese kumpala kua lufu luende, Yezu wakambila bayidi bende bualu bua “mupika wa lulamatu ne wa budimu” uvuaye (yeye Mukalenge) ne bua kupesha bujitu bua pa buabu. “Mupika” au uvua ne bua kuikalaku dîba divua Mukalenge uya mu diulu, ne uvua ne bua kutungunuka ne kuenza mudimu mukole mu tshikondo tshia dipingana dia Kristo mumane kudia Bukalenge (kayi umueneka). Diumvuija edi kadiena ditangila muntu umue to, kadi didi ditangila tshisumbu tshia Kristo tshia bela manyi. Bu mudi Yezu musumbe tshisumbu etshi ne mashi ende, udi utshibikila ne: “mupika” wende. Wakapesha bena mu tshisumbu etshi mudimu wa kuvuija bantu bayidi ne kubadisha, ne kubapesha “biakudia [bia mu nyuma] dîba diakane.”—Matayo 24:45-47; 28:19, NW; Yeshaya 43:10; Luka 12:42; 1 Petelo 4:10.
8. (a) Kasumbu ka mupika kadi ne majitu kayi mpindieu? (b) Bua tshinyi mushindu utudi tuangata malu adi Nzambi utulongesha ku butuangaji bua mupika udi ne mushinga?
8 Bu muvua kasumbu ka mupika aka kikala kenza mudimu wa Mukalenge ne lulamatu luonso mu tshikondo tshia dipingana diende (dia muntu kayi umumona) mu 1914, kudi malu adi ajadika ne: bavua balue kupesha kabidi kasumbu ka mupika aka majitu manene mu 1919. Katshia tshidimu atshi, mudimu munene wa diyisha Bukalenge bua Nzambi udi wenda wenzeka, ne badi benda basangisha musumba munene wa batendeledi ba Yehowa bua kupandukabu mu dikenga dinene. (Matayo 24:14, 21, 22; Buakabuluibua 7:9, 10) Buobu pabu badi dijinga ne biakudia bia mu nyuma, ne badi babapeshabi kudi kasumbu ka mupika. Nunku bua tuetu kusankisha Yehowa, tudi ne bua kuitaba ne kutumikila malu adiye utulongesha ku butuangaji bua mupika eu.
9, 10. (a) Mu bidimu lukama bia kumpala, mmushindu kayi uvuabu balongolole malu bua kuikala kuandamuna nkonko ivua itangila malongesha ne mushindu wa kulombola mudimu wa diyisha lumu luimpe? (b) Nndongoluelu kayi udiku lelu bua dilombola dia midimu ya bantu ba Yehowa?
9 Imue misangu, nkonko itu ijuka pa bidi bitangila malongesha ne mushindu udi bulongolodi mua kuenda. Ntshinyi tshitu tshienzeka dîba adi? Mu Bienzedi nshapita wa 15, badi balonda mushindu wakandamunabu lukonko luvua lutangila dikudimuna mutshima dia bantu ba bisamba bia bende. Bakaya ne bualu ebu kudi bapostolo ne bakulu mu Yelushalema (bavua benza kasumbu kaludiki). Nansha muvua balume aba kabayi babule bilema, Nzambi wakenza nabu mudimu. Bakakonkonona mvese ya mu Mukanda wa Nzambi ivua itangila lukonko alu, kabidi ne bijadiki bivua bimueneke bia mudimu uvua nyuma wa Nzambi mukuate mu divuija bena mu bisamba bia bende balua bena Kristo. Pashishe bakamanyisha dipangadika diakangatabu. Nzambi wakabenesha dipangadika adi. (Bienzedi 15:1-29; 16:4, 5) Bena mu kasumbu kaludiki aku bakasungula bantu ne kubatumabu bua kuyisha malu a Bukalenge bua Nzambi.
10 Mu matuku etu aa, Kasumbu Kaludiki ka bulongolodi bua Yehowa budi bumueneka nkenza ne bana betu ba balume bela manyi a nyuma wa Nzambi ba mu matunga mashilashilangane ne nkasombele ku biro bidi bilombola mudimu wa buloba bujima wa Bantemu ba Yehowa. Ku bulombodi bua Yezu Kristo, Kasumbu Kaludiki aka kadi katantshisha ntendelelu mulelela mu matunga onso, kadi kalongolola midimu ya dimanyisha Bukalenge ya Bantemu ba Yehowa mu bisumbu biabu binunu ne binunu. Bana betu badi mu Kasumbu Kaludiki badi ne meji a muomumue ne a mupostolo Paulo akafundilaye bena Kristo nende aa: ‘Ki mbua tudi ne bukokeshi ku ditabuja dienu, kadi tudi bakuatshishanganyi nenu mu disanka dienu; bualu bua nudi nujalama mu ditabuja.’—2 Kolinto 1:24.
11. (a) Mmushindu kayi utubu bateka bakulu ne basadidi ba mudimu? (b) Bua tshinyi tudi ne bua kueleshangana diboko ne bana betu badibu bateka?
11 Bantemu ba Yehowa ba pa buloba bujima batu beyemena Kasumbu Kaludiki bua kuteka bana betu ba balume bakumbane badi pabu ne bukenji bua kuteka bakulu ne basadidi ba mudimu badi ne bua kutangila bisumbu. Malu malomba adi badibu bateka aba ne bua kukumbaja adi mu Bible ne kaenaku bua kuleja ne: bantu badibu bateka aba mbapuangane, badi kabayi mua kuenza kalema to. Bakulu badi batuma mêna a balume badibu basue kuteka, ne aba badi bateka bana betu aba pa midimu badi ne bujitu bunene bua dikema kumpala kua Nzambi. (1 Timote 3:1-10, 12, 13; Tito 1:5-9) Ke bualu kayi, batu benza disambila bua nyuma wa Nzambi abambuluishe ne bakeba buludiki mu Dîyi diende difundisha ku nyuma wende. (Bienzedi 6:2-4, 6; 14:23) Nunku tuikalayi ne dianyisha bua bantu badi “mapa mikale bantu” aba, badi batuambuluisha tuetu bonso bua tufike ku ‘buobumue bua ditabuja.’—Efeso 4:8, 11-16.
12. Mmushindu kayi udi Yehowa ukuata mudimu ne bantu bakaji?
12 Bible udi uleja ne: midimu ya butangidi mu tshisumbu badi ne bua kuyenza anu kudi bantu balume. Eku ki nkupuekesha bantu bakaji milongo to, bualu bamue ba kudibu mbapianyi ba Bukalenge bua mu diulu, ne badi benza mudimu wa bungi wa diyisha. (Musambu 68:11) Padi bantu bakaji aba bakumbaja kabidi midimu yabu ya mu dîku ne lulamatu luonso, badi bambuluisha bua tshisumbu kuendatshi lumu luimpe. (Tito 2:3-5) Kadi kulongesha mu tshisumbu mmudimu udibu bapeshe bantu balume badibu bateke bua kuwenza.—1 Timote 2:12, 13.
13. (a) Mmuenenu kayi udi Bible ulomba bakulu bua kuikalabu nende pa bidi bitangila bukulu buabu? (b) Ndiakalenga kayi ditudi tuetu bonso nadi?
13 Panu pa buloba, batu bangata muntu udi ne muanzu munene ne mushinga wa bungi, kadi mu bulongolodi bua Nzambi bitu nunku: “Udi mutambe bukese munkatshi muenu nyeye udi munene.” (Luka 9:46-48; 22:24-26) Mukanda wa Nzambi udi ubela bakulu bua kabikadi bakokeshi ba bantu badi bikale bumpianyi bua Nzambi to, kadi bua bikale bilejilu bimpe kudi mikoko. (1 Petelo 5:2, 3) Ki ng’anu bantu bakese badibu bateke badi ne diakalenga dia kuikala baleji-mpala ba Mfumu wa diulu ne buloba to, Bantemu ba Yehowa bonso, balume ne bakaji badi ne diakalenga edi, badi bakula bua dîna diende ne bamanyisha bantu ba miaba yonso bualu bua Bukalenge buende.
14. Ku diambuluisha dia mvese idibu bafile eyi, andamunaku nkonko idibu bele ku ndekelu kua tshikoso etshi.
14 Mbimpe tudikonke ne: ‘Ndiku ne dianyisha bushuwa bua mushindu udi Yehowa ulombola bulongolodi buende budi bumueneka anyi? Meji anyi, ngakuilu wanyi ne bienzedi bianyi bidiku bileja ne: ndi ne dianyisha edi anyi?’ Kuelangana meji pa malu adi alonda aa kudi mua kuambuluisha yonso wa kutudi bua kudikonkonona mushindu’eu.
Bingikala bushuwa nkokela Kristo bu Mfumu wa tshisumbu, tshindi ne bua kuikala ngenza bilondeshile mudibu baleje mu mvese idi ilonda eyi ntshinyi? (Matayo 24:14; 28:19, 20; Yone 13:34, 35)
Pandi ngitaba ne dianyisha dionso malu adibu balongolole kudi kasumbu ka mupika ne Kasumbu Kaludiki, undi nnemeka menemene nnganyi? (Luka 10:16)
Mmushindu kayi udi bena mu tshisumbu bonso, nangananga bakulu ne bua kuenzelangana malu? (Lomo 12:10)
15. (a) Ntshinyi tshitudi tuleja ku mushindu utudi tuangata bulongolodi bua Yehowa budi bumueneka? (b) Mmishindu kayi itudi nayi bua kujadika ne: Diabolo mmuena dishima eku tusankisha mutshima wa Yehowa?
15 Yehowa udi utulombola lelu’eu ku diambuluisha dia bulongolodi buende budi bumueneka budi Kristo uludika. Mushindu utudi tuangata bulongolodi ebu udi uleja meji atudi nawu pa bidi bitangila tshilumbu tshia bumfumu bunene bua Nzambi. (Ebelu 13:17) Satana udi wenza muende muonso bua tuetu kuikala tudikuma eku ne eku anu bua malu etu nkayetu. Kadi tuetu bakuatshile Nzambi mudimu mu mushindu wonso udibi bikengela, ne bepuke malu adi atamba kukoka ntema ya bantu kutudi, netuleje ne: Diabolo mmuena dishima. Tuetu bikale banange aba badi ku mutu kuetu, tubanemeka kabidi ne tubenga ‘kulabidila bantu bua kupeta bintu,’ tudi tusankisha Yehowa. (Yuda 16, MMM; Ebelu 13:7) Tuetu bikale balamate balamatshilemu anu bulongolodi bua Yehowa, tudi tuleja ne: Yehowa udi Nzambi wetu ne kabidi tudi mu buobumue mu ntendelelu wende.—1 Kolinto 15:58.
Diambulula
• Bulongolodi bua Yehowa budi bumueneka ntshinyi lelu’eu? Budi ne tshipatshila kayi?
• Nnganyi udibu bateke Mfumu wa tshisumbu, ne udi utulombola ne dinanga dionso ku diambuluisha dia ndongoluelu kayi idi imueneka?
• Nngikadilu kayi milenga itudi ne bua kuleja kudi badi mu bulongolodi bua Yehowa?
[Bimfuanyi mu dibeji 133]
Yehowa udi utulombola ku diambuluishadia bulongolodi buende budi bumueneka budi Kristo uludika