Dîku dia bana betu didi mu buobumue

MUNKATSHI mua bidimu bitue ku 1 500, Isalele ke tshisamba tshivua ne dîna dia Yehowa Nzambi. Pashishe Yehowa ‘wakatuma ntema yende kudi bisamba bikuabu bua kupatulamu tshisamba bua dîna diende.’ (Bien. 15:14) Bantu badi ne dîna dia Yehowa badi ne bua kuikala bantemu bende, bikale mu buobumue mu lungenyi ne mu bienzedi nansha bobu basombele muaba kayi. Disangisha bantu bua dîna dia Nzambi divua ne bua kuenzeka mu dikumbaja mudimu uvua Yezu mupeshe bayidi bende. Uvua mubambile ne: “Nunku, ndayi nuvuije bantu ba mu bisamba bionso bayidi, nubabatiza mu dîna dia Tatu, dia Muana, ne dia nyuma muimpe, nubalongesha mua kutumikila malu onso andi munuambile.”​—Mat. 28:19, 20.

² Paudi udilambula kudi Yehowa ne ubatijibua, udi ulua muyidi wa Yezu Kristo. Udi ubuela mu dîku dia bena Kristo dia pa buloba bujima didi mu buobumue, didibu kabayi mua kupandulula kudi dishilangana dia matunga ne dia bisamba anyi dia malu a mpetu. (Mis. 133:1) Ke bualu kayi udi munange bena Kristo nebe mu tshisumbu ne ubanemeka. Bamue ba kudibu badi mua kuikala ba dikoba anyi ditunga dikuabu, balonge tulasa tushilangane ne tuudi mulonge, peshi bantu bauvua kuyi mua kudia nabu bulunda bua dishilangana dia malu onso aa ne dia bilele bia kuenu. Tudi mu buobumue ne tudi ne dinanga dilelela didi dienza tshisuikidi tshikole kupita malanda makuabu onso, nansha a bulunda bua tshianana, a tshitendelelu anyi a dîku.​—Mâko 10:29, 30; Kolos. 3:14; 1 Pet. 1:22.

DISHINTULULA LUNGENYI

³ Biobi bitshidi bikolele bamue bantu bua kulekela dimona bantu bakuabu mu mushindu mubi pamuapa bua dikoba diabu, bua tshisumbu tshiabu tshia tshididi, bua amue malu a mu nsombelu anyi bua malu makuabu akadi mele miji munda muabu, bavuluke bena Kristo bena Yuda ba kumpala bavua pabu ne bua kulekela ngenyi mibi ya ntendelelu wa buena Yuda ivuabu nayi bua bantu ba bisamba bikuabu. Yehowa wakalongolola lungenyi lua Petelo ne bulenga buonso kumpala kua yeye kumutuma kua Kônelio mfumu wa basalayi muena Lomo.​—Bienzedi nshap. wa 10.

⁴ Bakambila Petelo mu tshikena kumona bua kushipa imue nyama ivua kayiyi mikumbane bua bena Yuda bilondeshile mikenji ne kuyidia. Pakabenga Petelo, dîyi diakafuma mu diulu dimuambila ne: “Lekela kubikila bintu bidi Nzambi mukezule ne: mbibipe.” (Bien. 10:15) Bivua bikengela ne: Nzambi ele dîyi mu bualu ebu bua Petelo kushintulula lungenyi luende bua kuenza mudimu uvuabu ne bua kumupesha bimpe. Mudimu au uvua wa kuya kutangila muntu wa mu bisamba bikuabu. Pavua Petelo mutumikile tshivua Yehowa mumuambile, wakambila bantu bavua badisangishe ne: “Nudi bamanye bimpe mudibi kabiyi bianyishibue bua muena Yuda kusomba ne muntu wa tshisamba tshikuabu anyi kuya kudiye, kadi Nzambi mmundeje ne: tshiena ne bua kubikila muntu nansha umue ne: mmunyanguke anyi mmukoya to. Nunku ndi mulue, tshiyi mubenge nansha kakese pavuabu bambikidishe.” (Bien. 10:28, 29) Pashishe, Petelo wakamona tshijadiki tshia muvua Yehowa muanyishe Kônelio ne ba mu nzubu muende.

⁵ Shaula wa ku Tâso (Mufalese uvua mulonge bikole) uvua ne bua kudipuekesha bua kudisangisha ne bantu bavuaye kayi mua kuitaba bua kusomba nabu kumpala to. Uvua mene ne bua kulonda too ne buludiki buvua bantu abu bamupeshe. (Bien. 4:13; Gal. 1:13-20; Filip. 3:4-11) Tudi mua kuela meji muvua bantu bu mudi Sêgio Paulo, Dionusio, Damali, Filemona, Onezimo ne bakuabu bashintulule lungenyi luabu bikole pavuabu bitabe lumu luimpe ne balue bayidi ba Yezu Kristo.​—Bien. 13:6-12; 17:22, 33, 34; Filem. 8-20.

TULAMAYI BUOBUMUE BUETU PA BULOBA BUJIMA

⁶ Kakuyi mpata, dinanga dia bana benu ba balume ne ba bakaji mu tshisumbu tshienu ndikuambuluishe bua kusemena kudi Yehowa ne bulongolodi buende. Wakamona pebe tshimanyinu tshia dinanga dilelela tshidi munkatshi mua bayidi balelela ba Yezu, anu bu muakambaye ne: “Ndi nnupesha mukenji mupiamupia ne: nunangangane; anu bu mundi mununange, nuenu penu nunangangane. Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.” (Yone 13:34, 35) Wakalua kuanyisha Yehowa ne bulongolodi buende bikole pawakamona mudi dinanga didi mu tshisumbu dileja dinanga didi munkatshi mua bana betu ba pa buloba bujima. Udi udimuena dikumbana dia mulayi wa mu Bible udi wakula bua disangisha bantu mu matuku a ndekelu bua kutendelela Yehowa mu ditalala ne mu buobumue.​—Mika 4:1-5.

⁷ Bu mudiku malu a bungi adi atapulula bantu lelu, nnganyi uvua mua kuela meji ne: badi mua kusangisha bantu ba “mu bisamba bionso ne mu bisa bionso ne mu bukua bantu buonso ne mu miakulu yonso”? (Buak. 7:9) Tangila dishilangana didi pankatshi pa bantu badi mu matunga adi malu a sianse maye kumpala bikole ne bantu batshidi balamate ku bilele bia bankambua. Tangila mudi bantu ba dikoba dimue ne ba ditunga dimue baluishangana mu malu a Nzambi. Bu mudi dinanga dia ditunga dilue ne mushinga wa bungi, bantu mbatapuluke bikole mu malu a tshididi kupita kumpala. Paudi utangila dishilangana dinene mu malu a mpetu pamue ne malu makuabu a bungi adi apandulula bantu, disangisha bantu ba mu bisamba bionso, mu miakulu yonso, ne mu bisumbu bionso mu tshisuikidi tshikole tshia dinanga ne ditalala ntshishima tshidi anu Nzambi Wa Bukole Buonso mua kuenza.​—Zek. 4:6.

⁸ Bulelela, buobumue ebu budiku. Pawakalua Ntemu wa Yehowa mudilambule ne mubatijibue, wakabuela mu buobumue ebu. Bu mudi buobumue ebu bukuambuluisha, udi pebe ne bujitu bua kubulama. Bua kubulama, tumikila mêyi a mupostolo Paulo adi mu Galatiya 6:10 aa: “Patutshidi ne mushindu, tuenzelayi bantu bonso malu mimpe, kadi tuenzele nangananga bana betu mu ditabuja.” Tudi kabidi tutumikila mubelu wa ne: “Kanuenji bualu nansha bumue ne lungenyi lua dikokangana anyi lua kudimona bapite bakuabu, kadi ne didipuekesha, numone bakuabu bu banupite nuenu, panudi kanuyi nutangila anu malu enu nkayenu, kadi nutangila kabidi malu a bakuabu.” (Filip. 2:3, 4) Patudi tudienzeja bua kumona bena Kristo netu bu mudi Yehowa ubamona ne katuyi tubamona bilondeshile tshidibu ku mubidi, netutungunuke ne kuikala nabu mu ditalala ne disanka.​—Ef. 4:23, 24.

TUTABALELANGANAYI

⁹ Anu muvua mupostolo Paulo muleje, bantu bonso mu tshisumbu ki mbatapuluke to, kadi badi baditatshisha bua umue ne mukuabu. (1 Kol. 12:14-26) Tudi mua kuikala kule ne bamue bena dîku dietu dia pa buloba bujima, kadi bualu ebu kabuena butupangisha bua kuditatshisha bua bualu buabu to. Padibu bakengesha bana betu, tuetu bonso tudi tukenga nabu. Padi bamue bakengela bintu anyi padi tshipupu ne mvita ne bimvundu bibakebele ntatu, tuetu bonso tudi tuenza muetu muonso bua kubambuluisha mu nyuma ne ku mubidi.​—2 Kol. 1:8-11.

¹⁰ Tuetu bonso tudi ne bua kusambila bua bana betu dituku dionso. Bamue badi batuilangana ne mateta a kuenza malu mabi. Makenga a bamue bana betu adi mua kuikala mamanyike bimpe. Kadi bakuabu badi bapeta buluishi bua kudi bena mudimu nabu ne kudi bena mu mêku abu badi kabayi bena Kristo butudi katuyi bamanye. (Mat. 10:35, 36; 1 Tes. 2:14) Ntatu eyi idi itutangila tuetu bonso bualu tudi bana ba muntu. (1 Pet. 5:9) Munkatshi muetu kudi bakuabu badi benzela Yehowa mudimu mukole, bikale bantunga mulongo mu buambi ne balombola bisumbu. Banga pabu badi ne bujitu bua kutangila mudimu wetu wa pa buloba bujima. Tudi ne bua kubasambidila buonso buabu. Patudi tubasambidila, tudi tuleja mutudi babanange ne tubatabalela ne muoyo umue nansha patudi katuyi ne tshikuabu tshitudi mua kuenza bua kubambuluisha.​—Ef. 1:16; 1 Tes. 1:2, 3; 5:25.

¹¹ Bu mudiku malu mabi adi akebesha tunyinganyinga tua bungi mu matuku a ku nshikidilu aa, bantu ba Yehowa badi ne bua kuikala badilongolole bua kuambuluishangana. Imue misangu, patu bipupu bu mudi dikanka dia buloba ne dipasalala dia mâyi bienzeka, bidi mua kulomba bua kudienzeja bikole ne kulongolola bintu bia bungi bua kuambuluisha badi malu aa menzekele. Bena Kristo ba mu bidimu lukama bia kumpala mbatushile tshilejilu tshimpe mu bualu ebu. Bayidi ba mu Antiokia bavua bavuluke mubelu wa Yezu bualu bakatumina bana babu ba mu Yudaya bintu bia ku mubidi ne disanka dionso. (Bien. 11:27-30; 20:35) Pashishe mupostolo Paulo wakakankamija bena mu Kolinto bua kutua mudimu wa diambuluishangana mpanda, kubalombaye bua bawenze mu bulongame. (2 Kol. 9:1-15) Lelu eu kabidi, patu ntatu mikole ikuata bana betu, bitu bikengela kubambuluisha ne bintu bia ku mubidi. Bulongolodi buetu ne bena Kristo netu batu benza malu ne lukasa bua kubatumina bintu bidi bikengedibua.

BATEKA KU LUSEKE BUA KUENZA DISUA DIA YEHOWA

¹² Dîku dia bana betu ba pa buloba bujima didi mu buobumue ndilongolola bua kuenza disua dia Yehowa. Mu tshikondo tshitudi etshi, Nzambi mmusue ne: tuyishe lumu luimpe lua Bukalenge pa buloba bujima bua luikale bujadiki kudi bisamba bionso. (Mat. 24:14) Yehowa mmusue ne: tuikale ne bienzedi bidi biumvuangana ne mikenji yende minene ya bikadilu bilenga patudi tuenza mudimu eu. (1 Pet. 1:14-16) Tuetu bonso tudi ne bua kukokelangana ne muoyo mujima ne kuenza bua lumu luimpe luye kumpala. (Ef. 5:21) Etshi ki ntshikondo tshia kukeba masanka etu nkayetu to, kadi ntshia kuteka Bukalenge bua Nzambi pa muaba wa kumpala mu nsombelu wetu. (Mat. 6:33) Tuetu tubuteka pa muaba wa kumpala ne tuenza mudimu mu buobumue bua bualu bua lumu luimpe, netupete masanka mpindieu ne tshiendelele.

¹³ Tuetu Bantemu ba Yehowa tudi bantu ba pa buabu, batapulula ne bantu bakuabu bu tshisamba tshikezuke, bikale ne tshisumi mu mudimu wa Nzambi wetu. (Tito 2:14) Bu mutudi tutendelela Yehowa, bidi bienza bua tuikale bashilangane ne bantu bakuabu. Pa kumbusha dienza mudimu pamue ne bana betu pa buloba bujima, tudi kabidi tuakula muakulu umue wa bulelela ne tuenza malu mu diumvuangana ne bulelela abu. Yehowa wakamanyisha bualu ebu mukana mua muprofete Sefanya, wamba ne: “Nenkudimune muakulu wa bukua bantu ulua muakulu mukezuke, bua buonso buabu bamone mua kubila dîna dia Yehowa, bua bamuenzele mudimu dikaya dituangane ne dikaya dikuabu.”​—Sef. 3:9.

¹⁴ Pashishe, Yehowa wakasaka Sefanya bua kumvuija mushindu udi dîku dia bana betu ba pa buloba bujima didi dilue bualu bulelela lelu eu. Wakamuambile ne: “Bashadile ba Isalele kabakuenza bualu nansha bumue budi kabuyi buakane; kabakuamba bualu bua dishima, anyi kusangana ludimi ludi lushima mukana muabu nansha; nebadie, nebalale panshi, ne muntu kakubatshinyisha.” (Sef. 3:13) Bu mutudi bumvue Dîyi dia Yehowa dia bulelela, bashintulule lungenyi luetu ne tutumikila mikenji yende, tudi tuenza mudimu mu buobumue. Tudi tukumbaja malu adi bantu bamona ne: kaena mua kuenzeka nansha kakese. Eyowa, tudi bushuwa bantu ba pa buabu, batendeledi ba Nzambi badi bamutumbisha pa buloba bujima.​—Mika 2:12.