Badi batuma Paulo ku Lomo

Luendu luisatu lua diyisha lua Paulo luakajikila mu Yelushalema. Bakamukuata kuntu aku, kumuelabu mu buloko. Yezu wakamuambila mu tshikena kumona butuku ne: ‘Neuye ku Lomo ne neuyishaku.’ Bakumbuka ne Paulo ku Yelushalema, kuyabu nende ku Kaisalia kuvuaye muenze bidimu bibidi mu buloko. Pavua Paulo ulumbulula kumpala kua ngunvena Festo wakamba ne: ‘Bandumbuluishe kudi Kaisa ku Lomo.’ Festo wakamba ne: “Udi mulombe bua bakulumbuluishe kudi Kaisa, neuye kudi Kaisa.” Bakela Paulo mu mazuwa avua aya ku Lomo; Luka ne Alistâko, bena Kristo babidi, bakaya nende.

Pavuabu pa mâyi, tshipepele tshikole menemene tshiakajuka, kuenzatshi matuku a bungi. Bantu bonso bavua bela meji ne: bavua bafua. Kadi Paulo wakabambila ne: ‘Balumiana, muanjelu mmungambile mu tshilota ne: “Paulo, kuikadi ne buôwa to. Neufike ku Lomo, ne bantu bonso badi nebe mu buatu nebapande.” Ikalayi ne muoyo mukole! Katuakufua to.’

Tshipepele atshi tshiakatuta matuku 14. Ndekelu wa bionso, buloba buakamueneka. Tshidiila tshia Melita ke tshivua tshimueneke atshi. Mazuwa akajama mu lusenga, kukosekawu bitupa bitupa, kadi bantu bonso 276 bavua mu mazuwa bakafika ku mukuna kakuyi bualu to. Bamue bakowela, bakuabu bakupukila bipese bia mazuwa, kulelemabu kuyabu ku mukuna. Bantu ba mu Melita bakabakidila bimpe, kubatemeshilabu too ne kapia bua bobu kuota.

Ngondo isatu pashishe, basalayi bakaya ne Paulo ku Lomo mu mazuwa makuabu. Pavuaye mufike, bena Kristo nende bakalua kumuakidila. Pavua Paulo mubamone, wakela Yehowa tuasakidila, kupetaye dikima. Nansha muvua Paulo muena buloko, bavua bamuanyishile bua kufutshila nzubu tshibi bikale bamulama kudi musalayi. Wakashala kuntu aku bidimu bibidi. Bantu bavua balua kumumona, ne yeye uvua ubayisha lumu lua Bukalenge bua Nzambi ne ubalongesha malu a Yezu. Paulo wakafundila kabidi bisumbu bia mu Asia mukese ne mu Yudaya mikanda. Bushuwa, Yehowa uvua mukuate mudimu ne Paulo bua kumuangalaja lumu luimpe mu bisamba bishilashilangane.