Buakabuluibua buleja Yone

Pavua mupostolo Yone muena buloko mu tshidiila tshia Patemo, Yezu wakamuleja bikena kumona 16 bilondangane anyi bimfuanyi bia malu atshilualua. Bikena kumona abi bivua bileja muikala dîna dia Yehowa mua kujidibua, muikala Bukalenge buende mua kulua, ne muikala disua diende mua kuenzeka pa buloba anu bu mu diulu.

Mu tshimue tshia ku bikena kumona abi, Yone udi umona Yehowa mu diulu mu nkasua wende wa bukalenge wa butumbi, bamunyunguluke kudi bakulu 24 bavuale bilamba bitoke, bikale ne bifulu bia butumbi bia or ku mitu. Mipenyi ne makubakuba bidi bifumina ku nkuasa wa bukalenge au. Bakulu 24 abu badi binama kumpala kua Yehowa ne bamutendelela. Mu tshikena kumona tshikuabu, Yone udi umona musumba munene wa bantu ba mu matunga onso, ba mu bisamba bionso, ne ba mu miakulu yonso batendelela Yehowa. Yezu Muana wa mukoko udi ubalama ne uya nabu ku mâyi a muoyo. Pashishe mu tshikena kumona tshikuabu, Yezu udi utuadija kukokesha mu diulu bu Mukalenge pamue ne bakulu 24. Mu tshikena kumona tshidi tshilonda, Yone udi umona Yezu uluangana ne Satana udibu babikila ne: dragon ne bademon bende. Yezu udi ubipata mu diulu ubakupa pa buloba.

Pashishe Yone udi umona tshikena kumona tshilenga tshia Muana wa mukoko ne bantu binunu 144 bimane pa Mukuna wa Siona. Udi umona kabidi muanjelu wenda upapala unyunguluka buloba, wambila bantu bua kutshina Nzambi ne kumutumbisha.

Mu tshikena kumona tshidi tshilonda, mvita ya Armagedone idi ikutuka. Mu mvita ayi, Yezu ne tshiluilu tshiende badi batshimuna bulongolodi bubi bua Satana. Mu tshikena kumona tshia ndekelu, Yone udi umona malu enzeka mu diumvuangana dimpe menemene mu diulu ne pa buloba. Badi babutula Satana ne ndelanganyi yende butubutu. Bantu bonso mu diulu ne pa buloba badi bangata dîna dia Yehowa bu dia tshijila ne bamutendelela anu yeye nkayende.