DILONGA 6

Dipetangana dia mvese ne bualu dimueneke patoke

Yone 10:33-36

TSHIA KUENZA: Kubadi mvese patupu pashishe upita ku bualu bukuabu to. Enza bua bateleji bebe bamone patoke dipetangana didi pankatshi pa mvese uudi mubale ne bualu buudi wakuila.

MUA KUTSHIENZA:

Sobola miaku minene. Paudi ujikija kubala mvese, leja miaku idi ileja bualu bunene buudi wakuila buludiludi. Udi mua kuenza nanku pa kuambulula miaku ayi anyi pa kuela lukonko ludi lufikisha bateleji bebe ku dimanya miaku minene ayi.

Wewe muambulule lungenyi ludi mu mvese au mu mêyi makuabu, enza bua bateleji bebe bashale anu bamona patoke mudi miaku ya mu Bible ipetangana ne bualu bunene buudi wakuila.
Shindika bualu abu. Wewe mubadishe mvese bua bualu kampanda, umvuija mudi miaku minene idimu ipetangana ne tshiudi mumufidile.

Paudi umvuija mvese, lama Bible mubulula. Kuenza nanku kudi kuambuluisha bateleji bua kulamakaja mêyi ebe ne mvese uudi ufuma ku dibala.
Umvuija bipepele tshiudi mufidile mvese. Epuka diumvuija tumalu tudi katuyi ne mushinga, katuyi ne diambuluisha mu bualu bunene buudi wakuila. Imanyina pa malu akadi bateleji bebe bamanye bua tshiena-bualu atshi bua kusungula bungi bua malu adi ne mushinga bua bateleji bebe bamone mudi mvese upetangana ne bualu abu ne babumvue bimpe.