Ngondo 12

Yezu udi ne ngikadilu ya bungi idi itamba kulenga ku muoyo. Umue wa kudiyi nkumvua ntatu itudi tuetu bantu bapange bupuangane tutuilangana nayi. Pavua Yezu pa buloba, uvua mumanye mua ‘kusanka ne bavua basanka’ ne ‘kudila ne bavua badila.’ (Lomo 12:15) Tshilejilu, pavua bayidi bende 70 bafume ne disanka mu mudimu wa kuyisha uvuabu benze bimpe, “wakasanka bikole mu nyuma muimpe.” (Luka 10:17-21) Kadi pavuaye mumone muvua lufu lua Lazalo lubungamije bantu bavua bamunange, “wakashikunkila munda muende ne wakapampakana.” (Yone 11:33) Ntshinyi tshivua tshiambuluisha muntu mupuangane eu bua ikale umvuila bantu bena mpekatu luse mu mushindu eu? Tshivua tshitamba kumuambuluisha ndinanga divuaye nadi bua bantu. Uvua “nangananga mutambe kunanga bana ba bantu.” (Nsu. 8:31) Dinanga adi divua dimusake bua kumanya bimpe mutu bantu bela meji. Mupostolo Yone wakamba ne: “Uvua mumanye tshivua munda mua muntu.”​—Yone 2:25. w19.03 20 §1-2

Satana wakanyenga Yobo bintu bionso bivuaye nabi, kushipaye bena mudimu bende, ne kunyangaye lumu luende. Wakakuata dîku diende, kushipaye bana bende dikumi. Pashishe kumutuaye disama dibi menemene dia biuwuja kumbukila ku lubombo lua mutu too ne ku dikasa. Biakatonda mukaji wa Yobo bibi menemene, kumuambilaye bua alekele Nzambi, amudiule ne afue. Yobo muine wakajinga lufu, kadi wakalama anu muoyo wende mutoke. Pashishe Satana wakamuteta mu mushindu mukuabu. Wakatuma balunda ba Yobo basatu. Bakasomba nende matuku a bungi kabayi bamusamba nansha kakese, kadi bakamuamba mêyi mabi a amutapa ku muoyo. Bakamba ne: Nzambi ke uvua mumukebele ntatu yende ayi ne muoyo wende mutoke kawuvua umuambila bualu to. Bakafika too ne ku diamba ne: Yobo uvua muntu mubi uvua mukumbanyine malu mabi avua amuenzekela au!​—Yobo 1:13-22; 2:7-11; 15:4, 5; 22:3-6; 25:4-6. w19.02 4 §7-8

Kudi mishindu mikuabu ya ditshina idi mimpe buetu tuetu. Tshilejilu, tudi ne bua kutshina bua kubungamija Yehowa. Bu Adama ne Eva batshina bua kubungamija Yehowa, kabavua mua kuikala bamutombokele to. Kadi ke tshiakenzabu. Pakamutombokelabu, mêsu abu akatabala mu ngumvuilu wa ne: bakajingulula muvuabu balue bena mpekatu. Kabavua ne tshikuabu tshia kuenza, anu kusambulujila bana babu mpekatu ne lufu. Bu muvuabu bamone tshikavuabu anyi batshijingulule, bakumvua bundu bualu bavua butaka, bobu kuvuala bintu bua kudijika. (Gen. 3:7, 21) Nansha mutudi ne bua kutshina bua kubungamija Yehowa, katuena ne bua kutshina lufu tuamba kusukuila ne mu bilamba to. Yehowa mmulongolole mushindu wa tuetu kupeta muoyo wa kashidi. Tuetu benze mpekatu kadi banyingalale ne muoyo mujima, Yehowa neatubuikidile. Neatubuikidile bua ditabuja ditudi nadi mu mulambu wa kupikulangana nawu wa Muanende. Mushindu mutambe bunene wa kuleja ditabuja dietu nkudilambula kudi Nzambi ne kubatijibua.​—1 Pet. 3:21. w19.03 5-6 §12-13

Bena Isalele bavua ne malu a bungi a kulejila dianyisha. Yehowa mumane kutuma bipupu 10 mu Ejipitu, wakabapatula mu bupika. Pashishe wakabasungila ku bualu bubi menemene buvua ne bua kubafikila pavuaye mubutule tshiluilu tshijima tshia bena Ejipitu mu Mbuu Mukunze. Bena Isalele bavua ne dianyisha dia bungi, bobu kutuadija kuimba musambu wa ditshimuna wa kutumbisha nawu Yehowa. Kadi bakashala ne dianyisha anyi? Pavua bena Isalele batuilangane ne ntatu mikuabu, bakapua malu mimpe onso avua Yehowa mubenzele muoyo ne lukasa. Nunku bakaleja muvuabu bapange dianyisha. (Mis. 106:7) Mushindu kayi? Bible udi wamba ne: “Tshisumbu tshijima tshia bena Isalele tshiakabanga kunungana bua Mose ne Alona”; mu bulelela bavua banungana bua Yehowa. (Ekes. 16:2, 8) Biakabungamija Yehowa bua muvua tshisamba tshiende tshipange kuleja dianyisha. Wakalua kuamba ne: tshipungu tshia bena Isalele atshi tshivua ne bua kufua tshionso mu tshipela, pa kumbusha Yoshua ne Kaleba.​—Nom. 14:22-24. w19.02 17 §12-13

Yezu kavua ukeba bua bikale bavuluka lufu luende ne bintu bipitepite bungi bua kukoka ntema yonso ya bantu kudiye to. Kadi wakambila bayidi bende bua kuikala kumuvuluka musangu umue ku tshidimu ne bintu bikese patupu. (Yone 13:15; 1 Kol. 11:23-25) Bintu bikese ebi kadi bikumbanyine bidi bileja ne: Yezu kavua ne lutambishi to. Tudi ne disanka dia mudi didipuekesha dikale umue wa ku ngikadilu minene ya Mukalenge wetu wa mu diulu. (Filip. 2:5-8) Mmunyi mutudi mua kuidikija didipuekesha dia Yezu? Mpatudi tuteka malu a bakuabu kumpala kua etu. (Filip. 2:3, 4) Vuluka tshivua Yezu muenze butuku bua kumpala kua lufu luende. Uvua mumanye ne: ukavua pa kufua lufu lubi; kadi uvua uditatshisha bikole bua bapostolo bende ba lulamatu bakavua pa kupeta kanyinganyinga bua bualu buende. Nunku wakapitshisha butuku abu ubalongesha, ubakolesha, ne ubakankamija. (Yone 14:25-31) Yezu uvua uditatshisha bikole ne budipuekeshi buonso bua diakalenga dia bakuabu kupita muvuaye uditatshisha bua diende yeye. Tshilejilu kayipu tshimpe nunku tshidiye mutushile! w19.01 21 §5-6

Utu umvua tshia muoyo tshikututa misangu yonso iutu ujinga kujula tshianza bua kuandamuna anyi? Biobi nanku, kuena nkayebe to. Mu bulelela, buôwa abu budi mua kuleja bualu kampanda buimpe. Budi buleja ne: udi ne budipuekeshi ne udi umona ne: bakuabu mbakupite. Yehowa utu musue ngikadilu au. (Mis. 138:6; Filip. 2:3) Kadi Yehowa mmusue kabidi bua umutumbishe ne ukankamije bena Kristo nebe mu bisangilu. (1 Tes. 5:11) Mmukunange ne neakupeshe muoyo mukole uudi ukeba. Mona amue mêyi manene adi Bible utuvuluija. Bible udi wamba ne: tuetu bonso tutu tuenza bilema mu bitudi tuamba ne mu mushindu utudi tubiamba. (Yak. 3:2) Yehowa katu utulomba bua tuikale bapuangane to, nansha bena Kristo netu kabatu batulomba pabu nanku to. (Mis. 103:12-14) Mbena mu dîku dietu dia mu nyuma ne mbatunange. (Mâko 10:29, 30; Yone 13:35) Mbamanye ne: imue misangu muntu udi mua kufila mandamuna bishilangane ne muvuaye mulongolole mu meji ende. w19.01 8 §3; 10-11 §10-11

Lelu udi malu manyanguke eu, kabitu anu bipepele bua kuvuluka Mufuki webe to. Kadi kudi mushindu wa wewe kumuvuluka. Yehowa mmusue bua malu ebe ende bimpe ne wikale ne nsombelu wa disanka dilelela. Nzambi yeye nebe, udi mua kumuvuluka ku bunsonga buebe nansha too ne pawakulakaja. Bua kumvua bimpe, tuangatayi tshilejilu tshia ditshimuna Buloba Bulaya kudi bena Isalele. Pakavua bena Isalele pabuipi ne Buloba Bulaya, Nzambi kavua mubambile bua kulonga mvita anyi kupiluka mu diyiluangana to. (Dut. 28:1, 2) Kadi wakabambila ne: bavua ne bua kutumikila mikenji yende ne kumueyemena. (Yosh. 1:7-9) Bua mmuenenu wa buntu, mubelu au kawuvua ne mutu to! Kadi uvua mubelu muimpe wa katshia, bualu Yehowa uvua muenze bua bantu bende batshimune bena Kanâna misangu ne misangu. (Yosh. 24:11-13) Bushuwa, bua kutumikila Yehowa bidi bikengela kuikala ne ditabuja, ne ditabuja adi ditu dienza bua malu ende bimpe misangu yonso. Bualu ebu ki mbushintuluke mu kupita kua bidimu to, bitshidi nanku too ne lelu. w18.12 25 §3-4

Bamue bana betu mbalenduke bualu bavua bakajilule ngumvuilu wetu wa mvese kampanda. Bakuabu bobu mbaditue ku tshia batontolodi ne ku tshia baluishi badi bamba mudi malongesha etu a dishima. Ke bualu kayi bamue mbabange “kuya kule” ne Yehowa ne tshisumbu tshiende ku budisuile buonso. (Eb. 3:12-14) Bivua mua kuikala bimpe bu bobu balame ditabuja diabu ne beyemene Yezu bu muvua Petelo muenze! Bakuabu mbalekele bulelela ku kakese ku kakese pamuapa kabayi nansha bamanye. Muntu udi ulekela bulelela ku kakese ku kakese udi anu bu buatu budi buenda bumbuka ku tshibungubungu bitekete bitekete butangile munkatshi mua mâyi. Bible udi ubikila dilekela bulelela ku kakese ku kakese edi ne: ‘dipambuka.’ (Eb. 2:1) Muntu udi upambuka mmushilangane ne muntu udi uya kule ne bulelela ku bukole, bualu yeye katu wenza ku bukole to, nansha nanku udi utekesha malanda ende ne Yehowa ne mmufuane kuajimija. w18.11 9 §5-6

Udi musue bakulongeshe malu makuabu bua wewe kukumbana bua kuenza mudimu wa tshijila anyi? Biobi nanku, udi mua kuwuja dilomba bua kubuela mu Kalasa ka bamanyishi ba Bukalenge. Badi balongeshamu bana betu ba balume ne ba bakaji bashindame mu nyuma badi mu mudimu wa ku dîba ne ku dîba bua batantshishe malu a Bukalenge. Bana betu badi buwuja dilomba bua kuya mu kalasa aka badi ne bua kuitaba bua kuya muaba wonso udibu babatuma padi kalasa kajika. Udiku musue kubabidila mpunga eu bua kuenzela Yehowa mudimu bikole anyi? (1 Kol. 9:23) Bu mutudi bantu ba Yehowa, tudi ne bua kuikala ne muoyo wa kupa, kuikala ne buimpe, bulenga, ne dinanga, ne tutabalela bakuabu dituku dionso. Tuetu tuenza nunku, netuikale ne disanka ne ditalala. (Gal. 5:22, 23) Nansha wewe ne nsombelu kayi, udi mua kupeta disanka wewe widikija Yehowa muena muoyo wa kupa, ne biwikala bushuwa muenzejanganyi nende wa mudimu.​—Nsu. 3:9, 10. w18.08 27 §16-18

Muntu udi mua kudiebeja ne: ‘Kudiku bualu budi muena Kristo mua kushipela dibaka ne kubuela mu dikuabu anyi?’ Yezu wakaleja mmuenenu wende bua dishipa dibaka, wamba ne: “Muntu yonso udi ushipa dibaka ne mukajende ne usela mukaji mukuabu, udi wenda masandi, ne udi umuenzela bibi, ne bikala mukaji yeye mumane kushipa dibaka ne bayende, udi usedibua kudi mulume mukuabu, yeye udi wenda masandi.” (Mâko 10:11, 12; Luka 16:18) Nunku mbiumvuike bimpe ne: Yezu uvua unemeka dibaka ne uvua musue bua bantu bakuabu badinemeke pabu. Muntu uvua ulambakena ku bualu bukuabu bua kushipa dibaka ne muena dibaka nende wa lulamatu ne ubuela mu dibaka dikuabu, uvua wenda masandi. Bidi nanku bualu padi muntu ushipa dibaka ne muena dibaka nende tshianana kena udimanyika to. Ku mêsu kua Nzambi bubidi buabu nebikale anu batshidi “mubidi umue.” Yezu wakamba kabidi ne: muntu udi ushipa dibaka ne mukajende udi kayi ne bualu, udi mua kumuendeshisha masandi. Mushindu kayi? Tshikondo atshi, pavua mulume ushipa dibaka, mukaji uvua mua kudimona muenzejibue bua kusedibua kabidi bua kupeta muntu uvua mua kuambula bujitu buende. Disedibua kabidi dia nunku divua mumue ne kuenda masandi. w18.12 11 §8-9

Muyuki wa Habakuka ne Yehowa wakamupesha ditalala mu muoyo. Ke bualu kayi wakangata dipangadika dia kutungunuka ne kuindila Yehowa ne dituishibua dionso bua enze bualu. Kavua muenze nanku anu ku mpukapuka to, bualu wakaleja kabidi dipangadika diende edi pakaluaye kuamba ne: uvua ne bua ‘kuindila dituku dia dikenga talalaa.’ (Hab. 3:16) Dipangadika dia Habakuka didi ditulongesha tshinyi? Tshia kumpala, nansha tuetu mu ntatu ya mushindu kayi, katulekedi kusambila Yehowa nansha. Tshibidi, bidi bikengela tuikale tuteleja tshidi Yehowa utuambila ku diambuluisha dia Dîyi diende ne bulongolodi buende. Tshisatu, tudi ne bua kuindila Yehowa ne lutulu, tumueyemena ne muoyo mujima bamanye ne: neatumbushile makenga tshikondo tshidiye yeye nkayende mulongolole. Tuetu tutungunuka ne kuyukila ne Yehowa ne kumuteleja ne lungenyi lua dindila anu bu Habakuka, netupete petu ditalala mu muoyo diatuambuluisha bua kunanukila. Ditekemena dietu nedikoleshe lutulu luetu, ne luolu palu nelutuambuluishe bua kuikala ne disanka nansha tuetu mu ntatu ya mushindu kayi. Ditekemena didi ditupesha dishindika dia ne: Tatu wetu wa mu diulu neenze bualu.​—Lomo 12:12. w18.11 15-16 §11-12

Mmunyi mudi Yehowa umona kulenduisha bakuabu? Yezu wakamba ne: “Muntu yonso udi ulenduisha umue wa ku bana bakese badi bitabuje aba, bidi mua kuikala bitambe buimpe buende yeye bobu bamuele dibue dia mpelu mu nshingu ditu mpunda unyunguluja ne bamukupe mu mbuu.” (Mâko 9:42) Aa ki mmêyi a bilele to! Bu muvua Yezu muleje bumuntu bua Tatuende mu mushindu mupuangane, bidi bitujadikila ne: Yehowa udi anu umvua bibi bua muntu udi bienzedi biende bilenduisha muyidi wa Yezu. (Yone 14:9) Tudiku ne mmuenenu wa Yehowa ne Yezu anyi? Tudiku benze bua ashale wetu anyi? Ntshinyi tshidi malu atudi tuenza aleja? Tutekabi ne: tudi banange mvuadilu kampanda anyi ndengejilu kampanda wa mubidi bidi mua kuikala bitonda bamue bana betu mu tshisumbu anyi bidi mua kujula bakuabu majinga mabi. Dinanga diudi munange nadi bena Kristo nebe nedikuambuluishaku bua kubenga kuimanyina anu pa biudi wewe musue anyi? w18.11 25 §9-10

Bua tshinyi mbimpe yonso wa kutudi ikale ne muoyo mutoke? Mbimpe wikale ne muoyo mutoke bualu Satana mmubande Yehowa, ne mmukubande pebe. Muanjelu uvua ntomboji au wakashiminyina Yehowa malu wamba mudiye Mukokeshi mubi, mudinangi, ne muena dishima. Bia dibungama, Adama ne Eva bakatombokela Yehowa, kudituabu ku tshia Satana. (Gen. 3:1-6) Nsombelu uvuabu nende mu Edene uvua mubapeshe mpunga ya bungi ya kukoleshabu dinanga diabu kudi Yehowa. Kadi pavua Satana mubande Yehowa, kabavua banange Yehowa ne muoyo mujima to. Lukonko lukuabu luakajuka ndua ne: nekuikalaku bantu bashala ne lulamatu kudi Yehowa Nzambi bualu mbamunange anyi? Mu mêyi makuabu, bantu mbakumbane bua kuleja muoyo mutoke anyi? Lukonko alu luakajuka mu bualu bua Yobo. (Yobo 1:8-11) Yobo uvua mupange bupuangane anu bu tuetu. Uvua wenza bilema. Kadi Yehowa uvua mumunange bua muoyo wende mutoke. w19.02 3-4 §6-7

Bua kuleja mushinga udi nawu bulelela bua Bukalenge bua Nzambi kudi bantu badi babupeta, Yezu wakafila tshilejilu tshia ngenda mushinga muena ngendu uvua wenda ukeba mabue a busanga mimpe menemene. Wakapeta dimue dia mushinga mukole; ‘diakamue kupanaye’ bionso bivuaye nabi bua kudisumba. (Mat. 13:45, 46) Bia muomumue, bulelela butudi bapete (bulelela bua Bukalenge bua Nzambi ne malongesha malelela a mushinga atudi balonge mu Dîyi dia Nzambi) budi ne mushinga wa bungi kutudi, kutusakabi diakamue bua kuitaba bua kuenza tshionso tshivua tshikengela bua kupeta bulelela abu. Bu mutudi tuangata bulelela ne mushinga wa bungi, ‘katuakubupana nansha.’ (Nsu. 23:23) Bia dibungama, bamue bantu ba Nzambi mbapange kumona mushinga udi nawu bulelela buvuabu bapete, babupane ne kubupana. Katuitabi bua bualu bua nunku butufikile nansha! Bua kuleja mutudi banange bulelela bikole katuyi mua kubupana, tudi ne bua kuteleja didimuija dia mu Bible dia ‘kutungunuka ne kuenda mu bulelela.’ (3 Yone 2-4) Kuenda mu bulelela kudi kulomba kubuteka pa muaba wa kumpala mu nsombelu wetu ne kubutumikila. w18.11 9 §3

Bavua balombe kabidi bena Isalele bua kababundi tshimenga tshia Yeliko, kadi bua batshinyunguluke musangu umue ku dituku munda mua matuku asambombo, ne batshinyunguluke misangu muanda mutekeke mu dituku dia muanda mutekete. Bamue basalayi bavua mua kuikala badiambile ne: ‘Etshi si nkujimija dîba ne makanda etu!’ Mulombodi wabu uvuabu kabayi bamona uvua mumanye bimpe tshivuaye wenza. Mayele ende avua makoleshe ditabuja dia bena Isalele, mabambuluishe kabidi bua kubenga kuluangana mvita ne basalayi ba mu Yeliko. (Yosh. 6:2-5) Muyuki eu udi utulongesha tshinyi? Kudi misangu idi bulongolodi buetu buenza malu mu mushindu mupiamupia kadi katuyi tumvua tshidibu buenzela nanku to. Tshilejilu, tuvua mua kuikala bele meji ne: kuenza mudimu ne biamu bua kudilongela, kuyisha, ne mu bisangilu, katshivua lungenyi luimpe to. Kadi lelu tudi pamuapa bamone ne: patudi nabi bidi bituambuluisha. Patudi tumona bipeta bimpe bia malu aa nansha mutuvua mua kuikala ne dielakana, ditabuja dietu ne buobumue buetu bidi bikola. w18.10 23 §8-9

Malu avua bena Yuda batekemene bua Masiya akumbaje akasaka bena mu Galela bua kujinga kuteka Yezu mukalenge. Pamuapa bavua bela meji ne: Yezu uvua ne bua kuikala mfumu wa pa buende bualu uvua ngamba-malu wa dipoko, wondopa babedi, ne udiisha too ne bantu bavua ne nzala. Yezu mumane kudiisha bantu balume batue ku 5000, bantu bakakema bikole, yeye kujingulula tshivuabu basua kuenza. Bible udi wamba ne: “Bu muvua Yezu mumanye ne: bavua bakeba kulua kumukuata bua kumuteka mukalenge, wakumbuka kabidi kuyaye ku mukuna anu yeye nkayende.” (Yone 6:10-15) Dituku diakalonda, bantu abu bakavua pamuapa batukije. Ke Yezu kubumvuija tshivua mudimu wende menemene. Uvua mulue bua kuambuluisha bantu mu nyuma, ki nku mubidi to. Wakabambila ne: “Kanuenji mudimu bua biakudia bidi binyanguka to, kadi enzayi mudimu bua biakudia bidi bishala bua muoyo wa tshiendelele.”​—Yone 6:25-27. w18.06 4 §4-5

Yezu uvua umvuila bantu bualu uvua mubanange. Uvua mumanye muvua bantu bavua bu dilenge didi dizajike anyi bu mukaba wa muendu uvua ukeba kujima badiumvua. Ke bua tshinyi uvua ubatabalela, ubenzela malu ne bulenga ne lutulu. Nansha bana bavua basue kuikala ku luseke luende. (Mâko 10:14) Bulelela, katuena mua kumvuila bantu anyi kubalongesha bu Yezu to! Kadi mbimpe tuikale tutabalela bantu ba mu teritware wetu, mmumue ne: tumanye mua kuyukila nabu, dîba dia kuyukila nabu, ne mutantshi wa kuyukila nabu. Lelu, bangenda mushinga banene ne bamfumu ba tshididi ne ba bitendelelu babi badi kabayi bumvuilangana badi ‘batatshisha’ bantu miliyo ya bungi ne ‘mbabalekelele.’ (Mat. 9:36) Ke bualu kayi bantu ba bungi kabena beyemena muntu ne kabena ne ditekemena. Nunku mbimpe tuikale ne bulenga patudi tuyukila nabu ne tutabalele mêyi etu ne mushindu utudi tuyukila nabu. Bushuwa, dimanya dietu dia Bible anyi dimanya kumumvuija ki nditu anu dikoka bantu ku mukenji wetu to, kadi mpatudi nangananga tubatabalela bimpe ne tubanemeka. w18.09 31-32 §13-14

Mmunyi mutudi tuleja ne: tudi ne dijinga adi? Mpatudi tudia biakudia bia mu nyuma, tutumikila mikenji ya Nzambi, ne tuteka ntendelelu wende pa muaba wa kumpala. Tuetu tuenza malu aa, disanka dietu nedivule. Netukoleshe ditabuja dietu dia ne: milayi ya Nzambi neyikumbane. (Tito 2:13) Kuikala mu malanda makole ne Yehowa ke bualu bua mushinga budi butupetesha disanka dia kashidi. Mupostolo Paulo wakafunda ku nyuma ne: “Ikalayi nusanka mu Mukalenge [Yehowa] misangu yonso. Nengambe kabidi ne: Sankayi!” (Filip. 4:4) Bua tuetu kuikala mu malanda masheme a nunku, tudi ne bua kuikala ne meji a Nzambi. (Nsu. 3:13, 18) Bua kuikala ne disanka dia kashidi, kubala Dîyi dia Nzambi nkayaku ki nkukumbane to, kadi tudi kabidi ne bua kutumikila bitudi tubala abi. Yezu wakaleja mudibi ne mushinga bua kutumikila bitudi tulonga pakambaye ne: “Nuenu bamanye malu aa, nudi [ba disanka] binuaenza.” (Yone 13:17; Yak. 1:25) Kukumbaja dijinga dietu dia malu a mu nyuma ke bualu bunene butudi ne bua kuenza bua tuetu kuikala ne disanka dia kashidi. w18.09 18 §4-6

Epafa uvua mumanye bena Kristo nende bimpe, ne uvua uditatshisha bua bualu buabu bikole. Nansha muvuaye pende “muena lukanu” bu Paulo, kakapanga kutabalela majinga a bakuabu a mu nyuma to. (Filem. 23) Wakabambuluisha. Kabienaku bileja muvuaye uditatshisha bua bakuabu anyi? Kusambila bua bena Kristo netu kudi bushuwa ne bukole nangananga patudi tubatela mu mêna abu. (2 Kol. 1:11; Yak. 5:16) Ela meji bua bantu baudi mua kutela mêna abu mu masambila ebe. Anu bu Epafa, bena Kristo netu ba bungi batu basambila bua bana betu badi mu bisumbu ne bua bena mu mêku badi ne majitu manene anyi badi kumpala kua mapangadika makole a kuangata peshi badi batuilangana ne mateta. Kupita apu, mbimpe tuvuluke bana betu badi bafuishe, badi bapanduke ku bipupu bivua bibenzekele anyi ku mvita, ne badi ne lutatu lua kupeta dikuta. Bushuwa, kudi bana betu ba balume ne ba bakaji badi dijinga ne masambila etu. w18.09 5-6 §12-13

Paulo kavua wakula anu bua kupeshangana bintu patupu to, kadi uvua kabidi wakula bua kukankamija bantu, kubabela ne mêyi a mu Bible, ne kubambuluisha mu mushindu kampanda. (Bien. 20:31-35) Mupostolo Paulo mmutushile tshilejilu mu mêyi ne ku bienzedi biende tshia mutudi mua kudifila bua bakuabu, mmumue ne: kufila dîba ne makanda etu bua bualu buabu, kubatabalela ne kubananga. Bakebuludi ba malu a bikadilu bia bantu mbamone pabu ne: kufila kudi kupetesha muntu disanka. Mukanda kampanda udi wamba ne: “padi bantu benzela bakuabu malu mimpe, badi bapeta disanka dia bungi.” Bakebuludi badi bamba ne: patudi tuambuluisha bakuabu, tudi tujingulula buimpe bua muoyo ne tumanya bua tshinyi bavua batufuke. Ke bualu kayi, bamanyi bapiluke batu balomba bantu bua badifile ku budisuile bua kuambuluisha bakuabu bua bobu bine bapete makanda a mubidi mimpe ne disanka. Bualu ebu kabuena butukemesha to, bualu Mufuki wetu wa dinanga Yehowa utu anu utuambila ne: kufila kudi kutupetesha muntu disanka.​—2 Tim. 3:16, 17. w18.08 22 §17-18

Mêyi a buprofete avua Yeshaya mufunde bua Yezu adi atukankamija ne atupetesha ditekemena. Yeshaya wakamanyisha ne: Yezu kavua ne bua ‘kulumbuluisha anu bua malu adi amueneka ku mêsu kuende, anyi kubela anu bilondeshile malu adi matshi ende umvua to.’ Uvua ne bua ‘kulumbuluisha bapuekele biakane.’ (Yesh. 11:3, 4) Bua tshinyi mêyi aa adi atukankamija? Bualu tudi mu buloba budi buwule tente ne kansungansunga. Tuetu bonso tudi dijinga ne mulumbuluishi mupuangane, kakutulumbuluisha bilondeshile tshimuenekelu tshietu to! Dituku dionso edi tutu tumona bantu mu mushindu kampanda anyi kansanga. Kadi bu mutudi bapange bupuangane, katuena mua kumona malu mu mushindu mupuangane anu bu Yezu to. Tutu ne tshibidilu tshia kuimanyina pa bidi mêsu etu amona. Nansha nanku, pavua Yezu pa buloba wakatutumina dîyi bua kubenga kulumbuluishangana bilondeshile “tshimuenekelu,” kadi bua kulumbuluisha “ne dilumbuluisha diakane.” Nunku, Yezu mmusue tumufuane ne tulekele kulumbuluisha bakuabu bilondeshile tshimuekelu tshiabu. w18.08 8 §1-2

Mu bulelela, katuena tumvua dîyi dia Nzambi difumina mu diulu to. Kadi mmutupeshe Bible, Dîyi diende difunda, mudiye utuambila tshia kuenza. Nyuma wa Yehowa udi kabidi usaka “mulami wa lulamatu” bua kutungunuka ne kupesha batendeledi bende biakudia. (Luka 12:42) Tudi tupeta biakudia bipite bungi! Mu biakudia amu mudi mikanda yetu, biena bualu bidi mu jw.org, filme, ne bintu bia kuteleja. Mêyi a Nzambi adibu bafunde mu Bible atupeshe dishindika dia ne: Yehowa udi ne malu onso mu bianza ne nealongolole malu mabi onso adi Satana ne ndongoluelu wende mubi batuenzele. Tudisuikayi kabidi bua kuteleja dîyi dia Yehowa ne ntema yonso. Tuetu tuenza nanku, netutantamene malu onso atudi tutuilangana nawu lelu, nansha atuatuilangana nawu kumpala eku. Bible udi utuvuluija ne: “Nudi dijinga ne dinanukila, bua ne: nuenu bamane kuenza disua dia Nzambi, nuangate dikumbana dia mulayi.”​—Eb. 10:36. w19.03 13 §17-18

Bu mukavua Mose mulombole tshisamba tshia Isalele bidimu bia bungi, Yoshua uvua ne bua kuikala udiebeja bikala bantu ni bavua mua kuitaba bulombodi buende. (Dut. 34:8, 10-12) Mukanda kampanda wa malu a mu Bible udi wamba bua Yoshua 1:1, 2 ne: “Mu bikondo bia kale anyi bia lelu, dishintuluka dia balombodi ditu tshikondo tshibi tshitambe bua bantu.” Yoshua uvua anu ne bua kuikala mumvue buôwa, kadi mu matuku makese, wakasuika mukaba bua kulonda tshivuabu bamuambile. (Yosh. 1:9-11) Wakeyemena Nzambi ne muoyo mujima. Anu mudi Bible uleja, Yehowa wakalombola Yoshua ne bena Isalele ku diambuluisha dia muanjelu uvua muleji mpala wende. Mbikumbane bua kuamba ne: muanjelu eu uvua Dîyi, Muanabute wa Nzambi. (Ekes. 23:20-23; Yone 1:1) Yehowa wakambuluisha bena Isalele bua kusombabu bimpe kakuyi lutatu tshikondo tshivua Yoshua mupingane pa muaba wa Mose. w18.10 22-23 §1-4

Yehowa udi wanyisha bantu badi bamuenzela mudimu ku budisuile, ne udi ufunda mêna abu mu “mukanda [wende] wa tshivulukilu.” Bua Yehowa kufunda dîna dietu mu “mukanda [wende] wa tshivulukilu,” kudi amue malu atudi ne bua kuenza. Malaki uvua muleje bimpe ne: tudi ne bua ‘kutshina Yehowa ne kuelangana meji a dîna diende.’ Tuetu batendelele muntu mukuabu anyi tshintu tshikuabu pamutu pa kutendelela Yehowa, Yehowa neakupule dîna dietu mu mukanda wende wa muoyo. (Ekes. 32:33; Mis. 69:28) Nunku, didilambula dietu kudi Yehowa kadiena anu diumvuija patupu kumulaya bua kuenza disua diende ne kubatijibua mu mâyi to. Aa mmalu atudi tuenza musangu umue kujika, kadi kushala ku luseke lua Yehowa bu bantu bende kudi kulomba kutungunuka ne kumutumikila too ne mutuafua, mmumue ne: mpindieu ne mu matuku atshilualua.​—1 Pet. 4:1, 2. w18.07 23-24 §7-9

Kadi kabiena bidienzekela to. Tudi ne bua ‘kuya batangile ku dikola,’ anyi kutungunuka ne kudienzeja bua kukola. Kukola mu nyuma kudi kulomba kutungunuka ne kuvudija dimanya ne kupeta busunguluji bua bungi. Ke bualu kayi batu batukankamija misangu yonso bua kubala Bible dituku dionso. (Mis. 1:1-3) Ukadi mudifundile tshipatshila atshi anyi? Kubala Bible dituku dionso kudi mua kukuambuluisha bua kumvua mikenji ya Yehowa ne mêyi ende manene bimpe menemene ne kumvua Dîyi diende mu buondoke. Mukenji mutambe bunene wa bena Kristo mmukenji wa kunangangana. Yezu wakambila bayidi bende ne: “Bua bualu ebu bantu bonso nebamanye ne: nudi bayidi banyi, binuikala ne dinanga munkatshi muenu.” (Yone 13:35) Yakobo, muanabu ne Yezu, wakabikila dinanga ne: “mukenji wa bumfumu.” (Yak. 2:8) Paulo pende wakamba ne: “Dinanga ndikumbajibua dia mikenji.” (Lomo 13:10) Kabiena bikemesha bua mudi Bible wela kashonyi pa dinanga to, bualu “Nzambi udi dinanga.”​—1 Yone 4:8. w18.06 19 §14-15

Nansha muvua bena Isalele batombokele Yehowa, Mose ke wakafiika munda. Wakapanga didikanda, kufikaye ku diakula tshiakulakula kayi wela meji ku bipeta bivua mua kumueneka to. Mose wakalekela malu avua bakuabu benza amupangisha bua kushala mutuishile Yehowa mêsu. Mose wakapita ne tshilumbu tshia kumpala bimpe. (Ekes. 7:6) Kadi pamuapa ukavua mutshioke ne mufiike munda bualu bena Isalele bavua anu batomboka munkatshi mua bidimu bia bungi. Mose uvuaku anu mutume meji ende ku tshiji tshiende pamutu pa kukeba mua kutumbisha Yehowa anyi? Bikalabi ne: Mose muprofete wa lulamatu uvua mubuele mu ditanaji ne mulenduke, bidi mua kutuenzekela petu bipepele. Anu bu Mose, tukadi pa kubuela mu buloba bua mu tshimfuanyi, mmumue ne: mu bulongolodi bupiabupia budi Yehowa mutulaye. (2 Pet. 3:13) Kakuena muntu wa kutudi udi musue kupangila diakalenga dinene nunku! Kadi bua tuetu kudipeta, tudi ne bua kushala batuishile Yehowa mêsu, tukeba misangu yonso bua kuenza tshidiye musue.​—1 Yone 2:17. w18.07 15 §14-16

Satana kena mua kusaka bantu ku bukole bua benze malu adibu kabayi basue to. (Yak. 1:14) Bantu ba bungi badi benza malu adi Satana musue mu dipanga. Kadi padibu balonga bulelela, yonso wa kudibu udi usungula udiye musue kuenzela mudimu. (Bien. 3:17; 17:30) Tuetu badisuike bua kuenza disua dia Nzambi, kakuena tshidi Satana mua kuenza bua kunyanga muoyo wetu mutoke to. (Yobo 2:3; 27:5) Kudi malu makuabu adi Satana ne bademon bende kabayi mua kuenza. Tshilejilu, kakuena muaba nansha umue mu Bible udibu bambe ne: badi mua kumanya malu adi mu lungenyi lua muntu anyi mu muoyo wende to. Anu Yehowa ne Yezu ke badi mua kuamanya. (1 Sam. 16:7; Mâko 2:8) Tuetu benze ne muetu muonso bua mêyi etu ne bienzedi bietu biumvuangane ne disua dia Nzambi, netuikale bashindike ne: Yehowa kakulekela Diabolo utuenzela bibi bua kashidi to. (Mis. 34:7) Tudi ne bua kumanya muena lukuna wetu bimpe, kadi katuena ne bua kumumvua buôwa to. Yehowa udi wambuluisha too ne bantu bapange bupuangane bua kutshimuna Satana. Tuetu bamukandamene, neatunyeme.​—Yak. 4:7; 1 Pet. 5:9. w18.05 26 §15-17

Fuanyikijabi ne: udi ukeba kuya mu tshimenga tshidi kule bua kubuela mu tshibilu kampanda tshinene. Bua kufikamu, bidi bikengela kuenza luendu lule mu mashinyi. Paudi ufika muaba utu mashinyi imanyina, udi upeta mashinyi mapite bungi. Bidi bikengela kupeta mashinyi adi aya muaba uudi usua kuya! Wewe mubuele mu mashinyi adi aya muaba mukuabu, neuye kua tshianana. Lelu bansonga badi pabu mu nsombelu wa muomumue: badi benza luendu lule, kaluyi lua mu mashinyi to, kadi lua mu nsombelu wabu mujima. Kudi misangu idibu bapeta mpunga ya bungi ya kuenza amue malu ne ya kuangata mapangadika, kadi bapanga tshia kuenza. Bansonga wa yaya, nudi mua kudipepejila malu nuenu bamanye bimpe tshinudi ne bua kuenza mu nsombelu wenu. Nenuenzaku bua nsombelu wenu asankishe Yehowa anyi? Bualu ebu budi bumvuija kutumikila mibelu yende mu malu onso, bu mudi dilonga tulasa, dienza mudimu, diambula bujitu bua dîku, ne malu makuabu. Budi kabidi bumvuija kudienzeja bua kukumbaja bipatshila bia mu nyuma. Mbimpe bansonga badi badifila bua kuenzela Yehowa mudimu batuishibue ne: Nzambi neababeneshe ne neabambuluishe bua malu abu akumbane. w18.04 25 §1-3

Yefeta wakakumbaja mutshipu wende, kutumaye muanende wa bakaji utshivua kamama ku Shilo bua kuenza mudimu ku ntenta wa tshitendelelu matuku ende onso a muoyo. (Bal. 11:30-35) Nansha muvua bualu ebu buikale lutatu lukole kudi Yefeta, buvua mua kuikala kabidi lutatu lukole menemene kudi muanende wa bakaji uvua muitabe bua kutua dipangadika dia tatuende mpanda. (Bal. 11:36, 37) Nunku, uvua mudipangishe diese dia kusedibua, kulela bana, ne kulama dîna dia dîku diabu ne bumpianyi buabu. Uvua bushuwa dijinga ne busambi ne dikankamija. Bible udi wamba ne: “Tshiakalua tshilele mu Isalele: Tshidimu tshionso nsongakaji ya mu Isalele ivua iya kutumbisha muana wa bakaji wa Yefeta muena Gilada matuku anayi ku tshidimu.” (Bal. 11:39, 40) Katuenaku mua kuela bana betu badi bajike kalumbandi ne kubakankamija bua mudibu benza mudimu ne bujike buabu bua kudifila bikole mu “malu a Mukalenge” anyi?​—1 Kol. 7:32-35. w18.04 17 §10, 11

Banjelu ba bungi bakaditua ku tshia Satana bua kutombokela Nzambi. Kumpala kua Mvula wa kabutu, wakasaka bamue ba ku banjelu abu bua kuenda masandi ne bana ba bakaji ba bantu. Bible udi uleja bualu ebu mu tshimfuanyi wamba mudi dragon ukoka tshia bisatu tshia mitoto ya mu diulu. (Gen. 6:1-4; Buak. 12:3, 4) Pavua banjelu abu bumbuke mu dîku dia Nzambi, bakaditeka ku bukokeshi bua Satana. Kadi bantomboji aba kabena anu tshisumbu tshia bakebeshi ba bimvundu to. Satana mmuenze buende bukalenge, widikija Bukalenge bua Nzambi, ne mmuditeke mukalenge. Mu miaba ya mu diulu, Satana mmulongolole bademon bende, muenze mbulamatadi, mubapeshe bukokeshi, ne mubavuije bakokeshi ba panu. (Ef. 6:12) Satana udi wenza mudimu ne bulongolodi buende budi kabuyi bumueneka ebu bua kulombola mbulamatadi yonso ya bantu. w18.05 23 §5-6

Dinanga didi Nzambi mutunange nadi ditu dimuenekela imue misangu ku mibelu idiye utupesha bu muledi. Davidi uvua witaba mibelu mimpe ya nunku. Uvua welangana meji bua meji a Nzambi, uavuija ende ne ualekela bua amufumbe. Wewe muenze nunku ne ditabuja, neunange pebe Yehowa bikole ne neukoleshe dijinga diebe dia kumutumikila. Neulue kabidi muena Kristo mushindame. Muanetu kampanda wa bakaji diende Christin wakamba ne: “Pantu ngenza makebulula ne ngelangana meji a bindi mbala, ntu ngumvua anu bu ne: meme ke uvua Yehowa mufundishile malu au!” Wewe muikale muntu wa mu nyuma, udi upeta kabidi dimanya dia pa buadi ne busunguluji bidi bikuambuluisha bua kumona bulongolodi ebu ne tshidi tshibuindile anu mudi Nzambi ubumona. Bua tshinyi Nzambi udi ukupesha dimanya ne busunguluji bia nunku? Mmusue bua umanye malu adi ne mushinga wa bungi mu nsombelu webe, wangate mapangadika mimpe, ne windile matuku atshilualua ne dishindika dionso!​—Yesh. 26:3. w18.12 26 §9-10