Dikenga dia kashidi​—Bua tshinyi ndilongesha didi dilubakaja?

“Ndi ngumvua bambe se: nuvua bipate pastere wenu. Mbubi kayi buvuaye muenze?”

“Kavua ulekela kutuambila ne: netuye mu inferno buonso buetu.”

“Apo ntshinyi tshidi pastere mupiamupia wamba?”

“Pastere mupiamupia udi wamba pende ne: netuye mu inferno.”

“Nunku, dishilangana didi kuepi?”

“Dishilangana didi dia se: tshikondo tshivua pastere wa kale utuambilabi, bivua bimueneke bu bivua bimusankisha; kadi padi pastere mupiamupia ubiamba, bidi bimvuika ku tshikuma tshia dîyi diende se: mutshima wende mmusunsuke.”

DIYUKIDILANGANA edi didi disanganyibua mu mukanda wa bimfuanyi, didi dileja mu wadi mushindu se: dilongesha dia inferno didi dilubakaja balongeshi ba Bible ne bena kuitabuja bavule. Mu ngumvuilu mualabale, didi dishindika kabidi tshivua Clark H. Pinnock, mushikuluji wa malu a Nzambi muena Canada, mufunde ne: “Ku biena-bualu bionso bia malu a Nzambi bidi bilubakaja kuondo ka muoyo ka bantu kukadi siekele mivule, ndi ntshinka se: bikese bivua bikebelangane tunyinganyinga tukole kupita diumvuija dia inferno didibo bafila pa tshibidilu bu dinyoka dia kashidi dilelela dia mubidi ne anyima didi muntu ne bua kumvua.”

Ditapuluka ne ngikadilu milenga

Nenku, bua tshinyi bantu bavule mbalubakajibue kudi bimfuanyi bia iferno bidibo baleja mu bukua-buena-nkristo? (Utangile mu kazubu.) Mulongeshi Pinnock udi wamba ne: “Lungenyi lua se: tshifukibua tshiena-kumanya malu netshikengeshibue tshiendelele ku mubidi ne mu lungenyi ludi lulubakaja bikole bitambe, ne lungenyi lua se: dinyoka edi didi dienzeka ku dianyisha dia Nzambi ludi lutuyisha ditabuja dindi nadi pa bidi bitangila dinanga didi nadi Nzambi.”

Eyowa, dilongesha dia dikenga dia tshiendelele didi dielesha nkonko pa bidi bitangila ngikadilu milenga. Pa nanku, bena nkristo ba muoyo mulenga badi belangana meji pa nkonko mijula kudi Hans Küng, muena katolike mushikuluji wa malu a Nzambi: “Nzambi wa dinanga . . . udi ne bua kutangila ne mesu patupu munkatshi mua bikondo bikena-ndekelu dinyoka edi dia ku mubidi ne mu lungenyi dikena nshikidilu, dikena ditekemena, dibule luse ne dinanga, dia tshikisu tshikole dia bifukibua biende anyi?” Küng udi utungunuka: “Udi bu munanyi wa mabanza wa mutshima mupape anyi? . . . Netuele meji kayi bua muntu kampanda udi ujinga kukumbaja bijingajinga biende bia didisombuela ne tshikisu tshikole tshia mushindu’eu?”a Bushuwa, mmunyi mudi Nzambi udi utuambila mu Bible bua kunanga bena lukuna betu mua kunyoka bena lukuna bende tshiendelele? (1 Yone 4:8-10) Kabiena mua kutukemesha padi bamue bantu bafila nkomenu wa se: ngikadilu wa inferno kêna mu diumvuangana ne ngikadilu wa Nzambi, nunku, bilondeshile ngikadilu milenga, dilongesha edi kadiena kuitaba.

Bena kuitabuja bakuabo bavule badi badikolesha bua kupuwisha kuondo kabo ka muoyo pa kuepuka nkonko eyi. Badi mua kuenza bu badi kabayi bayimanye, kadi payi idi’anu kuoko. Nunku, Bidi’anu bikengela kuyandamuna. Nditapuluka kayi didi pankatshi pa dilongesha edi ne ngikadilu milenga? Mu mukanda wa Criswell Theological Review, mulongeshi Pinnock udi ufunda ne: “Bilondeshile ngikadilu milenga, dikenga dia kashidi kadiena mua kuanyishibua bualu didi divuija Nzambi bu tshidika kampanda udi utshingisha ne uzukila amu bua kunua mashi a bantu mushidu umue ne Auschwitz (mbuena kuamba ne: kamponyi ka dikengesha ne dienzeja bantu midimu mikole ka bena nazi ku Allemagne) bua bena tshibawu bavuabo kabayi nansha banyishibue bua kufua.” Udi webeja ne: “Mmunyi mudi kampanda muditeki wa pa muaba wa bakuabo mua kukolesha muoyo bua lungenyi elu [lua dilongesha dia inferno]? . . . Mmunyi mudi bena nkristo mua kudienzela tshimfuanyi tshia Nzambi wa tshikisu ne muena kudisombuela mushindu’eu?”

Bua kuleja buenzeji bubi budi nabu dilongesha edi pa nsombelu wa bantu, Pinnock udi wamba ne: “Ndi ndiebeja mene bua se: mmalu mabi a mushindu kayipu avuabo benze kudi aba bavua bitabuje Nzambi udi unyoka bena lukuna bende?” Udi ufila nkomenu eu ne: “Etshi ki mmuanda udi ulubakaja ne udi ukengela makebulula muondoke anyi?” Eyowa, Bikalabu babambidika Nzambi ngenzelu wa tshikisu wa mushindu’eu, kabiena bikemesha padi bena kuitabuja ba ngelakanyi baditua mu dikonkonona diondoke pa bidi bitangila dilongesha dia inferno wa kapia. Ne ntshinyi tshidibo bajandula? Bukuabo bualu bulamate ku lungenyi lua dikenga dia kashidi.

Inferno ne kulumbuluisha kuakane

Bavule ba ku aba badi bakonkonona ne ntema tshilumbu etshi mbamone se: mbimueneke se: Nzambi kêna ulonda mikenji ya kulumbuluisha kuakane mu dilongesha dia inferno nansha, ne abi mbibengangana ne ngumvuilu wabu wa ku tshileledi wa kulumbuluisha kuakane. Mmushindu kayi?

Tudi tupeta tshitupa tshia diandamuna pa kufuanyikija dilongesha dia dikenga dia kashidi ne mikenji ya bundumbulula miela kudi Nzambi: “Dîsu ku dîsu, dînu ku dînu.” (Ekesode 21:24) Bua dikengedibua dia diumvuija dikumbanyine, ulamike ku dilongeshi edi dia inferno wa kapia mukenji eu wa Nzambi mupesha Izalele wa kale, mukenji muine uvua mushindamena pa tshibawu tshidi tshiumvuangana menemene ne bubi buvua muntu muenze. Newikale mua kufika ku nkomenu kayi? Ng’eu wa se: amu aba benji ba mpekatu bavua babueja bakuabu mu dikenga dia kashidi ke badi bakumbanyine dikenga dia kashidi mushindu wa muomumue​—dikenga dia kashidi ku dikenga dia kashidi. Kadi, bu mudi bantu (nansha mibi yabu mikale ya mushindu kayi) mua kukengeshangana anu bua lupolo lukese, kubakosela tshibawu tshia dikenga dia kashidi, kakuena bushuwa diumvuangana nansha dikese pankatshi pa bubi buabu ne dinyoka dia kashidi dia inferno wa kapia.

Mu ngumvuilu mukuabu, dinyoka nedikale dipite bukole. Nedisambuke mikalu ya mukenji wa “dîsu ku dîsu, dînu ku dînu.” Pa kumona muvua malongesha a Yezu atuyisha lungenyi lua didisombuela, tudi mua kuitaba se: nebikale bikole bua bena nkristo balelela kuangatabo dikenga dia kashidi bu tshibawu tshiakane.​—Matayi 5:38, 39; Lomo 12:17.

Badi babingisha dilongesha edi

Nansha nanku, bena kuitabuja bavule badi badikolesha bua kubingisha dilongesha edi. Mmushindu kayi? Clive S. Lewis mufundi muena Britanike udi wakula mu dîna dia bavule ba ku babingishi ba dilongesha edi mu mukanda wende wa Le problème de la peine (angl.): “Bu bikale ku bukokeshi buanyi, kakuena dilongesha dimvua mua kutamba kusua bua kumbusha mu buena-nkristo bu edi to. Kadi, bujadiki bujima bua dine dilongesha edi budi busanganyibua mu Mifundu, nangananga mu miaku ya Mukalenge wetu yeye muine.” Nenku, aba badi bakuila dilongesha edi badi bitabuja se: dikenga dia kashidi didi dikuatshisha buowa, kadi pinapo, badi batungunuka ne kujadika se: kakuena udi mua kudipandishaku, bualu bilondeshile mmuenenu wabu, Bible ke udi udilongesha. Mona tshiakamba Pinnock, mushikuluji wa malu a Nzambi: “Pa kuitaba ngikadilu wende udi kayi usankisha, badi batekemena kuleja patoke lulamatu luabo lukole ku Bible, ne bukitu kampanda, pa kuitaba bulelela ebu bukuate buowa anu bualu mifundu idi ibulongesha. Bimueneka bu badi basua kuleja se: dibenga kutupakana dia Bible divua diedibue mpata. Kadi mbia bushuwa anyi?”

Wewe pebe, pamu’apa udi udiebeja bikala lulamatu [luebe] ku Bible kaluyi lukushila muaba bua kuenza disungula dikuabo, kumusha edi dia kuitaba dilongesha edi. Ntshinyi tshidi Bible wamba menemene pa muanda eu?

[Mêyi adi kuinshi]

[Kazubu mu dibeji 5]

BIMFUANYI BISATU BIDI NE MMUENENU WA MUOMUMUE

Kutonda Ditabuja kua Westminster, kuakitaba bena mishonyi bavule, kudi kumanyisha se: aba badi kabayi munkatshi mua basungula “nebakupibue mu makenga a kashidi, ne nebanyokibue ne dibutudibua dia kashidi.” Tshibungu tshia Encyclopédie de la religion (angl.) tshidi tshiumvuija ne: “Mu buena nkristo bua bena katolike ba ku Rome, inferno udi wangatshibua bu nsombelu wa dinyoka dikena-ndekelu . . . udi muntu ukengeshibua ku kapia ne ku makenga a mishindu mikuabu.” Tshibungu etshi tshidi tshisakidila ne: “Ekleziya ortodokse wa bena nkristo ba ku Orient” udi ulonda “dilongesha dia se: inferno mmuaba wa kapia ne dinyoka bia kashibi bidi bindile badi bedibue mulawu.”​—Mukanda 6, dibeji dia 238 ne dia 239.