Midimu mivulavulayi mu tshikondo tshia dikalaku dia Kristo
“Pashishe, mukalenge neambile aba bikala ku dia balume diende ne: ‘Vuayi, nuenu bakabeneshibua kudi Tatu’anyi, nupiane bukalenge bunulongoluela katshia ku ntuadijilu wa bukua-bantu.’”—MATAYI 25:34.
1. Mmushindu kayi udi pa·rou·siʹa wa Kristo mufuanangane ne “matuku a Nowa”?
DIKALAKU dia Kristo—mmuanda muindila musangu mule! Tshikondo tshifuanangane ne “matuku a Nowa” avua Yezu muakule bualu buawu mu diumvuangana ne “nshikidilu wa bulongolodi bua malu” tshiakakumbana mu tshidimu tshia 1914. (Matayi 24:3, 37) Kadi, dikalaku, peshi pa·rou·siʹa, dia Kristo divua ne bua kumvuija tshinyi bua bashadile bela manyi ba “mupika wa lulamatu ne wa budimu”? (Matayi 24:45) Bushuwa, bavua ne bua kulua batuadi ba butoke bena bivule bia kuenza! Malu a dikema avua ne bua kuenzeka! Mudimu wa disangisha bantu wa katshia ne katshia uvua ne bua kutuadija.
2. Ndikezula dia mushindu kayi diakenzeka mu dikumbana dia Malaki 3:1-5?
2 Kadi, diambedi, bena nkristo aba bela manyi bavua bakengela dikezudibua. Anu muvua Malaki 3:1-5 mubimanyishe, Yehowa Nzambi ne “mutumibue wende wa tshiovo,” Yezu Kristo, bakalua kukontolola ntempelo wa mu nyuma mu printemps wa 1918. Dilumbuluisha divua ne bua kutuadija ne “nzubu wa Nzambi.” (1 Petelo 4:17) Malaki 3:3 uvua mumanyishe ne: “[Yehowa] neasombe bu muenguludi ne mukezudi wa tshiamu tshia argent ne udi ne bua kukezula bana ba Lewi; ne udi ne bua kubatokesha bu tshiamu tshia ngolo ne bu tshiamu tshia argent.” Nunku, bivua tshikondo tshia diengulula ne dikezula.
3. Bua tshinyi bivua bia mushinga bua kuenzekako dikezula dia mu nyuma?
3 Mu dilumbuluisha edi, diakafika mu tshikondo tshiadi tshikole mu 1918, bashadile ba ku kasumbu ka mupika bakakezudubua ku bukoya buonso buvua bufuma ku malu a Nzambi ne ku bulongolodi ebu. Bua tshinyi Yehowa wakenza dikezula edi? Bualu, bivua bitangila ntempelo wende wa mu nyuma, mbuena kuamba ne: ndongoluelu mifuanangane ne ntempelo, idi yambuluisha bua kumutendelela bilondeshile bishimikidi bijadika kudi mulambu wa dibuikidila mpekatu wa Yezu Kristo. Yehowa uvua musue bua ntempelo wende ikale mukezuke, bua pakokibua bungi buvule bua bamutendeledi badi ne ditekemena dia kuikala ne muoyo pa buloba, basangane muaba udi bumfumu buende ku mutu kua bionso bunemekibue, muaba udi dîna diende dia bunzambi dibingishibue ne udibo batumikila mikenji yende miakane. Nunku, bavua ne bua kuleja dianyisha diabo bua Yehowa ne kudituabo pabo ku dimanyisha malongolola ende a mpatshi.
Masanka mapiamapia a mudimu
4, 5. (a) Mmunyi mudi lukonko lujula kudi Yezu Kristo lusaka yonso muena mu kasumbu ka mupika ku didikonkonona lelu’eu? (b) Nngumvuilu kayi utudi ne bua kuikala nende bua miaku “mupika wa lulamatu ne wa budimu” ne “bena mudimu bende”? (c) Mbukenji kayi buvua Yezu mupeshe mupika?
4 Mu 1919, kasumbu kakezula ka mupika kavua mua kupangadija dikumbaja dia midimu mivulavulayi. Mu 1914, Yezu Kristo, Mfumu wa kasumbu aka, uvua mupeshibue Bukalenge bua mu diulu. Pakapinganaye kudi “bena mudimu buonso” ba mu nzubu wende bua kukontolola midimu ya muntu ne muntu, wakafika muvuadika butumbi bua Bukalenge, buvuaye kayi nabu pavuaye panshi pa buloba apa. Nnsombelu kayi wakasanganaye? Kasumbu ka mupika kavua kadifile mu midimu ya dilubuluja bipatshila bia Mukalenge anyi? Anu mudibi bimanyisha mu Matayi 24:45-47, Yezu wakela lukonko luakasaka mulongi yonso muela manyi ku dikonkonona didifila diende dijima dia pa nkayende kudi Masiya wa Yehowa: “Mmupika kayi wa lulamatu ne wa budimu udi mfumu’ende muteke pa bena mudimu bende, bua kubapa biakudia biabo pa tshikondo tshiakanyine? Mupika eu ng’wa diakalenga biamusangana mfumu’ende mu difika diende, wenda wenza nunku! Bulelela, ndi nnuambila ne: Neamuteke ku mutu kua bintu biende bionso.”
5 Mbimueneke se: diumvuija didi Yezu mufile bua mupika eu wa lulamatu ki ndilamika muntu nansha umue pa nkayende. Tòo, kadi didi difunkuna tshisumbu tshia bela manyi ba lulamatu ba Kristo mu tshibungi. Bena mudimu ke buobo mene balongi aba ba Kristo bangata muntu yonso pa nkayende. Yezu uvua mumanye se: neasumbe balongi bende bela manyi ku mashi ende; ke bualu kayi wakakula bualu buabu mu tshibungi bu mupika wende. Mu 1 Kolinto 7:23, badi bakula bualu buabu ne: “Nuakasumbibua ku mushinga kampanda; kanudivuiji tshiakabidi bapika ba bantu nansha.” Yezu uvua mupeshe kasumbu ka mupika wende bukenji bua kukenkesha butoke buende bua kukoka bantu ne kuenza bakuabu balongi, ne kudiisha kabidi ku musangu ne ku musangu bena mudimu bende pa kubapesha biakudia bia mu nyuma pa dîba dikumbanyine.
6. Kunyima kua dikontolola dia Yezu, ndifutu kayi diakapeta mupika?
6 Kubangila ku tshikondo tshiakatuadija dikalaku dia Kristo too ne mu 1918, kasumbu ka mupika, nansha mudiku kakayi kende lumu, nansha mudiku kakengeshibua, pamue ne ngelakanyi bua bualu buaku, nkakebe mua kupesha bena mudimu biakudia bivua bikumbanyine bua tshikondo etshi. Ke nsombelu wakasangana Yezu pakatuadijaye dikontolola diende. Mukalenge Yezu uvua musankishibue, ne mu 1919, wakabala kasumbu aka ka mupika se: nka disanka, bualu kakanyishibua kudiye. Ndifutu kayi dia disanka dipetele mupika bu muvuaye muenze tshivua Mfumu’ende mumutumine dîyi bua kuenza? Mmuanzu mubandile wa buneme! Eyowa, majitu manene pa makaya ende mu dilubuluka dia bipatshila bia Mukalenge wende. Bu mukavua Mfumu’ende muteka mpindieu Mukalenge mu diulu, bintu biende bionso bia pa buloba bivua bilue pabi bia mushinga mukole.
7, 8. (a) ‘Bintu bionso’ bia Mfumu mbintu kayi? (b) Ntshinyi tshidibo balombe mupika mu dilama diende dia tshiuma etshi?
7 Apo, “bintu biende bionso” mbinganyi? Mbintu bionso bia mu nyuma bidi pa buloba, bine ebi mbilue tshiuma tshia Kristo bilondeshile bukokeshi bupeteleye bu Mukalenge wa mu diulu. Bushuwa, bine ebi bidi ne bukenji bua kuenza balongi ba Kristo, ne disanka dikena kuelekeja dia kutumika mu matunga wonso bu bena-mpala ba Bukalenge bua Nzambi bumana kujadika.
8 Ku muanzu eu mubandile, kasumbu ka mupika kavua kapeshibue bukokeshi bua kulama bintu bionso bia Mfumu, kavua kabidi kenzejibue bua kufila mêba mavule ne kutabalela bikole dikumbajibua dia mudimu wa Bukalenge, pamue ne luibaku lua nzubu minene idi yambuluisha mu mudimu eu. Kasumbu aka kavua kapete mpindieu budimi bua kukuatshila mudimu butambe kualabala, mbuena kuamba ne: buloba bujima budi bantu basombele.
Disangisha dia mikoko
9. Mbipeta kayi biakapeteka mu divula dia midimu ya mupika?
9 Nunku, ne butumike buonso, kasumbu ka mupika wa lulamatu ne wa budimu wa Kristo kakavudija midimu yaku. Kuakapatuka bipeta kayi? Ba ndekelu ba ku bela manyi 144 000 bakasangishibua. Pashishe, tshikena-kumona tshia Yone tshidi mu Buakabuluibua 7:9-17 tshiakalua muanda mulelela udi ukemesha ne ukankamija. Nangananga biangatshile mu 1935, kasumbu ka mupika nkalabule disanka dia kumona dikumbana dia tshikena-kumona etshi ku kakese ku kakese. Bafumina pa buloba bujima, “musumba munene” wa miliyo mivule ya batendeledi mbanyunguluke ntempelo wa mu nyuma wa Yehowa. Muanjelo wa Yehowa uvua muambile Yone ne: muntu nansha umue kavua mua kubadika bungi bua musumba eu munene. Abi bidi biumvuija se: kakuena mikalu miela bua bungi bua bantu badi kasumbu ka mupika ne bua kulua nabu ku ntempelo wa mu nyuma wa Yehowa nansha. Mu mutantshi wonso udi tshiibi tshiunzulula, mudimu wa disangisha udi ne bua kutungunuka.
10. Lelu’eu, mupika mmudifile ku dikumbaja mudimu kayi muwule tente ne dinanga?
10 Kasumbu ka mupika wa lulamatu kadi ne bujitu bunene bua kutabalela “mikoko mikuabu,” idi’anu yenda ivula. Kasumbu aka kadi ne bua kumanya se: bantu aba bafuanangane ne mikoko ne badi bafume mu matunga wonso badi ne mushinga mukole ku mesu kua Mfumu, Yezu. Badi benza tshisumbu tshiende tshia mikoko lelu’eu. (Yone 10:16; Bienzedi 20:28; 1 Petelo 5:2-4) Nunku, bua dinanga didibo nadi bua Mfumu ne bua mikoko eyi, kasumbu ka mupika kadi kapetesha musumba munene bionso bidiwo ukengela mu nyuma ne disanka dionso.
11-13. Mmiaku kayi mikumbanyine ivua mulombodi kampanda wa Watch Tower Society muambe pa bidi bitangila mudimu wa mupika?
11 Eyowa, tshitupa tshinene tshia mudimu wa batuadi ba butoke mupesha mupika ndisangisha dia ba bakokeshibue ba Bukalenge bua Nzambi bikala ne muoyo pa bulba. Pavuaye wakula bua midimu ya mupika wa lulamatu idi’amu yenda ivula, F. W. Franz, uvua mulombodi wa Watch Tower Society, wakamba kumpala kua lufu luende mu Décembre 1992 ne:
12 “Bilondeshile dimonamona dia mianda dindi mupete mu bidimu bianyi 99 bia muoyo, Yezu Kristo katu muanji kulekela kutumika ne bulongolodi mu mushindu wa dikema. Ki mmuntu udi ulombola bulongolodi, kadi, bushuwa mMukalenge Yezu Kristo. Bualu, mbulubuluke bipitshidile mushindu wa dikema utuvua katuyi nansha belele meji to. Lelu’eu, tudi ne bulongolodi budi bualabale pa buloba bujima. Budi bukuata mudimu ku emisfere Nord (hémisphère Nord) ne ku emisfere Sud (hémisphère Sud), ku Est ne ku Ouest. Anu muntu umu’epele ke udi mukumbanyine kupeta lumu bua dilubuluka edi dia dikema—Muana wa Nzambi, udi ulombola kasumbu ka mupika wa lulamatu ne wa budimu. Udi udileja mukumbane bua kukumbaja majitu ende, ke tshidi mene tshifikisha ku didiunda edi dia mpatshi ditudi badimuene.
13 “Mudimu kawena ukumbajibua kudi muntu umue to. Tudi ne bulongolodi budi ne mêyi-maludiki a Nzambi, budi butumika bilondeshile mêyi-maludiki a Nzambi, ku bulombodi bua Nzambi. Muntu nansha umue, nansha muashi muine wa Watch Tower Bible and Tract Society, kêna mua kudipesha anyi kupeshibua lumu bua bionso bidi bikumbajibue pa buloba bujima. Bushuwa, mbia dikema.” Aba buonso bena mu musumba munene kabenaku pabo ne mmuenenu wa muomumue pa kuitaba menemene miaku eyi ya muanetu wa balume Franz utudi bashale tujinga anyi? Eyowa, bushuwa, badi baleja dianyisha kudi Yehowa bu mudiye muvudije midimu ya mupika wa lulamatu.
Bakokeshibue ba Bukalenge
14, 15. (a) Ntshinyi tshivua Yezu muleje mu tshimfuanyi tshia ntalenta (Matayi 25:14-30)? (b) Ntshimfuanyi kayi tshikumbanyine tshitudi tusangana pashishe mu Matayi nshapita wa 25?
14 Mu Matayi nshapita wa 25, tshimfuanyi tshia mikoko ne bibujibuji tshilonda kudi Yezu tshidi tshiumvuija mudimu munene wa disangisha bakokeshibue ba pa buloba ba Bukalenge bua Nzambi. Mu tshimfuanyi tshidi ku mutu kuatshi, tshimfuanyi tshia ntalenta, Yezu udi umvuija se: balongi bela manyi ba lulamatu badi batekemena kukokesha nende mu Bukalenge buende bua mu diulu badi ne bua kuenza mudimu bua kuvudija biuma biende bia pa buloba. Nunku, mbikumbanyine menemene bua se: mu tshimfuanyi etshi tshidi tshitshilonda, Yezu kuleja malu malomba bantu aba badi basue kulua bakokeshibue ba Bukalenge buende bua mu diulu.
15 Mona tshidiye wamba mu Matayi 25:31-33: “Palua Muan’a muntu mu butumbi buende, ne banjelo buonso nende popamue, neasombe mu nkuasa wende wa bumfumu wa butumbi. Matunga wonso neasangishibue kumpala kuende, ne yeye neatapulule bantu, bamue ku bakuabo, anu bu mudi mulami utapulula mikoko ku bibujibuji. Ne neateke mikoko ku dia balume diende, kadi bibujibuji ku dia bakaji diende.”
16. Mmunyi mudi matunga masangishibue ne bantu batapuludibue?
16 Yezu wakalua mu butumbi buende mu 1914. Pa kulombola biluilu, yeye ne banjelo bende buonso bamutue mu nyima, wakela bena lukuna bende ba-demon mvita ne kubipata mu diulu. Tshitupa tshidi tshilonda tshia tshimfuanyi tshiende tshidi tshituambuluisha bua kujingulula ne: disomba dia Yezu mu nkuasa wende wa bumfumu wa butumbi, didi dileja mu tshimfuanyi se: udi utumika bu Mulumbuluishi mu tshikondo tshia dikalaku diende. Disangishibua dia matunga wonso kumpala kuende didi diumvuija mu ngakuilu wa tshimfuanyi ne: Yezu udi utumika pa matunga anu bu udi kumpala kua tshisumbu tshia bimuna. Tshisumbu etshi tshia bimuna tshidi ne mikoko ne bibujibuji. Pikalabi bikengela pamu’apa tshia-bibidi tshia dituku bua mulami kutapulula mikoko miena-dîna ku bibujibuji, mudimu wa pa buloba bujima wa ditapulula bantu badi ne budikadidi bua kudisunguila bimpe ne bibi udi ne bua kunenga bipitshidile. Bidi nanku bualu ditapulula ndishindamena pa bienzedi bia muntu ne muntu.
17. Bua tshinyi bienzedi bia muntu ne muntu bidi ne mushinga mukole lelu’eu?
17 Mu tshimfuanyi, Mukalenge-Mulami udi uteka bantu bafuane mikoko ku dia balume diende ne aba badi bafuane bibujibuji ku dia bakaji diende. Dia balume diende didi diumvuija dilumbuluisha dilenga, didi difikisha ku tshipeta tshimpe—muoyo wa kashidi. Dia bakaji didi dileja dilumbuluisha dibi—dia kabutu ka kashidi. Nunku, nkoselu wa tshilumbu etshi bua muntu ne muntu kudi Mukalenge udi ne mushinga mukole.
18. Bua tshinyi dibenga kumueneka dia Mukalenge kadiena mua kubingisha muntu nansha umue?
18 Dibenga kumueneka dia Mukalenge, Muan’a muntu, mu tshikondo tshia dikalaku diende, peshi pa·rou·siʹa, kadiena dibingisha muntu nansha umue. Lelu’eu, “mikoko” mivulavulayi idi idisangisha kudi kasumbu ka mupika bua kumanyisha lumu luimpe lua Bukalenge bua Nzambi pa buloba bujima, nunku benda bakenkesha butoke buabu. Bushuwa, bumanyishi buabu mbumuangalake mu bitupa bionso bia buloba.—Matayi 24:14.
19. Nngikadilu kayi milenga ya mikoko idi mizangika mu tshimfuanyi tshia mikoko ne bibujibuji?
19 Bua tshinyi Mukalenge-Mulami udi ufuta kasumbu ka mikoko pa kukapetesha nsombelu mulenga mu matuku atshilualua? Bualu, kadi kafila diambuluisha ne muoyo umue mu mudimu wa dimanyisha Bukalenge ne kadi kaleja bulenga kudi bana babo ne Kristo bela manyi, muanda udi Yezu utangila bu mumuenzela yeye muine. Ke bua tshinyi Mukalenge, Muan’a muntu, udi wambila mikoko ne: “Vuayi, nuenu bakabeneshibua kudi Tatu’anyi, nupiane bukalenge bunulongoluela katshia ku ntuadijilu wa bukua-bantu.”—Matayi 25:34; 28:19, 20.
Badi bambuluisha Mukalenge
20, 21. Mbijadiki kayi bidi mikoko ifila bua kuleja se: mmiditeke ku luseke lua Bukalenge?
20 Utabalele bua se: padi Mukalenge ubikila mikoko eyi bua kupiana buloba bukokesha kudi Bukalenge bua Nzambi, badi baleja kukatshila kuabu. Badi bamuebeja ne: ‘Mukalenge, ndîba kayi dituvua bakuenzele malu aa wonso?’ Udi ukudimuna ne: “Bulelela ndi nnuambila ne: Bu munuvua benzele umue wa ku batambe bukese ba ku bana betu aba, meme muine ke unuvua babienzele.” (Matayi 25:40) Yezu pakamuenekelaye Mariya Madelene dituku dia dibiishibua diende ku lufu, wakakula bua bana babo ba mu nyuma pa kumuambila ne: “Ndaku kudi bana betu.” (Yone 20:17) Mu tshikondo tshia dikalaku diende dikena-dimueka, Yezu udi’amu ne kasumbu kakese ka bashadile bela manyi ba ku bana babo ba mu nyuma 144 000 batshidi ne muoyo pa buloba.
21 Bu mudi Yezu mu mawulu kayi umueneka, yeye muine ki ng’udi bantu aba bafuane mikoko benzela buludiludi malu muwule tente ne dinanga nansha. Badi bamumona pa nkuasa wende wa bumfumu amu ne mesu abu a ditabuja. Yezu udi uleja dianyisha bua madikolela wonso adibo benza bua kuambuluisha bana babo ba mu nyuma, balua bapianyi pamue nende mu diulu. Bionso bidibo benzela bana babo udi ubibala bu bimuenzela yeye muine. Bantu bafuane mikoko badi benzela bena nkristo aba malu mempe bualu badi bitaba se: bushuwa, buobo aba mbana babo ne Kristo. Badi banyisha kabidi se: bushuwa, bana babo ne Kristo ba mu nyuma mbena-mpala ba Bukalenge bua Yehowa, ne mbasue kufila bijadiki bisunguluke bidi bimueneka bia se: badi baditeka nabo tshiapamue ku luseke lua Bukalenge ebu.
22. Mmunyi mudi kasumbu ka mikoko kafutshibua? (Fuanyikija ne Buakabuluibua 7:14-17.)
22 Yehowa uvua mupangadije se: kasumbu aka ka mikoko nekamueneke mu tshikondo etshi tshia dikalaku dia Muan’ende, ne mmubalamine difutu dia mpatshi! Musumba munene neupiane mabenesha a ditalala pa buloba apa mu Bukokeshi bua disanka bua bidimu tshinunu bua Mukalenge mujadika kudi Yehowa, Yezu Kristo.
23. Tela imue mishindu idi mikoko yambuluisha ne dimanya dionso bana babo ne Mukalenge.
23 Ntshinyi tshitudi tujingulula patudi tukonkonona milayi ya mu Bible idi yakula bua tshikondo tshia dikalaku dia Kristo, pamue ne tshimfuanyi tshia Yezu tshia mikoko ne bibujibuji? Tshitudi tujingulula ng’etshi: Muntu kêna ulua mukoko, udi Nzambi ne Mukalenge wende babala bu muakane, pa kuenzela umue wa ku bana babo ne Mukalenge ba mu nyuma malu mempe ku mpukapuka ne kayi mumanye nansha. Nansha mudibo kabayi bamona ne mesu abu a ku mubidi Mukalenge eu ukadi ukokesha, bena mu kasumbu ka mikoko mbamanye menemene bidibo benza. Badi badikolesha bua kuambuluisha bana babo ne Mukalenge, ki ng’amu ne bintu bia ku mubidi, kadi pa kubatuadila kabidi diambuluisha dia mu nyuma. Mmushindu kayi? Pa kubelesha diboko muabu muonso mu dimanyisha dia lumu luimpe lua Bukalenge bua Nzambi ne pa kulombola malonga a Bible bua kuenza balongi ba Kristo. Nunku, lelu’eu kudi batuadi ba butoke bapite pa miliyo inayi badi bamanyisha Bukalenge bua Nzambi.
Midimu mivulavulayi
24. Mmidimu kayi mikumbaja ne dinanga idi ivuija kasumbu ka mupika tshisamba tshia disanka dipitshidile pa buloba lelu’eu?
24 Tuanjibi kutela imue ya ku midimu milenga kabukabu mikumbaja kudi kasumbu ka mupika wa lulamatu. Tshia kumpala, kasumbu ka mupika nkateka ku mutu kua bintu bionso bia Mfumu—bipatshila bia Bukalenge buende pa buloba—ne tshiuma etshi tshidi’anu tshienda tshivula. Tshibidi, kasumbu aka kakena kadiisha amu bena mudimu bela manyi ne biakudia bia mu nyuma, apo kabidi ne musumba munene wa mikoko mikuabu udi’anu wenda uvula. Tshisatu, kasumbu ka mupika kadi kalombola mudimu wa dimuangalaja butoke bua Bukalenge. Tshinayi, didiunda dipite bunene dia midimu yende didi ditangila disangisha dia musumba munene wa mikoko mikuabu, idi ilombodibua too ne ku ntempelo wa Yehowa wa mu nyuma. Bualu buitanu, ne diambuluisha dijima dia “mikoko,” kasumbu ka mupika kadi kapetesha filiale ya bulongolodi idi mimuangalake pa buloba bujima, pamue ne tshilombuelu tshia pa buloba bujima tshidi ku Etats-Unis, nzubu minene idi ikengedibua. Midimu eyi mikumbaja ne dinanga idi ivuija kasumbu ka mupika tshisamba tshidi ne disanka dipitshidile pa buloba lelu’eu, ne badi bavuija bantu bakuabu miliyo ne miliyo bena disanka. Buonso buabu, badi bela Yehowa Nzambi ne Yezu Kristo tuasakidila wa manza tente, buobo badi balombola midimu mivulavulayi ya mupika wa budimu!
25. Mmunyi mudi mikoko mua kutungunuka ne kuelesha kasumbu ka mupika diboko, ne idi yenza nunku ne ditekemena kayi?
25 Kupita bikondo bikuabu, kasumbu ka mupika kadi kenza mudimu mpindieu ne tshisumi tshikole bua kukumbaja majitu mamomekela kudi Nzambi. Tshikondo tshidi tshishala kumpala kua “dikenga dinene” kubudikadi ntshipite kuipidila! (Matayi 24:21) Mmushindu kayipu udibi bia mushinga bua mikoko ya Nzambi kushalayi milamate ku luseke luimpe ludi lupetesha dianyishibua kudi Mukalenge-Mulami wende! Nunku, buonso buetu tutungunukayi ne kuelesha mupika wa lulamatu ne wa budimu diboko ne mitalu. Anu bienzayi nunku, ke mikoko yonso kumvuayi dituku kampanda dikadi pabuipi apa, miaku eyi ya disanka ne: “Luayi, nuenu badi babeneshibue kudi Tatu’anyi, nupiane bukalenge bunulongoluela katshia ku ntuadijilu wa bukua-bantu.”
Udiku mua kuandamuna anyi?
◻ Ndilumbuluisha kayi diakalonda dibanjijibua dia Mukalenge?
◻ Mmunyi mudi Matayi 24:45-47 mupete dikumbana diende mu tshikondo tshietu etshi?
◻ Pa bidi bitangila midimu mivulavulayi, kasumbu ka mupika ne musumba munene badi bela Yehowa tuasakidila wa manza tente bua midimu kayi menemene?
◻ Mmunyi mudi Matayi 25:34-40 ukumbana mu pa·rou·siʹa?
[Tshimfuanyi mu dibeji 16]
Mukalenge mmupeshe mupika wa lulamatu bintu biende bionso
[Tshimfuanyi mu dibeji 18]
Yezu wakasomba mu nkuasa wende wa bumfumu wa butumbi bua kulumbuluisha bantu