Bamanyishi ba Bukalenge badi balonda

Bululame budi bubingisha mudimu wetu

BULULAME mbualu bua nshindamenu bulomba bena nkristo. Mupostolo Paulo mmufunde mu Ebelu 13:18 ne: “Tudi ne dishindika dia se: tudi ne kuondo ka muoyo kalulame, ne dijinga dia kuikala ne nsombelu mululame mu malu wonso.” Bululame buetu budi ‘bubingisha dilongesha dia Mutupandishi wetu, Nzambi, mu malu wonso.’ (Tito 2:10) Ke mudi bululame pamue ne mudimu wa buambi bia bena nkristo babidi bamanyishi ba bukalenge ku tshidiila tshia Tonga, ku Sud wa mbuu wa Pasifike, bifile bumanyishi bulenga. Filiale wa Société Watch Tower wa ditunga dia Samoa occidentales udi ulonda ne:

“Munkatshi mua bidimu bisatu, bena dibaka kampanda, Bantemu, bakambila bantu ba mu misoko inayi ya mu tshidiila tshiabu malu adi atangila Bukalenge bua Nzambi, kadi, kakuyi tshipeta tshia nsongo. Pashishe, pavua bayende usama, mukaji wakashala utumika nkayende mu mudimu wabu wa budimi bua coco, uubula ne umisha misa ya coco, ke wabo mushindu umu’epele uvuabo bapetela dieya. Pakakumbana tshikondo bua basumbi kukenketabo misa ya coco, kuvua tshibombi tshia muntu kampanda tshivua tshibuelakane ku bitanu bia muanetu wa bakaji. Ke bena musoko kumubelabo bua kulama tshibombi etshi tshia pa mutu ne ku tshibala bu dibenesha dia kudi Nzambi. Kadi, wakabenga, ne pakasuabo kumusumba bibombi bionso bisambombo, wakanyisha amu mushinga wa biende. Bululame buende buvua bumueneshibue patoke.

“Kunyima, pakaya mulume mu tshidiila tshikuabo, ngenda-mushinga wa mu musoko wende wakamulomba bua kumusumbila bimue bintu. Ke tshiakenza Ntemu eu, ne kupingajila muntu awu makuta avua mashale. Muntu awu wakakema bikole. Wakamba ne: bivua bua musangu wa kumpala bua kumona muntu umupingajila makuta avua mashale. Aba buonso bavuaye ulomba bua kumusumbila bintu bavu’amu bakalama ne makuta. Musangu mukuabo kabidi, pavua Ntemu eu ukengela kupeta tshintu kampanda mu magazin a muntu eu, wakamona amu bamupesha nsapi ya magazin bua kuangata tshivuaye ujinga ne kushiya mfranga kumpala kua kuyaye. Bantu bakuabo bakebeja ngenda-mushinga bua tshinyi uvua ufila nsapi amu kudi Ntemu, kayi ubapesha pabo. Wakabumvuija ne: Ntemu eu uvua muntu umu’epele wa kueyemena mu musoko.

“Bena musoko bakayukidilangana nkayabo pa nsombelu mulenga wa bena dibaka aba. Bantemu mbamanyike bua bululame buabo, mmuenenu wabo wa ndubidilu mu mianda ya politike ne mudimu wabo wa kumanyisha Bukalenge bua Nzambi, udi uleja dishilangana pankatshi pa mitabuja a bena musoko ne malongesha a mu Bible. Mpindieu, padi bena musoko badiebeja malu kampanda pa bidi bitangila Bible, badi baebeja Bantemu bua kupetabo mandamuna. Mu butuku kampanda, mulume mene wakajuuka pa bulalu e kupatuka bua kubuela mu tshisangilu kampanda tshia bena musoko bua kuandamuna ku nkonko pa tshiena-bualu kampanda tshia mu Bible. Patuye uya ku nzubu wa madilu, misangu mivule, batu bamulomba bua aleje tshidi Bible wamba pa bidi bitangila lufu, ne batu banemeka mêyi ende.”

Nenku, bululame bua bana betu aba, wa balume ne wa bakaji, pamue ne mudimu wabo wa kumanyisha Bukalenge bidi bifila bumanyishi bulenga mu tshidiila etshi tshilengele tshia ku Sud wa mbuu wa Pasifike. Badi ne ditekemena dia se: bantu bakuabo kabidi nebalonge Bible ne nebaditeke ku luseke lua bulelela. Bienzabo nenku, Yehowa Nzambi kakupanga kubabenesha nansha.​—Yone 8:32.