Wakaluangana bua ditabuja diende

KUKADI bidimu bisatu, Caridad Bazán Listán, umue wa ku Bantemu ba Yehowa ku Cadix, mu Espagne, bivua bikengela kumupanda ne lukasa luonso. Tubulutubulu tuvua tudiunguija mu dimuma diende dia muoyo tuvua tumepesha mubidi luya ne tunyanga mashi ende. Kunyima kua yeye mumane kuanyishibua mu tshibambalu kampanda tshia lupitadi, wakumvuija mmuenenu wende muashila pa Bible uvua umukandika diedibua mashi mu mubidi. Ba doktere bakitaba bua kumupanda kakuyi dimuela mashi. Kadi, kumpala kua kumutualabu mu tshibambalu mutubu bapandila bantu, ba-doktere bakamulomba bua yeye kutua tshiala pa dibeji kampanda. Dibeji edi divua dileja se: bavua badiakaje bua kunemeka dipangadika diende pa bidi bitangila mashi, kadi bavua basue bua kubapeshaye dianyisha dia kumuondopa ne buanga kayi buonso buamonabu se: budi bukengedibua biamuenekaku njiwu.

Mukulu kampanda wa mu tshisumbu uvua mu lupitadi pamue ne muana wa Caridad wa balume, udi pende Ntemu, bakamuleja tshivua ditua tshiala pa dibeji adi diumvuija. Ditua diende dia tshiala pa dibeji divua ne bua kufila dianyisha kudi ba-doktere bua kumuela mashi mu mubidi biamuenekaku njiwu. Pavuile bena mudimu ba mu lupitadi bua kumutuala mu tshibambalu mutubu bapandila bantu, wakabambila ne: kakutua tshiala pa dibeji adi nansha. Bakamupingaja ne lukasa luonso mu tshibambalu tshiende tshia mu lupitadi ne kumusaka ku bukole bua kushintulula lungenyi luende.

Kunyima kua mayukidilangana mavule, bakapangadija bua kubikidisha nzuji kampanda bua kumuitabijija ku bukole, kadi abi kabivua ne dikuatshisha nansha dimue. Caridad wakumvuija se: uvua ne bua kulua muena tshibawu kumpala kua Nzambi biafilaye kudibu dianyisha dia kumuela mashi. Wakabaleja se: mu Mikenji ya Mozese, biakuatshibua mukaji kampanda ku bukole bua kuenda nende masandi, kavua ne bua kuangatshibua bu muena tshibawu biakandamanaye ne kuela mbila ya kulomba diambuluisha. (Dutelonome 22:23-27) Wakamba ne: “Ba-doktere kabena bangata disua dianyi ne mushinga ne badi bakeba bua kunyanga kuondo kanyi ka muoyo ku bukole, ne pa nanku, ndi ne bua kutua nkanana mushindu wa muomumue bu pavuabu mua kukeba bua kuenda nanyi masandi ku bukole.”

Mêba mavule akapita, ne ndekelu wa bionso, ba-doktere bakapunga dîyi bua kumupanda kakuyi dimuela mashi mu mubidi. Mu tshibambalu mutubu bapandila bantu, Caridad wakalomba dianyisha bua kusambila Yehowa. Ke tshiakenzaye, ne dipandibua diende diakenzeka bimpe bitambe.

Kadi, pashishe, makanda a mubidi a Caridad akanyanguka bikole, ne ba-doktere bakapangadija bua kubenga kulonda disua diende ne kumuela mashi mu mubidi ku bukole. Nunku, doktere kampanda ne munganga mukaji kansanga bakadiakaja bua kumuela mashi mu mubidi. Kadi, nansha muvuaye kayi ne makanda a mubidi mimpe, Caridad wakasumpakana muende muonso. Wakafika too ne ku dikosa ne menu kanshinga kavua mashi ne bua kupitshila. Ndekelu wa bionso, bundu buakakuata doktere bua bivuaye wenza, ke kulekelaye. Doktere wakamba ne: “Tshiena mua kutungunuka ne kuenza muanda eu to. Ngalekedi kashidi!”

Caridad wakapanduka ku bubedi ebu ne kupetulula makanda ende a mubidi kakuyi ntatu mivule. Dikima ne ditabuja biende biakakemesha bikole ba-doktere ne ba-minganga. Bionso abi biakenzeka pavua Caridad ne bidimu 94.