Mushindu wa kupeta disanka mu nsombelu wa dîku

“DÎKU didi dienda difua ku kakese ku kakese,” ke muakamba, tshidimu tshishale, mufuidi kampanda wa nkuasa wa bukalenge bua ditunga dia Etats-Unis. Eyowa, bidi bikemesha bikole pa kumona mushindu udi dîku dinyanguka. “Mashintuluka a mushindu’eu, bu wowu menzeke mu tshikondo tshimue, pa bidi bitangila malu a bubanji bua ditunga anyi a matanda avua mua kutukosa mueyelu,” ke muakaleja tshikandakanda tshia Fortune.

Nansha mêku atu enza muawu muonso bua kulonda mêyi-maludiki a mu Bible atu’anu misangu mivule apetangana ne diakabi. Kukadi bidimu bikese, muena nkristo kampanda, uvua ne majinga mempe, wakambila tatu kansanga wa bana basambombo ne: “Udi mua kuela meji ne: banayi ba ku bana bebe badi mua kumbuka mu bulelela anyi?” Kadi, tatu’au wakabenga kuidikija mua kuela meji nansha bua umue wa ku bana bende kulekelaye bulelela. Udi umvuija bua tshinyi:

“Bushuwa, bana betu ki mbetu menemene to,” ke muakambaye. “Yehowa Nzambi mmutupeshabu, badi ‘bumpianyi,’ dipa. Pashishe, wakamba ne: bu tuetu bakoleshe bana betu mu njila muakane, ‘kabakupatukamu nansha.’ Bia muomumue, mukajanyi ne meme, tutu tuenza muetu muonso bua kubatabalela anu bu bana ba Yehowa.”​—Musambu wa 127:3; Nsumuinu 22:6.

Tatu wa dîku eu wakajingulula mushindu wa kupeta disanka mu dîku: baledi badi ne tshia kutabalela babo bana anu bu bana ba Nzambi. Ki nkuamba ne: benu bana nebumvue anu musangu umue mibelu yenu milenga to, kadi, nudi ne bujitu bua kutabalela bidi Nzambi munupeshe.

Mudimu wa bujitu bunene

Nuenze mudimu eu biakane, ne kanemu pashishe dibuejayi ne kasuki mu mudimu’eu, kanuwenji ne lulengu peshi ne dipetu. Filayi dîba dienu ne makanda enu mu mudimu eu, eku bamanye ne: nenuandamune kudi Nzambi bua bumpianyi ebu, dipa didiye munupeshe. Kuteta nkoleshilu mishilangane kakuena ne mushinga nansha kakese. Mibelu idi Nzambi mufundishe mu Bible, Dîyi diende, mmikumbane, ne baledi badi ne bua kuyilonda ne muoyo umue.

Yehowa Nzambi udi utupesha dîyi-diludiki edi: “Udi ne bua kualongesha [mêyi aa] muanebe, kumuambilawu pawikala musombe mu nzubu muebe, ne pawikala wenda mu njila, ne pa kulala, ne pawudi ubiika. Udi ne bua kuasuika bu tshimanyinu ku tshianza tshiebe, ne adi ne bua kuikala bu tshilenga pankatshi pa mêsu ebe, ne udi ne bua kuafunda ku mabaya a tshiibi tshia nzubu webe ne ku biibi biebe [bia lupangu].” Bible udi kabidi utukankamija ne: “Ne nuenu ba-tatu, . . . tungunukayi ne kubakolesha mu mibelu ne manyoka pamue ne buludiki bua lungenyi bia Yehowa.”​—Dutelonome 6:7-9; Efeso 6:4.

Kukolesha bana mu mushindu’eu kudi kukengela ntema ya ku dituku ne ku dituku; eyowa, nudi ne bua kusomba nabu dîba dikumbanyine ne dijinga dia kubaakaja, pashishe kubatabalela ne dîsu dikole. Baledi badi benzela babo bana bintu bituatedi ebi badi benza bionso bidi Nzambi mubalombe bua kupeta disanka mu nsombelu wa dîku.

Nudi bamone ne: mikenji eyi mmipite bukole anyi? Baledi ba bungi batu bela meji mushindu’au pa kumona bienzedi biabu. Kadi numanye ne: benu bana, tshipedi tshia Nzambi, badi bakengela ntema ya pa buayi.

Mushindu wa kutabalela bana

Bidi bia meji bua kuelangana lungenyi pa tshilejilu tshia baledi ba tshitembu aba badi bakolesha bimpe bana babu. Tshikandakanda tshia U.S. News & World Report tshiakapatula mu nimero watshi wa mu dia 12 Décembre 1988, tshiena-bualu etshi: “Mêku a dikema.” Tshiena-bualu etshi tshiakaleja malu anayi adi ambuluisha mu nkoleshilu muimpe wa bana: “[1] Dîba dia didia ku mesa, diyukila didi disonsola tshieledi tshia lungenyi, [2] dibala dia mikanda milenga, [3] buenzeji bua bantu badi ne nsombelu wa tshitembu, ba lungenyi lutabuluke ne [4] kanemu ka bikadilu bilenga bia mu dîku.”

Pa bidi bitangila “diyukila dîba dia kudia,” kanupu muoyo ne: Nzambi udi utumina baledi dîyi bua kulongesha bana babo padibo basombe nabu mu nzubu. Dîku diebe ditu ne tshibidilu tshia kusangila bua kudia, ngenzelu udi wambuluisha bua kupetangana kaba kamue dituku dionso bua kushintakajangana mêyi adi ibaka anyi? Mêba aa akêna kupua muoyo adi ne mushinga mukole bua bana ne badi badiumvua bakubibue, mu dîku didi ne nsombelu mushindame. Muana wa balume kampanda wa bidimu bisambombo wakamba ne: mmunange bikole dîba dia didia “bualu kakuena ditatshisha lungenyi bua bakuabu,” bualu bantu buonso badiku.

Netuambe tshinyi bua diyukidilangana dienu ku mesa? Ndishindamene misangu mivule pa malu adi mu “mikanda milenga,” bu mudi Bible ne mikanda idi yumvuija Bible idi yakula bua mudimu wetu munsantu peshi bua bifukibua bia Nzambi anyi? Pa kumusha mayuki aa mashila pa malu a mu nyuma, baledi badi ne bua kukolesha munda mua bana babo dinanga bua Yehowa ne bua mikenji yende miakane ku diambuluisha dia dilonga dia ku musangu ne ku musangu.

Tatu wa dîku utukadi bakule bualu buende wakumvuija ne: “Katuvua ne lutatu nansha lukese bua kudia biakudia bietu kaba kamue. Bivua tshibidilu, ne mêba aa a kudia avua akolesha malanda etu. Kadi, tuvua ne lutatu bua kulonda misangu yonso programme wetu wa dilonga dia Bible.” Ku ndekelu wa dituku dia mudimu mukole, bivua bienzeka bua muena nkristo eu kulala, mupungile bikole, munkatshi mua dilonga. Kadi, uvua udikolesha matuku wonso bua kulombola diyukilangana edi pa Bible ne bana bende; kabidi, uvua wangata dîba ku musangu ne ku musangu bua kuakula ne yonso wa kudibo, ne ubateleja musangu mule.

Pa kumusha diyukidishangana dilenga ku mesa ne dibala dia mikanda milenga, utu upesha bana bebe mushindu wa kupetela masanka ku “buenzeji buimpe bua kudi bantu badi ne nsombelu wa tshitembu, ba lungenyi lutabuluke anyi”? Bushuwa, biwikala musue kuambuluisha bana bebe bua kupetabo disanka mu nsombelu wabu wa bukulumpe, bidi bia mushinga bua kutantshilabo ku musangu ne ku musangu aba badi bidikija nsombelu wa Yezu Kristo, muntu mutambe bunene wa katshia ne katshia.

Bua kujikija, netuambe tshinyi bua “kanemu ka bikadilu bilenga bia mu dîku”? Bana bebe badi ne bua kumanya se: badi ne bua kuenza madikolela a kunemeka bikadilu bilenga ebi, ne kudi imue mmuenenu, ngakuilu, mvuadilu ne ngenzelu idi kayiyi mua kuanyishibua ne idi mibengangane ne bikadilu bilenga ebi bia mu dîku. Badi ne bua kujingulula mudibi bibi menemene bua kuenza nunku, ne kabidi ngenzelu wa mushindu’eu neakubungamije bikole, anu bu Yakoba, nkambua wa kale, wakalua “tshintu tshia mupuya mubi bua bena ditunga” bua bienzedi bia bundu bia bana bende.​—Genese 34:30.

Tatu eu wa diku uvua wangata bana bende basambombo bu bintu bia bende bia Nzambi uvua ushindamena pa “bikadilu bilenga bia mu dîku.” Misangu yonso, uvua umvuija bana bende mushindu uvua dîku dilonda lungenyi ne bulombodi bia Nzambi ku mvuadilu ne nkoselu wa nsuki, ne pa kuimansha bienzedi bia bena mu bulongolodi ebu. Baledi aba bakafila dîba divule, dinanga ne kuditatshisha bua kukolesha bana babo basambombo mu njila mukumbanyine, ne bine bana aba bakenza tshivua tshimpe ‘pa kubenga kusesuka mu njila muakaja bua bualu buabu.’​—Nsumuinu 22:6.

Pa buloba bujima, mêku binunu ne binunu adi mu nsombelu mushindame wa muomumue. Adi butumbi bua Mufuki wa mêku, ne difutu bua baledi bena kudifila ne buwule tente ne dinanga. Mu kupita kua bidimu, bana badi baleja baledi babu dianyisha divule bua madikolela avuabo benze. Tudi tunulomba mpindieu bua kubala muyuki wa mukaji kampanda uvua mukolesha kudi baledi bena nkristo, ne kueleela meji pa malongesha a mushinga mukole anudi mua kupetelaku.