Bantemu ba Yehowa pa buloba bujima: Ditunga dia Philippines

BIDIILA 7 083 bia mabue mudi mivu ya mvula ne mushipu bidi bienza ditunga dia Philippines ntshitupa tshia ku mutu tshia ku tshitupa tshia mulongolongo wa mikuna idi midiine mu mâyi.a Bantu 62 000 000 badi bâse mu Philippines batu bananga kuyukidilangana pa tshiena-bualu kayi tshionso. Ngikadilu eu wa bulunda udi ubavuija budimi bua bufuke budi bupetesha mushindu wa kufila bumanyishi bua Bukalenge.

Bumanyishi mu kalasa

Mu tshidiila tshia Masbate, nsongakaji wa mu kalasa kampanda kabandile wakapeta mushindu wa kufila bumanyishi kudi mulongeshi wende ne kudi bena mu kalasa kabu dîba dia diteta divua dikengela amu kuandamuna bulelela peshi dishima. Udi ulonda ne:

“Lukonko luvua luamba ne: ‘Bikala Nzambi munnange, kêna mua kumfikisha ku ntatu anyi kundekela nkenga.’ Pavua mulongeshi wanyi ulongolola mabeji etu a diteta, wakajingulula se: buonso, pa kungumbusha bakandamuna ne: bulelela. Mulongeshi wanyi wakandomba bua meme kumvuija bena mu kalasa bua tshinyi ngakandamuna ne: dishima. Nngakamba ne: ki nNzambi udi utufikisha ku ntatu to, nansha mudiye muanji kulekelela makenga ne wanyisha bua tuetu kutetshibua. Pa kutumika ne Bible wanyi, umvua pa tshibidilu ntuala mu kalasa, ngakeelelangana meji pamue ne bena mu kalasa [ketu] pa miaku idi mu 1 Yone 4:8, ‘Nzambi udi dinanga.’ Kunyima kua diumvuija dianyi, mulongeshi wanyi wakatuishibua, kututa [tshianza] pa tshibasa tshiende, e kuamba ne: ‘Marilou wambi bulelela.’ Anu meme ke uvua mufile diandamuna dilelela ku lukonko elu ne anu meme ke upetele mpue mivule.”

Mukenji wa Bukalenge udi muaba wonso

Pavuaye mu mudimu wa ku nzubu ne nzubu mu tshitupa tshikuabo tshia ditunga dia Philippine, muanetu kampanda wa bakaji mpanda-njila wa pa tshibidilu (mumanyishi wa ku dîba ne ku dîba wa lumu luimpe) wakapetangana ne mamu kampanda wa bana batekete basatu. Mukaji eu wakaleja dijinga dikole dia kumanya bia bungi pa bidi bitangila mukenji wa Bukalenge, ne ebi, biakapetesha mushindu wa kutuadija dilonga dia Bible pamue nende. Nansha muvua bayende kayi usanka bua malongesha a mu Bible avuaye upeta, nangananga kudi Bantemu ba Yehowa, dilonga diakatungunuka.

Mulume eu wakaya ne dîku diende mu tshimenga tshikuabo, wela meji ne: ebi bivua mua kukosa diumvuangana dia mukajende ne Bantemu. Kadi, kabiakanenga to bua kumanya muaba uvua mukaji awu usombela, ne wakatuadija tshiakabidi dilonga diende dia Bible. Eyowa, bayende wakanyingalala bikole. Wakatuala tshiji tshiende too ne pa muaba wende wa mudimu, payilaye kudiabakena kudi muntu kampanda uvua mulue kulongoluesha mashinyi ende. Tatu eu kavua mumanye se: muntu awu uvua mulue kulongoluesha mashinyi uvua umue wa ku Bantemu ba Yehowa to.

Ntemu eu wakamumvuija ne: nebikale diambuluisha dinene bua dîku dijima biatungunuka mukajende ne malonga ende a Bible. Neatuadije kutumikila mêyi-maludiki a Bible mu nzubu. Wakamuambila kabidi ne: yeye [bayende] pende uvua mua kupetela masanka mavule ku dilonga malu adi atangila Bukalenge bua Nzambi.

Diyukidilangana edi diakapatula tshipeta kayi? Mukaji wa mulume eu wakapeta budikadile buvule bua kulonga Bible, ne wakapangadija bua kupingana ne dîku diende muaba uvuabu basombele kumpala. Kuine aku, mukaji eu wakalubuluka mu nyuma, kuvuaye too ne mumanyishi wa Bukalenge udi kayi muanji kutambula. Bayende pende wakanyisha dilonga dia Bible, ne dîku dijima diakatuadija kubuela mu bisangilu bia bena nkristo.

[Mêyi adi kuinshi]

[Kazubu mu dibeji 8]

NSOMBELU WA DITUNGA

Tshidimu tshia mudimu tshia 1993

BUNGI BUBANDILE BUA BAMANYISHI: 116 576

BUNGI KU MUNTU: Ntemu 1 bua bantu 549

BUNGI BUA BAVUA MU TSHIVULUKILU: 357 388

MWAYENE WA BAMPANDA-NJILA: 22 705

MWAYENE WA MALONGA A BIBLE: 94 370

BUNGI BUA BATAMBULE: 7 559

BUNGI BUA BISUMBU: 3 332

BIRO BIA FILIALE: MANILLE

[Tshimfuanyi mu dibeji 9]

Bumanyishi bua mu tshisalu budi bupatula bipeta bimpe

[Tshimfuanyi mu dibeji 9]

Biro bia filiale wa Société Watchtower mu Manille