Bantemu ba Yehowa pa buloba bujima​—Ditunga dia Bahamas

DITUNGA dia Bahamas​—nsangilu wa bidiila binene ne bikese 3 000—​didi bu busanga bua mu nshingu buenza ne mabue, didi ne bualabale bua kilometre 900 mu mbuu munene pankatshi pa Florida ne Cuba. Munkatshi mua bantu 267 000 badi bâsemu, mudi tshisumbu tshia tungimba tua mêyi matue tua bamanyishi ba Bukalenge. Musambu wabu wa disamuna udi uvuluija Yeshayi 42:10-12: “Imbilayi Yehowa musambu mupiamupia, butumbi buende kumbukila ku ntengu ya buloba, nuenu bantu badi bapueka mu mbuu munene ne tshidi tshimuwuja, nuenu bidiila ne nuenu badi bâsepu. . . . Kumbukila ku lusongo lua mikuna, lekelayi bantu bele lubila lukole. Nubalekele bape Yehowa butumbi, ne mu bidiila nubalekele benda bamusamuna.”

Ditabuja dipiadipia didi dibuejibua mu diteta

Mu ngondo wa Kashipu wa tshidimu tshishale, mpanda-njila kampanda wa pa tshibidilu (mumanyishi wa Bukalenge wa ku dîba ne ku dîba) wakashiila muenzejanganyi nende kansanga wa mudimu wa ku mubidi mukanda wa Udi mua kuikala ne muoyo wa kashidi pa buloba bukudimuna mparadizu udi wambuluisha ku dilonga Bible. Pakajikijaye kubala mukanda, wakadiambila mundamunda ne: ‘Tshitendelelu etshi ntshintu tshindi ne bua kukenketa menemene.’ Mbingu ibidi milondangane, wakabuela mu bisangilu mu Nzubu ya Bukalenge ibidi mishilangane ya Bantemu ba Yehowa. Pashishe, bakatuadija kulonga nende Bible. Kadi, kunyima anu kua mbingu isambombo katshia watuadija malonga ende a Bible, diteta diakajukila ditabuja diende dipiadipia​—mafesto a mufikilu.

Dîku dia muena-kantu ku bianza eu divua dinange bikole bitambe mafesto a mushindu’eu, kadi, dinanga diende bua Dîyi dia Nzambi diakamusaka ku ditungunuka ne malonga ende a Bible. Bu muvua dimanya diende dia bulelela bua mu Mifundu dienda divula, nenku dijingulula diende bua tshidi mafesto a mufikilu umvuija ne matuku a diikisha atu enzeka pa buloba bujima pamue ne mmuenenu wa Yehowa pa bidi biatangila diakavula padi.

Dîba diakalongolola mukaji wa muntu eu tshibilu bua kuenza difesto dia Ba-tatu, ne kanemu kuonso, wakabenga bua kudisangisha nabo. Mukajende wakamona se: kavua mumunange kabidi nansha, uvua wangata tshitendelelu tshiende ne mushinga kumupita yeye ne dîku diabo. Ne lutulu luonso, wakamumvuija ne: ditumikila bivuaye ulonga mu Bible divua dimuambuluisha bua kuikala mulume ne tatu wa tshitembu. Ndekelu wa bionso, mukajende wakatuadija kunanga dilonga diende dia bulelela budi mu Mifundu minsantu, ne kuanyisha pende bua kulonga Bible. Mpindieu, ukadi ulombola dilonga dia Bible mu dîku diende. Ne ndisanka kayipu divuaye nadi mu Mpuilu wa “Dilongesha dia Nzambi” uvua muenzeke tshidimu tshishale etshi! Mukajende pamue ne muanende wa bakaji bavuamu pabo, ne kumumonabo utambushibua.

Bena tshimuangi badi bateleja musambu mupiamupia

Binunu bia bena tshimuangi bena ditunga dia Haïti mbazobakane mu bena ditunga dia Bahamas. Badi kabidi bajinga kuteleja musambu mupiamupia wa bulelela bua Bukalenge. Bantemu badi mu Bahamas badi bela tuasakidila kudi mêku abidi a balume ne bakaji ba bena Haïti ba ku Amerike batshidi bafikilaku. Bantu aba bakambuluisha bua kushindamija bisumbu bia bena Haïti bivuabo bafumineku ku diasa mu bidiila bia Grand Bahama ne Abaco.

Bu diambuluisha dikuabo kudi bena Haïti, bavua ne dijinga dia kumanya bia bungi pa bidi bitangila mukenji wa Bukalenge, bakenza Mpuilu wa kumpala wa bena Haïti batu bakula muakulu wa Créole mu Bahamas mu dia 31 Kashipu too ne mu dia 1 Tshimungu 1993. Bantu bavuamu bavua 214. Bantu bapiabapia basatu bakavua badilambula kudi Nzambi bakatambushibua. Bena Haïti bavule bavua balonga bulelela mu Bahamas bakadi bapingane mu tshidiila tshiabo muvuabo basombele anyi baye kuasa mu miaba mikuabo bua kusangisha mêyi abo ku a Bantemu ba mu miaba ayi bua kusamuna Yehowa.

[Kazubu mu dibeji 8]

NSOMBELU WA DITUNGA

Tshidimu tshia mudimu 1993a

BUNGI BUBANDILE BUA BAMANYISHI: 1 294

BUNGI KU MUNTU: Ntemu 1 pa bantu 197

BUNGI BUA BAVUA MU TSHIVULUKILU: 3 794

MWAYENE WA BAMPANDA-NJILA: 186

MWAYENE WA MALONGA A BIBLE: 1 715

BUNGI BUA BATAMBULE: 79

BUNGI BUA BISUMBU: 22

BIRO BIA FILIALE: NASSAU

[Mêyi adi kuinshi]

[Tshimfuanyi mu dibeji 9]

Nzubu wa Bukalenge wa kumpala, muikale ne biro bia filiale pamue ne nzubu ya ba-misionere

[Tshimfuanyi mu dibeji 9]

Bantemu badi bamanyisha ne mitalu yonso lumu luimpe

[Tshimfuanyi mu dibeji 9]

Milton G. Henschel ne Nathan H. Knorr pamue ne ba-misionere mu Nassau kukadi kupite bidimu bu 45

[Tshimfuanyi mu dibeji 9]

Biro bipiabipia bia filiale, biakabanjijibua mu dia 8 Luishi 1992