Bamanyishi ba Bukalenge badi balonda

Bulelela bua mu Bible budi buvuija buobumue mu dîku

LELU’EU, mu miaba mivule pa buloba, buobumue bua dîku kabutshienaku kabidi. Kadi, Bible udi usokolola nsapi wa buobumue bua dîku. Konkonona mêyi a Yezu: “Muntu yonso udi umvua mêyi anyi ne waatumikila neikale bu muena meji, wakiibaka nzubu wende pa mutu pa dibue.” (Matayi 7:24) Mêku binunu ne binunu a Bantemu ba Yehowa adi mu buobumue pa kutumikila mêyi aa ne pa kutumika ne Bible bu tshishimikidi bua kuibaka dîku didi mu buobumue. Bakuabo pabo badi babueja buobumue bua mushindu’eu anu bu mudi bualu ebu bumona buleja.

Pavua Daniel utumika mu tshiluilu tshia masalayi mu France, Omonié wa tshitendelelu wakalomba bua Daniel asumbe Bible, ke tshiakenzaye, ne wakatuadija kumubala pa tshibidilu. Pashishe, wakatumibua ku Tahiti. Bamue basalayi benzejanganyi ba mudimu ne Daniel bavua ba-adventiste, bakuabo bavua ba Mormon. Miyuki yabo ivua misangu mivule miibakila pa malu a Nzambi. Dituku kampanda, musalayi uvua ne muanzu wa sergent-chef wakaleja Daniel kudi mukajende uvua umue wa ku Bantemu ba Yehowa. Wakapitshisha [mukaji eu] dilolo dijima muikale wandamuna nkonko mivule ya Daniel ne wakamuleja pende kudi tshisumbu tshia muaba awu mu Tahiti. Kakanenga bua kutuadija dilonga dia Bible dia pa tshibidilu.

Baledi ba Daniel bavua bashale ku France bavua bena Katolike ba tshitembu. Tatuende uvua mufidi wa mibelu ne uvua muomekela bujitu bua kulongesha malu a Nzambi mu tshilongelu tshia ekleziya Katolike. Bu muvuaye ujinga se: baledi bende bababidile pabo ngumvuilu ya mushinga mukole ya malu a mu nyuma avuaye ulonga, ku kakese ku kakese, Daniel uvua usakidila ngenyi mikese ya mu Bible mu mikanda yende ivuaye ubafundila.

Ku ntuadijilu, mamuende wa Daniel uvua ne disanka, kadi pashishe dimona dîna dia Yehowa mu umue mukanda uvua muanende wa balume mumufundila diakamutonda bikole. Matuku makese kunyima, wakateleja ku tshisanji bamba ne: Bantemu ba Yehowa “ntshitendelelu tshia njiwu.” Wakafundila Daniel mukanda, umutumina dîyi bua kukosaye diakamue diumvuangana dionso divuaye nadi ne Bantemu ba Yehowa. Apo, Daniel uvua wenda ulubuluka mu dilonga diende dia Bible ne wakadilongolola ne lukasa luonso bua kumbuka mu mudimu wa tshiluilu tshia masalayi ne kupingana ku France.

Diakamue pakalukilaye ku mbelu kuabo, Daniel uvua upitshisha dilolo dionso​—misangu mikuabo too ne ku shòò butuku—​uyukidilangana mutantshi mule pa bidi bitangila Bible ne mamuende. Ndekelu wa bionso, wakanyisha kuya ne Daniel mu Nzubu wa Bukalenge. Pakabuelaye mu tshisangilu tshiende tshia kumpala, wakatuibua bikole ku muoyo, ke kutuadijaye dilonga dia pa tshibidilu diende nkayende dia Bible. Wakalubuluka lukasa lukasa ne kunyima kua matuku makese wakatambushibua.

Tatuende wa Daniel uvua muntu uvua wangata mmuenenu ya bakuabo ne mushinga, kadi uvua mudifile ne kasuki mu midimu yende ya ku mubidi ne ya malu a Nzambi. Bualu bukuabo, musangu kampanda, wakambula mukajende ne Daniel mu mashinyi too ne ku mpuilu wa distrike. Bivua mu dia 14 Kashipu, mu tshieledi tshiende tshia lungenyi uvua wela meji ne: neaye kubandila ngendu ya mazengu ya difesto dia Bastille mu tshimenga. Patshivuaye windila, wakangata dipangadika, bua dijinga patupu dia kumanya bia bungi, dia kuanji kutapa dîsu munda mua nzubu wa mpuilu. Ditalala ne bulongame biakamonaye munkatshi mua tshisamba tshia Yehowa biakamukemesha, ne pavuaye wendakana ku bibambalu bionso bishilangane bia mpuilu, yonso uvua umumona uvua anu umubikila ne: “muanetu.” Wakapua muoyo bionso bivua bitangila ngendu ya mazengu ya difesto dia Bastille, e kusombaye too ne pakajika mpuilu. Wakalomba dilonga dia Bible ne kulubulukaye lukasa lukasa mu dilonga bulelela. Kadi, pavua dimanya diende dienda divula, wakatuadija kudiumvua bibi bitambe bua nsombelu ya mudimu wende, ke bualu kayi, pakakumbajaye bidimu 58, wakalekela mudimu wende. Lelu wa ndaya, buonso buabo basatu mu dîku mbamane kuditshipa kudi Nzambi, kutambula batismo ne badi basadila Yehowa pamue mu buobumue.

Bulelela bua mu Bible ke buakavuija buobumue mu dîku dia Daniel. Budi kabidi mua kuvuija buobumue mu mêku makuabo biabulongawu ne kubutumikila ne muoyo umue.