Utuku wangata Bible ne mushinga anyi?

KUKADI bidimu bipite pa 200, katshia Mary Jones waledibua mu Llanfihangel, musoko wa mu ditunga dia Galles udi muditole kule, pabuipi ne muelelu wa Mbuu wa Atlantike. Baledi bende bavua bapele baluki ba bilamba ne manda, ku bianza​—bapele mu mushindu wa se: kabavua nansha ne Bible wabo nkayabo. Kadi bakadima mu muanabo wa bakaji dinanga bua Nzambi pa kumulondela miyuki ya mu Bible ne pa kumuambuluila mvese ivuabo bavuluka. Mary uvua pa tshibidilu ubala Bible wa mu tshiena-Galles wa muena mutumba nabo, ne wakatuadija kulama mfranga mikese bilondeshile bumonyi buende, wakapangadija bua kusumba wende nkayende.

Mu tshidimu tshia 1800, pakakumbaja Mary bidimu 16, wakumvua ne: bavua basumbisha ndambu ya Bible ya mu tshiena-Galles ku mutantshi wa kilometre 40, mu tshimenga tshikese tshia Bala. Ne dikima dionso, wakapangadija bua kukuya. Ke tshiakenzaye, ku makasa kutupu, uvua ubanda pa tukunakuna. Ku shòò, wakafika, kadi Bible yonso ikavua mimane kupanyishibua. Bualu bukuabo, Mary wakajingulula ne: mfranga ivuaye mulame ivua mikese mitambe.

Pastere wa muaba awu wakatuibua bikole ku muoyo pa kumona dimanya dia Bible dia Mary ne dinanga divuaye nadi bua Bible. Pakamonaye binsonji bimupueka mu mêsu bualu kakamusumba nansha muakenzaye madikolela aa wonso, ne bulenga buonso, wakamupesha Bible uvuaye nende nkayende, wamba ne: “Umubale bimpe menemene, ulonge malu adimu ne disuminyina, bu tshiuma, lama mêyi mansantu mu lungenyi luebe, ne nsombelu webe ikale mu diumvuangana ne malongesha ende.”

Muyuki eu bakawulonda ku shòò mu tshisangilu tshia Komité wa tshibambalu tshia Religious Tract Society of London. Muinamu bakangata dipangadika dia kuabanya nkudimuinu ya Bible ki ng’anu kudi bena ditunga dia Galles, kadi ne kudi bantu ba pa buloba bujima. Biangatshile ku ntuadijilu mupepele eu, kuakatoloka Société ya Bible mivule ya diambedi mu siekele wa 19. Ku shòò, Bible ya mu miakulu ya matunga menyi yakatuadija kulondangana ku dipatuka pa tshibidilu ne lukasa luonso.

Lelu’eu, Société Watch Tower, mubanjija mu 1884, udi upatula Bible ne mikanda ya dilonga idi yumvuija Bible mu miakulu mipite pa 200. Pa buloba bujima, ukadi mumane kuabanya Bible miliyo 72 ya nkudimuinu wa Les Saintes Ecritures​—Traduction du Monde nouveau mifunda mu ngakuilu wa buena-lelu. Bible eu wakakudimunyibua pa kutentula mu tshiena-Ebelu ne mu tshiena-Greke bia ku mbangilu, udi mpindieu mua kupetshibua mujima anyi tshitupa mu miakulu 14 ne udi kabidi wenda ukudimunyibua mu tu-miakulu tukuabo 16.

Bu mudi Bible mua kupetshibua mpindieu kudi bantu pabuipi ne buonso, mmunyi muwudi umuangata pebe? Utuku wangata Bible ne mushinga anyi? Udiku ne webe Bible uwudi mulame bu tshiuma ne uwudi ubala anyi?

[Mêyi a dianyisha bua tshimfuanyi mu dibeji 3]

Muyuki muangatshila mu mukanda wa The Story of Mary Jones and Her Bible