Bamanyishi ba Bukalenge badi balonda

Nzambi kêna ne kansungansunga to

KUKADI bidimu bipite pa 1 900, mupostolo Petelo wakafila bumanyishi kudi munene wa basalayi Korneyi, wamba ne: “Bulelela, ndi njingulula ne, Nzambi kena ne kansungunsungu, kadi yeye udi witabusha wa mu tshisamba tshionso udi umutshina, udi wenza malu makane.” (Bienzedi 10:34, 35) Korneyi wakaleja ditshina dia Nzambi ne dinanga dia buakane. Wakanyisha bumanyishi bufila kudi Petelo ne wakalua muena nkristo.

Dîyi-diludiki dia muomumue didi dimueneka dilelela lelu’eu​—Nzambi kêna ne kansungansunga to. Bidi nanku bilondeshile bualu buakenzeka ku Allemagne. Luapolo ludi luamba ne:

“Mu teritware wa tshisumbu tshietu, mudi tumponya tua nzubu ya tshiluilu tshinene tshia basalayi ba bena Russie. Mu 1989, tshikondo tshîpi kunyima kua diupuka dia Lumbu lua Berlin, bakulu bakalomba bikala umue wa ku bamanyishi mua kumvua ne kuakula tshiena-Russie. Bamue ba kutudi bavua mua kutshiumvua, ne tuakaya kuenza mudimu mu teritware eu, ebi biakamueneka disanka dilelela. Budi bulonda ebu mbumue bua ku malu mamona.

“Mvua ne mumanyishi ukena mutambule (ukadi mpindieu mumane kutambula) patuakayukila ne kumanda wa masalayi. Kumanda wakateleja bituvua tukeba kumuambila pashishe wakatulomba bua kuyukila ne basalayi bende. Wakamba ne: buobu pabu badi ne bua kuteleja malu a Nzambi ne a mu Bible, nenku tuakenza tshipungidi bua kupingana.

“Tuakalomba muanetu wa bakaji uvua wakula tshiena-Russie bimpe bitambe bua kuya netu bu mukudimunyi. Mu nzubu wa tshisangilu wa mu kamponya, tuakateka mesa a mikanda idi yumvuija Bible ne kuyukila ne basalayi 68 ne kuandamuna ku makonka abu. Pashishe bakitaba ne disanka dionso mikanda 35 ne bibejibeji pabuipi ne 100. Patuakapatuka mu nzubu wa tshisangilu, tuakamona tusumbu tukese tua basalayi tuyukila pa bivua bifunda mu mikanda eyi.

“Tuakumvuangana bua kupingana mu dia 4 Kashipu 1992. Patuakafika pa dîba 10:50, nsentedi wa ku kamponya wakatuambila ne basalayi bavua batuindile. Major kampanda wakaya netu mu nzubu wa tshisangilu, ne tuetu kusangana se: mukaji muena mudimu wa biblioteke, wakadianjila kuangata mikanda kutudi bua kuyiteka mu biblioteke, ukavua mumane kumanyisha difika dietu pa kuteka mamanyisha mu kamponya. Bana betu basatu bakenza miyuki mikese bua kumvuija mudimu wetu pa buloba bujima ne wakaleja bua tshinyi tudi mua kueyemena Bible. Pashishe tuakafunda nkonko ya bateleji, ne tuakafila mandamuna a mu Bible. Munkatshi mua nkonko eyi muvua elu: Bantemu ba Yehowa badi ne mmuenenu kayi pa mudimu wa busalayi, ne munkatshi muabu mudi basalayi anyi? Ebi biakapesha mumanyishi ukena mutambule uvua mumfile diambedi mushindu wa kumvuija mudimu wende wa busalayi wa bidimu 25 mu tshiluilu tshia ditunga dia Allemagne wa kudi dîba dipatukila, bidimu biende bia ndekelu uvua kapitene mu tshiluilu tshia muulu. Wakumvuija muakamanyaye malu a Nzambi ne a mu Bible ne mpindieu uvua ujinga kuikala umue wa ku Bantemu ba Yehowa. Basalayi bakakema bua bivuabu bumvue. Mu minute munda-mutekete mikanda yonso ituakaya nayi ikavua mu bianza bia basalayi, ne ba bungi bavua bakeba Bible. Tuakabapetela Bible muanda-mutekete mu tshiena-Russie ku tshipanyinu kampanda tshia mikanda, ne bakasanka bua kuyipeta. Bivua disanka dilelela bua kupetesha bena nzala ya mu nyuma aba dimanyisha dia mu Bible divuabu nadi dijinga, ne tudi batekemene se: nebaditumikile.”

Bushuwa, Nzambi kêna ne kansungansunga to. Mu Dîyi diende udi ulomba bantu ba muoyo muimpe nansha banganyi nansha basanganyibua muaba kayi. Udi ubalomba bua kulonga malu adi amutangila yeye ne Muanende, Yezu Kristo, ne bavule ba nsombelu mishilangane badi benza nenku.​—Yone 17:3.