Bena maplome a Galaad badi bapeta “Disanka dipite mu kupa”

DIA LUMINGU, dia 6 Luabanya 1994, dîku dia ku tshilombuelu tshia Bantemu ba Yehowa ne benyi babu bakadisangisha bua tshibilu​—dijikija dia balongi ba kalasa ka 96 ka Bible ka Watchtower ka Galaad. Mu mumvuija ende a ntuadijilu, muludiki wa programme Karl F. Klein, muena mudimu mu Kasumbu Kaludiki ka Bantemu ba Yehowa kukadi bidimu pabuipi ne 20, wakambila balongi 46 ne: “Yezu wakamba ne: disanka dia kupa ndipite dia kupeta. Nenku nedikale mu mudimu wenu wa bu-misionere​—panudi nutamba kupa, nudi nutambe kupeta disanka.”​—Bienzedi 20:35.

Mibelu ya dilayangana

Miyuki milondangane yakenjibua bua balongi. Leon Weaver, muena mu Komité wa mudimu, wakenza tshiena-bualu tshia “Dinanukila didi ditumbisha Yehowa.” Buonso buetu tutu tupeta mateta. (2 Kolinto 6:3-5) “Patudi bafinakajibue,” ke miaku ya Muanetu Weaver, “mbipepele bua kudieyemena nkayetu.” Kadi, wakavuluija balongi ne: “Nansha nuenu mua kutantamena mateta a mushindu kayi adi mua kufikila bantu buonso, Yehowa udi unutabalela. Kakuanyisha bua nutetshibue ne matetshibua mapite makanda enu bukole bua nuenu kuâkama.”​—1 Kolinto 10:13.

“Nanganyi matuku wonso muaba wenu wa mudimu” ke tshiena-bualu tshia diyuki diakalonda, dienza kudi Lyman Swingle wa mu Kasumbu Kaludiki. Bena Izalele kabavua dîba dionso basungula kuvuabu ne bua kusombela ne malu avuabu ne bua kuenza. Tshisa tshionso tshivua ne tshiatshi tshitupa tshia buloba, ne bena Lewi bavua bapeshibue midimu misunguluke ya kuenza. Bia muomumue, bavule lelu’eu mu mudimu wa ku dîba ne ku dîba wa pa buawu​—bu mudi ba-misionere ne bena dîku dia Betele—​kabena badisunguila muaba wabu wa kusombela ne mudimu wenzabu. Tshia kuenza ntshinyi pikala muntu welakana pa bidi bitangila muaba wende wa mudimu? “Bu nuenu mua kutangila ne ntema kudi Yezu, Ntunga-mulongo wa ditabuja dietu, ne kutangila ne ntema tshilejilu tshiende, kanuakuteketa,” ke muakamba Muanetu Swingle.​—Ebelu 12:2, 3, NW.

Leonard Pearson, wa mu Komité wa Ferme wa Watchtower, wakalonda ne tshiena-bualu “Shalayi ne mêsu majadika.” Wakamba ne: “Nudi mua kuikala ne tshiamu tshilenga tshitambe tshia kukuata natshi bindidimbi, ne muaba mulenga wa kukuata, bia ku manda bilenga bipue, kadi e kupeta anu bipeta bibi​—pikala tshiamu tshiebe katshiyi tshijadika bimpe.” Anu bu lumuenu lubaluluke lua kukuata nalu bimfuanyi, mu tshindidimbi tshia tuetu kukuata mudi ne bua kuikala kabidi mudimu wa buambi udi wenda wenjibua pa buloba bujima. Katuena mua kupua muoyo tshimfuanyi tshijima. “Aba badi badimona anu buobu nkayabu nebikale ne dibungama miaba yabu ya mudimu,” ke muakamba Muanetu Pearson. “Aba badi ne mêsu majadika kudi Yehowa ne pa mudimu udiye mubapeshe nebalubuluke.”

“Bia kuelela tuasakidila bungibi” ke tshiena-bualu tshia diyuki diakalonda, dienza kudi John E. Barr, mukuabu muena mu Kasumbu Kaludiki. “Kanujimiji nansha bia munyi dijinga dienu dia kuela Yehowa tuasakidila,” ke mubelu wakapesha Muanetu Barr kudi balongi. “Ke umue wa ku mpokolo minene ya disanka, nansha nuenu ne muaba kayi wa mudimu.” Dijinga dia kuela tuasakidila diakasaka Davidi bua kufunda ne: “Mionshi ya luidi yakuhona mu miaba mimpe bua bualu buanyi; bulelela, ndi ne buhianyi bulelngele.” (Musambu wa 16:6) “Nudi ne bubanji bua mushindu’eu pa kudiumvua pabuipi ne Yehowa mu nsombelu wenu wa ku dituku ne ku dituku,” ke muakamba Muanetu Barr. “Yehowa kêna mua kumusha malanda awu kunudi binuatungunuka ne kuaangata bu tshintu tshilengele tshitambe tshia kuelelela tuasakidila.”

Mulongeshi wa Galaad Jack Redford wakalonda mu diakula, pa tshiena-bualu tshia “Mmunyi muwenza mudimu ne ludimi luebe?” Miaku kayiyi miela meji biakane idi mua kupuekesha muntu ne mâyi! (Nsumuinu 18:21) Mmushindu kayi wa kukanda ludimi? Muanetu Redford wakandamuna ne: “Nudi diambedi ne bua kulongesha tshieledi tshienu tshia lungenyi, bualu ludimi ludi luleja mushindu udi tshieledi tshia lungenyi ne mutshima.” (Matayo 12:34-37) Yezu wakafila tshilejilu tshilenga tshitambe; wakenza mudimu ne ludimi luende bua kutumbisha dîna dia Yehowa. “Lelu’eu kudi nzala ya mu nyuma ya kuteleja mêyi a Yehowa,” ke muvua Muanetu Redford muambile balongi. “Nudi bamanye mêyi aa. Nudi ne ‘ludimi lua balongeshibue.’ Nenku, nulekele misangu yonso ludimi luenu lulombodibua kudi tshieledi tshia lungenyi ne mutshima bidi bilambula bijima kudi Yehowa.”​—Yeshaya 50:4.

Mushinga wa masambila uvua mushindika mu diyuki “Nudi nuenda bu badi ku mesu kua Yehowa anyi?” Ulysses Glass, mufundi wa mêna a balongi mu kalasa, wakamba ne: “Pikala tatu wenza mudimu mukole bua kudiisha bena dîku diende kadi kayiku wakula nabu ne kayi ubaleja bienzedi bia diengeleka, bena dîku diende badi mua kuela meji ne: kenzela kende ka mudimu mukole mbua tshipatshila tshibi kadi ki mbua dinanga to. Ke mudibi buetu tuetu kabidi. Tudi mua kuenzela Nzambi mudimu wa bungi. Kadi bituikala katuyi tusambila, apu tudi anu badifile ku mudimu patupu pamutu pa kudifila kudi Tatu wa mu diulu wa dinanga.”

Theodore Jaracz, wa mu Kasumbu Kaludiki, wakakula pa tshiena-bualu “Bua tshinyi misumba idi idisangisha ne tshisamba tshia Nzambi.” Ku tshidimu tshionso nkama ya binunu bia mikoko idi ibuela mu bulongolodi bua Yehowa. (Zekâya 8:23) Ntshinyi tshidi tshisunguluja Bantemu ba Yehowa bu tshisamba tshia Nzambi? Tshia kumpala, badi bitaba Bible mujima bu Dîyi dia Nzambi. (2 Timote 3:16) Tshibidi, badi ne ndubidila mu mianda ya tshididi. (Yone 17:16) Tshisatu, badi bafila bumanyishi bua dîna dia Nzambi. (Yone 17:26) Tshinayi, badi baleja dinanga didi ne didilambula. (Yone 13:35; 15:13) Ne bimanyinu ebi, ne tudi ne dikima dionso mua ‘kumanyisha ngikadilu milenga ya eu wakatubikila ku mîdima bua kutubueja mu butoke buende bua dikema.’​—1 Petelo 2:9.

Kunyima kua miyuki eyi ivua isankisha, balongi buonso 46 bakapeta maplome abu. Bakatumibua mu matunga 16 pa buloba.

Programme wa mapingaja mushilangane

Mu mapingaja, Dilonga dikepesha dia Tshibumba tshia Nsentedi diakalombodibua kudi Donald Krebs wa mu Komité wa Betele. Pashishe balongi bakaleja programme uvua ne tshiena-bualu tshia “Meji adi anu ela dîyi mu musesu menemene.” (Nsumuinu 1:20) Bakaleja mu manaya malu mamona mu misesu ne mu teritware ya bangenda-mushinga. Bushuwa, Yehowa udi ubenesha aba badi bakongoloja dikima bua kuamba lumu luimpe ku mpukapuka. “Ntu musue kuela meji se: tudi miele ya kukosa nayi bilongo mu bianza bia banjelo banowi,” ke muakamba umue wa ku bena maplome. “Pikala mamanya etu a mudimu matue, banjelo abu nebatuangate bua kuenza netu mudimu muvule.” (Fuanyikija ne Buakabuluibua 14:6.) Programme wa balongi uvua kabidi ne bindidimbi biakaleja bateleji dilongesha bantu mu ditunga dijima dia Bolivie, dia Malte, ne dia Taiwan​—asatu a ku matunga muvua balongi ne bua kutumibua.

Bakalonda kudi Wallace ne Jane Liverance​—ba-misionere munkatshi mua bidimu 17—​bakandamuna ku makonka. Mu Kasuamansense 1993, bakabikidibua ku Ferme wa Watchtower kudi Muanetu Liverance usadila bu umue wa ku balongeshi ba Galaad.

Dinaya dia bitupa binayi, ne tshiena-bualu tshia “Mushindu wa kunemeka badi bakumbanyine mu bidimu biabu bia bukulakaje” diakalonda. Padi bantu bakulakaja, buowa bua kulua bantu tshianana ne kulekedibua budi mua kunyanga didinemeka diabu nkayabu. (Musambu wa 71:9) Dinaya edi divua ditua ku muoyo diakaleja mushindu udi buonso mua kuambuluisha mu tshisumbu bena lulamatu aba bakulakaje.

Kunyima kua musambu ne disambila bia ndekelu, bateleji buonso 6 220 mu Nzubu wa Mpuilu wa tshimenga tshia Jersey City ne mikuabu nzubu ivua ilonda muine programme eu bakadiumvua batalajibue mu nyuma. Masambila etu adi aya pamue ne balongi aba mu miaba yabu mipiamipia ya mudimu. Tudi tubajingila bua kutungunukabu ne kupeta disanka dinene dia kupa.

[Kazubu mu dibeji 26]

Bishiferi bidi bitangila balongi

Bungi bua matunga mudibo bafumine: 9

Bungi bua matunga mudibo batumibue: 16

Bungi bua balongi: 46

Mwayene wa bidimu bia tshilelelu: 33,85

Mwayene wa bidimu bipitshisha mu bulelela: 16,6

Mwayene wa bidimu mu mudimu wa ku dîba ne ku dîba: 12,2

[Kazubu mu dibeji 27]

Badi batabalela tshidiila tshia Malte

BUKUA-BUENA-NKRISTO mbubuikidije bulelela bua mu Bible mu tshidiila tshia Malte kukadi bidimu bivule. Ba-misionere ba ndekelu ba Galaad bakatumibuaku, Frederick Smedley ne Peter Bridle, bakapeta maplome abu mu kalasa ka muanda-mukulu mu 1947. Kadi, bakakuatshibua ne kuipatshibua mu Malte mutantshi mukese kunyima kua difika diabu. Mukanda wa 1948 Yearbook of Jehovah’s Witnesses (Anuere wa Bantemu ba Yehowa bua 1948) wakafila luapolo ne: “Ba-misionere aba babidi bakapitshisha dîba dia bungi ku tubadi pamue ne banene ba ditunga anu bu muvuabu bapitshisha mu dienza mudimu wabu wa Nzambi, bionso ebi anu bua buluishi bua bamfumu ba Ekleziya Katolike wa bena Roma. Bansaserdose badi bamba ne: Malte nditunga dia bena Katolike ne muntu mukuabu yonso udi ne bua kuumukamu.” Mpindieu, bidimu bu 45 bimane kupita, ba-misionere banayi ba kalasa ka 96 ka Galaad mbatumibue ku Malte.

[Tshimfuanyi mu dibeji 26]

Kalasa ka 96 ka Galaad ka Bible ka Watchtower

Mu liste udi kuinshi eku, milongo mmifunda nimero biangatshile ku badi kumpala too ne ku badi kunyima, ne mêna mmatela biangatshile ku dia bakaji aya matangile ku dia balume.

(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; L/iehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.