Bena mapolome a Galaad​—“Ba-misionere balelela!”

“MISIONERE nnganyi?” Lukonko alu luvua luedibue mu tshiena-bualu tshia tshikandakanda kampanda kukadi makumi bu anayi a bidimu. Mufundi wakamba ne: ba-misionere balelela mbiamu bia diakajilula nabi nsangilu wa bantu ne malu a mfranga. Kadi, mu Dia lumingu dia 5 Luabanya 1995, mu Nzubu wa Mpuilu wa Bantemu ba Yehowa wa ku Jersey City, diandamuna dia mushindu mushilangane divua difidibue ne dizangika dionso. Bivua tshikondo kayi? Difidibua dia mapolome a kalasa ka musangu wa 98 ka Tshilongelu tshia Watchtower tshia Bible tshia Galaad​—tshilongelu tshidi tshitume ba-misionere pa buloba bujima!

Kunyima kua disambila ne musambu bia ntuadijilu, Albert D. Schroeder muena mu Kasumbu Kaludiki wakajingila ne musangelu wonso dilua dilenga kudi bateleji 6 430 bavuaku. Mu mumvuija ende a mbuelelu, muanetu Schroeder wakumvuija patoke bua tshinyi bena mapolome a Galaad bavua bashilangane ne bakuabu batu badibikila bu ba-misionere. Wakamba ne: “Bible ke mukanda wa nshindamenu wa Galaad.” Bena mapolome a Galaad mbalongeshibue bua kuikala, ki mbena mudimu wa ku mubidi, kadi balongeshi ba Dîyi dia Nzambi. Nunku, mu mushindu wa pa buawu mbakumbane tshishiki bua kutabalela bidi bikengedibua mu nyuma bia bantu mu mianda mipiamipia.

Ba-ngamba-malu balondangane bakakonkonona mianda mivule mudi bena mapolome a Galaad badijadike mudibu ba-misionere “balelela.” Charles Molohan wakabenzela muyuki udi ne tshiena-bualu tshia “Tungunukayi ne kukuama mamuma mimpe bu ba-misionere.” Pa kushindamena pa mêyi a mupostolo Paulo mu Kolosai 1:9, 10, muanetu Molohan wakavuluija bena mapolome se: ngondo yabu itanu mipitshisha ku Galaad ivua mibambuluishe bua kudiunda “mu dimanya dijalame dia Nzambi.” Ebi nebibambuluishe bua kupatula mamuma mu mishindu ibidi: pa kuleja mamuma a spiritu wa Nzambi ne pa kuabanyangana malelela a Bible ne bakuabu.

Daniel Sydlik muena mu Kasumbu Kaludiki wakalonda ne tshiena-bualu tshidi tshitua ku muoyo “Kanuenji malu adi ateka muoyo wenu mu njiwu.” Wakatela lukonko lua Yezu: “Ntshinyi tshiafila muntu bua kushintakaja ku anyima wende?” (Matayi 16:26, NW) Muanetu Sydlik wakamuenesha ne: “Bantu mbashintakaje anyima yabu bua kupeta nsombelu mutambe bupepele, bushême.” Kadi, aba badi ne ditabuja dilelela kabena mua kuenza malu mabi padibu kumpala kua mateta ne ntebela. Mêyi a Yezu adi aleja ne: muntu udi ne bua “kufila” ku budisuile, mbuena kuamba ne: kudibenga, bua kupandisha anyima, peshi muoyo wende. Ba-misionere bapiabapia bavua bapeshibue mubelu wa kupa Yehowa anyima wabu mujima, madikolela abu wonso, mu mudimu wende!

Pashishe, William Van Wall muena mu Tshibambalu tshia Komité wa Mudimu wakenza muyuki pa tshiena-bualu “Mupostolo Paulo​—Tshilejilu tshiakanyine didikija.” Muanetu Van de Wall wakumvuija ne: “Paulo uvua ntunga-mulongo bua mudimu wa bu-misionere mu siekele wa kumpala.” Pashishe, mu mushindu muakanyine, mianda inayi ivua mizangikibue muvua mupostolo Paulo mufile tshilejilu tshimpe bua ba-misionere lelu’eu: (1) Diditatshisha ne dinanga bilelela bua bantu bia Paulo, (2) dikuata diende dimpe dia mudimu, (3) budipope buende buakamufikisha ku dibenga kudinemesha, (4) dieyemena Yehowa diende dikena mpata.

“Yehowa anufukune mu mudimu wenu mupiamupia” ke tshivua tshiena-bualu tshikonkonona kudi Lyman A. Swingle muena mu Kasumbu Kaludiki. Pa kutumika ne mvese wa dituku, Musambu wa 139:16, muanetu Swingle wakatonda ne: bu ba-misionere bapiabapia, bavua ne bua kupetangana ne ntatu mu midimu yabu ne se: Yehowa mmumanye majandula. “Ndayi kudiye,” ke muakabelaye, “muambilayi panudi ne lutatu. Tetayi bua kusunguluja tshidi disua diende.”

John E. Barr muena mu Kasumbu Kaludiki wakenza pashishe muyuki pa tshiena-bualu “Ditabuja dienu didi dienda dikola.” (2 Tesalonike 1:3, NW) Mu Luka 17:1, tudi tubala ne: Yezu wakamba se: “Malu adi alenduisha bantu k[ae]na a[p]anga kulua.” Bakuabu mbalenduke bua bu-muntu bua ba-misionere nabu. Kadi muanetu Barr wakakankamija ba-misionere bua kuikala ne ditabuja didi dikengedibua bua kufuilangana luse. Eyowa, bivua mu nsombelu eu pakalomba balongi ba Yezu ne: “Vudija ditaba dietu.” (Luka 17:2-5) Ditabuja dia ba-misionere didi pamu’apa mua kutetshibua kudi makaja kabukabu mu malu a bulongolodi. “Tudi ne ditabuja bua kuitaba makaja aa,” ke muakebeja muanetu Barr, “peshi nealue bipumbishi bifuane mukuna?”

Pashishe kuakalonda imue mibelu kudi balongeshi babidi ba Galaad. Jack Redford wakabela bena mapolome a Galaad bua kulama mmuenenu mululame. Wakalonda bualu bua misionere kampanda wakalekela mudimu wende bua kuandamuna ku tshipela tshimuela kudi ba-misionere nende. Pabi, Mifundu idi itudimuija ku difîka munda tshiananatshianana. (Muambi 7:9) “Nuikale ne mmuenenu muakane,” ke muakabelaye. “Fuilayi bilema ne mapanga bupuangane bia bakuabu banudi nabu pamue luse.”

U. V. Glass, sekretere wa Tshilongelu tshia Galaad, wakebeja pashishe ne: “Nudi badiakaje bua kuakamangana ne ‘tshikondo ne malu a mu tshintuluntulu’ anyi”? (Muambi 9:11, NW) “Nsombelu wetu utu pa tshibidilu ushintuluka,” ke muakaleja muanetu Glass, “ne amue mashintuluka adi mua kuikala alubakaja.” Mu tshintuluntulu, bamue ba-misionere mbakamangane ne makanda mabi a mubidi, masama, ne ntatu ya bena dîku, kubambidikabi bamue bua kulekela midimu yabu. “Malu a mu tshintuluntulu nansha wowo mikale tshinyi,” ke muakamba muanetu Glass, “tudi bamanye se: Yehowa mmuamanye ne udi uditatshisha. Bituamueyemena, tudi bamanye se: netutshimune!”

Muyuki udi ne tshiena-bualu tshia “Bateka ku luseke bua mudimu wa bu-misionere” wakatuisha mulongolongo wa miyuki ya mu dinda ku tshibungubungu. Theodore Jaracz muena mu Kasumbu Kaludiki wakela lukonko ludi ku ntuadijilu ludi lulonda elu: “Misionere nnganyi?” Mu diandamuna, wakakonkonona Bienzedi nshapita 13 ne 14 pa bidi bitangila mudimu wa bu-misionere wa Paulo ne Barnabase. Bidi bimueneka patoke ne: mudimu awu wakashindamena, ki mpa kujikija ntatu ya nsangilu wa bantu, kadi pa ‘kumanyisha lumu luimpe.’ (Bienzedi 13:32) Muanetu Jaracz wakebeja ne: “Kanuenaku nuitaba se: Paulo ne Barnabase bakaleja tshidi misionere mulelela ne bua kuikala anyi?” Misionere wa kale Robert Tracy wa ku Mexique wakalombibua bua kuabanyangana amue a ku malu ende mamonamona adi atua ku muoyo bu mumuangalaji wa Evanjeliyo.

Programe wa mu dinda wakatua ku tshibungubungu pakafila muanetu Schroeder mapolome kudi bena mapolome 48. Bateleji bakatshionkomoka bua kumvua mêna a miaba 21 kuvuabu batume ba-misionere: Barbados, Bénin, Bolivie, Costa Rica, Côte d’Ivoire, Equateur, Guinée Equatoriale, Estonie, Guinée-Bissau, Honduras, Latvia, Leeward Islands, Mauritanie, Mozambique, Nicaragua, Paraguay, Pérou, République centrafricaine, Sénégal, Taïwan, ne Venezuela.

Kunyima kua diikisha bua didia, bateleji bakadisangishilula ne kubabidila dilonga dilenga dia Tshibumba tshia Nsentedi, dilombola kudi Robert P. Johnson muena mu Tshibambalu tshia Mudimu. Bena kalasa ka 98 bakandamuna nkonko. Ebi biakalondibua kudi mulongolongo wa nkonko ya musangelu milombola kudi balombodi ba Galaad. Bateleji bavua bakankamijibue bikole pavua bena mapolome babanyangana malu abu mamona mu budimi ne bumvuija nyanji yabu pa bidi bitangila midimu yabu ku matunga menyi.

Munkatshi mua bidimu bisambombo ne tshitupa, Galaad uvua usanganyibua ku nzubu ya Société Watchtower ku Wallkill, mu New York. Kadi, mu Tshisanga 1995, kalasa kakaya ku Muaba mupiamupia wa Dilongesha wa Watchtower ku Patterson, mu New York. Mmunyi muvua bena dîku dia Betele ku Wallkill bumvue pa bidi bitangila dishintuluka edi? Ku difidibua dia mapolome edi, bungi kampanda bakafumina ku Wallkill bavua bedibue nkonko. Ngakuilu yabu idi itua ku muoyo idi ileja patoke ne: balongi ba Galaad mbabashile tshivulukilu tshinene. Bidi bimueneka patoke ne: balume ne bakaji aba badisuile badi ba-misionere balelela​—badipuekeshi, badibengi, badi baditatshisha bikole bua kuambuluisha bakuabu.

Pakavua difidibua dia mapolome ditua ku tshibungubungu, bateleji buonso bavua ne dieyemena dia se: Tshilongelu tshia Galaad netshitungunuke ne kuenza tshiditshi tshienze munkatshi mua bidimu bipite pa 50​—kupatula ba-misionere balelela!

[Kazubu mu dibeji 18]

Bishiferi bia Kalasa:

Bungi bua matunga maleja mpala: 8

Bungi bua matunga a kuya kutumika: 21

Bungi bua balongi: 48

Muayene wa bidimu: 32,72

Muayene wa bungi bua bidimu mu bulelela: 15,48

Muayene wa bungi bua bidimu mu mudimu wa ku dîba ne ku dîba: 10,91

[Tshimfuanyi mu dibeji 18]

Bena mapolome a kalasa ka 98 ka Tshilongelu tshia Bible tshia Watchtower tshia Galaad

Mu liste udi kuinshi eku, milongo mbayibale bituadijile kumpala baya panyima, ne mêna mbaatele bituadijile ku dia bakaji baya ku dia balume mu mulongo wuonso.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.