Balongi bena mapolome ba Dîyi dia Nzambi

MU DIDIKIJA bena nkristo ba mu siekele wa kumpala, Bantemu ba Yehowa mbamanyike pa buloba bujima bua diyisha diabu dia ku tshiibi ne ku tshiibi. Mudimu eu uvua muzangika mu mêyi a mbangilu mu programe wa difila mapolome a kalasa ka 102 ka Tshilongelu tshia Bible tshia Watchtower tshia Gilada.

Mu dia 1 Luabanya 1997, Albert Schroeder, muena mu Kasumbu Kaludiki ka Bantemu ba Yehowa, wakakoka ntema ku tshiena-bualu kampanda tshia matuku mashale aa mu tshikandakanda tshia bena France tshia Le Point. Tshivua tshiakula bua mapangadika a Katolike wa bena Roma a kutuadija diyisha dia ku nzubu ne ku nzubu mu ditunga dia Italie. “Bua [ba-misionere ba mu Vatican] kabalu kufika bianza bitupu bu mudibu bafuilakana teritware wa Bantemu ba Yehowa,” ke muakamba tshiena-bualu etshi, “Vatican mmufike mene ku dipatuisha miliyo ya kopi ya Evanjeliyo wa Munsantu Mâko, bu mudi batumibue babu bakamangana ne bamanyi bapiluke [Bantemu] mu ‘difila’ dia dîyi dimpe ku tshiibi ne ku tshiibi.”

Bena mapolome 48 badi munkatshi mua aba bakidikija ndongeshilu mipiluke ya Yezu mu dimuangalaja Dîyi dia Nzambi. Bavua bafume ku matunga muanda-mukulu balue ku Nsangilu wa Bilongelu wa Watchtower ku Patterson, mu New York. Munkatshi mua ngondo itanu ya kalasa kabu, bakalonga Bible kumbukila ku ntuadijilu too ne ku ndekelu kuende. Dilonga diabu diakangata kabidi malu a kale a bulongolodi bua Nzambi, mishindu ya nsombelu wa bu-misionere idi ne dikuatshisha, ne mamuma a spiritu wa Nzambi. Bionso ebi bivua bienzeke ne tshipatshila tshimuepele mu lungenyi​—kubalongolola bua mudimu wa bu-misionere wa ku babende mu matunga 17 muvuabu ne bua kubatuma. Pavuabu bangata mapolome, bateleji 5 015 ba mu bukua matunga bakabanyangana disanka dia muanda eu. Mmubelu kayi wa ndekelu udi ne dikuatshisha uvua balongi aba bena Gilada bapete?

Dikankamija diakanyine bua ba-misionere bapiabapia

Panyima pa mêyi a mbangilu a mulombodi, Ralph Walls, muambuluishi wa Komité wa Bena mudimu wa Kasumbu Kaludiki, wakenza muyuki muipi wa kumpala muikale ne mubelu udi ne dikuatshisha bua ba-misionere bapiabapia. Tshiena-bualu tshiende tshivua “Vulukayi bua kunanga.” Wakaleja patoke ne: mu 2 Timote nshapita 3, Bible wakadianjila kuamba ne: bulongolodi ebu buvua mua kulua ku kakese ku kakese bubule dinanga. Wakafila tshivuluiji etshi tshiakanyine kudi ba-misionere aba bapiabapia, mu dipetangana ne diumvuija dia dinanga didi mu 1 Kolinto 13:1-7: “Nuenu, munudi ba-misionere, nudi mua kudiundisha bungi bua mêba enu. Nudi mua kupeta dimanya divule mu dishidimunyibua dienu dia ku Gilada. Peshi tudi mua kutumika ne lukunukunu luonso mêba a pa mutu mu midimu yetu ya filiale. Kadi madikolela etu onso pamue ne didibudisha amue masanka kabiena biumvuija tshintu nansha tshimue bituapua muoyo bua kunanga.”

Uvua ulonda ku programe uvua Carey Barber, wa mu Kasumbu Kaludiki, wakakonkonona tshiena-bualu tshia: “Yehowa udi utulombola ku Ditshimuna.” Kumbukila ku mbangilu wabu mukese panyima pa Mvita ya Kumpala ya Buloba bujima, Yehowa Nzambi mmulombole basadidi bende ba lulamatu ku ditshimuna mu dimanyisha dia lumu luimpe lua Bukalenge buende, nansha muvuaku dikengeshibua. Mu 1931 Balongi ba Bible, muvuabu bamanyike mu tshikondo atshi, bakangata dîna dia Bantemu ba Yehowa, ku kanyinganyinga ka bamfumu ba Bukua-buena-nkristo. “Mpindieu kalasa ka 102 ka ba-misionere balongesha ku Gilada kadi ne disanka dinene dia kuikala ne diabanyangana dialabale mu mudimu wa butumbi wa difila mpunga munene bua kumanya dîna edi dia tshijila,” ke muakamba Muanetu Barber. Badi babuela ku liste mule wa ba-misionere 7 131 badibu balongeshe mu Tshilongelu tshia Gilada ne bàdì bambuluishe bua kualabaja diyisha dia Dîyi dia Nzambi kumbukila ku matunga 54 mu 1943 too ne ku matunga 233 lelu’eu.

Ngamba-malu wakalonda, Lloyd Barry, muikale pende muena mu Kasumbu Kaludiki, uvua muena dipolome wa kalasa ka 11 ka Gilada ne wakasadila bu misionere mu ditunga dia Japon bua bidimu bipite pa 25. Wakafila dikankamija ne tshiena-bualu tshiende, “Unanukile mu malu onso aa.” “Disanka dienu divule nedisanganyibue mu ditantamena,” ke muakambilaye balongi. Mmafutu kayi atu afumina ku ditantamena mu mudimu wa bu-misionere peshi mu mudimu kayi wonso wa teokrasi? “Ku mutu kua bionso, ditantamena dietu didi disankisha mutshima wa Yehowa . . . Kudi disankishibua dinene bua kunusanganabu balame muoyo-mutoke mu ditetshibua . . . Nuenze mudimu wa bu-misionere didifila dia muoyo wenu . . . Difutu dienu nedikale muaku udi ulenga mutshima eu: ‘Bimpe.’” (Matayo 25:21; Nsumuinu 27:11) Mu dikomesha muyuki wende, Muanetu Barry wakabela ne muoyo mujima bua ba-misionere aba bapiabapia ‘bananukile mu malu onso aa’ pa kuikala bapangadije bua se: budimi bua bu-misionere bulue muoyo wabu mene.​—1 Timoteyi 4:16, MMM.

“Tshinuamona ntshinyi?” ke lukonko luakajulabu kudi Karl Adams, udi muikale ne mudimu mu dilongesha tulasa tuvule tua Gilada. Wakaleja ne: tshikala ba-misionere aba bapiabapia mua kumona mu midimu yabu katshiena tshisuikila anu ku lumonu luabu lua ku mubidi kadi ku mêsu a mu mutshima wabu kabidi. (Efeso 1:18) Ebi bivua biumvuija kudi tshiakamona batentekedi bena Izalele pakatentekelabu Buloba Bulaya. Batentekedi bonso 12 bakamona bintu bia muomumue ne mmuenenu wa ku mubidi, kadi anu babidi ke bakamona Buloba Bulaya ne mmuenenu wa Nzambi. Ba-misionere badi mua kumona pabu bintu mu mishindu mishilangane. Mu amue matunga muikalabu basadila, badi mua kumona bupele, dikenga, ne dipanga ditekemena. Kadi kabena ne bua kuandamuna mu mushindu mubi ne kulekela miaba yabu ya mudimu. Muanetu Adams wakakula bua misionere umue wa mu kalasa ka musangu mushale wakamba ne: “Malu mamonamona aa mmamfikishe ku dijingulula se: ndi ne bua kushala apa. Bantu aba badi bakengela ditekemena bua matuku atshilualua. Ndi musue kuenza dishintuluka mu nsombelu yabu.” Muanetu Adams wakakomesha pa kukankamija ba-misionere bapiabapia bua kumonabu matunga adibu batumibue bu miaba idi Yehowa mujadike bua kuenza tshitupa tshia Mparadizu Wende wa pa buloba bujima ne kumona bantu badi muomu bu bantu bikala mua kulua bena mu nsangilu wa bulongolodi bupiabupia.

Muyuki wa ndekelu wa tshitupa etshi tshia programe uvua muenza kudi Wallace Liverance, wakasadila bidimu bivule mu mudimu wa bu-misionere kumpala kua kuluaye mulongeshi ku Gilada. Tshiena-bualu tshivua tshia: “Enzayi malu ne bujinguludi mu midimu ya Nzambi ya mpatshi.” Kuenza malu ne bujinguludi kudi kulomba kuenza malu ne mbabi, ne budimu, ne mmuenenu wa lungenyi. Atshi ntshintu tshivua Mukalenge Shaula wa Izalele mupangile bua kuenza.​—1 Samuele 13:9-13; 15:1-22.

Mushindu umue wa kuenza malu ne bujinguludi ng’wa kuitaba ntatu ya dibidilangana ne mushindu mupiamupia wa nsombelu, pamue ne kulonga muakulu mupiamupia ne kufika ku dimanya bantu bine. Malu mamonamona adi nawu ba-misionere mu dipetangana ne ntatu ne kutshimuna bipumbishi bidi mua kubakolesha mu nyuma mu mushindu wakakoleshibua Yoshua ne Kaleba pakangatabu ditunga divua Nzambi mubapeshe.

Diela nkonko

Tshitupa tshia programe tshivua tshilonda tshiakakonga mulongolongo wa diela nkonko. Harold Jackson, wakela Ulysses Glass nkonko, eu udi muikale sekretere ne mulongeshi wa mutantshi mule wa Tshilongelu tshia Gilada, udi mpindieu ne bidimu 85. Ba-misionere bavule badi mu budimi batshidi bavuluka bimpe bidimu biende bia dilongesha ne dishidimuna bia lulamatu. Pashishe kuakalua Mark Noumair, mulongeshi wa ku Gilada wakapitshisha bidimu bivule mu mudimu wa mu matunga menyi mu Afrike kumpala kua kudisangaye ku tshisumbu tshia balongeshi ba mu Tshilongelu tshia Gilada. Wakela balongi nkonko pa bidi bitangila mudimu wabu munkatshi mua ngondo itanu ya kalasa kabu. Malu mamonamona abu akaleja patoke se: kudi bantu badi ne disankidila mu Dîyi dia Nzambi mu teritware wa muaba udibu basombele.

Pashishe Robert Ciranko ne Charles Molohan bakakula ne bantu bapiluke bavua babuele mu kalasa kakuabu mu nzubu eyi, kalasa ka bena mudimu ba filiale. Mibelu yabu mipesha bapetshi ba mapolome yakakonga dikengela dia kuikala badipuekeshi ne kuambuluisha ku buobumue bua tshisumbu. Bakafila lungenyi bua se: bena mapolome kabena ne bua kuikala ne ngenyi midianjila kuela ya tshienzeka mu mudimu wa bu-misionere kadi, bikala anu bitaba nsombelu kayi yonso wabafikila. Ditumikila mubelu eu nediambuluishe kakuyi mpata ba-misionere aba bapiabapia bua kukumbajabu midimu yabu bu balongeshi ba Dîyi dia Nzambi.

Ndekelu wa bionso, Theodore Jaracz, muena mu Kasumbu Kaludiki, e kuenzelaye bateleji muyuki pa tshiena-bualu tshia: “Ntshinyi tshidi ne buenzeji kudi mukuabu?” Wakumvuija ne: patudi tuetu bu bena nkristo tuleja mamuma a spiritu, tudi mua kuikala ne buenzeji buimpe kudi bantu bakuabu. “Ba-misionere badi bulongolodi bua Yehowa butume mbapatule muyuki muakanyine ka-lumbandi udi ne buenzeji kudi bantu mu mushindu muimpe, mushindu wa mu nyuma,” ke muakabambishaye. Pashishe wakatela amue mumvuija menza kudi bantu bavuabu bambuluishe bua kusadila Nzambi bu tshipeta tshia bilejilu bimpe bifila kudi ba-misionere. “Nulame lumu ludi bantu ba Yehowa bapete ne nutungunuke ne kukonkola ku biibi abi mu miaba yenu ya mudimu ya mu matunga menyi mu dikeba aba badi bakanyine . . . Kabidi, ku bululame buenu ne bienzedi bikezuke, nukandamene mmuenenu wa bulongolodi ebu, ne nuikale buenzeji buimpe bua butumbi ne lumu bia Yehowa,” ke muakakomeshaye.

Mu dikomesha dia programe, mulombodi wakela mioyo ya pabuipi ne ya kule pashishe wakafila mapolome ne wakamanyisha miaba ya mudimu ya ba-misionere. Panyima pa muanda eu, umue wa ku bena mapolome wakabala mukanda wa balongi wa dileja nawu dianyisha bua dishidimunyibua divuabu bapete. Mbimueneke patoke se: programe wa difila mapolome wa kalasa ka 102 wakasaka bateleji bonso bua kupangadija bikole bua kuya batangile kumpala mu dimanyisha Dîyi dia Nzambi.

[Tshimfuanyi mu dibeji 31]

Bena mapolome a kalasa ka 102 ka Tshilongelu tshia Bible tshia Watchtower tshia Gilada

Mu liste udi kuinshi eku, milongo mbayibale bituadijile kumpala baya panyima, ne mêna mbaatele bituadijile ku dia bakaji baya ku dia balume mu mulongo wonso.

(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.