Bantemu ba Yehowa pa buloba bujima: Colombie

COLOMBIE nditunga dia pa buadi dia ku Amerike wa ku Sud. Mbu wa Atlantike ne wa Pasifike mbitue ku muelelu wa ditunga edi dilengeja kudi mikuna idi iluka tupia. Luya ludi mu bibandabanda bia ku muelelu ne mu mpata ludi lushiila mashika a nsongo mitumbuke ya Mikuna ya Ande mibuikila kudi neje muaba.a

Nansha mudi Colombie mumanyike bua or ne emeraude, bantu ke badi bubanji buende bua mushinga mukole. Lelu’eu, Yehowa udi uuja nzubu wende wa mu nyuma ne butumbi. Batendeledi bimpe ne ba kunanga badi babuelamu mu bitupa bionso bia pa buloba, nansha mu Colombie.​—Hagai 2:7.

Balombodi ba kumpanyi bakemeshibua

Ku Facatativá, kilometre 42 ku nord-ouest wa Bogotá, diunzuluka dia biro bia filiale wa Société Watch Tower ne ditanda dia kuenza mikanda bipiabipia diakenzeka mu dia lumingu, dia 1 Kasuabanga 1992. Dikumbula dia Betele divua ne buenzeji bukole kudi bavua balueku. Mumane kupingana ku ditanda kuvuaye wenzela mudimu, mukumbudi umue wakasaka bikole bamfumu bende ba mudimu bua kuyabo kumona bulongolodi ‘bua dikema ku ngenzelu wa mudimu, bulongame ne lungenyi luimpe lua benji ba midimu.’ Mu dilua diabu diakalonde, balombodi aba bavua ne ntema mivule ne bakela nkonko ya bungi.

Balombodi aba bavua basue kutuma batangidi babo ba midimu ne tupita​—bena mudimu buonso mene—​bua kulua kukumbula Betele. Lumingu luonso, bakenza programme bua bena mudimu 15 anyi 25 bikala baya, too ne pajikija bena mudimu buonso 1 300 kumona ndongoluelu eu muimpe wa mudimu.

Nkama ne nkama ya bena mudimu babu bakaya kumona bintu bia mudimu bia filiale ne bakamona cassette vidéo Les Témoins de Jéhovah: un nom et une organisation. Bakemeshibue bua bunene bua bulongolodi ne dialabala dia mudimu wa kumanyisha Bukalenge pa buloba bujima, bakakatshila bua buondoke bua dimanya dia teknoloji mubandile udi Société utumika nende. Pa kuya, bavule bakamba ne: bavua badiumvue bu badi ‘bumbuka mu mparadizu bua kupingana mu buloba bukena bulongame.’

Bulelela budi bulenga bantu ba mishindu yonso

Bantu ba mishindu yonso badi balengibue kudi lumu luimpe. (1 Timote 2:3, 4) Tshilejilu, muenji wa kale wa misambu ne mulombodi wa tshisumbu tshia tungimba tua heavy-metal rock wakitabuja bulelela bua mu Bible, kukudimunaye nsombelu wende, ne kuluaye ne lukasa luonso mpanda-njila wa pa tshibidilu. Pashishe wakatekibua bu musadidi wa mudimu. Bantu bavule bavua mu bisumbu bia bantomboji bakalonga mua kueyemena ne kutekemena Bukalenge bua Yehowa. Badi mpindieu badifile mu kulongesha ne tshisumi mukenji wa bulongolodi bupiabupia bua ditalala.

Banu ba diamba ne badipanyishi badi pabu bakudimuka ku bulelela. Nsongalume umue ukadi mpindieu Ntemu uvua mulombodi wa budimi bua diamba ne laboratware wa cocaïne biasa munkatshi mua ditu, bidimu bitanu kumpala kua yeye kulekela nsombelu wa mushindu’eu. Wakapeta diakalenga pa kulonga ne kutumikila mêyi-makulu a mu Bible. Mu buloko kampanda, bashipianganyi ba kalanda musenga, benzeja kudi dilonga dia Bible ne muoyo umue, badi basambila bikole bua Yehowa abafuile luse ne abiitabe bu basadidi bende.

Bulelela bantu ba mishindu yonso badi bandamuna bimpe ku mukenji wa Bukalenge. Mu Colombie nansha miaba mikuabo, Yehowa udi uuja nzubu wende ne butumbi.

[Mêyi adi kuinshi]

[Kazubu mu dibeji 8]

NSOMBELU WA DITUNGA

Tshidimu tshia mudimu 1993

BAMANYISHI BUONSO: 60 854

BUNGI KU MUNTU: Ntemu 1 bua bantu 558

BAVUA MU TSHIVULUKILU: 249 271

MUAYENE WA BAMPANDA-NJILA: 8 487

MUAYENE WA MALONGA A BIBLE: 100 927

BUNGI BUA BAKATAMBUSHIBUA: 5 183

BUNGI BUA BISUMBU: 751

BIRO BIA FILIALE: FACATATIVÁ

[Tshimfuanyi mu dibeji 9]

Bena mudimu ba biro bia filiale pamue ne ba missionnaires mu 1956

[Tshimfuanyi mu dibeji 9]

Biro bia filiale bimuenena muwlu