Enzayi mudimu bikole bua lupandu lua nzubu wenu

“Tungunukayi ne kubakolesha mu mibelu ne manyoka pamue ne buludiki bua lungenyi bia Yehowa.”​—EFESO 6:4, NW.

1, 2. Mbintu kayi bikole bidi baledi ne bua kutantamena lelu’eu?

TSHIKANDAKANDA tshimanyike tshiakabikila bualu ebu dishintuluka dinene. Tshivua tshiena-bualu tshiakamba mashintuluka manene adi menzeke mu dîku mu bidimu bidi panshi. Aa avua mashintuluka akambabu se: avua tshipupu tshia dishipa mabaka, mabaka miibîdi, dishipa dia tshia kabidi, dishipa mikenji, ne dijuka dia bilumbu bipiabipia mu mêku atshidi majima.” Mabika ne mala aa kabiena mua kutukemesha to, bualu Bible wakadianjila kumanyisha se: bantu nebikale mu “bikondo bikole” mu “matuku a ku nshikidilu.”​—2 Timote 3:1-5, NW.

² Nenku baledi badi mu ntatu ivua kayiyi mimanya kudi bantu ba bikondo bishale. Nansha mudi bamue baledi munkatshi muetu bakoleshe bana babu mu njila ya Nzambi katshia “ku buana,” mêku mavule mmatuadije ‘kuenda mu bulelela’ anu mpindieu. (2 Timote 3:15; 3 Yone 4) Bana babu badi mua kuikala bakole pakatuadija baledi kubalongesha njila ya Nzambi. Kabidi, bungi budi buvula bua mêku a muledi umue ne a baledi biibîdi adi munkatshi muetu. Nansha nsombelu yeye mushindu kayi, mubelu wa mupostolo Paulo udi mukumbanyine: “tungunukayi ne kubakolesha mu mibelu ne manyoka pamue ne buludiki bua lungenyi bia Yehowa.”​—Efeso 6:4, NW.

Baledi bena nkristo ne majitu abu

3, 4. (a) Mmalu kayi adi makepeshishe mudimu wa ba-tatu? (b) Bua tshinyi ba-tatu bena nkristo badi ne bua kuenza bipite pa kuikala anu bakebi ba bia kudia?

³ Numanye se: Paulo wakamanyisha mêyi ende adi mu Efeso 6:4 diambedi kudi “ba-tatu.” Mufundi kampanda wakumvuija ne: mu bikondo bishale “ba-tatu bavua ne bujitu bua bana babu pa malu a mu nsombelu ne a mu nyuma; ba-tatu bavua ne bujitu bua nkoleshilu wa bana babu. . . . Kadi Révolution Industrielle wakuumusha diumvuangana edi; ba-tatu bakalekela madimi abu ne magaze abu, kushiya nzubu yabu bua kuya kuenza midimu mu izine ne pashishe mu biro. Ba-mamu bakenza midimu mivule ivua ba-tatu ne bua kuenza. Ku kakese ku kakese, bu-tatu buakashala anu ku dîna.”

⁴ Balume bena nkristo: Kanusanki anu bua kuikala bakebi ba bia kudia, nulekeela bakaji benu ndongeshilu ne nkoleshilu yonso. Nsumuinu 24:27 wakabela ba-tatu ba bikondo bia kale ne: “Longolola mudimu webe ha mbelu, udilongolueleu mu budimi; hashishe wase [nzubu, NW] webe.” Bia muomumue lelu’eu, bu mûdi mulume muena mudimu, udi mua kuikala dijinga ne kuenza mudimu mêba a bungi bua kupeta bintu bia mu nsombelu. (1 Timote 5:8) Kadi, kunyima suaku bua kuangata dîba dia ‘kuasa nzubu webe’​—mu dinanga ne mu nyuma.

5. Mmunyi mudi bakaji bena nkristo mua kuenza mudimu bua lupandu lua mêku abu?

⁵ Bakaji bena nkristo: Nuenu penu nudi ne bua kukuata mudimu mukole bua lupandu lua nzubu yenu. Nsumuinu 14:1 (NW) udi wamba ne: “Mukaji muena meji menemene udi wibaka nzubu wende.” Bu munudi bena dibaka, wewe ne bayebe nudi ne bujitu bua kuabanyangana mu dilongesha bana benu. (Nsumuinu 22:6; Malaki 2:14) Ebi bidi mua kumvuija kukela bana benu, kubalongolola bua bisangilu bia buena nkristo ne bua mudimu wa buambi, nansha pa kuendesha dilonga dia dîku padi bayebe kayi ne mushindu. Nudi kabidi mua kuenza bia bungi bua kulongesha bana midimu ya mu nzubu, ngikadilu ya tshitembu, mankenda a mubidi, ne bikuabu bintu bia bungi bidi mua kubambuluisha. (Tito 2:5) Padi balume ne bakaji babu benza mudimu pamue mushindu’eu, badi mua kukumbaja bilenga majinga a bana babu. Majinga aa adi tshinyi?

Majinga a kunangibua

6. Mmidimu kayi idi nayi ba-mamu ne ba-tatu mu dikola dia dinanga dia bana babu?

⁶ “Padi mamu muamushi wengeleka bana bende,” badi badiumvua bimpe, bakubibue, banangibue. (1 Tesalonike 2:7; Musambu wa 22:9, NW) Ba-mamu bakese ke badi mua kupangila kubombeka bana ba pa mbidi ne dinanga diabu. Muprofeta Yeshaya wakebeja ne: “[Mukaji, NW] udi mua kuhua muan’andi utshidi wamua mabele muoyo, bua yeye kafuidi muana wa balume wakuleleye luse, anyi?” (Yeshaya 49:15) Nenku, ba-mamu badi ne mudimu munene bua kukolesha dinanga mu bumuntu bua bana. Kadi, ba-tatu badi pabu mua kuikala ne mudimu munene wa kuenza pa bualu ebu. Mulongeshi wa mêku Paul Lewis udi wamba ne: “Tshiena muanji kumona muambuluishi wa bantu nansha umue udi wamba muvuaye mumvue muana mutomboke[delinquent] wamba muvuaye ne malanda mimpe ne tatuende. Nansha umue pa nkama ne nkama.”

7, 8. (a) Ntshijadiki kayi tshidiku tshidi tshileja diumvuangana dikole munkatshi mua Yehowa Nzambi ne Muanende Yezu Kristo? (b) Mmunyi mudi ba-tatu mua kufùla tshisuikidi tshia dinanga pamue ne bana babu?

⁷ Nenku bidi bikengela bua ba-tatu bena nkristo kudimabu ne lubatshi malanda a dinanga ne bana babu. Tshilejilu, tangila Yehowa Nzambi ne Yezu Kristo. Ku batismu wa Yezu, Yehowa wakamba ne: “Wewe udi Muana wanyi munanga, udi unsankisha bimpe.” (Luka 3:22) Mbiabungi biamba mu miaku mikese! Yehowa (1) wakitaba Muanende, (2) wakaleja patoke dinanga bua Yezu, ne (3) wakamanyisha dianyisha diende dia Yezu. Kadi, eu kauvua musangu umuepele uvua Yehowa mumanyishe dinanga bua Muanende to. Yezu wakambila Tatuende pashishe ne: “Wakunsua meme diambedi kabai [banji, NW] kufuka buloba.” (Yone 17:24) Bushuwa, pa nanku, bana buonso ba balume ne ba bakaji badi ne butumike kabena bakengela kuedibua tuasakidila, kunangibua ne kuanyishibua, kudi ba-tatuabu anyi?

⁸ Biwikala tatu, imue misangu udi mua kuenza bia bungi bua kufùla tshisuikidi tshia dinanga ne bana benu pa kubaleja dinanga ku mubidi ne ku miaku. Bushuwa, mbikolele bamue balume bua kuleja diengeleka diabu, nangananga pikalabu kabayi bapete musangu nansha umue dinanga kudi babu ba-tatu. Kadi nansha kuleja kuebe kua dinanga kuoku kakuyi kua nsongu kudi mua kuikala ne tshipeta tshinene kudi bana bebe. Ndekelu wa bionso, “dinanga didi diibaka.” (1 Kolinto 8:1) Pikala bana bebe badiumvua bakubibue bua dinanga diebe dia bu-tatu, nebadiumvue basakibue bua kuikala ‘bana balume ne bana bakaji balelela’ ne nebadiumvue bimpe bua kunuambila bidi munda muabu.​—Nsumuinu 4:3.

Majinga abu a mu nyuma

9. (a) Mmushindu kayi uvua baledi bena Izalele batshinyi ba Nzambi baditatshisha bua bidi bena nzubu wabu bakengela mu nyuma? (b) Mmishindu kayi kayiyi milongolola idi nayi bena nkristo ya kulongesha bana babu?

⁹ Bana badi pabu ne bidibu bakengela mu nyuma. (Matayo 5:3) Mozese wakambila baledi bena Izalele ne: “Mêyi aa andi nkutumina dîyi lelu’eu adi ne bua kuikala mu mutshima webe; udi ne bua kualongesha muanebe, kumuambilawu pawikala musombe mu nzubu muebe, ne pawikala wenda mu njila, ne pa kulala, ne pa kubiika. (Dutelonome 6:6, 7, NW) Biwikala muledi muena nkristo, udi mua kufila dilongesha divule ku mpukapuka, bu mudi “pawikala wenda mu njila.” Dîba dipitshisha pamue mu diendakana, mu disumba bintu, anyi mu dienda pamue ne bana bebe ku nzubu ne ku nzubu mu mudimu wa buena nkristo didi dituambuluisha bua kufila dilongesha mu mushindu kawuyi mutandabale. Mêba a didia adi tshikondo tshimpe tshitambe bua mêku kuyukilawu. “Tudi tuangata mêba a didia bua kuyukila pa bivua bienzeke munda munya,” ke tshidi muledi mukaji kampanda umvuija.

10. Bua tshinyi dilonga dia mu dîku ditu imue misangu bualu bukole, ne ndipangadika kayi didi baledi ne bua kuangata?

¹⁰ Kadi, dilongesha dilongolola ku diambuluisha dia dilonga dia Bible pa tshibidilu ne bana benu didi dikengedibua. Kabiyi mpata, “buhote budi busuikibue mu mutshima” wa bana. (Nsumuinu 22:15) Bamue baledi badi bamba ne: bana babu badi mua kunyangakaja ku bukole dilonga dia dîku. Mmushindu kayi? Mpa kuendakana kakuyi dikisha ne pa kulengulula, kuenza manaya adi enza tshiji (bu mudi mvita ne bana babu), anyi kuenza bu badi bapange malelela a nshindamenu a mu Bible. Pikalabi bifike too ne ku difuilakana dia disua dia bana ne dia baledi, disua dia baledi didi ne bua kutamba bukole. Baledi bena nkristo kabena ne bua kuteketa ne kulekela bana bakokesha nzubu wabu.​—Fuanyikija ne Galatia 6:9.

11. Mmunyi mudi dilonga dia mu dîku mua kusankisha?

¹¹ Pikala bana benu kabayi basue dilonga dia mu dîku, imue misangu bidi bikengela kuenza amue mashintuluka. Tshilejilu, dilonga didi diangatshibua bu mushindu wa kulondolola bilema bia bana benu matuku mashale aa anyi? Imue misangu bidi mua kuikala bipite buimpe bua kuyukila ne muana pa nkayende pa malu aa. Dilonga dienu didi dienjibua pa tshibidilu anyi? Biwikala mua kudiumusha bua bualu kampanda ku televizion anyi manaya kansanga, bana benu kabakuangata dilonga ne mushinga menemene to. Udi ne muoyo mujima ne musangelu mu ndongeshilu webe anyi? (Lomo 12:8) Bushuwa, dilonga didi ne bua kuikala tshikondo tshia disanka. Keba mua kusaka bana buonso bua kuikalamu ne ntema. Ikala ne mmuenenu muimpe ne wa diibaka, wela bana ka-lumbandi ne luya bua mandamuna abu. Bushuwa, kujikiji anu nshapita nansha, keba mua kulenga mitshima.​—Nsumuinu 23:15.

Mibelu mifila mu buakane

12. Bua tshinyi mibelu ne manyoka kabiena anu bitangila manyoka a ku mubidi?

¹² Bana badi kabidi bakengela bikole mibelu. Bu muudi muledi, udi ne bua kubafundila mikalu. Nsumuinu 13:24 udi wamba ne: “Udi kayi ukanda ne lukodi udi ne muan’andi lukuna, kadi udi unanga muan’andi udi unanukila kumukanda.” Kadi, Bible kêna usua kuamba ne: manyoka adi ne bua kufidibua anu ne lukodi. Nsumuinu 8:33 udi wamba: “Umvuayi diyisha,” ne badi batuambila ne: “dî dia mibelu didi dibuela mu mutshima wa muena lungenyi didi dihita mikumu lukama ham’bidi ha muhote.”​—Nsumuinu 17:10.

13. Mmunyi mudi mibelu ne manyoka mua kufidibua kudi muana?

¹³ Ku mpukapuka, manyoka a ku mubidi adi mua kuikala makanyine. Kadi, padiwu afidibua mu tshiji, adi mua kunekesha ne kupangila tshipeta. Bible udi udimuija ne: “Nuenu batatu, kanufikishi munda mua bana benu, bua mitshima yabo kaibungami.” (Kolosai 3:21) Bushuwa, “muena meji udi wandamuka muhote ku dikengesha didiye n’adi.” (Muambi 7:7) Nsonga mukengesha udi nansha mua kutombokela mikenji miakane. Nenku, baledi badi ne bua kuenza mudimu ne Mifundu bua kulongesha bana babu mu buakane mu mushindu wa ditshintshikila apu mushindame. (2 Timote 3:16) Mibelu ne manyoka bia Nzambi bidi bifidibua ne dinanga ne bupole-malu.​—Fuanyikija ne 2 Timote 2:24, 25.a

14. Ntshinyi tshidi baledi ne bua kuenza padibu bamba kufika munda ne nsòkà?

¹⁴ Bushuwa, “tuetu buonso, tutu tulenduka misangu mivule.” (Yakobo 3:2, NW) Nansha muledi wa dinanga udi mua kulenduka bua ntatu ya tshikondo atshi anyi kuamba tshintu tshibi peshi kuleja ngikadilu wa nsòkà. (Kolosai 3:8) Biobi bienzeke nanku, kanulekedi dîba dibuela eku muanebe muikale mu dikenga dikole peshi wewe muine muikale ne tshiji. (Efeso 4:26, 27) Jikija tshilumbu etshi ne muanebe, kumulomba dilekela pikalabi bikengedibua. (Fuanyikija ne Matayo 5:23, 24.) Kuleja budipuekeshi bua mushindu’eu kudi mua kukusemeja pabuipi ne muanebe. Biwikala kuyi mua kudikanda ne biwatshimunyibua kudi nsòkà, keba diambuluisha kudi bakulu batekibue mu tshisumbu.

Nzubu ya muledi umuepele ne mêku masambakaja

15. Mmunyi mudi bana mua kuambuluishibua mu mêku mudi muledi anu umue?

¹⁵ Ki mbana buonso badi bapeta diambuluisha kudi baledi babidi. Mu États-Unis muana 1 mu 4 udi ukoleshibua kudi muledi umue. ‘Bansongalume kabayi tatu’ bavuaku miaba yonso mu bikondo bitshivuabo bafunda Bible, ne diditatshisha bualu buabo ndiambulula misangu ne misangu mu Mifundu. (Ekesode 22:22) Lelu’eu, mêku a muledi-umuepele muena nkristo adi pawu atantamena mabika ne mala, kadi badi bakankamijibua ku muoyo pa kujadika se: Yehowa udi “tatu wa bana ba nshiya ne mulumbuluishi wa [bakaji, NW] ba mu lufuila.” (Musambu wa 68:5) Bena nkristo mbalombibue bua “kuambuluisha bana ba nshiya ne bakaji bakamba mu makenga abo.” (Yakobo 1:27) Bakuetu bena nkristo badi mua kuenza bia bungi bua kuambuluisha mêku adi ne muledi anu umuepele.b

16. (a) Ntshinyi tshidi muledi udi anu umuepele mua kuenza bua diakalenga dia nzubu wende? (b) Bua tshinyi mibelu ne manyoka bidi mua kuikala bikole, kadi bua tshinyi bidi ne bua kufidibua?

¹⁶ Biwikala muledi anu umuepele, tshiudi mua kuenza ntshinyi bua kuambuluisha bena mu nzubu muebe? Udi dijinga ne disuminina mu kulonga kua bible ne dîku diebe, kubuela mu bisangilu, ne kuenza mudimu wa buambi. Manyoka pawu adi mua kuikala mudimu mukole. Imue misangu utshidi udila bua dijimija dia muena dibaka munanga. Peshi udi mua kuikala uluangana ne didiumvua diebe bu muena tshibawu anyi ne tshiji bua dishipa dia dibaka. Pikala kabadi kanuambike, wewe ne muena dibaka nebe wa kale, bujitu bua kulama bana, udi nansha mua kutshina bua kumona muanebe usungula bua kuikala ne muena dibaka unudi batapulukangane nende anyi bashipe nende dibaka. Malu a mushindu’eu adi mua kukupangisha bua kufila manyoka adi akengedibua. Kadi, Bible udi utuambila ne: “muana udibo balekelela nkayandi udi ufuishisha mamu’andi bundu.” (Nsumuinu 29:15) Nenku kuteketedi didipiisha, kanyinganyinga, anyi ntatu mijula kudi muena dibaka wa kale. Difundila bipatshila bitshintshikila ne bishindame. Kushipi mêyi-maludiki a mu Bible.​—Nsumuinu 13:24.

17. Mmunyi mudi midimu ya bena mu nzubu mua kukondakana mu mêku mudi muledi anu umuepele, ne ntshinyi tshidi mua kuenjibua bua kuepuka nsombelu eu?

¹⁷ Kadi, ntatu idi mua kujuka pikala mamu mudisombele mua kuangata muanende wa balume bu bayende mukuabu​—mulume wa mu nzubu—​peshi kuangata muanende wa bakaji bu mulunda wa pa muoyo, kumunemejila bujitu ne bilumbu bia mu mutshima. Kuenza nenku kakuena kuimpe ne nkukondakaja meji a muana. Padi muaba wa muledi ne wa muana kawuyi musunguluja bimpe, manyoka adi mua kuteketa. Bimanyike patoke se: wewe ke muledi. Biwikala mamu ne ukengela mibelu mishindamene pa Bible, uyikebe kudi bakulu anyi kudi muanetu wa bakaji mukole ne mubobe.​—Fuanyikija ne Tito 2:3-5.

18, 19. (a) Imue ntatu idibu bapeta kudi mêku masambakaja idi tshinyi? (b) Mmunyi mudi baledi ne bana mu mêku masambakaja mua kuleja meji ne busunguluji?

¹⁸ Mêku adi muledi ne muledi ne bende bana adi pawu ne yawu ntatu. Pa tshibidilu, baledi aba badi bamona se: “dinanga dia lukasa lukasa” kadienaku. Tshilejilu, bana ba muena dibaka umue badi mua kuikala ne lubabu bua bidiye wenzela bende bana. (Fuanyikija ne Genese 37:3, 4.) Bushuwa, bana ba mukuabu muledi badi mua kunyingalala bua muledi mutapulukangane ne kutshina bua kunanga muledi mupiamupia kudi bu kutungila tatu wabu anyi mamu wabu mubaledi. Kuidikija bua kufila manyoka adi akengedibua kudi mua kukudimunyibua ne divuluija edi dia luonji, ‘Kuena muledi wanyi mulelela to!’

¹⁹ Nsumuinu 24:3 udi wamba ne: “Badi bibaka [nzubu, NW] ne meji, dijingulula dia mianda didi dimujadika.” Eyowa, bidi bikengela meji ne busunguluji kudi buonso bua dîku disambakaja kulubulukadi. Ku kakese ku kakese, bana badi ne bua kuitaba bulelela bua se: nsombelu mmumane kushintuluka. Baledi bapiabapia badi ne bua kulonga mua kuikala ne lutulu ne luse, kabafiki munda lukasa padibu babengibue bu mudibi bimueneka. (Nsumuinu 19:11; Muambi 7:9) Kumpala kua kuenza mudimu wa dinyoka ne dibela, anji kujadika bulunda ne muana wa muledi mukuabu. Kumpala kua malanda a mushindu’eu kujadikibuawu, bamue badi bela meji se: mbiakane kushila mubaledi wabu bua kutungunuka ne mibelu ne manyoka. Padi bilumbu bijuka, madikolela adi ne bua kuenjibua bua kuyukidilangana. “Kudi aba badi bakonkangana kudi meji,” ke tshidibu bamba mu Nsumuinu 13:10, NW.c

Tungunukayi ne mudimu bua lupandu lua nzubu wenu!

20. Ntshinyi tshidi bamfumu ba mêku bena nkristo ne bua kutungunuka ne kuenza?

²⁰ Mêku mashindame a buena-nkristo kaena adivuila nkayawu ku mpukapuka. Nuenu bamfumu ba mêku nudi ne bua kuenza madikolela wonso bua lupandu lua nzubu yenu. Nuikale batabale, nujingulula bikadilu bibi anyi majinga a bena bulongolodi ebu. Filayi tshilejilu tshimpe mu diakula, mu ngikadilu, mu dinanga, mu ditabuja, ne mu bukezuke. (1 Timote 4:12) Lejayi mamuma a spiritu wa Nzambi. (Galatia 5:22, 23) Lutulu, kanemu, dilekelelangana bilema, ne kuengeleka nebiambuluishe madikolela anudi nuenza bua kulongesha bana benu njila ya Nzambi.​—Kolosai 3:12-14.

21. Mmunyi mudi nsombelu wa luya, wa disanka mua kulamibua mu nzubu wetu?

²¹ Ne diambuluisha dia Nzambi, kebayi mua kujadika disanka ne luya mu nzubu wenu. Pitshishayi dîba pamue bu dîku, nuditatshisha bua kudia pamue nansha musangu umue ku dituku dionso. Bisangilu bia bena nkristo, mudimu wa buambi, dilonga dia mu dîku, mbintu bidi bikengedibua. Kadi, kudi kabidi “tshikondo tshia kuseka . . . tshikondo tshia kuja maja.” (Muambi 3:1, 4) Eyowa, difundilayi bikondo bia dijikija lunteke bidi biibaka mu nyuma. Makumbula a mizé, zoo, ne mikuabu miaba adi enza disanka bua dîku dijima. Peshi nudi mua kujima TV ne kupitshisha dîba bua kuimba misambu, kuteleja mijiki, kunaya, ne kuakula. Ebi bidi mua kusemeja bena dîku muaba umue.

22. Bua tshinyi udi ne bua kuenza mudimu mukole bua lupandu lua ba mu nzubu muebe?

²² Nuenu baledi bena nkristo buonso tungunukayi ne kuenza mudimu bua kusankisha Yehowa menemene “bua nukuame mamuma mu mudimu mulenga wonso ne nudiunde mu dimanya dijalame dia Nzambi.” (Kolosai 1:10, NW) Ibakayi nzubu wenu pa tshishimikidi tshikole tshia butumike ku Dîyi dia Nzambi. (Matayo 7:24-27) Ne ikalayi bajadike se: madikolela enu bua kukolesha bana benu “mu mibelu ne manyoka pamue ne buludiki bua lungenyi bia Yehowa” neapete dianyisha diende.​—Efeso 6:4, NW.

[Mêyi adi kuinshi]

Udi mua kuandamuna munyi?

◻ Mmunyi mudi mulume ne mukaji mua kuambuluishangana bua kuibaka nzubu wabu?

◻ Amue a ku majinga adi nawu muana a kunangibua adi tshinyi, ne mmunyi mudiwu mua kukumbajibua?

◻ Mmunyi mudi bamfumu ba mêku mua kulongesha bana babu mu mishindu milongola ne kayiyi milongolola?

◻ Mmunyi mudi baledi mua kufila mibelu ne manyoka mu buakane?

◻ Tshidi mua kuenjibua ntshinyi bua diakalenga dia mêku a muledi umue ne bua mêku adi muena dibaka yonso ne bende bana?

[Tshimfuanyi mu dibeji 16]

Dinanga dia tatu ne dianyisha diende bidi ne mushinga mu didiundisha dia dinanga dia muana