Sankayi mu Yehowa!

“Sankayi mu Mukalenge matuku wonso. Ndi ngamba tshiakabidi se: sankayi!”​—FILIPOI 4:4, NW.

1. Bua tshinyi miaku idi Paulo wamba bua se: bena nkristo badi ne bua kusanka matuku wonso idi mua kutukemesha?

LELU’EU, tubingila bua kusanka ntukese ne katutuku misangu mivule to. Bantu benza ne lupuishi, nansha bena nkristo balelela, badi bakamangana ne nsombelu mituadi ya tunyinganyinga​—bu mudi bulofua, masama, lufu lua banangibue, ntatu bua dishilangana dia bu-muntu, peshi buluishi bua kudi bena dîku badi kabayi bena kuitabuja anyi bua kudi balunda ba kale. Nenku, mmunyi mutudi ne bua kumvua mubelu wa Paulo wa ‘Kusanka matuku wonso’? Pa kutangila nsombelu ya dipanga disanka ne ntatu idi yonso wa kutudi ne bua kutantamena, kudiku mushindu wa kusanka anyi? Dikonkonona malu adi kumpala ne ku nyima kua mêyi aa nedikutokeshile bualu ebu.

Kusanka​—Bua tshinyi ne mmunyi?

2, 3. Mmushinga kayi udi nawu disanka, bu mudibi bilejibue bua Yezu ne bua bena Izalele wa kale?

² “Sankayi mu Mukalenge matuku wonso. Ndi ngamba tshiakabidi se: sankayi!” Ebi bidi mua kutuvuluija mêyi avuabo bambile bena Izalele buludiludi kukadi siekele bu 24 ne: “Disanka dia Yehowa nlumbu luenu,” peshi bilondeshile nkudimuinu wa Moffatt: “Kusankila mu wa Tshiendelele mmakanda enu.” (Nehemiya 8:10) Disanka didi dipetesha makanda ne didi anu bu lumbu lukolesha kutudi mua kunyemena bua dikankamijibua ne bukubi bietu. Disanka ntshiamu tshia mudimu tshiakambuluisha nansha Yezu muntu mupuangane bua kunanukila. “Bua disanka divuabo bamutekele kumpala, wakatantamena mutshi wa tshinyongopelu, kupetula bundu, e kusomba ku dia balume dia nkuasa wa bumfumu wa Nzambi.” (Ebelu 12:2, NW) Mu butoke buonso, kuikale mua kusanka mu tshikondo tshia ntatu kudi ne mushinga muvule bua lupandu.

³ Bangabanga ne kubuela mu Buloba Bulaya, bakatumina bena Izalele dîyi ne: “Nenusanke mu malu mimpe onso akanuha Yehowa, Nzambi wenu, ne nuenu ne ba mu nsubu yenu, ne Muena Lewi ne benyi badi munkatshi muenu.” Kubenga kusadila Yehowa ne disanka kuvua ne bua kupatula bipeta bibi bitambe. “Milau ei yonso neilue kunudi, neyinulonde, neyinuhete tô ne hanuajimishibua . . . bualu bua nuenu kanuakakuatshila Yehowa, Nzambi wenu, mudimu ne disanka mu mitshima yenu bua bintu bionso biakanuheye.”​—Dutelonome 26:11; 28:45-47.

4. Bua tshinyi tudi mua kupanga kusanka?

⁴ Mmushindu kayipu udibi bikengela bua se: bashadile ba ku bela manyi a mu nyuma ba lelu’eu pamue ne “mikoko mikuabo” benzejanganyi nabu ba mudimu basanke! (Yone 10:16) Paulo, pa kuambulula mubelu wende ne: “ndi ngamba tshiakabidi se,” wakazangika mushinga wa kusanka bua bintu bionso bimpe bidi Yehowa utuenzela. Ke mututu tuenza anyi? Peshi tudi anu badiine mu midimu yetu ya mu nsombelu wa ku dituku dionso idi pamu’apa mua kutufikisha ku dipua muoyo tubingila tuvule tutudi natu bua kusanka anyi? Ntatu idiku mituimanyine bu mukuna mu mushindu wa kutumbushayi mmuenenu wetu wa Bukalenge ne mabenesha afuminaku anyi? Tutuku tushiila bikuabo bintu muaba​—bu mudi dibenga kutumikila mikenji ya Nzambi, kubenga kuangata mêyi-maludiki a Nzambi ne mushinga, peshi kulengulula midimu ya bena-nkristo—​bua kutumbushabi disanka dietu anyi?

5. Bua tshinyi muntu udi kayi mutshintshikidi udi ne lutatu bua kusanka?

⁵ “Ditshintshikila dienu dimanyike kudi bantu buonso. Mukalenge ukadi pabuipi.” (Filipoi 4:5, NW) Muntu udi kayi mutshintshikidi kêna ne ngikadilu wa pankatshikatshi nansha. Udi mua kulekela kutabalela makanda ende a mubidi, udi mua kukengesha mubidi wende ne ntatu anyi tunyinganyinga bidi kabiyi ne dikuatshisha. Pamu’apa ki mmumanye bua kuitaba mikalu yende ne kusomba mu diumvuangana nayi to. Udi mua kudifundila bipatshila bitambe bunene ne kuteta kubikumbaja kayi utangila bipeta bidi mua kufuminaku. Anyi pamu’apa udi mua kutumika ne mikalu yende bu kabingila bua kulua mukata anyi muena lulengu. Bua dipanga ngikadilu wa pankatshikatshi ne dibenga kuikala mutshintshikidi, udi umona bimukolela bua kusanka.

6. (a) Ntshinyi tshidi bena nkristo netu mua kumona kutudi, ne ndîba kayi didibi mua kuenzeka? (b) Mmunyi mudi mêyi a Paulo adi mu 2 Kolinto 1:24 ne Lomo 14:4 atuambuluisha bua kuikala batshintshikidi?

⁶ Nansha biatuangata baluishi bu bena bitabataba, bena nkristo netu nebamone dîba dionso butshintshikidi buetu. Ne nebikale nanku, bituikala bena ngikadilu wa pankatshikatshi ne patuikala katuyi tutekemena kutudi tuetu bine bupuangane anyi kulomba bia muomumue kudi bakuabo. Kupita bionso, tudi ne bua kudikanda kutekela bakuabo majitu manene adi aya dia muamua ne bidi Dîyi dia Nzambi dilomba. Mupostolo Paulo wakamba ne: “Ki mmumue ne tudi ne bukokeshi pa ditabuja dienu to, kadi tudi benzejanganyi nenu ba mudimu bua disanka dienu.” (2 Kolinto 1:24, NW) Bu muvuaye Mufarizeyi kale, Paulo uvua mumanye bimpe se: mêyi-maludiki adi kaayi majoboke adi bantu badi ne bukokeshi bêla adi afuatakaja disanka, pabi mibelu idi yambuluisha ya kudi benzejanganyi nende ba mudimu idi idivudija. Muanda wa se: “Mukalenge ukadi pabuipi” udi ne bua kuvuluija muntu muena ditshintshikila se: katuena ne bua ‘kulumbuluisha musadidi wa mu nzubu wa mukuabo. Kumpala kua mfumuende nkudiye wimana anyi upona panshi.’​—Lomo 14:4, NW.

7, 8. Bua tshinyi bena nkristo badi ne bua kutekemena ntatu, kadi mmushindu kayi udibu mua kutungunuka ne kusanka?

⁷ “Kanusumpakanyi bua tshintu nansha tshimue, kadi, mu malu wonso, ku masambila ne misengelelu ne dianyisha, numanyishe Nzambi milombo yenu.” (Filipoi 4:6, NW) Lelu’eu tudi mu “tshikondo tshikole” tshiakamanyisha Paulo. (2 Timote 3:1-5) Nenku, bena nkristo badi ne bua kutekemena kuakamangana ne ntatu. Mêyi a Paulo a “kusanka matuku wonso” kaena umbusha muanda wa se: muena nkristo mulamatshi wa mikenji udi imue misangu mua kubungama anyi kutekeshibua mu mikolo. Pa bidi bitangila Paulo, yeye muine wakamba ne: “Bakatutshintshimika ku nseke yonso, kadi katuena mu muaba mubumbakane; tudi tulubakana, kadi katuena banze kuteketa; tuakuihatshibua, kadi katuena tulekedibua ha nkayetu; tuakukumibua hanshi, kadi katuena tushihibua.” (2 Kolinto 4:8, 9) Kadi, disanka dia muena nkristo didi dituuyisha tshilunji ne kabidi diumbusha bikondo bîpi bia dibungama ne tunyinganyinga. Didi dipetesha bukole budi buambuluisha bua kuya kumpala ne dipangadika dikole; katuyi tupua muoyo tubingila tuvule tutudi natu bua kusanka.

⁸ Padi ntatu ijuka, nansha yoyi ya mushindu kayi, muena nkristo wa disanka ne budipuekeshi, udi ulomba diambuluisha kudi Yehowa mu masambila. Kakushala mu kanyinganyinga kanekesha to. Kunyima kua kuenza tshionso tshidiye mukumbane bua kuenza bua kujikija ntatu eyi, neashiye tshionso tshialua kuenzeka mu bianza bia Yehowa mu diumvuangana ne dilomba edi: “Upuila Yehowa yeye nkayende bujitu buebe, ne yeye neakukoleshe.” Kadi, muena nkristo kêna utupisha kuela Yehowa tuasakidila bua bimpe Biende bionso bidiye mumuenzele.​—Musambu wa 55:22, NW; tangila kabidi Matayi 6:25-34.

9. Mmunyi mudi dimanya dia bulelela difila ditalala mu tshieledi tshia lungenyi, ne bualu ebu budi mua kuikala ne buenzeji kayi buimpe kudi muena nkristo?

⁹ “Ditalala dia Nzambi didi dipite lungenyi kayi luonso bulenga, nedilame mitshima yenu ne bieledi bienu bia lungenyi ku butuanganji bua Kristo Yezu.” (Filipoi 4:7, NW) Dimanya bulelela budi mu Bible didi dipikula tshieledi tshia lungenyi tshia muena nkristo ku mashimi ne kabidi dimuambuluisha bua kuvudija ngenyi miakane. (2 Timote 1:13) Nenku, mmupete diambuluisha bua kuepuka bubi anyi bienzedi bibule meji bidi mua kunyanga ditalala mu malanda ende ne bakuabo. Pamutu pa kutekeshibua mu mikolo bua dipanga buakane ne bubi bimuenzela, udi weyemena Bukalenge bua Yehowa buajikija ntatu ya bukua-bantu. Ditalala dia mushindu’eu mu tshieledi tshia lungenyi didi dikuba mutshima wende, dilama bipatshila biende bikezuke, ne dilombola ngelelu wende wa meji mu njila wa buakane. Ku lukuabo luseke, bipatshila bikezuke ne ngelelu wa meji mululame, bidi bipetesha tubingila kabukabu bua kusanka nansha mudiku ntatu ne bifimpakaji bikebesha kudi bulongolodi ebu budi mu tshikondo tshikole.

10. Disanka dilelela didi mua kupeteka anu pa kuakula anyi kuela meji pa malu kayi?

¹⁰ “Pashishe, bana betu, malu wonso adi a bushuwa, adi makumbanyine kutabalela, adi makane, a bupeluke, a kunanga, a lumu luakane, a ngikadilu mulenga ne a kutemba ku bantu, ikale malu anudi nutungunuka ne kuelangana meji.” (Filipoi 4:8, NW) Kabiena bisankisha muena nkristo bua kuakula anyi kuelangana meji pa bintu bibi. Ebi bidi diakamue biumbusha mishindu kabukabu ya dijikija lutetuku idi bulongolodi ebu bupatula. Muntu nansha umue kêna mua kulama disanka dia bena nkristo bikalaye uwuja tshieledi tshiende tshia lungenyi ne mutshima wende ne malu a dishima, a bukoya, ne malu adi kaayi malulame, a buenzavi, adi kaayi mimpe, a lukinu ne mabi. Bua kuamba bimpe, muntu nansha umue kêna mua kupeta disanka dilelela pa kuwuja tshieledi tshiende tshia lungenyi ne mutshima wende ne malu a bukoya. Mu bulongolodi ebu bua Satana bunyanguke, ndiibakibua kayipu ditudi nadi bua kumanya se: muena nkristo udi ne bintu bimpe bivule bidiye mua kueleela meji ne kuyukidilangana!

Tubingila kabukabu bua kusanka

11. (a) Mbualu kayi butudi katuyi ne bua kulengulula, ne mbua tshinyi? (b) Dibuela mu mpuilu wa matunga-masanga divua ne buenzeji kayi kudi mutumibue kampanda ne mukajende?

¹¹ Patudi tuakula bua tubingila tutudi natu bua kusanka, katupu muoyo dinanga dia buena-muntu bua bukua-matunga. (1 Petelo 2:17) Nansha mudi bena matunga ne bisamba pa buloba bujima bakinangana munkatshi muabu, bena tshisamba tshia Nzambi badi basemejangana umue ne mukuabo pabuipi mu dinanga. Buobumue buabo butu butamba kumueneka mu mpuilu yabo ya matunga-masanga. Mu umue wa kudiyi wakenzeka mu 1993 ku Kiev, Ukraine, mutumibue wakafumina ku Etats-Unis wakafunda ne: “Binsonji bia disanka, mêsu avua engelela, dielangana mu bitupa dia misangu ne misangu, ne dielangana muoyo kudi musumba wa bantu bavua mu tshipalu pa kunyungisha makumbi a mêkala mashilangane ne bitambala bivua tshijadiki tshia buobumue bua teokrasi. Mitshima yetu ivua yiwule tente ne lutambishi bua bivua Yehowa mukumbaje bu mu tshishima mu dinanga dia buena-muntu bua bukua-matunga. Malu aa akalenga mu mushindu muondoke mutshima wa mukajanyi ne wanyi pawo ne akasakidila diumvuija dipiadipia ku ditabuja dietu.”

12. Mmunyi mudi Yeshayi 60:22 wenda ukumbana ku mêsu kuetu?

¹² Mmushindu kayipu udi ditabuja dia bena nkristo dishindama padibu lelu’eu bamona mudi milayi ya mu Bible ikumbana ku mêsu kuabo! Tuangate bu tshilejilu, mêyi adi mu Yeshayi 60:22 [NW]: “Mukese neavue tshinunu, ne eu udi mutambe bukese [neavue] ditunga dikole. Meme, Yehowa, nembuambuluje mu tshikondo tshiabu.” Pakaledibua Bukalenge mu 1914, anu bantu 5 100​—mukese—​uvua ufila bumanyishi ne disuminyina dionso. Kadi, mu bidimu bitanu bipite, bunene bua buena-muntu bua bukua-matunga budi bualabala ne Bantemu bapiabapia batambule batue ku bantu 5 628 ku lumingu luonso! Mu 1993, bungi bubandile bua ba-ministre ba tshisumi buvua bua bantu 4 709 889. Anjibi kuela meji! Ebi bidi biumvuija se: “mutambe bukese” wa mu 1914 mmulue menemene “tshinunu”!

13. (a) Ntshinyi tshidi tshienda tshienzeka bituadijile mu 1914? (b) Mmunyi mudi Bantemu ba Yehowa batumikila dîyi-diludiki didi mu mêyi a Paulo adi mu 2 Kolinto 9:7?

¹³ Kumbukila mu 1914, Bukalenge bua Masiya budi bukokesha munkatshi mua baluishi bende. Bukokeshi buende mbabutue nyama ku mikolo kudi bamulondi bende badisuile badi bafila mêba, makanda, ne mfranga bua kulubuluja mudimu wa buambi pa buloba bujima bia muomumue kabidi ne kampanye ka luibaku mu bukua-matunga. (Musambu wa 110:2, 3) Bantemu ba Yehowa badi basanka bua padi mapa a ku budisuile apeshibua bua kujikija midimu eyi, nansha mudibo kabayi batamba kuakula bua mfranga mu bisangilu biabu.a (Fuanyikija ne 1 Kulondolola 29:9.) Bena nkristo balelela ki mbasakibue ku bukole bua kufila mapa a ku budisuile; badi bangata muanda eu bu disanka bua kutua Mukalenge wabo nyama ku mikolo bilondeshile nsombelu yabo, muntu yonso udi wenza “bu mudiye mudifundile munda muende, kabiyi ne mutshima mujoboke anyi dienzejibua ku bukole.”​—2 Kolinto 9:7, NW.

14. Nsombelu kayi udi mumueneka mu tshisamba tshia Nzambi bituadijile mu 1919 ne udi ubapetesha kabingila kayi bua kusanka?

¹⁴ Dipingajilula ntendelelu mulelela mu tshisamba tshia Nzambi divuabo badianjile kumanyisha diapatuishi mparadizu wa mu nyuma. Bituadijile mu 1919, udi ku kakese ku kakese wenda walabaja mikalu yende. (Musambu wa 14:7; Yeshayi 52:9, 10) Mbipeta kayi biapatuki? Bena nkristo balelela badi ne “musangelu ne disanka.” (Yeshayi 51:11, NW) Mamuma mimpe adi apatuka ntshijadiki tshia bidi spiritu wa Nzambi ne bukokeshi bua kukumbaja ku butuangaji bua bantu bapange bupuangane. Buonso buetu tudi tuupula lumu ne butumbi pa makaya a Yehowa, kadi ndisanka kayi dikuabo didiku kupita kulua benzenjanganyi ba mudimu ne Nzambi? (1 Kolinto 3:9) Yehowa udi ne bukole buvule bua kujula mabue, pikalabi bikengedibua, bua kumanyishawu mukenji wa bulelela. Kadi, kakasungula ntumikilu eu to, pamutu pa nanku, wakasungula bifukibua bienza ne lupuishi bidi bidifila ku budisuile bua kumanyisha disua diende.​—Luka 19:40.

15. (a) Mmianda kayi ya mu matuku adi panshi aa itudi tulonda ne ntema yonso? (b) Mmuanda kayi utudi bindila ne disanka dionso?

¹⁵ Ne ditshina dionso, basadidi ba Yehowa badi mpindieu batangila mianda idi yenzeka mu bulongolodi ebu anu bu mudiyi mu diumvuangana ne milayi ya mu Bible. Matunga mmatete ne muawu muonso​—kadi ki mmangule mpasu—​bua kujalamija ditalala. Mianda idi yenda yenzeka mmibafikishe ku dieyemena Bulongolodi bua Matunga Masanga bua kujikijabu ndululu idi mu imue miaba ya buloba. (Buakabuluibua 13:15-17) Kadi, ne disanka dionso, bena tshisamba tshia Nzambi mbindile umue wa ku mianda ya disanka divule yenzeka, dituku diawu didi dienda disemena pabuipi ku dituku dionso. “Tusankayi ne tutshionkomoke ne disanka, ne tumupeshayi butumbi, bualu dibaka dia Muan’a mukoko diafiki ne mukajende mmudilongolole.”​—Buakabuluibua 19:7, NW.

Kumanyisha​—Mbujitu peshi ndisanka?

16. Umvuija mushindu udi dipanga kutumikila bitudi tulonga mua kujimija disanka dia muena nkristo?

¹⁶ “Malu anuakalonga, anuakitaba, anuakumvua ne anuakamona kundi, nutumikile malu aa; ne Nzambi wa ditalala neikale nenu.” (Filipoi 4:9, NW) Pa kutumikila malu avuabo balonge, bena nkristo badi mua kutekemena dibenesha dia kudi Nzambi. Bumue bua ku malu matambe bunene buvuabo balonge ndikengedibua dia kumanyisha lumu luimpe kudi bakuabo. Bushuwa, nnganyi udi mua kubabidila ditalala mu tshieledi tshia lungenyi anyi kusanka biabengaye kumanyisha lumu kudi bantu bena mutshima mululame badi muoyo wabo musuikakaja ku diteleja lumu elu?​—Yehezekele 3:17-21; 1 Kolinto 9:16; 1 Timote 4:16.

17. Bua tshinyi mudimu wetu wa buambi udi ne bua kuikala dîba dionso mpokolo wa disanka?

¹⁷ Ndisanka kayipu diakusangana bantu badi bafuanangane ne mikoko badi badiakaje ku budisuile bua kumanya malu adi atangila Yehowa! Bushuwa, aba badi basadila ne bipatshila bimpe, nebamone dîba dionso mudimu wa Bukalenge bu mpokolo wa disanka. Bidi nanku bualu kabingila kanene ka kuikala Ntemu wa Yehowa nka kutumbisha dîna Diende ne kubingisha muanzu Wende wa bu Mukokeshi ukena mikalu udi ku mutu kua bionso. (1 Kulondolola 16:31) Muntu udi ujingulula muanda eu neasanke nansha pabenga bantu mu mushindu mubule meji lumu luimpe ludiye ubatuadila. Mmumanye se: kufila bumanyishi kudi bantu badi kabayi bena kuitabuja nekujike dituku kampanda; kadi ditumbisha dîna dia Yehowa neditungunuke bua kashidi.

18. Ntshinyi tshidi tshisaka muena nkristo ku dienza disua dia Yehowa?

¹⁸ Ntendelelu mulelela udi usaka bamutumikidi ku dienza malu adi Yehowa ulomba, ki ng’anu bualu badi ne bua kuenza nunku, kadi bualu mbanange kuenza nunku. (Musambu wa 40:8; Yone 4:34) Mbikolele bantu bavule bua kufika ku dibijingulula. Dimuedi, inabanza kampanda musedibue wakambila Ntemu kansanga wakamukumbula ne: “Bushuwa, ndi ne bua kunuela diboko muulu. Meme tshiena mua kuya ku nzubu ne ku nzubu kumanyisha malu a tshitendelelu tshianyi bu munudi nuenza to.” Ne mimuemue ku mishiku, Ntemu [eu] wakamuandamuna ne: “Ndi mua kumvua muwudi udiumvua. Bangabanga ne meme kulua umue wa ku Bantemu ba Yehowa, kuvua mua kummona nya kudi bakuabo bantu bua kuyukidilangana nabo malu adi atangila tshitendelelu tshianyi to. Kadi, mpindieu ndi munange bua kuenza nunku.” Inabanza awu wakanji kuela meji bua tshitupa tshîpi ne pashishe kuoya ngombo ne: “Pa kutangila bimpe, tshiebe tshitendelelu tshidi ne tshintu kampanda tshia kufila tshidi tshianyi katshiyi natshi. Pamu’apa ndi ne bua kutangila menemene muanda eu.”

19. Bua tshinyi mpindieu ntshikondo tshia kusanka kupita muvuabi kumpala?

¹⁹ Mvese wa tshidimu tshia 1994 udi mufunda ne maleta manene mu Nzubu yetu ya Bukalenge utu pa tshibidilu utuvuluija ne: “Eyemena Yehowa ne mutshima webe mujima.” (Nsumuinu 3:5, NW) Kudiku mua kuikala kabingila katambe bunene bua kusanka kupita dieyemena Yehowa dietu, lumbu luetu lukolesha kutudi tunyemena anyi? Musambu wa 64:10 [NW] udi wamba ne: “Muakane neasanke mu Yehowa ne bushuwa neanyemene kudiye.” Etshi ki ntshikondo tshia kutenkakana anyi kulekela to. Ngondo kayi wonso udi upita udi utusemeja menemene ku bulelela budi basadidi ba Yehowa batekemena bikole katshia ku matuku a Abele. Mpindieu ntshikondo tshia kueyemena Yehowa ne mutshima wetu mujima, pa kumanya se: kupita ne bangabanga, tudi ne tubingila tuvule bua kusanka!

[Mêyi adi kuinshi]

Mmunyi muudi mua kuandamuna?

◻ Bua tshinyi, bilondeshile Nehemiya 8:10, tudi ne bua kusanka?

◻ Mmunyi mudi Dutelonome 26:11 ne 28:45-47 uleja mushinga wa kusanka?

◻ Mmunyi mudi Filipoi 4:4-9 mua kutuambuluisha bua kusanka?

◻ Nkabingila kayi kadi mvese wa tshidimu tshia 1994 utupetesha bua kusanka?

[Tshimfuanyi mu dibeji 16]

Bantemu bena Russie ne Allemagne badi basanka mudibu mu buena-muntu bua bukua-matunga

[Tshimfuanyi mu dibeji 17]

Kuabanyangana bulelela ne bakuabo nkabingila bua kusanka