Bantemu ba Yehowa pa buloba bujima: Nigeria

NIGERIA mmudifinye mu dinkonya pa nshindamenu wa difu dia Afrike wa ku ouest. Ditunga edi didi mu Golfe wa Guinée, ku nord kua mushonyi wa ekuatere didi ne bantu badi basemu bapite pa miliyo 88.a

Mu bidimu bibidi bia mudimu bishale, filiale wa Nigeria wa Société Watch Tower wakatabalela bansonga mu mushindu wa pa buawu. Dikebulula dienza mu bisumbu bia Bantemu ba Yehowa diakaleja se: bia pa lukama 80 bia aba bakatuadija buambi bua lumu luimpe ku Nigeria mu 1992 bavua bena bidimu bivua pankatshi pa 10 ne 20. Aba bakatambushibua mu tshidimu atshi, bia pa lukama 63 bavua bena mvula ayi.

Bansonga badi bolola tshianza bua kupanda-njila

Bansonga bavule badi batuadija mudimu wa buambi bua ku dîba ne ku dîba bu bampanda-njila. Mpanda-njila mukaji Hannah udi wamba ne: “Pankavua pa kujikija kalasa, ngakakumbula aba bakabuela mu Kalasa ka Mudimu wa Bumpanda-njila, muinamu ngakasanganamu bana betu ba bakaji bakulakaje babidi. Ngakadiambila munda munda ne: ‘Padi babidi aba mua kupanda-njila, bua tshinyi meme panyi tshiena mua kuenza nunku?’

“Nenku, pangakajikija kalasa, ngakalua mpanda-njila. Ngondo isatu pashishe, ngakapetangana ne Josephine, mutendeledi wa juju anyi tshijimba tshia bena Afrike wa ku Ouest. Josephine wakamba ne: ‘Nuenu Bantemu ba Yehowa nudi bantu babi. Kanutu nuenza difesto dia Diledibua anyi nutumika ne bijimba.’ Ngakamuandamuna ne: bu yeye mua kuanyisha bua kulonga pamue nanyi Bible, uvua mua kumanya bua tshinyi katutu tutumika ne bintu bia nunku. Wakandomba bua meme kumupinganyinuna. Pashishe, wakatuadija kubuela mu bisangilu ne wakenza mashintuluka mavule mu nsombelu wende. Mu Tshisua-Munene 1990 wakatambushibua. Bituadijile mu Tshimungu 1991, Josephine ukadi mpanda-njila. Pakabuelaye mu Kalasa ka Mudimu wa Bumpanda-njila tshidimu tshishale, wakandubula kudi balongi nende bu mamuende wa mu nyuma!”

Kasete ka Video ne Nzubu wa Bukalenge

Kamue ka ku tusete tua video tua Société kakambuluisha tshisumbu kampanda tshikese bua kupeta tshitupa tshia buloba bua [kuibaka] Nzubu wa Bukalenge. Mu dikeba tshitupa tshia buloba tshia kusumba, bana betu ba balume banayi bakafika kudi Onojie, mfumu wa kabukulu wa muaba awu. Wakabaleja tshitupa tshia buloba tshivua ne mushinga wa dolare 1 025 ya bena Etats-Unis. Tshisumbu katshivua mua kukokesha bua kuyifuta to, bualu anu bamanyishi 17 ki bavua mua kufila mfranga bua muanda eu. Onojie wakapangadija bua kubaleja mukuabo muaba.

Ngondo bungi kampanda kunyima, umue wa ku bakulu ba mu tshisumbu wakakumbula Onojie kuende. Onojie uvua ubandila kasete ka video kavua kaleja ditekibua diende mu nkuasa wa bumfumu. Mukulu wakamba ne: “Ndi musue bua ubandile kasete ka video kandi naku. Kasete aka kadi ne tshiena-bualu tshia Les Témoins de Jéhovah: un nom, une organisation.”

Kunyima, mukulu eu wakebeja tshivua Onojie wela meji bua kasete ka video aku. “Ngakabandila filme eu misangu itanu,” ke muakamba Onojie. Mukulu wakavuluija Onojie Nzubu ya Bukalenge ivuaye mumone mu kasete ka video ne kumumvuija se: tshisumbu tshia muaba eu tshivua patshi tshisua kuibaka tshintu kampanda tshia muomumue. Nenku, mukulu wakamuleja ne: biapeta tshisumbu tshitupa kampanda tshia buloba ku mutumba kuatshi, netshisumbe diakamue. Onojie wakandamuna ne: “Butuku bushale, kunyima kua dibandila kasete ka video aka, ngakela panyi meji a muomumue.” Pa nanku, wakasakidila metre 6 ku lupangu lua tshisumbu. “Nudi mua kuangata etshi,” ke muakambaye. “Nenku, mu bule nudi mua kululepesha anu bu munudi nukengela. Longolola fishi ya lupangu, ne nentueku tshiala.”

[Mêyi adi kuinshi]

[Kazubu mu dibeji 9]

NSOMBELU WA DITUNGA

Tshidimu tshia mudimu tshia 1993

BUNGI BUBANDILE BUA BAMANYISHI: 174 582

MWAYENE: Ntemu 1 bua bantu 507

BAKABUELA MU TSHIVULUKILU: 473 245

MWAYENE WA BAMANYISHI BAMPANDA-NJILA: 19 777

MWAYENE WA MALONGA A BIBLE: 242 028

BUNGI BUA BATAMBULE: 8 888

BUNGI BUA BISUMBU: 3 289

FILIALE: BENIN CITY, EDO STATE