Bua tshinyi bantu babi badi balubuluka?
“BUALU kai bantu babi badi bashala ne muoyo?” Lukonko elu lukavua lumana kuedibua kale kudi muena lulamatu Yobo, ne mbaluambulule kabidi misangu ya bungi katshia ku tshikondo tshiende. Pamu’apa ludi mu bieledi bia meji bia bantu bavule badi mu teritware wa Yougoslavie wa kale (bu mudi mukaji muleja pa tshizubu tshietu) badi badila aba badi bakengakana mu mvita mikuate buôwa. Bua tshinyi bantu babi badi bapanduka ne nansha balubuluka? Anu bu muakaleja Yobo, misangu ya bungi “mu nsubu yabo mudi ditalala, kamuyi buowa, mulangala wa Nzambi kawena uyikuma.”—Yobo 21:7, 9.
Ebi bidi biumvuija ne: kusadila Nzambi, kunanga bena mutumba netu, ne kudikanda ku dienza bibi kabiena ne mushinga anyi? Nansha kakese! Bible udi utupetesha ditekemena diakane padiye wamba ne: “Kanuluanganyi bua kutshimuna benji ba bibi anyi kanutembanganyi ne aba badi benza bibi. Bualu anu bu mutu bisosa nebuume mu katupa kîpi emu, ne nebafubidile bu bisekiseki bibishi bia muvu wa printemps. Eyemena MUKALENGE ne enza bimpe.”—Musambu wa 37:1-3, nkudimuinu wa New English Bible.
Eyowa, dilubuluka dia tshimuenekelu dia benji ba bibi didi anu dia tshitupa tshîpi. Bushuwa, mioyo yabo mmitambe buîpi, kadi aba badi basadila Nzambi badi ne ditekemena dia mpatshi bua tshikondo tshialua. Mu katupa kîpi emu, dilaya dia Nzambi nedikumbane: “[Nzambi] neakupule tshinsonji tshionso ku mêsu kuabo, ne lufu kaluena luikalaku kabidi, nansha madilu nansha didiabakena, nansha bisama kabiena bikalaku kabidi. Malu a diambedi akujimina.” (Buakabuluibua 21:4, NW) Amu bantu bakane, ki mbantu babi, ke bamona tshikondo atshi. Ndikankamijibua kayipu dia kusemena kudi Nzambi ne kulonga bua kuenza disua diende, katuyi tuditatshisha bua bubi bua aba badi batunyungulule!
Biwikala ujinga kupeta mamanyisha a pa mutu,peshi ujinga bua muntu kampanda akukumbule bua kulonga Bible pamue nebe kabiyi kufuta nfranga suaku ufundile Bantemu ba Yehowa ba muaba uudi musombele anyi kudi Association “Les Témoins de Jéhovah,” B.P. 634 Limete, Kinshasa, Zaïre.