Bafue badi mua kutumona anyi?

MUKAJI kampanda wakashipa bayende. Bidimu muanda-mutekete kunyima mmutshingisha kudi tshilota tshidiye witabuja ne: ntshimanyinu tshia tshiji tshikole tshia bayende wakafua. Bua kutuyisha “spiritu” wa bayende, udi utuma muanende wa bakaji bua kuitshikija milambu ya maluvu pa lukita luende.

Muanende wa bakaji eu ki mmumanye tshia kuambila spiritu wa tatuende, bualu mulambu ng’wa kudi mamuende wakamushipa. Kumbukila ku muaba kampanda musokome, muakunyende wa balume udi ubandila. Wakadifila ku budisuile, [bua se:] ne yeye ne yayende wa bakaji balombe tatuabu mu disambila bua abambuluishe bua kusombola dishipibua diende.

Tshitupa etshi tshia dinaya tshidi tshifumina mu dinaya dia bena Greke dia Batuadi ba mulambu wa kuitshikija, difunda kukadi bidimu bipite pa 2 400. Mu miaba mikuabo pa buloba, nangananga mu Afrike, milambu ya muomumue mienza ku nkita itshidi anu ifidibua nansha lelu’eu.

Anjibi kuangata tshilejilu tshia Ibe, udi musombele ku Nigeria. Bu muakafuishaye bana basatu, wakaya kudi mpaka-manga wa muaba awu, e kuambilaye Ibe ne: lufu kalutu luabula mulambidi​—tatuende wa Ibe wakafua udi ne tshiji bualu dijikibua diende kadiakenzeka biakane to.

Pa kulonda mubelu wa mpaka-manga wa muaba awu, Ibe udi ulambula mbuji ne witshikija mulambu wa maluvu a gin ne mvinyo pa lukita lua tatuende. Udi ubila spiritu wa tatuende, ulomba dimufuila luse, ushindika dinanga diende, ne ulomba dibenesha.

Ibe kêna wela mpata ne: tatuende udi mua kumumona ne kumumvua. Kêna witabuja ne: tatuende mmupange muoyo, apo, ku lufu “mmudisambuluje” kumbukila mu bulongolodi budi bumueneka bua kuya mu bulongolodi bukena bumueneka. Ibe udi witabuja ne: tatuende mmumbuke mu bulongolodi bua mubidi ne mashi bua kuya mu bulongolodi bua ba-spiritu, muaba wa bankambua.

Ibe udi weleela meji mushindu’eu: ‘Nansha mudi tatu katshiyi kabidi mu bulongolodi ebu, utshidi anu umvuluka ne udi utabalela dikala bimpe dianyi. Ne bu mudiye mpindieu spiritu wa makokeshi mabandile, mmukumbane bua kungambuluisha kupita pavuaye muntu pa buloba. Kusakidila apu, udi mua kundombela buludiludi kudi Nzambi, bualu Nzambi udi pende spiritu. Tatu udi dîba edi mua kuikala mufike munda, kadi bingamuleja kanemu kakumbanyine, neamfuile luse ne neambeneshe.’

Mu Afrike, ditabuja dia se: bafue batu bamona bantu pa buloba ne badi ne buenzeji pa nsombelu yabo ndimuangalake munkatshi mua aba badi benza ntendelelu wa kabukulu. Ke mudibi munkatshi mua bantu badi badiamba mudibo bena nkristo. Tshilejilu, kunyima kua mukaji mumane kusedibua mu ekleziya, pa tshibidilu utu uya ku mbelu kua baledi bende bua kupeta dibenesha dia kabukulu. Kuinaku bankambua batu babikidibua, ne mulambu wa maluvu utu witshikijibua buabo. Bantu bavule batu bitabuja ne: kubenga kuenza nunku kutu kukebesha tshipupu mu dibaka.

Batu bela meji ne: bankambua, anyi spiritu ya bankambua, itu itabalela dipanduka ne dilubuluka bia mêku abo pa buloba. Bilondeshile mmuenenu eu, spiritu ya bankambua mmiambuluishi ya bukole, idi mua: kupetesha bia-dinowa bimpe, kulubuluja dikala bimpe, ne kukuba bantu ku dijiwuka. Badi bakuila bantu. Kadi bikalabu babapue muoyo anyi babenzele bibi, badi batuala tshipupu​—disama, bupele, nansha lufu. Nunku, ku diambuluisha dia milambu ne bibilu, bantu badi benza madikolela bua kulama malanda mimpe ne bafue.

Utuku witabuja ne: bafue badi menemene ne tshitupa tshia kukumbaja mu nsombelu ya ba-muoyo anyi? Ukadiku mumane kuimana pa lukita lua munangibue kampanda ne muakule mêyi makese, bua se: pamu’apa udi mua kukuteleja anyi? Eyowa, bikala bafue batumona ne batumvua anyi to mbualu busuikakaja ku tshidi tshienzeka ku lufu. Tuanjibi kukonkonona tshidi Bible wamba pa bidi bitangila bualu ebu bua mushinga mukole.