Mfumu kampanda udi utangidila matuku ende atshilualua

MFUMU kampanda wa ku Afrike wa ku Ouest uvua mulombodi munangibue ne munemekibue bikole kudi tshinsanga tshia bantu bende. Mu mufikilu wa 78 wa diledibua diende, balunda bende, dîku diende, ne banga bamunangi bakadisangisha bua kumuela ka-lumbandi. Mu muyuki wende, mfumu eu wakasungula tshiena-bualu tshia pa buatshi bua tshikondo tshia bu nanku. Wakakula bua ngenyi yende idi itangila muoyo kunyima kua lufu.

Wakamba se: dia muamua dia lukita “mudi bulongolodi bukuabo budi kabuyi ne dishima, lubabu ne lukuka.” Wakabuleja bu bulongolodi “bua tshishima,” buikal’anu ne bakane, benzejangana ne Nzambi.

Mitabuja a mushindu’eu mmatampakane munkatshi mua bena Afrike. Bilondeshile ntendelelu ya ka-bukulu ya bena Afrike, lufu kaluena ndekelu wa muoyo kadi ntshisabu, ntshipitshidi [tshidi tshifikisha] ku muoyo mu muaba wa mu nyuma. Batu bamba se: ku lufu muntu utu umbuka ku bulongolodi budi bumueneka bua kuya ku bukena bumueneka. Bu spiritu, muntu’eu udi pashishe ubuela mu muaba udi bankambua bende basombela.

Bena Afrike wa ku Ouest bavule badi bitabuja se: bankambua, peshi spiritu yabo [bankambua], badi batabalela dikala-bimpe dia mêku abo pa buloba. Mukanda wa West African Traditional Religion udi wamba ne: “Kakuena dishilangana dikole dia buenzeji pankatshi pa bena mu tshinsanga batshidi panu pa buloba, ne aba badi mu bulongolodi budi dia muamua. Patshivuabo panu pa buloba, [bankambua] bavua bakulu ba mêku abo. Nansha mudibu mpindieu kabayi bamueneka kutudi, badi’anu bakulu mu bulongolodi bua mu nyuma. Kabena balekela kutangila dikala-bimpe dia mêku abo mu ka-bujima.”

Nenku, mfumu mukulumpe mutela kuulu awu uvua mutekemene bua kupetangana ne bankambua bende ne kuenza nabo mudimu pamue mu muaba wa mu nyuma. Wakamba ne: “Ndi ne dishindika dikole [dia se: nengikale ne] muoyo kunyima kua lufu ne nempete mushindu wa kutungunuka ne kusadila [bu mukulu anyi mfumu]​—nansha kunyima kua lufu.”

Kadi, bua tshiakalua mfumu kuamba pashishe, tshikandakanda tshia Sunday Times tshiakatshinka se: “uvua umueneka kayi mutuishibue menemene” pa muoyo wa dia muamua dia lukita. Wakambila musumba uvua mudisangishe ne: uvua mumvue bakula bua mukanda udi wakula pa muoyo kunyima kua lufu. Mfumu uvua wenda ukeba mukanda awu munkatshi mua bidimu bitanu. Bua diditatshisha diende bua kuubala, wakateka dolare 1 500 bua eu yonso uvua mua kumutuadila mukanda eu.

Mfumu’eu uvua mua kuikala mudiumbushile dilubakana pa kubala mukanda udi mupepele bua kupeta. Mmukanda udi upeteka ne lukasa luonso muenzeja ki nkudi muntu kadi kudi Mufuki wa bantu buonso. (1 Tesalonike 2:13) Mukand’awu m’Bible. Ntshinyi tshidiye wamba pa muoyo kunyima kua lufu?