‘Bienzedi biende bidi bimulonda’

MU DINDA pa dîba 8:50 mu dinayi dia 28 Kashipu 1994, George D. Gangas wakajikija luendu luende lua pa buloba. Uvua ne bidimu 98. George Gangas uvua umue wa ku bela manyi, muena Kasumbu Kaludiki ka Bantemu ba Yehowa biangatshile mu dia 15 Kasuamansense 1971.

Bamanyangana nabu buonso ba muanetu wa balume Gangas bavua bamanye dinanga diende dia bululame ne dikina diende dia bubi. Badi bavuluka bimpe bitambe mushindu uvuaye misangu ya bungi umvuija Satana bu mudingianganyi wa muengu, mukuate buôwa, mubi, kayi muakanyine kanemu ne wa tshianana. Bishilangane, uvua wakula bua Yehowa bu Tatu munangi, mulenga, wa luse, muengeleki, ne mutabaledianganyi. Bavule badi kabidi bavuluka dinanga diende dia kuela nkonko mishindamene pa Bible. Mu diyukidilangana kayi dionso, uvua pa tshibidilu wela nkonko​—imue ya kudiyi mipepele, mikuabo mikole mitambe. Eyowa, uvua munange bulelela bua mu Bible.

Muanetu Gangas wakabatijibua mu dia 15 Kashipu 1921. Wakatuadija mudimu wende wa buambi bua ku dîba ne ku dîba (kupanda-njila) mu Luabanya 1928. Nunku, pa kusangisha mmuenze bidimu 66 mu mudimu wa ku dîba ne ku dîba. Wakalua muena mudimu wa Tshilombuelu tshia ku Brooklyn tshia Société Watch Tower mu dia 31 Kasuamansense 1928.

Muyuki wa muoyo wende wakapatuka mu nimero wa mu dia 15 Kasuamansense 1966 wa Tshibumba tshia Nsentedi (anglais). Tshidi tshimumvuija ne mêyi mapepele ne masunguluke bumuntu wa Nzambi muena ngikadilu ya mu nyuma. Mu tshiena-bualu atshi, wakamba tshiambilu tshidi tshitua ku muoyo tshidi tshilonda etshi: “Ndi munange muoyo ne ndi musue bua se: bana betu bapete pabu muoyo. Ndi ntua ku tshia mupostolo Paulo udi wamba ne: bintu bikuabo bionso bidi ‘dijimija bua mushinga mutambe bulenga udi nawu dimanya dia Yezu Kristo.’”​—Filipoi 3:8, NW.

Muanetu Gangas wakaleja ku bienzedi biende ne: uvua bushuwa munange muoyo, ne wakabanyangana ne mitalu yonso ne bakuabo “dimanya diende dia Kristo Yezu.” Dijimina diende nedibungamije, kadi mmushindu kayipu utudi tusanka bu muapetshiye mpindieu difutu diende dia mu diulu! Mpindieu, ‘neikishe ku mudimu wende mukole, bualu bienzedi biende bidi bimulonda.’​—Buakabuluibua 14:13, nkudimuinu wa New International Version.

[Bimfuanyi mu dibeji 31]