Utshidi muvuluke anyi?

Buebe wewe nimero ya ndekelu ya Tshibumba tshia Nsentedi idi ne dikuatshisha anyi? Pikalabi nanku, bua tshinyi kubenga kuteta tshivulukilu tshiebe ne nkonko idi ilonda eyi:

▫ Bua tshinyi Bantemu ba Yehowa badi batungunuka ne kukumbula bantu nabu?

Bantemu mbasue dibenesha dia Nzambi ku butuangaji bua Bukalenge bulaya buabu nkayabo, ne bu mudibo banange bantu nabo, mbasue bia muomumue bua bantu nabo badipete pabo. Nunku, pa kulonda tshilejilu tshia Yezu, badi badiumvua benzejibue kudi dinanga dikena-bia-kasombela bua kukumbula bantu nabo. (Matayo 6:9, 10; 22:37-39)​—15/8, mabeji a 8, 9.

▫ Bua tshinyi kuitaba didimenena mmuanda wa ditabuja?

Bashikuluji ki mbanji kumona nansha musangu umue busambulukidianganyi bua ngikadilu mipiamipia​—nansha buobo buimpe—​budi bupatula bintu bipiabipia bidi ne muoyo; kadi mbatuishibue ne: ke mushindu wakenzeka mishindu mipiamipia ya bintu. Babingishi ba didimenena ki mbanji kumona bintu bidi ne muoyo bienzeka mu tshintuluntulu kumbukila ku bintu bidi kabiyi ne muoyo nansha; kadi mbimane kashendende pa bualu bua se: eu ke mushindu wakatuadija muoyo.​—1/9, dibeji 5.

▫ Mmunyi mutudi mua kutshimuna biakane ditekeshibua mu mikolo dia ku mikandu ya mu nsombelu?

Nansha tuetu bikale mu nsombelu kayi, tuetu baditonte pa bitudi mua kuenza pamutu pa kudisuya pa bitudi katuyi mua kuenza, nsombelu neikale wa disankishibua, ne netupete disanka mu mudimu wa Yehowa. (Musambu wa 126:5, 6)​—1/9, dibeji dia 28.

▫ Mbipeta kayi bimpe bidi bifumina ku difuilangana luse?

Kufuila bakuabo luse kudi kushemeja malanda (Efeso 4:32); kakuena kutuala anu ditalala patupu ne bantu netu kadi ditalala dia munda-munda (Lomo 14:19; Kolosai 3:13-15); kufuila bakuabo luse kudi kutokeshila mpekatu yetu njila wa kufuidibuayi payi luse (Matayi 6:14); kabidi, kudi kutuambuluisha bua kuvuluka se: tuetu petu tutu tukengela difuidibua luse. (Lomo 3:23)​—9/15, dibeji dia 7.

▫ Mmunyi mudi tshitembelu tshia muprofete Amosa tshituambuluisha mu mudimu wetu wa buambi?

Katuena nansha kakese mua kushintulula anyi kutekesha mukenji wa Nzambi. Pa nanku, anu bu Amosa, tudi tûmanyisha ne butumike buonso katuyi tutangila mandamuna a badi bauteleja.​—15/9, dibeji dia 17.

▫ Ngikadilu kayi ya Nzambi itudi ne bua kuidikija?

Mitambe bunene ya kudiyi ndimanya kulongolola dia Yehowa ne disanka diende. (1 Kolinto 14:33; 1 Timote 1:11) Ngikadilu eyi ya Nzambi mmitshintshikila, nenku bua se: yonso wa kudiyi ki mmuenjibue bua kunyanga mukuabo to.​—10/1, dibeji dia 10.

▫ Mbimue biidia bimpe kayi bidi baledi ne bua kudianjila kuela bua kuambuluisha bana babo bua kusadila Yehowa?

Nsapi munene nkutuadija kumpala kua dîba. Malu mamonamona ne malesona malonga patshivua mutshima mutekete ne mudiakaje bua kutumikila nebinenge musangu mule. (Nsumuinu 22:6) Bidi bia mushinga bua kubalongesha bua kuikala ne butumike ne kanemu bua Yehowa ne ntendelelu wende mu bisangilu bionso. Baledi badi bapatula bipeta bimpe badi balonga mua kujingulula majinga mabi adi afumina ku dipanga bupuangane dia bana babo dipiana, ne baledi aba badi batuadija kumpala kua dîba bua kuambuluisha bana babo bua kudilulamija. (Nsumuinu 22:15) Ndekelu wa bionso, kutuadija kumpala kua dîba kufunda bipatshila bitshintshikila mu mudimu wa teokrasi bidi muana mua kukumbaja.​—1/10, mabeji a 27-28.

▫ Ngikadilu kayi musunguluke wa difuilangana luse dia Yehowa utudi ne bua kudikolesha bua kuidikija?

Yehowa utu ufuilangana luse ne upua muoyo. (Yelemiya 31:34) Muanda eu mmukolela bantu. Mushinga wa kuenza nunku bakawuzangika kudi Yezu, anu bu mudibi bifunda mu Matayo 6:14, 15.​—15/10, mabeji a 25-26.

▫ Mbintu kayi bisatu bidi bipumbisha luse luetu?

Bua bu-muntu buetu bua mpekatu bua ku tshilelelu, nyanji ya mutshiawudi idi mua kuela miji mu mutshima wetu. Bituikala ne mutshiawudi bua muntu kampanda, netupeteku mushindu wa kumuleja luse luengeleki anyi? Didianyika ku tshikisu patupu ntshikuabo tshipumbishi. Ebi bidi bitufikisha ku dibenga kuikala ne nyanji ya luse bua dikengeshibua dia bakuabo. Kusakidila apu, muena buiminyi pamu’apa mmubule pende luse. (1 Yone 3:17)​—1/11, mabeji a 19, 20.

▫ Mmalongesha kayi atudi mua kulongela ku Miyuki ya mu Mifundu idi yakula bua Yobo?

Muyuki wa mu Mifundu udi wakula bua Yobo udi utamba kutudimuija bua mateyi a Satana ne utuambuluisha bua kumona mudi bukokeshi bukena-mikalu ku mutu kua bionso bua Yehowa busuikakaja ku muoyo mutoke wa muntu. Anu bu Yobo, muntu yonso udi munanga Nzambi neatetshibue. Kadi tudi mua kunanukila anu bu muakenza Yobo, pa kujadika mudi Satana mushimianganyi, ne pa kubabidila mabenesha a Bukalenge bua Nzambi.​—15/11, dibeji dia 20.

▫ Mmunyi mudi mulombodi wa kasumbu ka bakulu mua kuleja dianyisha diakanyine kudi mukulu yonso?

Misangu yonso padiku mushindu, mulombodi wa kasumbu ka bakulu udi ne bua kupetesha tshivuluiji tshia biena-bualu kumpala kua dîba bua kupetesha bakuabo bakulu tshikondo tshia bungi bua kueleela meji mu masambila pa tshiena-bualu tshionso tshitela. Munkatshi mua tshifufu tshia bakulu, neenze madikolela bua kubenga kufumba mmuenenu wa bakulu, kadi udi ne bua kubakankamija bua kudiumvua ne: “badi ne budikadidi bua diakula” pa malu adi akonkononyibua. (1 Timote 3:13)​—1/12, dibeji dia 30.