Yehowa udi mua kukupetesha bukole

“Udi ufila bukole kudi eu udi mupungile; ne kudi eu udi kayi ne ngulu, udi ufila makanda mavule.”​—YESHAYI 40:29, NW.

1, 2. Mbimue bijadiki kayi bidi bileja bukole buvule bua Yehowa?

YEHOWA udi Nzambi wa “bukole buvule.” Tudi mua kumona tshijadiki tshia “bukole bua kashidi ne Bunzambi” bia Nzambi mu buneme bua bufuki buende budi bumueneka. Bantu badi babenga kuitaba tshijadiki tshia mushindu’eu tshia Bumufuki buende ki mbakubingisha to.​—Musambu wa 147:5, NW; Lomo 1:19, 20, NW.

² Bukole bua Yehowa budi buende bumueneka bimpe bitambe padi bena sianse badîne mu dishikuluja malu adi atangila tshibuashibuashi ne galaksi yatshi idi midibâle pa bualabale bua nkama ne nkama ya miliyo ya kilometre. Butuku bukenkesha, tangila mu diulu, ne pamu’apa neudiumvue bu mua kadiumvua muimbi wa misambu: “Handi ntangila diulu diebe, didi mudimu wa bianza biebe, ne ngondo ne mitoto biwakafuka; Muntu udi nganyi bua wewe kumuelela meji? Ne muana wa muntu udi nganyi bua wewe udi umulama ne dinanga?” (Musambu wa 8:3, 4) Ne mmushindu kayipu buimpe udi Yehowa utabalela muntu, utabalela yonso wa kutudi! Wakapetesha mulume ne mukaji ba kumpala tshisombelu tshilengele. Nansha buloba buatshi buvua ne bukole​—bua kumenesha bikunyibua, kupatula biakudia bikena binyanga bidishi bia mubidi. Muntu ne nyama badi bapetela bukole ku bintu ebi bidi bijadika bukole bua Nzambi.​—Genese 1:12; 4:12; 1 Samuele 28:22.

3. Ku luseke lua bintu bidi bimueneka bia mu bukua-bifukibua, mbinganyi bikuabo bidi bileja bukole bua Yehowa?

³ Kusakidila ku muanda wa se: diulu ntshintu tshia tuyayi tukamona ne mitshi ne nyama bidi bisankisha, bidi bitufunkuina bukole bua Nzambi. Mupostolo Paulo wakafunda ne: “Ngikadilu yende ikena-kumona idi imueneka bimpe bitambe katshia ku difukibua dia bukua-bantu, bualu idi imueneka mu lungenyi ku diambuluisha dia bintu biakenjibua, eyowa, bukole buende bua kashidi ne Bunzambi [buende].” (Lomo 1:20, NW) Kadi kudi tshikuabo tshijadiki tshia bukole buende tshidi tshiakanyine ntema ne dianyisha bietu. ‘Ntshinyi,’ ke muudi mua kudikonka, ‘tshidi tshifunkuna bukole bua Nzambi kupita bifukibua?’ Diandamuna n’Yezu Kristo. Bushuwa, ku buenzeji bua spiritu, mupostolo Paulo udi wamba ne: Kristo mukudika ku mutshi udi “bukole bua Nzambi ne meji a Nzambi.” (1 Kolinto 1:24, NW) ‘Bua tshinyi udi bukole ne meji?’ ke muudi mua kuebeja, ‘Ne ndiumvuangana kayi didibi mua kuikala nabi ne muoyo wanyi bituadijile mpindieu?’

Bukole ku butuangaji bua Muanende

4. Mmunyi muakalejibua bukole bua Nzambi pa bidi bitangila Muanende?

⁴ Bukole bua Nzambi buakalejibua diambedi pakafukaye Muanende-umuepele, muenza ku tshimfuanyi tshiende. Muana eu wa mu nyuma wakasadila Yehowa bu “muenji wa mudimu munene” pa kutumika ne bukole bua Nzambi buvule bua kufuka bikuabo bintu bionso. (Nsumuinu 8:22, 30, NW) Paulo wakafundila bana babu bena nkristo ba mu Kolosai ne: “Ku butuangaji buende, bintu bikuabo bionso biakafukibua mu diulu ne pa buloba, bintu bidi bimueneka ne bintu bikena-bimueneka . . . Bikuabo bintu bionso biakafukibua ku butuangaji buende.”​—Kolosai 1:15, 16, NW.

5-7. (a) Kale, mmunyi muvua bantu baditue mu dileja bukole bua Nzambi? (b) Nkabingila kayi kadiku bua kuitabuja se: bukole bua Nzambi budi mua kulejibua mu malu a bena nkristo lelu’eu?

⁵ Tudi tshitupa tshia ‘bintu biakafukibua pa buloba.’ Nenku, bukole bua Nzambi budi mua kutusambulukila tuetu bantu anyi? Eyowa, mu malanda wonso pankatshi pa Nzambi ne bantu bapange bupuangane, Yehowa utu bimue bikondo upetesha bamusadidi bende bukole bua dikema bua bakumbaje malongolola ende. Mozese uvua mumanye se: pa tshibidilu, bantu bapange bupuangane batu bashala ne muoyo bidimu 70 anyi 80. (Musambu wa 90:10) Netuambe tshinyi bua Mozese yeye muine? Wakashala ne muoyo bidimu 120, kadi “mêsu ende kaakalua bilejileji to, ne makanda ende a mubidi kaakakepela to.” (Dutelonome 34:7, NW) Ebi kabiena biumvuija se: Nzambi utu upetesha yonso wa ku basadidi bende mushindu wa kushala ne muoyo matuku male peshi kushala ne makanda a mushindu’awu to, kadi etshi ntshijadiki tshia se: Yehowa udi mua kupetesha bantu bukole.

⁶ Bukuabo bualu bua pa mutu budi buleja bukokeshi budi nabu Nzambi bua kupetesha bakaji ne balume bukole ng’ebu buakenzelaye mukaji wa Abrahama. “Sara muine wakapeta bukole bua kuimita kankanunuina, nansha mukavuaye mumane kupitshisha bidimu bia lulelu, bualu uvua wangata eu wakamulaya bu muena lulamatu.” Peshi anji bambisha muakafila Yehowa bukole kudi ba-nzuji ne bakuabo bantu mu Izalele: “Jedeon, Baraka, Samsona, Jefté, Davidi, Samuele ne bakuabo baprofete, bavua . . . kumbukila ku butekete bavuijibue bena bukole.”​—Ebelu 11:11, 32-34, NW.

⁷ Bukole bua mushindu’eu budi mua kutumika pabo kutudi. Oh, pamu’apa katuena mua kutekemena ndelanganyi ku tshishima to, anyi kuikala ne bukole bu buvua nabu Samsona. Kadi tudi mua kuikala ne bukole buvule, anu bu muvua Paulo muleje bua kudimuija bena mu Kolosai bena bukole bua nanku nanku. Eyowa, Paulo wakafundila balume, bakaji ne bana anu bu mutudi tusanganyibua mu bisumbu lelu’eu, ne wakamba ne: bavua benda bavuijibua “bena bukole ne bukole buonso.”​—Kolosai 1:11, NW.

8, 9. Mu siekele wa kumpala, mmunyi muakalejibua patoke bukole bua Yehowa pa bidi bitangila bantu bu tuetu?

⁸ Mu mudimu wa Yezu patshivuaye buloba, Yehowa wakaleja patoke se: bukole buende buvua butumika ku butuangaji bua Muanende. Bu tshilejilu, tshikondo kampanda pakakukila misumba kudi Yezu mu Kapernaume, “Bukole bua Yehowa buvua nende bua kumona mua kupolesha babedi.”​—Luka 5:17, NW.

⁹ Matuku akalonda dibiishibua diende ku lufu, Yezu wakashindikila bamulondi bende se: bavua ne bua ‘kupeta bukole pavua spiritu munsantu ne bua kubafikila.’ (Bienzedi 1:8, NW) Ebi bivua bilelela! Mushikuluji kampanda wa malu a kale udi wakula bua malu akenzeka matuku makese kunyima kua Pantekoste wa 33 B.B. ne: “Ne bukole buvule, bapostolo bavua batungunuka ne kufila bumanyishi pa dibiishibua dia Mukalenge Yezu ku lufu.” (Bienzedi 4:33, NW) Paulo uvua umue wa ku bantu bakapeshibua bukole bua kumona mua kukumbaja mudimu uvua Nzambi mumupe bua kuenza. Kunyima kua dikudimuna diende dia mutshima ne dipetulula lumonu, “wakatungunuka ne kupeta bukole buvule ne uvua utuisha bena Yuda bavua basombele mu Damase, pa kujadika se: awu uvua Kristo.”​—Bienzedi 9:22, NW.

10. Mmunyi muvua bukole bua kudi Nzambi ne buambuluishi buvule pa bidi bitangila Paulo?

¹⁰ Bushuwa, Paulo uvua ukengela bukole buvule, pa kutangila makanda a mu nyuma ne a mu lungenyi bivua bikengedibua bua ngendu isatu ya bu-misionere ya mutantshi wa kilometre mivule. Uvua kabidi ne bua kuakamangana ne ntatu ya mishindu yonso, kunanukila diedibua mu buloko ne kuamba kushipibua kakuyi bualu. Mmunyi muakafikaye ku ditshimuna? Wakandamuna ne: “Mukalenge wakimana pabuipi nanyi ne wakela bukole munda muanyi bua buambi buenjibue tshishiki ku butuangaji buanyi.”​—2 Timote 4:6-8, 17, NW; 2 Kolinto 11:23-27.

11. Pa bidi bitangila bukole bua Nzambi, Paulo uvua wakula bua ditekemena kayi bua basadidi nende mu Kolosai?

¹¹ Nenku, kabiena bikemesha bua pavua Paulo ufundila “bana babu mu buobumue ne Kristo” mikanda mu Kolosai pa kubashindikila se: bavua mua “kuvuijibua bena bukole ne bukole buonso bilondeshile butumbi bua ngulu ya [Yehowa] bua kumona mua kunanukila tshishiki ne kuikala ne muoyo-mule ne disanka.” (Kolosai 1:2, 11, NW) Kadi nansha muvua mêyi aa diambedi atangila bena nkristo bela manyi, buonso badi balonda makasa a Kristo badi mua kutamba kubabidila malu avua Paulo mufunde.

Mupeshibue bukole mu Kolosai

12, 13. Nkabingila kayi kakafikisha Paulo ku difundila bena Kolosai mukanda, ne mmunyi muakandamunabu pamu’apa?

¹² Tshisumbu tshia mu Kolosai tshivua mu provinse wa Roma ku Azi, tshivua pamu’apa tshienjibue ku bumanyishi bua Epafraze muena nkristo wa lulamatu. Mbimueneke se: pakumvuaye bua diedibua dia Paulo mu lukanu pabuipi ne 58 B.B., Epafraze wakapangadija bua kukumbula mupostolo ne kumukankamija pa kumutuadila ngumu mimpe ya dinanga ne ditua nkanana bia bana babu ba mu Kolosai. Pamu’apa Epafraze wakamanyisha kabidi bua amue malu avuaku bushuwa mu tshisumbu tshia mu Kolosai avua akengela kululamijibua. Paulo ku luende luseke, wakamona muvuabi kabiyi bikengela kujingakana bua kubafundila mukanda wa dibakankamija ne dibabela nawu. Udi pebe mua kupetela dikankamija ku nshapita wa 1 wa mukanda awu, bualu udi ujadika patoke mushindu udi Yehowa mua kupetesha basadidi bende bukole.

¹³ Udi mua kuanji kufuanyikija mushindu uvua bana betu ba bakaji ne ba balume mu Kolosai ne bua kudiumvua pavua Paulo ubasamuna bu “bena nkristo bena lulamatu mu buobumue ne Kristo.” Bavua bakanyine ka-lumbandi bualu bavua ne ‘dinanga bua bansanto buonso’ ne bua ‘dituala mamuma a lumu luimpe’ katshia ku tshikondo tshiakavuabo bena nkristo! Mêyi a muomumue adi pawu mua kuambibua bua tshisumbu tshietu peshi bua yonso wa kutudi pa nkayende anyi?​—Kolosai 1:2-8.

14. Ntshinyi tshivua dijinga dia Paulo kudi bena Kolosai?

¹⁴ Paulo wakalengibua ku muoyo pakapetaye ngumu yakamufikisha ku diambila bena Kolosai ne: kavua utupisha kusambila bualu buabo ne ulomba bua “buwujibue ne dimanya dijalame dia disua dia [Nzambi] mu meji wonso ne dijingulula dia mu nyuma, bua kuenda mu mushindu udi muakanyine Yehowa.” Wakasambila ne: “tungunukayi ne kukuama mamuma mu mudimu wonso muimpe ne kudiunda mu dimanya dijalame dia Nzambi, kuvuijibua bena bukole ne bukole buonso mu bualabale bua bukole buende bua butumbi bua kunanukila tshishiki ne kuikala ne muoyo-mule ne disanka.”​—Kolosai 1:9-11, NW.

Udi kabidi lelu’eu ufila bukole

15. Mmunyi mutudi mua kuleja mmuenenu wa muomumue anu bu muvuabi bilejibue mu bivua Paulo mufundile bena Kolosai?

¹⁵ Ntshilejilu kayipu bulenga tshidi Paulo mutushile! Bana betu pa buloba bujima batu bakengela masambila etu bua bamone mua kunanukila ne kushala ne disanka nansha mudibo mu makenga. Anu bu Paulo, tudi ne bua kulomba bintu bisunguluke mu masambila etu patudi tupeta ngumu idi ileja se: bana betu mu tshikuabo tshisumbu, anyi mu dikuabo ditunga, badi mu ntatu. Pamu’apa, tshisumbu tshidi pabuipi ntshipete ntatu ya ku tshipupu kampanda tshia ku bintu bifuka peshi lutatu kansanga lua mu nyuma. Anyi bidi mua kuikala bua se: bena nkristo badi bananukila mu matunga adi masasuluja kudi mvita pankatshi pa bena ditunga anyi dishipangana pankatshi pa bisa bishilashilangane. Mu masambila, tudi ne bua kulomba Nzambi bua ambuluishe bana betu bua “bende mushindu udi muakanyine Yehowa,” batungunuke ne kukuama mamuma a Bukalenge eku bananukila, ne badiunde mu dimanya dijalame. Nanku basadidi ba Nzambi badi bapeta bukole bua spiritu wende, “bavuijibua bena bukole ne bukole buonso.” Ikala ne dishindika dia se: Tatuebe neakuteleje ne neakuandamune.​—1 Yone 5:14, 15.

16, 17. (a) Anu bu muakafunda Paulo, mbua tshinganyi butudi ne bua kuelela tuasakidila? (b) Mmu ngumvuilu kayi mudi tshisamba tshia Nzambi tshimane kupikudibua ne kulekeledibua mpekatu?

¹⁶ Paulo wakafunda se: bena Kolosai bavua ne bua ‘kuela tuasakidila kudi Tatu uvua mubapeteshe mushindu wa kudifila mu bumpianyi bua bansanto mu butoke.’ Tuetu petu tuele Tatu wetu wa mu diulu tuasakidila bua muaba wetu mutufundila mu ndongoluelu wende, nansha mu bulongolodi buende budi mu diulu peshi budi pa buloba bia Bukalenge buende. Mmunyi muvua Nzambi muvuije bantu bapange bupuangane bakanyine ku mêsu kuende? Paulo wakafundila bana babu bela manyi ne: “Mmutupikule ku bukokeshi bua mîdima e kutusambuluja mu bukalenge bua Muana wa dinanga diende, ku butuangaji buende tudi bapete dipikudibua dietu ku tshia-bupikudi, dilekeledibua dia mpekatu yetu.”​—Kolosai 1:12-14, NW.

¹⁷ Ditekemena dietu nansha diodi dia mu diulu anyi dia pa buloba, tudi tuela Nzambi tuasakidila dituku dionso bua dipikudibua dietu ku ndongoluelu eu mubi wa mîdima, dikumbajibue ku diambuluisha dia ditabuja dietu mu mulambu wa mushinga mukole wa tshia-bupikudi wa Muana musuibue wa Yehowa. (Matayo 20:28) Bena nkristo bela manyi a mu nyuma mbababidile tshia-bupikudi tshidi tshibakumbanyine mu mushindu wa pa buawu udi mua kubapetesha mushindu wa ‘kusambulujibua mu bukalenge bua Muana wa dinanga dia Nzambi.’ (Luka 22:20, 29, 30) Kadi, bituadijile mpindieu, “mikuabo mikoko” idi payi ibabidila tshia-bupikudi. (Yone 10:16) Idi mua kupeta dilekeledibua mpekatu dia Nzambi bua kumona mua kuimana mu bululame buonso kumpala kuende bu balunda bende. Badi bakumbaja tshitupa tshinene mu dimanyisha “lumu luimpe elu lua bukalenge” mu tshikondo etshi tshia ku nshikidilu. (Matayo 24:14) Kupita apu, badi ne ditekemena dia mpatshi dia kulua bakane tshishiki ne kupuangana ku mubidi, ku ndekelu kua Bukokeshi bua Kristo bua Bidimu Tshinunu. Pawudi ubala diumvuija didi mu Buakabuluibua 7:13-17, mona né kuena mua kuanyisha ne: nsombelu miumvuija apa ntshijadiki tshia dipikudibua ne dibeneshibua.

18. Ndipunga kayi didi ditedibua mu Kolosai didi Nzambi wenda ukumbaja?

¹⁸ Mukanda wa Paulo udi utuambuluisha bua kumona bunene bua dibanza ditudi nadi kudi muntu mutambe bunene wa katshia ne katshia. Ntshinyi tshidi Nzambi ukumbaja ku butuangaji bua Kristo? “[Tshivua] dipungija tshiakabidi ne bintu bikuabo bionso bia pa buloba anyi bia mu diulu pa kubueja ditalala ku mashi akapuekeshaye pa mutshi wa tshinyongopelu.” Dilongolola dia Nzambi didi dia kupingajilula bifukibua bionso mu diumvuangana dionso nende, anu bu muvuabi kumpala kua buntomboji mu Edena. Eu wakatumikaye nende bua kufuka bintu bionso nYeye udiye utumika nende mpindieu bua kufikisha ku dipunga edi.​—Kolosai 1:20, NW.

Bakoleshibue bua tshipatshila kayi?

19, 20. Dikala bansanto ne dibenga kuikala ne katoba bietu mbisuikakaja ku tshinyi?

¹⁹ Majitu adi kudi yonso wa kutudi udi mupunge ne Nzambi. Tuvua tshikondo kampanda bena mpekato ne basemejibue kule ne Nzambi. Kadi, mpindieu, bu mutudi ne ditabuja mu mulambo wa Yezu wa tshia-bupikudi ne bu mudi ngenyi yetu kayitshiyi isadila bubi, tudi mpindieu mu nsombelu “munsanto ne udi kayi katoba” ne “katuyi ba kupisha kumpala kua [Nzambi].” (Kolosai 1:21, 22, NW) Bualu bua dikema, anu bu muvua Nzambi kayi mufue bundu bua bantemu bena lulamatu ba kale, nenku kêna bia muomumue ufua bundu bua kubikidibua bu Nzambi wetu. (Ebelu 11:16) Lelu’eu, muntu nansha umue kêna mua kutupisha bua mutudi tubikidibua mu dîna diende ditambe buneme, anyi ne: tudi tutshina bua kumanyisha dîna edi too ne ku mfudilu ya buloba!

²⁰ Kadi bambisha mubelu udi Paulo usakidila mu Bena Kolose 1:23, [Mukenji Mulenga]: “Tshidiku anu bua nuenu kunanukila mu ditaba, bashindamene pakole, kanuyi nulamuka ku ditekemena dia [lumu luimpe lunudi bumvue, ludibo bamanyishe bifukibua bionso bidi muinshi mua diulu, NW].” Malu mavule adi enda pamue ne dishala dietu ne lulamatu kudi Yehowa pa kulonda makasa a Muanende musuibue. Yehowa ne Yezu mbenze bivule buetu! Tudi ne bua kubaleja dinanga dietu pa kulonda mubelu wa Paulo.

21. Bua tshinyi tudi ne kabingila kanene ka kusangala lelu’eu?

²¹ Bena nkristo bena Kolosai bavua ne bua kukatshila pa kumvua se: ‘lumu luimpe luvuabo bumvue’ lukavua “lumanyishibue mu bifukibua bionso bidi muinshi mua diulu.” Lelu’eu, bidi bivuayija mubidi pa kumona bualabale budi lumu luimpe lua Bukalenge lumanyishibue kudi Bantemu miliyo mipite pa inayi ne tshitupa mu matunga mapite pa 230. Eyowa, tshidimu tshionso bantu pabuipi ne 300 000 ba mu matunga wonso batu bapunga ne Nzambi!​—Matayo 24:14; 28:19, 20.

22. Nansha tuetu mu dikenga, ntshinyi tshidi Nzambi mua kutuenzela?

²² Eyowa, nansha muvua Paulo mufimpakaja mu buloko mu tshikondo tshiakafundilaye bena Kolosai mukanda, kakadiabakena nansha kakese. Bishilangane, wakamba ne: “Ndi mpindieu nsanka mu dikenga dianyi bualu buenu.” Paulo uvua mumanye tshivua “kunanukila tshishiki ne kuikala ne muoyo-mule ne disanka” biumvuija. (Kolosai 1:11, 24, NW) Kadi uvua mumanye se: bionso ebi kavua ubienza ku bukole buende to. Yehowa uvua mumuvuije muena bukole! Ke mudibi lelu’eu. Bantemu binunu bivule bakedibua mu buloko ne bakakengeshibua ki mbajimije disanka diabo mu disadila Yehowa to. Bishilangane, mbafike ku dianyisha bulelela bua dîyi dia Nzambi didi mu Yeshayi 40:29-31 [NW]: “Yeye udi upetesha badi bapungile bukole . . . Aba badi batekemena kudi Yehowa nebapetulule bukole.”

23, 24. Mbualu kayi bunsanto busokoka budibu batele mu Kolosai 1:26?

²³ Bumanyishi bua lumu luimpe bushindamene pa Kristo buvua ne mushinga muvule kudi Paulo. Uvua musue bua bakuabo bangate pabo ne mushinga mudimu udi Kristo ukumbaja mu dilongolola dia Nzambi, nenku wakabuangata bu “bualu bunsanto busokoka, buakashala busokoka bituadijile ku ndongoluelu ya malu ya kale ne kumbukila ku bipungu bia kale.” Kadi, kabuvua ne bua kushala busokoka kashidi to. Paulo wakasakidila ne: “Mpindieu mbulejibue patoke kudi bansanto bende.” (Kolosai 1:26, NW) Buntomboji pakatuadijabo mu Edena, Yehowa wakafila dilaya dia bintu bimpe bivua ne bua kulua, kudianjila kumanyisha se: ‘dimiinu dia mukaji uvua ne bua kuboza mutu wa nyoka.’ (Genese 3:15, NW) Ebi bivua biumvuija tshinyi? Munkatshi mua bipungu ne mua siekele, buakashal’anu bualu busokoka. Pashishe Yezu e kulua, “kufila butoke pa muoyo ne dibenga kunyanguka ku butuangaji bua lumu luimpe.”​—2 Timote 1:10, NW.

²⁴ Eyowa, “bualu bunsanto busokoka” mbuashila pa Kristo ne Bukalenge bua Masiya. Pavua Paulo utela “bintu bidi mu diulu,” uvua utuma lungenyi kudi aba bâdia Bukalenge pamue ne Kristo. Buobo aba nebatumike nabu bua kutuadila “bintu bionso bia pa buloba,” aba bababidila mparadizu wa kashidi pa buloba mabenesha mavule. Nenku, udi mua kumona mudibi biakanyine menemene, bua Paulo kutuma lungenyi ku “biuma bia butumbi bia bualu ebu bunsanto busokoka.”​—Kolosai 1:20, 27, NW.

25. Anu bu mudibi bilejibua mu Kolosai 1:29, mmuenenu kayi utudi ne bua kuikala nende mpindieu?

²⁵ Paulo wakadianjila kuakula bua muaba uvuaye ne bua kuikala nawu mu Bukalenge. Kadi wakajingulula se: katshivua tshintu patupu tshivuaye ne bua kutekemena eku kayi wenza bualu kampanda to. “Meme ndi bushuwa ngenza mudimu mukole, nditatshisha mu diumvuangana ne ditumika didiye utumika munda muanyi ne bukole.” (Kolosai 1:29, NW) Bambisha se: ku butuangaji bua Kristo, Yehowa wakapetesha Paulo bukole bua kumona mua kukumbaja mudimu udi upandisha. Ke tshidi Yehowa mua kutuenzela lelu’eu. Kadi tudi ne bua kudiebeja nkayetu se: ‘Ntshidi ne lungenyi lua kumuangalaja evanjeliyo lumvua nalu diambedi pangakalonga bulelela anyi?’ Newandamune tshinyi? Ntshinyi tshidi mua kuambuluisha yonso wa kutudi bua kutungunuka ne ‘kuenza mudimu mukole ne kuditatshisha nkayetu bilondeshile ditumika dia bukole bua Yehowa’? Tshiena-bualu tshidi tshilonda netshikonkonone menemene bualu ebu.

Uvuaku mubambishe anyi?

◻ Bua tshinyi tudi mua kuikala ne dishindika dia se: Yehowa udi mua kuleja bukole buende bua diakalenga dia bantu?

◻ Nkabingila kayi kakafikisha Paulo ku difunda mêyi adi mu Kolosai nshapita wa 1?

◻ Mmunyi mudi Nzambi ukumbaja dipunga didi dilejibua mu Kolosai 1:20?

◻ Ku bukole buende, ntshinyi tshidi Yehowa mua kukumbaja ku butuangaji buetu?

[Karte/​Tshimfuanyi mu dibej 8]

(Bua kumona malu bimpe, tangila mu mukanda)

KOLOSAI