Basangisha mu tshituangajilu tshipuangane tshia dinanga

“Suikanganayi pamue mu diumvuangana ne mu dinanga.”​—KOLOSAI 2:2, NW.

1, 2. Mbuenzeji kayi butapuluji budi bumvuika nangananga lelu’eu?

TELEJA! Mukungulu wa dîyi dikole didi difumina mu diulu diamba ne: “Diakabi kudi buloba ne mbuu, bualu Diabolo wapueki kunudi muikale ne tshiji tshikole, bu mudiye mumanye ne: udi ne tshikondo tshîpi.” (Buakabuluibua 12:12, NW) Mu kupita kua tshidimu tshionso, mukenji awu ukadi utamba kutshingisha bantu badi base pa buloba.

² Muluishi munene wa Yehowa mmumanyike katshia ku kale bu ntomboji (Satana) ne mushiminyinyanganyi (Diabolo). Kadi mudingianganyi eu udi mpindieu utumika mu mukuabo mushindu wa njiwu​—mmulue nzambi wa tshiji tshikole. Mbua tshinyi? Bualu bavua bamuipate mu diulu kudi Mikayele ne banjelo bende mu mvita yakabudika mu diulu mu 1914. (Buakabuluibua 12:7-9) Diabolo mmumanye bua se: udi anu ne tshitupa tshîpi bua afile tshijadiki tshia mudiye mua kupambula bantu buonso ku ditendelela Nzambi. (Yobo 1:11; 2:4, 5) Bu mudibo kabayi ne mushindu wa kupanduka, yeye ne ba-demon bende badi anu bu mbulubulu idi ijikija tshiji tshiayi pa bukua-bantu bulubakane.​—Yeshaya 57:20.

3. Dipuekeshibua dia Satana didi ne buenzeji kayi tshikondo tshietu etshi?

³ Malu aa adi enda enzeka adi bantu kabayi mua kumona adi aleja bua tshinyi bukua-bantu mu tshibungi tshiabu kabuena ne bikadilu bilenga. Malu aa adi kabidi aleja bua tshinyi madikolela a dikema adi enjibua kakuyi ditekesha bua kusangisha matunga adi mapanduluke adi kaayi mua kusomba mu diumvuangana. Bisa ne biota bidi biluishangana tshimue ne tshikuabo ne luonji luonso, nenku muanda eu udi ushiya bantu miliyo mivule kabayi nzubu ne ubavuija bena tshimuangi. Katuena ne bua kukema bua divula dia dipetula dia mikenji dikena kuelekeja! Anu bu muakadianjila Yezu kumanyisha, ‘dinanga dia bantu bavule didi dienda dikepela.’ Dibenga kumvuangana ne dipangika dia dinanga miaba yonso ntshimanyinu tshia bantu bena lelu’eu badi balubakane.​—Matayo 24:12.

4. Bua tshinyi tshisamba tshia Nzambi tshidi mu njiwu ya pa buayi?

⁴ Pa kumona nsombelu wa bulongolodi ebu, disambila dia Yezu bua bamulondi bende didi dipeta mushinga muondoke: “Ndi nkulomba, ki mbua kubapatula mu bulongolodi ebu, kadi mbua kubalama bua mubi. Kabena ba mu bulongolodi ebu, bu mundi meme tshiyi wa mu bulongolodi ebu.” (Yone 17:15, 16, NW) Lelu’eu, “mubi” udi nangananga utamba kutemesha tshiji thiende pa aba “badi batumikila mêyi-matuma a Nzambi ne badi ne mudimu wa kufila bumanyishi budi butangila Yezu.” (Buakabuluibua 12:17, NW) Bu Yehowa kayi mutabalela ne diengeleka dionso, Bantemu bende bena lulamatu bavua mua kubutudibua. Mioyo yetu mmisuikakaja ku mushindu utudi tutumika ne bionso bidi Nzambi mulongolole bua dikubibua dietu dia mu nyuma ne bua dikala-bimpe dietu. Ebi bidi biumvuija dienza madikolela mu diumvuangana ne bukole Buende budi mu ditumika ku butuangaji bua Kristo, anu bu muakabela mupostolo mu Kolosai 1:29.

5, 6. Mmunyi muakadiumvua mupostolo Paulo bua bena nkristo ba ku Kolosai, ne bua tshinyi mvese wa tshidimu tshia 1995 mmukumbanyine?

⁵ Mbimueneke se: nansha muvua Paulo kayi pamu’apa mumonangana nabo mpala ne mpala, uvua munanga bana babu ba mu Kolosai. Wakabambila ne: “Ndi ntekemena se: nudi mua kujingulula kanyinganyinga kanyi kuondoke kandi naku bualu buenu.” (Kolosai 2:1, The New Testament in Modern English, kudi J. B. Phillips) Bu mutu balondi ba Yezu kabayi bena mu bulongolodi ebu, “mubi” kakulekela kuteta bua kunyanga buobumue bua bana betu pa kukuna munkatshi muabo mmuenenu wa mu bulongolodi ebu. Ngumu ivua Epafraze mulue nayi ya ku Kolosai ivua ileja se: ebi bivua bienzeka mu bualabale kampanda.

⁶ Dimue dia ku maditatshisha manene a Paulo bua bana babu bena nkristo divua mua kulejibua mu tshikoso ne mêyi aa: “Suikanganayi pamue mu diumvuangana ne mu dinanga.” Mêyi ende aa adi ne diumvuija dia pa buadi lelu’eu, mu bulongolodi mudi kamuyi buobumue ne dinanga. Bituatumikila mubelu wa Paulo, netubabidile diengeleka dia Yehowa. Netumone kabidi mudi bukole bua spiritu wende butumika mu nsombelu wetu, butuambuluisha bua kukandamena bifimpakaji bia mu bulongolodi ebu. Eu mmubelu wa meji menemene! Nenku, Kolosai 2:2 neikale tshiena-bualu tshietu bua tshidimu tshia 1995.

7. Ndiumvuangana kayi didi ne bua kuikala munkatshi mua bena nkristo balelela?

⁷ Mu mukanda wende wa kumpala kudi bena Kolinto, mupostolo wakatumika ne mubidi wa muntu bu tshifuanyikijilu kampanda. Wakafunda ne: mu tshisumbu tshia bena nkristo bela manyi “kamuena ne bua kuikala ditapulukangana to,” kadi “bitupa biatshi bidi ne bua kutabalelangana mushindu wa muomumue tshimue ne tshikuabo.” (1 Kolinto 12:12, 24, 25, NW) Ntshifuanyikijilu kayipu tshia mpatshi! Bindimba bietu bidi bikuatshishangana tshimue ne tshikuabo, tshidimba tshionso ntshisuikakaja ku bikuabo bidimba bia mubidi wetu. Dîyi-diludiki dia muomumue ndiakanyine nsangilu wetu wa bana betu pa buloba bujima, udi muenza ne bela manyi ne miliyo mivule ya badi batekemena kuikala ne muoyo mu mparadizu pa buloba. Katuena ne bua kuditapulula tuetu nkayetu ku nsangilu wa bena nkristo ne kudishikamina to! Utumika ku butuangaji bua Yezu, spiritu muvule wa Nzambi udi utufikila ku butuangaji bua didisangisha dietu ne bana betu.

Diumvuangana ndisuikakaja ku dimanya

8, 9. (a) Ntshinyi tshidi tshikengedibua menemene bua tuetu kukuatshisha diumvuangana mu tshisumbu? (b) Mmunyi muudi mupete dimanya pa bidi bitangila Kristo?

⁸ Bumue bua ku malu a Paulo a nshindamenu buvua bua se: diumvuangana dia bena nkristo ndisuikakaja ku dimanya, nangananga dimanya didi ditangila Kristo. Paulo wakafunda ne: bena nkristo badi ne bua “kusuikangana pamue mu dimvuangana ne mu dinanga bua biuma bionso bia dishindika dijima dia dijingulula diabo dia dimanya kampanda dijalame dia bualu bunsanto busokoka bua Nzambi, mbuena kuamba ne: Kristo.” (Kolosai 2:2, NW) Tudi bapete dimanya​—dia malu malelela—​bituadijile ku tshikondo tshituakatuadija kulonga Dîyi dia Nzambi. Bu tshitupa tshia mu dipeta dijingulula dia mushindu udi mavule a ku malelela aa mu diumvuangana ne dilongolola dia Nzambi, tudi tufika ku dijingulula mudimu munene udi Yezu ukumbaja. “Mudiye ke mudi musokoka biuma bionso bia meji ne dimanya.”​—Kolosai 2:3, NW.

⁹ Ke muutu udiumvua pa bidi bitangila Yezu ne mudimu wende udiye ukumbaja mu dilongolola dia Nzambi anyi? Bena mu Bukua-buena-nkristo bavule badi ne lukasa luonso bakula bua Yezu, bamba mudibo bamuitaba ne bamane kupandishibua. Kadi, bua kuamba bulelela, mbamumanye anyi? Kabiena nanku to, bualu bavule badi bitabuja dilongesha dia Busatu Bunsanto didi kadiyi mu Mifundu. Udi mumanye ki ng’anu bulelela pa muanda eu, kadi udi pamu’apa ne dimanya dialabale dia tshishiki pa malu akamba Yezu ne akenzaye. Bantu miliyo ne miliyo mbapete diambuluisha mu muanda eu pa kutumika ne mukanda wa Le plus grand homme de tous les temps bua kulonga. Kadi, tudi ne bua kutungunuka ne kuvudija dimanya dietu dia Yezu ne bienzedi biende.

10. Mmushindu kayi utudi mua kupeta dimanya disokoka?

¹⁰ Muanda wa se: “biuma bionso bia meji ne dimanya” bidi “bisokoka bimpe bitambe” mu Yezu kawena umvuija se: katuena mua kujingulula meji ne dimanya bia mushindu’eu to. Bishilangane, bidi anu bu tshiina tshia tubanda. Katuena ne bua kuya kulekule mu dikeba pa kudiebeja patudi ne bua kutuadijila bua kumbula nansha. Tukadi bamanye se: dimanya dilelela didi dituadija ne bidi Bible usokolola pa Yezu Kristo. Patudi tuanyisha tshishiki mudimu udi Yezu ukumbaja mu dikumbana dia dilongolola dia Yehowa, tudi tupeta biuma bia meji malelela ne dimanya dijalame. Ke bua tshinyi tudi ne bua kutungunuka ne kuondola, tupatula mabue a mushinga mukole mavule anyi bintu bia mushinga mukole bia ku mpokolo eu kutukavua bamane kumbula.​—Nsumuinu 2:1-5.

11. Mmunyi mutudi mua kuvudija dimanya ne meji bietu ku dieleela meji pa Yezu? (Ubiumvuija pa kutela tshilejilu tshiakafila Yezu pa kuowesha balongi bende mâyi ku makasa, anyi utumika ne bikuabo bilejilu.)

¹¹ Tshilejilu, tudi mua kuikala bamanye se: Yezu wakuowesha bapostolo bende mâyi ku makasa. (Yone 13:1-20) Tukadiku beleele meji pa dilongesha diakafilaye ne mmuenenu wakalejaye anyi? Patuikala tuenza nunku, tudi mua kutuala kumbukila muinshi, tshiuma tshia meji tshiatupetesha mushindu​—eyowa, tshiatusaka—​bua kushintulula mushindu utudi tuangata muanetu kampanda wa balume anyi wa bakaji utu ne ngikadilu wa bumuntu udi kayi utusankisha. Peshi padibo batomekela mudimu kampanda utudi katuyi batambe kunanga, tudi mua kuandamuna mushindu mushilangane kunyima kua tuetu bamane kupeta busunguluji bua tshishiki bua diumvuija dia Yone 13:14, 15. Mushindu awu ke udi dimanya ne meji ne bua kuikala ne buenzeji kutudi. Mbuenzeji kayi buikalabi nabi pa bakuabo patudi tuidikija tshishiki tshilejilu tshia Yezu mu diumvuangana ne dimanya divudija bua Kristo? Pamu’apa tshisumbu tshia mikoko ‘netshidisuikakaje pamue bu mukaba ne tshilamba mu dinanga.’a

Ditanaji didi mua kunyanga diumvuangana

12. Ndimanya kayi ditudi ne bua kudimukila?

¹² Bikala dimanya dijalame diambuluisha ‘disuikangana dietu pamue bu mukaba ne tshilamba mu dinanga,’ kadi mbipeta kayi bidi bipatukila ku tshintu tshidibo “babikila ne dishima dionso ne: ‘dimanya’”? Bishilangane, kudi kupatuka bipeta bibi bu mudi​—matandu, dibenga kumvuangana, ne disesuka ku ditabuja. Nenku, tudi ne bua kutamba kudilama ku dimanya dia dishima dia mushindu’eu, anu bu muakadimuijabo Timote kudi Paulo. (1 Timote 6:20, 21) Paulo wakafunda kabidi ne: “Ndi ngamba nanku, bua muntu nansha umue kavu kunudinga ne miaku ya mafi. Nudimuke bua muntu kavu kunubueja mu bupika ne meji a tshianana a dishima malondeshe ngenyi ya bantu patupu ne malu a panu adi kaayi a Kristo.”​—Bena Kolose 2:4, 8, Mukenji Mulenga.

13, 14. (a) Bua tshinyi bana betu bena Kolosai bavua mu njiwu pa bidi bitangila dimanya? (b) Bua tshinyi bamue lelu’eu badi mua kuela meji se: kabena mu njiwu ya muomumue?

¹³ Bena nkristo bena Kolosai bavua babanyungulule kudi buenzeji bubi bua tshidi kakuyi mpata tshiangatshibua ne dishima dionso bu dimanya. Bantu bavule bavua mu Kolosai ne ku mutumba kuende bavua banange ne muoyo mujima nkindi ya bena Greke. Kuvua kabidi balondi ba bilele bia buena-Yuda bavua basue bua se: bena nkristo balame Mikenji ya Mozese, bu mudi eyi ivua itangila matuku a mafesto ne biakudia bivua biakumbanyine. (Kolosai 2:11, 16, 17) Paulo kavua uluisha bana babu bua kabapetshi dimanya dijalame to, kadi bavua ne bua kutabala bua muntu nansha umue kakuatshibu bu tshintu tshia mupawu, pa kutumika ne mêyi mitabijijanganyi bua kubafikisha ku ditaba mmuenenu wa bantu pa nsombelu ne bienzedi. Udi mua kumvua se: bikala bantu kampanda mu tshisumbu mbalekela ngelelu wa meji ne mapangadika biabu bilombodibua kudi malongesha ne mmuenenu bia mushindu’eu bidi kabiyi mu Mifundu pa bidi bitangila muoyo, bidi mua kunyanga diumvuangana ne dinanga pankatshi pa bena mu tshisumbu.

¹⁴ ‘Eyowa,’ udi mua kuela meji, ‘Ndi mumona njiwu ivua kumpala kua bena Kolosai, kadi tshiena mu njiwu ya kuenzejibua kudi malongesha a bena Greke, bu mudi edi dia anyima ukena ufua peshi edi dia nzambi wa busatu; anyi tshiena mmona njiwu ya kukuatshibua mu buteyi kudi mafesto a bampangano a bitendelelu bia dishima kundi mupanduke.’ Muanda eu mmulenga. Bidi bimpe bua kuikala mutuishibue pa bubandile bua bulelela bua nshindamenu budi mu Mifundu buakasokolodibua ku butuangaji bua Yezu. Kadi, bidi mua kuikala ne: tudi mu njiwu ya kukuatshibua mu buteyi kudi mikuabo nkindi anyi mmuenenu ya bantu idi mivule lelu’eu anyi?

15, 16. Mmuenenu kayi mu nsombelu udi mua kuikala ne buenzeji pa ngelelu wa lungenyi wa muena nkristo?

¹⁵ Umue mmuenenu wa mushindu’eu ukadiku: “Mpindieu mulayi wa dikalaku diende wepi? Ba-tatuetu bakalala mu diikisha, kadi malu adi atungunuka menemene anu bu mutuwu.” (2 Petelo 3:4, The New English Bible) Nyanji ayi idi mua kulejibua mu mêyi makuabo, kadi mmuenenu udi anu wa muomumue. Tshilejilu, bamue badi mua kuela meji nunku, ‘Pangakalonga diambedi bulelela kukadi makumi a bidimu, nshikidilu “ukavu’anu ku mutumba eku.” Kadi, kên’anu ufika to, ne nganyi udi mumanye tshikondo tshialuaye?’ Bidi bilelela bualu muntu nansha umue ki mumanye dîba dialua nshikidilu. Kadi, bambisha mmuenenu wakatudimuija Yezu bua kuikala nende: “Tungunukayi ne kutentekela, nuikale batabale, bualu kanuena bamanye dîba diakumbana tshikondo tshijadika.”​—Mâko 13:32, 33, NW.

¹⁶ Nebikale njiwu mikole bua kuangata mmuenenu wa se: bu mutudi katuyi bamanye dîba dialua nshikidilu, tudi anu ne bua kulongolola nsombelu wa dibodiama dia bintu ne udi wangatshibua bu nsombelu “muakaja”! Mmuenenu awu udi mua kulejibua patoke mu ngelelu wa meji bu eu, ‘Mbinkumbanyine bua kuela biidia biangambuluisha meme (anyi biambuluisha bana banyi) bua kuikala ne mudimu muimpe wa ku mubidi udi mua kumpetesha mfranga mivule yangambuluisha bua kuikala ne nsombelu wa bena kantu ku bianza. Bushuwa, nembuele mu bisangilu bia bena nkristo ne mu bualabale kampanda nendifile mu mudimu wa buambi, kadi kakuena kabingila ka kuenza madikolela anyi kutamba kudibudisha amue masanka to.’​—Matayo 24:38-42.

17, 18. Mmuenenu kayi uvua Yezu ne bapostolo bende batubele bua kuikala nende?

¹⁷ Kadi, kabiena mua kuedibua mpata bua se: Yezu ne bapostolo bende bakatubela bua mu nsombelu wetu tuluijakane pa malu adi atangila dimanyishibua dia lumu luimpe, tuenza tuetu bine madikolela ne tudibudisha amue masanka ku budisuile. Paulo wakafunda ne: “Kadi, bana betu, monayi tshindi ngamba: tshikondo tshidi tshishale ntshipidile. Kubangila ku lelu, aba badi ne bakaji bikale bu badi kabayi nabu . . . ne aba badi basumba bikale bu badi kabayi nabi, ne badi batumika ne bia mu bulongolodi ebu, bikale bu badi kabayi batumika nabi, bualu tshimuenekelu tshia bulongolodi ebu tshidi tshienda tshishintuluka.”​—1 Kolinto 7:29-31, NW; Luka 13:23, 24; Filipoi 3:13-15; Kolosai 1:29; 1 Timote 4:10; 2 Timote 2:4; Buakabuluibua 22:20.

¹⁸ Kayi utubela bua kudifundila kuikala ne nsombelu wa bena kantu ku bianza bu tshipatshila, Paulo ku buenzeji bua spiritu wakafunda ne: “Bualu katuena bavue panuapa ne kantu, ne katuena mua kumukapu ne kantu. Nenku tuetu ne tshiakudia ne tshiakuvuala, tusankile pinapu. . . . Luangana mvita milenga ya ditaba, upete muoyo wa kashidi, uudi mubikidila, ne uuvua mulayile dilaya diebe dilenga dia ditaba kumpala kua bamonyi bavule.”​—1 Timote 6:7-12, Mukenji Mulenga.

19. Mmunyi mudi tshisumbu tshienzejibua padi benamu banyisha nsombelu uvua Yezu mukankamije?

¹⁹ Padi tshisumbu tshikale ne bena nkristo ba tshisumi badi batamba kuditatshisha bua ‘kufila bumanyishi bulenga bua patoke,’ diumvuangana ke tshipeta tshidi tshipatuka. Kabena bangata mmuenenu wa ne: ‘Udi ne bintu bimpe bia bungi bua bidimu bivule; ikisha, udie, unue, wondoloke.’ (Luka 12:19, NW) Bishilangane, badi benza madikolela mu buobumue, badibudisha amue masanka ku budisuile bua kutamba kudifila mu mudimu wabenga kuenzuludibua.​—Fuanyikija ne Filipoi 1:27, 28, NW.

Tudimukile mêyi mitabijijanganyi

20. Mmu mukuabo nsombelu kayi mudi muena nkristo mua kupambuishibua?

²⁰ Bushuwa, kudi mikuabo nsombelu mudi bena nkristo mua ‘kushimibua ne mêyi mitabijijanganyi’ anyi dishimangana dia tshianana didi dipumbisha ‘disuikangana pamue bu mukaba ne tshilamba mu dinanga.’ Filiale wa Société Watch Tower mu Allemagne wakafunda ne: “Tshilejilu kampanda tshidi tshikoka ntema pa muanda eu tshiakajula dielangana ntshia se: bamanyishi ne nansha bakulu bakakuatshisha ngenyi mishilangane pa ngondapilu ivua bana betu batumika nayi.” Badi basakidila ne: “Bu mudibo batumika ne mishindu kabukabu ne bu mudiku babedi bavulavulayi, ebu mbualu budi bujudija milandu ne bikala ngondapilu ayi mikale ya bu-mpaka-manga bua muinshi muinshi, bidi kabidi pamu’apa mua kuikala ne njiwu.”​—Efeso 6:12.

21. Mmunyi mudi muena nkristo mua kujimija padiye ne bua kushindamena lelu’eu?

²¹ Bena nkristo mbasue kushala ne muoyo ne kuikala ne makanda mimpe a mubidi bua kumona mua kutendelela Nzambi. Kadi, mu bulongolodi ebu, tudi tukulumpa ne tusama bua dipanga bupuangane. Pamutu pa kuzangika mianda ya makanda a mubidi, tudi ne bua kushindamena pa tshiyijikiji tshilelela, buetu ne bua bakuabo. (1 Timote 4:16) Kristo ke udi nshindamenu wa dijikija ntatu edi, anu bu muvuaye nshindamenu wa mubelu wa Paulo kudi bena Kolosai. Kadi, kupu muoyo se: Paulo wakaleja mudi bamue mua kulua ne “mêyi mitabijijanganyi” bumbusha ntema yetu kudi Kristo, pamu’apa bayitangija ku njanduilu ya masama, ngondapilu, anyi ndilu kampanda.​—Kolosai 2:2-4.

22. Mmuenenu kayi wa pankatshikatshi utudi ne bua kuikala nende pa njanduilu ne ngondapilu mivule ya masama?

²² Bantu pa buloba bujima mbafimpakaja kudi diendeshila bintu lumu ne bijadiki kampanda bia mianda mibabidila pa ngondapilu ne njanduilu kayi yonso ya masama. Imue ya kudiyi badi batumika nayi pa buloba bujima ne mmianyishibue; mikuabo badi bayijana anyi bayelela meji mabi.b Muntu yonso udi ne budikadidi bua kudisunguila tshienzaye bua makanda ende a mubidi. Kadi aba badi bitaba mubelu wa Paulo udi mu Kolosai 2:4, 8 nebakubibue bua kabashimibu kudi “mêyi mitabijijanganyi” anyi “didingangana dia patupu” bidi bipambula bavule badi bapange ditekemena dia Bukalenge, badi kabatshiyi ne ditekema bua disulakajibua. Nansha bikala muena nkristo mutuishibue se: umue mushindu wa luondapo udi umueneka muimpe buende, kêna ne bua kuwendeshila lumu munkatshi mua bu-wetu bua bena nkristo, bualu udi mua kulua tshiena-bualu tshivudiji tshia dielangana ne matandu. Nenku, udi mua kuleja se: udi mu mushindu mubandile unemeka mushinga wa diumvuangana mu tshisumbu.

23. Bua tshinyi tudi mu mushindu wa pa buawu ne kabingila bua disanka?

²³ Mupostolo Paulo wakazangika se: diumvuangana dia bena nkristo didi nshindamenu bua disanka dilelela. Bushuwa, mu matuku ende, bisumbu bivua bungi bukese pa kubifuanyikija ne bidiku lelu’eu. Kadi wakafundila bena Kolosai ne: “Bushuwa, ndi kule bua mubidi, kadi mu lungenyi ndi munkatshi muenu, nsanka pa kumona [bulongame, NW] buimpe budi kuenu, ne bukole bua ditaba dienu dia Kristo.” (Kolose 2:5, [Mukenji Mulenga]; tangila kabidi Kolosai 3:14.) Mmushindu kayipu udibi bitamba kutuala disanka! Tudi mua kumona tshijadiki tshilelela tshia diumvuangana, bulongame buimpe, ne ditabuja dishindame mu tshietu tshisumbu, ebi bidi bileja mu tshibungi nsombelu udi mu tshisamba tshia Nzambi pa buloba bujima. Nenku, mu tshikondo etshi tshîpi tshidi tshishale mu ndongoluelu udiku mpindieu, yonso wa kutudi ikale ne dipangadika dia “kusuikangana pamue mu diumvuangana ne mu dinanga.”

[Mêyi adi kuinshi]

Uvuaku mubambishe anyi?

◻ Mvese wa tshidimu tshia 1995 bua Bantemu ba Yehowa neikale tshinyi?

◻ Bua tshinyi bena nkristo ba ku Kolosai bavua ne bua kusuikangana pamue bu mukaba ne tshilamba mu dinanga, ne mbua tshinyi tudi petu ne bua kuikala nanku lelu’eu?

◻ Mmuenenu kayi mubi pa nsombelu udi bena nkristo mu mushindu wa pa buawu ne bua kudimukila lelu’eu?

◻ Bua tshinyi bena nkristo badi ne bua kudimuka bua kabashimibu kudi mêyi mitabijijanganyi pa bidi bitangila makanda a mubidi ne njanduilu wa masama?

[Bimfuanyi mu dibeji 17]

Malongolola ebe bua matuku alua mmashindamene pa dikalaku dia Yezu anyi?